Tutungunukayi ne kukuatshisha mudimu wa diasa dia Nzubu ya Bukalenge
1. Mmunyi mudi Yehowa mubeneshe mudimu wa diasa dia Nzubu ya Bukalenge?
1 Pakatuadija mudimu wa diasa dia Nzubu ya Bukalenge mu 1999, bantu ba bungi bavua belakana. Bavua badiebeja ne: “Mmunyi mutuakokesha bua kuibaka nkama ne nkama ya Nzubu ya Bukalenge bu muvuabi bilaya?” Kadi anji tangila anu tshidi tshienzeke bua diambuluisha dia Yehowa munkatshi mua bidimu bitanu biashadi ebi. Too ne mu ngondo muisatu wa 2005, mbase Nzubu ya Bukalenge 238 mu teritware wa filiale wetu! Bisumbu 787 bidi ne bamanyishi bapite pa 65 000 badi benzela bisangilu mu Nzubu eyi. Tudi tuela bana betu bonso bavua badifile ku budisuile bua kuibaka Nzubu ya Bukalenge mipiamipia tuasakidila wa bungi katuyi tupua muoyo aba bavua bafile kabu kakese kavuabu naku bua kuukuatshisha. Bible udi uleja ne: Yehowa udi ubenesha bonso badi bafila bintu bua kukuatshisha midimu ya Bukalenge.—2 Kol. 9:6, 7.
2. Bua tshinyi nansha bisumbu bikadi bipete Nzubu wa Bukalenge bidi ne bua kutungunuka pabi ne kufila mapa bua kukuatshisha mudimu eu?
2 Bantu bonso badi mua kuambuluisha: Bikale tshisumbu tshienu tshikadi ne Nzubu wa Bukalenge mupiamupia, abi mmumue ne: kuenaku mua kukuatshisha kabidi mudimu eu anyi? Tòo, mbindile dikuatshisha diebe ne muoyo kulu kulu. Bua kuasa Nzubu wa Bukalenge umuepele, badi batula makuta adi bisumbu bia bungi bifila. Patudi tukuatshisha mudimu eu, tudi tuleja mutudi banange bena Kristo netu. (Gal. 6:10) Bua mudimu wa diasa dia Nzubu ya Bukalenge kutungunukawu bimpe, badi dijinga ne makuta makumbane bua kusumba bintu bidi bikengela bua mudimu utshidi mushale. Nuenu bafile mapa ne muoyo wenu mujima, neambuluishe bisumbu bivule bua kupetabi pabi muaba muimpe wa kutendelela Yehowa udi umutumbisha.
3. Mmunyi mudi bantu badi kabayi babanji mua kutua pabu malu a Bukalenge nyama ku mikolo?
3 Bamue mbamone bimpe bua kutumikila mubelu uvua mupostolo Paulo mupeshe bena Kristo ba mu Kolinto. Pa kumona dijinga dikole divuaku dia makuta, wakabalomba bua kuikala ne tshibidilu tshia kudianjila kuteka kantu ku luseke. (1 Kol. 16:1, 2) Kadi Paulo wakalua kufunda pashishe ne: mapa aa kaavua ne bua kulua bujitu kudi bena Kristo to, bavua ne bua kuafila bilondeshile ‘muvua muntu nabi.’ (2 Kol. 8:12-15) Nansha muena Kristo udi ne bintu anu bikese, Yehowa udi wangata dipa diende ne mushinga.—Luka 21:1-4.
4. Ntshinyi tshiakenza bantu ba Nzambi mu matuku a Mose bua kukumbaja dijinga divuaku, ne mmunyi mutudi mua kubidikija?
4 Bible udi wamba bua bena Isalele ba mu matuku a Mose pavuaku dijinga dinene dia kuibaka tabernakle ne: ‘Muntu yonso wakadi mutshima wende umuenzeja ne wakadi tshipapayi wakalua ne kupa kua Yehowa bualu bua mudimu wa nzubu wa tshitendelelu ne bintu bionso biakadi mu tshitendelelu ne bilulu bia tshijila. Balume ne bakaji bakalua ba bungi bakadi bitabuja mu mitshima yabu, bakalua ne tukanu tua ku matshi ne tukanu tua ku minu ne nkanu ya ku maboko ne bintu bionso bia or; muntu ne muntu wakalua ne kupa kua or kudi Yehowa.’ (Ekes. 35:21-22) Tuikalayiku petu ne lungenyi lua muomumue elu!
5. Bua tshinyi mbia mushinga bua kulama Nzubu wa Bukalenge bimpe menemene?
5 Dilongolola ne mankenda: Nzubu wa Bukalenge mmuaba udi malu a ntendelelu mulelela enzekela. Kulama Nzubu wa Bukalenge ne mankenda ne kuikala kumulongolola bimpe kudi kutumbishisha Nzambi wetu. Bu mudi Yehowa muikale Nzambi wa tshijila, bidi bikengela kulama Nzubu wa Bukalenge ne mankenda bua ikale tshilejilu tshimpe. (1 Pet. 1:16) Nansha mudi nzubu mivule yenda inyanguka ku kakese ku kakese mu teritware wetu bua dibenga kuyilongolola, tuetu tudi ne bua kulama Nzubu ya Bukalenge bimpe bua kubenga kupendesha ntendelelu wa Yehowa. (2 Kol. 6:3, 4) Kabidi, katulekedi Nzubu wetu wa Bukalenge wenda unyanguka kamutshiyi mushindu wa kumulongolola nansha.
6. Mmunyi mutudi mua kuleja ne: tudi basue kulama Nzubu wetu wa Bukalenge bimpe?
6 Batu bakonkonona Nzubu ya Bukalenge ku tshidimu tshionso. Pashishe mutangidi wa tshijengu utu pende utumina biro luapolo bua kubimanyisha mushindu udi Nzubu eyi. Nansha nanku, dilama dia Nzubu wa Bukalenge bimpe mbujitu bua muntu yonso. Bakulu badi ne bua kuenza programe wa mankenda a nzubu eyi ne wa dilongolola miaba idi ikengedibua misangu yonso. Bantu badi banange Yehowa ne basue kukuatshisha ntendelelu wende badi bafila bintu biabu bua kulama Nzubu wa Bukalenge bua kanyanguki to.
7. Ntshinyi tshidi bisumbu bidi ne bamanyishi anu bakese bidibu kabayi bibakile Nzubu ya Bukalenge ne bua kuenza?
7 Bisumbu bidi ne bamanyishi anu bakese menemene ki mbabiele mu programe wa kubibakila Nzubu ya Bukalenge to. Tshidibi, Nzubu yabi ya Bukalenge nansha yoyi mienza ne bintu bidi binyanguka lukasa, badi ne bua kuyilama bimpe ne kuikala kuyilongolola. Bikala bisumbu bia mushindu eu bitekeshe makuta ku biro, bidi mua kualomba bua kuenza nawu midimu eyi. Imue misangu, bisumbu bikese bia nunku bitu bienzela bisangilu biabi mu nzubu ya bana betu. Pikalabi nanku, tshisumbu ke tshidi ne bua kufila makuta a kuenza nawu mudimu wa kulongolola muaba eu.
8. Ntshinyi tshidi bisumbu bikadibu bibakile Nzubu ya Bukalenge ne bua kulomba bua benze ne makuta avuabi bitume ku biro?
8 Tshia kuenza ne makuta avua matekesha ku biro: Bimue bisumbu bikadibu bashile Nzubu ya Bukalenge bivua bitume makuta ku biro kukadi bidimu bivule. Tshipatshila tshia makuta aa tshivua tshia kubashilabu Nzubu wa Bukalenge. Anu bu muvua mukanda wetu wa dia 1 ngondo wa dikumi ne muibidi 1999 mumvuije, tutu dijinga ne dianyisha dienu bua kubueja makuta aa mu Tshibutshilu tshia makuta a diasa Nzubu ya Bukalenge. Bualu ebu budi ne mushinga bualu bintu bivuabu banuashile nabi Nzubu wenu wa Bukalenge bavua babisumbe ne makuta a mu Tshibutshilu tshia diasa dia Nzubu ya Bukalenge. Mushinga wa bintu ebi uvua mupite kule ne kule makuta anuvua batuma ku biro. Ke bua tshinyi bavua balombe bakulu bua bangate dipangadika pa bungi bua makuta a kuikalabu batumina biro ne pashishe baleje tshisumbu bualu ebu. Pashishe bakulu badi ne bua kufundila biro mukanda muipi bua kubimanyisha ne: dipangadika divua diangatshibue bua kubueja makuta atuvua batume mu Tshibutshilu tshia diasa dia Nzubu ya Bukalenge.
9. Mbualu kayi budi tshisumbu ne bua kuenza bikalatshi katshiyi tshianji kuenza muvuabu bambe bua makuta a diasa dia Nzubu ya Bukalenge?
9 Kukadi bidimu bivule bidi bisumbu bikuabu kabiyi bianji kutumanyisha bua kubueja makuta aa mu Tshibutshilu tshia diasa dia Nzubu ya Bukalenge nansha. Tudi tulomba bakulu bua batangile bimpe bua kumanya ni bidi mua kuikala nanku. Bikalabi kabiyi nanku, bakulu badi ne bua kuangata dipangadika dia bualu ebu, kudimanyisha tshisumbu, pashishe kutufundila mukanda bua tuangate makuta aa bua kuambuluisha nawu bikuabu bisumbu. Benze bualu ebu mu Tshisangilu tshia Mudimu tshiakonkononabu tshisakidila etshi.
10. Bua tshinyi mbimpe kubueja makuta atuvua batume ku biro mu Tshibutshilu tshia diasa dia Nzubu ya Bukalenge?
10 Bimue bisumbu bidi mua kujinga bua kuangata makuta aa bua kudiundisha nawu Nzubu yabi ya Bukalenge idibu babashile. Pabi, kudi bisumbu bipite bungi bidi kabiyi bianji kupeta Nzubu wa Bukalenge muimpe nansha. Kadi kanuenaku numona ne: bu muvua makuta a kunuibakila nawu Nzubu wenu wa Bukalenge mafumine mu Tshibutshilu tshia diasa dia Nzubu ya Bukalenge, mbimpe kupingaja makuta aa bua bakuabu bapetaku pabu diakalenga edi anyi?—1 Yone 3:17.
11. Mmalu kayi adi akengela kuenza kumpala kua kusakidila bintu bikuabu bu mudi nzembu anyi bisanji bia mêyi mu Nzubu wa Bukalenge?
11 Bintu bikuabu bia kusakidila: Luapolo ludi luleja ne: bana betu ba bungi kabatu babuela bisangilu bia munkatshi mua lumingu to, bualu bakuabu badi ku mudimu, bakuabu mu tulasa. Nunku, bikengela kuela nzembu ku Nzubu wa Bukalenge bua kumona mua kuenza bisangilu ebi butuku bua bena mu tshisumbu bonso babuelamu. Pashishe, nebikale bimpe bua tshisumbu tshidi ne bantu ba bungi kuikalatshi ne bisanji bia mêyi. Bisumbu bidi ne bua kudibutshila makuta makumbane ne kualama bua kusumba anyi kuenza nawu midimu ya nunku. Kadi mbimpe kulomba dianyisha dia biro kumpala kua kusakidila bintu bia mushindu eu, kabidi nebiambuluishe bua kuepuka ditula dia makuta tshianana tshianana. Nansha nanku, tshisumbu netshitungunuke anu ne kutuma makuta atshi pa tshibidilu bua kukuatshisha mudimu wa diasa dia Nzubu ya Bukalenge.—Filip. 2:4.
12. Ntshinyi tshidi tshituambuluishe bua kuibaka nkama ne nkama ya Nzubu ya Bukalenge?
12 Tudi badimuene ne etu abidi mudi mabenesha a Yehowa ne mapa etu mafile ne muoyo mujima mambuluishe bua kuasa nkama ne nkama ya Nzubu ya Bukalenge pa buloba bujima. Yehowa atungunuke ne kupesha bantu bende nyuma wende bua abambuluishe bua ‘benzele bakuabu bimpe, bikale ne bubanji bua bienzedi bimpe; badilongolole bua kupangana bintu; basue kuikala ne bakuabu luse.’ (1 Tim. 6:18.) Yehowa atungunuke ne kubenesha bionso binudi nuenza bua kutua malu a Bukalenge nyama ku mikolo ku mudimu wenu mukole wa diasa dia Nzubu ya Bukalenge, pa kufila mapa ne muoyo mujima ne pa kuenza mudimu wa buambi ne tshisumi.