Tshitupa tshia 9: Tulombolayi malonga a Bible mimpe
Longesha balongi ba Bible mua kuyisha dîba dionso didi mpunga umueneka
1 Pakajingulula Andele ne Filipo ne: Yezu uvua Masiya uvuabu balaye, kabakadilaminyina bua kuambila bakuabu lumu lua disanka alu nansha. (Yone 1:40-45) Bia muomumue lelu eu, padi balongi ba Bible batuadija kuleja ditabuja diabu mu bidibu balonga, badi bumvua disanka bua kubiambila bakuabu. (2 Kol. 4:13) Mmunyi mutudi mua kubakankamija bua kuyishabu padi mpunga umueneka ne kubalongesha bua kuyishabu nanku bimpe menemene?
2 Udi pamuapa anu mua kuebeja mulongi wa Bible ni ukadiku muyukile ne bakuabu pa malu akadiye mulonge mu Bible. Pamuapa udi mua kuikala ne balunda ne bena mu dîku diabu badiye mua kubikila bua kuluabu kumona pabu mutuye ulonga Bible. Muebeje ni kudi bena mudimu nende, balongi nende, peshi bamanyangana nabu bakuabu badi banange kumvua lumu luimpe. Mushindu eu ke udiye mua kutuadija kuyisha. Muambuluishe bua ikale ne busunguluji ne kanemu ne bukalanga padiye uyukila ne bakuabu pa malu adi atangila Yehowa Nzambi ne bidiye mulongolole bua kuenza.—Kolos. 4:6; 2 Tim. 2:24, 25.
3 Bayishe malu adibu bitabuje: Mbia mushinga mukole bua kulongesha balongi ba Bible bua kuakulabu ne Bible padibu bayisha malu avuabu bitabuje. Patudi tufika imue miaba mu dilonga dietu tudi mua kuebeja mulongi ne: “Mmunyi muudi mua kuenza mudimu ne Bible bua kumvuija bena mu dîku dienu dilongesha edi?” anyi ne: “Mmvese kayi wa mu Bible uudi mua kujadikila nende nansha mulunda webe kampanda bualu ebu?” Teleja mudiye wandamuna, pashishe umuleje mua kujalamijaye dilongesha diende mu Bible. (2 Tim. 2:15) Paudi wenza nunku, neulongolole mulongi bua kumonaye mua kuyisha dîba dionso didi mpunga umueneka ne mua kuyisha pamue ne tshisumbu padiye ukumbaja malu malomba.
4 Mbimpe kulongesha balongi ba Bible mua kutantamenabu imue ntatu. (Mat. 10:36; Luka 8:13; 2 Tim. 3:12) Padi bantu bakuabu bajula nkonko anyi bakula mudibu bamone bua Bantemu ba Yehowa, au mpunga udi mua kufikisha balongi ba Bible ku dibayisha. Broshire wa Bantemu ba Yehowa—Mbanganyi? Mmalu kayi adibu balongesha? udi mua kubambuluisha bua bikale ‘badilongolole bua kukudimuna dîyi’ kudi badi babela nkonko. (1 Pet. 3:15) Broshire eu udi ne malu majalame adi bantu bapiabapia mua kuambuluisha nawu balunda babu ne bena mêku abu badi ne meji mimpe mu nkonko yabu bua kumvuabu malongesha etu a mu Bible ne midimu yetu.