Mpungilu wa Distrike wa Bantemu ba Yehowa wa “Dipikudibua dikadi pabuipi” bua 2006
1. Mmunyi muvua basadidi ba Nzambi ba kale baleja dianyisha diabu bua ntendelelu mulelela, ne ndiakalenga kayi dia muomumue ditudi nadi lelu eu?
1 Hezikiya mukalenge wa Yuda wakatuma milopo yende ne mikanda ku bianza bua kubikila bantu bua badisangishe bonso mu Yelushalema. (2 Kul. 30:6, 13) Mushindu uvua bantu banyishe anyi babenge dibikila edi uvua uleja mmuenenu uvuabu nende bua ntendelelu mulelela. (2 Kul. 30:10-12) Mu ngondo idi kumpala eku, basadidi ba Yehowa ba matuku etu aa nebikale pabu mua kuleja dianyisha diabu dia muoyo mujima bua diakalenga dia pa buadi dia kudisangisha bua kutendelela Yehowa. Mbatumine tshisumbu tshienu mukanda wa dinubikila nawu bua kubuela mu Mpungilu wa Distrike wa “Dipikudibua dikadi pabuipi.” Dibikila edi neuditabe anyi neudibenge?
2. Ntshinyi tshitudi mua kuenza ku mpindieu bua mpungilu kutuambuluishaye menemene?
2 Tuadija kudilongolola ku mpindieu: Bua programe eu wa mu nyuma udibu balongolole ne dinanga kutuambuluishaye menemene, tudi ne bua kuikalaku mu matuku onso a mpungilu. Udi ne bua kutuadija kulongolola malu ku mpindieu ne meji bua kubuela ne bena dîku diebe mu mpungilu matuku onso asatu. (Nsu. 21:5) Mu malu audi mua kudilongoluela mudi: dilomba mfumuebe wa mudimu dikisha bua matuku au, kuyukila ne muena dibaka nebe udi kayi Ntemu ne kuambuluisha balongi ba Bible bua babuele dituku dionso mu mpungilu. Kuindidi bua kulongolola malu aa a mushinga mu minite ya ndekelu to. Kadi, udi ne bua kuleja Yehowa malu aa mu disambila, mutuishibue ne: ‘Yeye neenze malu ende.’—Mus. 37:5.
3. Bua tshinyi tudi ne bua kulonda malu adibu balongolole bua miaba ituikala?
3 Bulongolodi bua Yehowa butu buditatshisha bikole bua kuikale bintu bidi bikengedibua muaba wonso udi mpungilu wenzekela. Dianyisha ditudi nadi bua didifila dia bana betu batu benza mudimu mukole bua kulongolola miaba eyi, diangata badi balua kubuela netu mu mpungilu ne mushinga ne kanemu katudi naku kudi bulongolodi bua Nzambi bidi ne bua kutusaka bua kulonda bimpe menemene mibelu idi mu tshiena-bualu etshi.—1 Kol. 13:5; 1 Tes. 5:12, 13; Eb. 13:17.
4-6. (a) Mmalu kayi a mushinga atudi ne bua kuvuluka patudi dijinga ne muaba wa kulala, ne mbua tshinyi? (b) Mmalu kayi adibu ne bua kulongolola bikalabu mua kuladika bana betu mu Nzubu wa Bukalenge? (c) Ngamue malu kayi atudi ne bua kukonkonona bua tuetu kumona mua kubuela mu Mpungilu wa Distrike? (Tangila kazubu kadi mu dibeji 4.)
4 Miaba ya kulala: Pa tshibidilu, miaba ya kulala mu tshimenga tshidi mpungilu wenzekela itu ku nzubu kua bena Kristo netu, ku Nzubu wa Bukalenge anyi kua balela betu. Kunyima kua Tshisangilu tshia Mudimu tshinuakonkonona tshisakidila etshi, nebalamike dibeji didi dileja miaba yonso yenzekela mpungilu ku tshibasa tshia mamanyisha. Tudi tunulomba bua kuela meji bimpe bua kumona mua kusungula muaba unuikala mua kubuela mu mpungilu wa tshidimu tshia 2006.
5 Wewe musue kusombela kua muena Kristo nebe anyi ku Nzubu wa Bukalenge, sekretere wa tshisumbu tshienu afunde mêna a bamanyishi bonso badi basue kusombela miaba eyi bua kuatumina Tshibambalu tshia miaba ya kulala tshia muaba wenzekela mpungilu kumpala kua dîba. Sekretere afunde dîna diebe, aleje ni udi mulume anyi mukaji, bidimu biebe ne bena mu dîku dienu banudi nabu. Kuenza nunku nekupeteshe bena mu Tshibambalu tshia miaba ya kulala dîba dikumbane dia kulongoluela bantu bonso miaba bimpe. Komite wa Mudimu wa Tshisumbu neakonkonone bangabanga ngikadilu ya bamanyishi bonso badi balomba kaba ka kulala kumpala kua kutuminabu bena mu Tshibambalu tshia miaba ya kulala mabeji adi ne mêna abu. Bobu bamane kutupesha muaba wa kulala, ki mbimpe bua tuetu kushintulula kabidi muaba bua kuya kusombela kua muanetu mukuabu anyi kua mulunda wetu nansha. Kuenza nanku kudi mua kutatshisha bena mu Tshibambalu tshia miaba ya kulala. Kadi bikala muntu ujinga kusombela kua mulela wende udi kayi Ntemu mu tshikondo tshia mpungilu, kêna ne bua kufila dîna diende bua kudituminabu bena mu Tshibambalu tshia miaba ya kulala to.
6 Dilala ku Nzubu wa Bukalenge: Tudi tunutumina kabidi mu tshisakidila emu malu adi akengela kulonda bua kuladika bantu ku Nzubu wa Bukalenge. Komite wa Mpungilu wa Distrike neateke mukulu kampanda bua kutangila muenzeka malu aa. Neikale ne muntu wamuambuluisha, nangananga mukulu nende anyi musadidi wa mudimu udi mukumbane. Nebakosolole Nzubu wa Bukalenge mu bitupa bibidi. Tshitupa tshimue bua bana betu ba bakaji ne bana babu batekete ne bansongakaji. Tshitupa tshikuabu netshikale bana betu ba balume ne bansongalume. Nzubu wa Bukalenge neikale anu bua kulala patupu. Mu munya padi bantu bonso mu mpungilu, bua kuepuka buivi nudi mua kulongolola bua bantu bikale bashintakanangana bua kulama bintu ku Nzubu wa Bukalenge. Nusungule bana betu ba balume ba tshikadilu tshimpe badi bakole mu nyuma bua kuenzabu mudimu eu. Ki mbianyishibue bua kulambila munda mua Nzubu wa Bukalenge to. Nudi mua kuasa katanda kakese mu lupangu bua kulambilamu anu mu matuku a mpungilu au. Padi mpungilu ujika, nupule katanda aka. Nushiye Nzubu wa Bukalenge ne lupangu ludiye ne mankenda ne bulongame. Nutabalele bua tshintu nansha tshimue katshinyanguki to. Bantu balala mu Nzubu wa Bukalenge benze muabu muonso bua kulejangana ngikadilu ya buena Kristo bulelela ne bayileje bena mutumba kabidi.
7. Mmunyi mudibu mua kuambuluisha aba badi ne majinga a pa buawu?
7 Majinga a pa buawu: Nsumuinu 3:27 udi wamba ne: ‘Kupadi bantu tshintu tshimpe, badi bakumbane mua kuikala natshi, pawikala ne bukole bua kubapatshi.’ Mmunyi muudi mua kuenzela bakuabu malu mimpe bua kubuelabu mu mpungilu? Bana betu bakulakaje, balema, aba badi mu mudimu wa ku dîba ne ku dîba ne bantu bakuabu badi pamuapa dijinga ne mushindu wa kufuta njila anyi kupeta muaba wa kulala. Balela babu ke badi ne bujitu bua kubambuluisha bangabanga. (1 Tim. 5:4) Kadi bobu kabayi mua kukokesha, bena Kristo badi mua kuambuluisha bawetu aba. (Gal. 6:10) Batangidi ba dilonga dia mukanda badi ne bua kutangila mu tusumbu tuabu bana betu badi ne majinga a pa buawu bua kumona mua kudilongolola kumpala kua mpungilu.
8. Bua tshinyi tudi ne bua kubuela anu mu mpungilu udibu batufundile?
8 Dibuela mu mpungilu mukuabu: Bua kulongololabu bungi bukumbane bua miaba ya kusomba, bua mikanda, bua nzubu ya kulala, ne bikuabu kabidi, tudi tunukankamija bua kubuela mu mpungilu udibu batume tshisumbu tshienu. Kadi koku malu kampanda adi mua kukupangisha bua kubuela mu mpungilu udibu batume tshisumbu tshienu, udi mua kuya kubuela mu mukuabu
9. Mmushindu kayi utuavudija disanka bua mpungilu udi kumpala eku?
9 Bena budisuile: Bushuwa, disanka dia bungi nedikale kudi bantu bonso balua mu mpungilu bua kudia biakudia bia mu nyuma ne kupeta mushindu wa kukolesha buena muntu buabu. Kadi disanka dietu nedipite kuvula patuadifila ne budisuile bua kuenza midimu bua mpungilu wetu kupitaye bimpe. (Bien. 20:35) Komite ya Mpungilu ya muaba unudi ikadi pa kulomba bana betu bakuabu bua kuambuluisha mu mudimu eu. Neudifile pebe anyi?—Mus. 110:3.
10. Utu wangata mpungilu wa distrike ne mushinga kayi, ne ndipangadika kayi diudi ne bua kuangata?
10 Muana wa balume wa bidimu bitanu uvua mubuele mu mpungilu wa distrike wakamba ne: “Mpungilu wa distrike ntshitupa tshia ntendelelu wa Yehowa tshintu munange bikole.” Mêyi aa mamba ne muoyo mujima adi atuambuluisha tuetu bonso bua kuelangana meji a mushindu ututu tuanyisha dibuela mu mpungilu wetu wa distrike wa ku tshidimu tshionso. Bidi anu bu muakamba mufundi wa Misambu ne: ‘Dituku dimue mu biendedi bia mu tshitendelelu tshiebe didi dipita matuku tshinunu a kukuabu buimpe.’ (Mus. 84:10) Davidi uvua uleja mu musambu dijinga diende dia ‘kushikama mu nzubu wa Yehowa matuku onso a muoyo wende, bua kumona buimpe bua Yehowa ne bua kuelangana meji a malu a mu ntempelo wende.’ (Mus. 27:4) Bivua bisankisha Davidi bikole bua kudisangisha ne batendeledi bakuabu ba Yehowa. Tudi petu mua kuanyisha ntendelelu mulelela bu Davidi pa kuikalaku matuku onso asatu a Mpungilu wa Distrike wa “Dipikudibua dikadi pabuipi.”
[Kazubu mu dibeji 3]
Programe
Ditanu ne Disambombo
9:30 dinda - 5:05 dilolo
Dia lumingu
9:30 dinda - 4:10 dilolo
[Kazubu mu dibeji 4]
Malu a kutangila bua kubuela mu Mpungilu wa Distrike
1. Biwikala ne bua kuenza luendu lule bua kubuela mu mpungilu, tuadija kulama mfranga ya kufuta njila ne ya biakudia buebe wewe ne bua bena dîku diebe dijima.
2. Kupu muoyo bua kuya ne mapa ebe a budisuile bua kukuatshisha nawu malu a mpungilu. ‘Muntu kamueneki ku mêsu kua Yehowa bianza bitupu’ kadi ‘atumbishe Yehowa ne biuma biende.’—Dut. 16:16; Nsu. 3:9.
3. Mu mpungilu, tudi tutumbisha dîna dia Yehowa ku tshikadilu tshietu tshimpe ne ku mankenda ne mvuadilu wetu muimpe utudi nende.—1 Kol. 10:31.
4. Wikale mudiakaje bua kueleshangana diboko ne bakididianganyi ne kabidi bana betu bonso badi ne bujitu bua kufila bulongame. Udi mua kukuatshila miaba anu bua bena mu dîku dienu anyi bua bantu banudi bende nabu.
5. Bua wewe kuteleja bimpe tshitupa tshia mu mapingaja, udie bintu bikese mu dikisha dia midi. Biakudia bia bungi anyi bidi mua kukukutshisha bikole mbifuane kukufikisha ku dilala tulu.—Luka 8:18.
6. Mankenda adi atumbisha Yehowa. Ku ndekelu kua tshitupa tshionso tshia mpungilu, muntu yonso udi mua kuangulaku mabeji ne bintu bikuabu bua kubiela muaba udi mulongolola bua kubimansha bua kushiya muaba wa mpungilu ne mankenda.—1 Pet. 1:15, 16.