Longa mua kuelesha bantu meji
1. Mmuyuki kayi wa mu Bible utuakonkonona, ne mbua tshinyi?
1 Muyuki uvua Paulo muenze mu nsunagoga wa mu Antiokia wa Pisidia udi mu Bienzedi 13:16-41 udi utupesha tshilejilu tshimpe pa mushindu wa kuelesha bantu meji. Paulo wakatangila nsombelu wa bateleji bende ne ngelelu wabu wa meji e kubayishaye lumu luimpe bilondeshile malu aa. Tukonkononayi muyuki eu ne tumone mushindu utudi mua kumuidikija patudi tuyisha.
2. Ntshinyi tshitudi tulongela ku mushindu uvua Paulo mutuadije muyuki wende?
2 Keba malu anudi nuenu bonso nuitaba: Nansha muvua malu avua Paulo uyisha mimanyine pa mudimu uvua nawu Yezu mu dikumbaja disua dia Nzambi, kakatuadija muyuki wende diakamue ne bualu ebu to. Kadi wakakula bua malu a bena Yuda avuaye yeye muine ne bena Yuda ba bungi bavua muaba au bamanye bimpe ne bitabuja kabidi. (Bien. 13:16-22) Mu mushindu wa muomumue, netulenge mitshima ya bantu bimpe tuetu banji kukeba malu atudi tuitaba ne adibu bitaba pabu. Ebi bidi bitulomba kubela nkonko ne budimu bua kubasaka ku diakula ne kuteleja bidibu bamba bua kujingulula malu adi ne mushinga buabu buobu.
3. Ntshinyi tshivua tshipangishe bateleji ba Paulo bua kuitaba ne: Yezu ke Masiya uvuabu balaye?
3 Paulo wakabavuluija muvua Nzambi mulaye bua kutuma Musungidi uvua ne bua kupatukila mu ndelanganyi ya Davidi. Pabi, bena Yuda ba bungi bavua bindile bobu tshilobo tshia basalayi tshivua ne bua kulua kubumusha ku bupika bua bena Lomo ne kuteka tshisamba tshiabu ku mutu kua bikuabu. Bavua bamanye bimpe ne: bamfumu ba bitendelelu bia bena Yuda ba mu Yelushalema bakabenga Yezu, kumufilabu mu bianza bia bena Lomo ne kumushipabu. Nunku, mmunyi muvua Paulo mua kufika ku dituisha bantu aba ne: Yezu eu ke uvua Masiya uvuabu balaye?
4. Mmushindu kayi uvua Paulo mueleshe bena Yuda meji bimpe?
4 Akaja ndongeshilu webe: Bu muvua Paulo mumanye meji a bateleji bende, wakenza mudimu ne Bible bua kubelesha meji pa malu avuabu bitaba ne muoyo mujima. Tshilejilu, mu diakula diende, wakaleja muvua Yezu muledibue mu ndelanganyi ya Davidi ne muvua Yone Mubatiji (uvua bantu bamona bu muprofete wa Nzambi) mumanyishe dilua diende. (Bien. 13:23-25) Paulo wakalua kuleja patoke ne: pavua bamfumu ba bitendelelu babenge Yezu ne bamufundile tshibawu tshia lufu, ‘bakakumbaja mêyi a baprofete.’ (Bien. 13:26-28) Pashishe, Paulo wakaleja ne: kuvua bantu bavua badimuene ne abu abidi muvua Yezu mubishibue ku lufu; pashishe kukokaye ntema yabu ku mvese ivuabu bamanye bimpe ivua mikumbane mu dibishibua diende ku lufu edi.—Bien. 13:29-37.
5. (a) Mmunyi muvua Paulo muakaje mushindu wende wa kuyisha pavuaye uyukila ne bena Greke? (b) Mmunyi mutudi mua kuidikija Paulo patudi tuyisha mu teritware wetu?
5 Musangu mukuabu pavua Paulo wakula ne bena Greke mu Aleopago wa ku Atena, wakatuadija muyuki mushindu mukuabu. (Bien. 17:22-31) Nansha nanku, wakayisha anu mukenji umue umue au, kadi mu nsombelu eyi yonso ibidi, wakapatula bipeta bilenga. (Bien. 13:42, 43; 17:34) Bia muomumue lelu’eu, netuenze mudimu wetu bimpe bu tuetu mua kukeba malu atudi tuetu ne bateleji betu tuitaba, ne kutuadija muyuki bilondeshile nsombelu ne meji abu.