Leja dinanga pa kutabalela bakuabu
1 Mamu mukuabu uvua umona Bantemu ba Yehowa bu bantu babi udi wamba ne: “Tshiena mvuluka bimpe malu atuvua bayukile musangu wa kumpala to, kadi tshindi mumanye ntshia se: uvua ne budipuekeshi ne musangelu ne bulenga. Biakandenga ku muoyo bikole.” Mêyi aa adi aleja patoke mudibi ne mushinga bua kutabalela bantu batudi tuyisha ne muoyo mujima.—Filip. 2:4.
2 Dinanga didi dienzelangana malu ne bulenga: Tudi mua kuleja mutudi banange bakuabu patudi tubenzela malu ne bulenga. (1 Kol. 13:4) Muntu muena bulenga udi utabalela majinga a bakuabu ne ukeba mushindu wa kubambuluisha. Bushuwa, kuyisha nkuleja bakuabu bulenga. Kadi kudi kabidi mushindu mutambe buimpe wa kuleja bakuabu bulenga. Netuleje mutudi babanange patudi tubangata bu balunda, tubanemeka, tubateleja ne patudi tuyukila nabu bimpe.—Mat. 8:2, 3.
3 Dinanga dietu bua bantu neditusake bua kubambuluisha mu malu kampanda. Tshilejilu, pavua muanetu wa balume uvua mpanda-njila uyisha ku nzubu ne ku nzubu, mukaji mukamba mukuabu ukavua mukulakaje wakabenga kuyukila nende pakamanyaye ne: uvua Ntemu. Mamu eu wakamba ne: uvua pa tshibandilu mu tshikuku ukeba bua kushintulula ampule pavua muanetu eu mukokole ku tshiibi. Ke muanetu eu kumuambila ne: “Ki mbimpe wewe kuenza mudimu eu nkayebe to.” Nanku mamu au kumuambila bua abuele mu nzubu. Kumushintuluilaye ampule ne pashishe kutungunukaye ne njila wende. Matuku makese pashishe, muana wa balume wa mamu eu wakalua bua kumushila biakudia, ke mamu kumulondela tshivua tshienzeke. Muanende wakakema bikole, ke kuyaye wenda ukeba muanetu eu bua kumuela tuasakidila. Bakayukila bimpe, ne kumufikishabi ku ditaba bua kulonga Bible.
4 Patudi ne bulenga, tudi tuleja dinanga didi nadi Yehowa bua bantu ne tupesha mukenji utudi tuyisha lumu. Nunku, mu malu onso, ‘tudimanyishayi bu bena mudimu ba Nzambi, [pa kuikala] ne luse’ anyi bulenga.—2 Kol. 6:4, 6.