Mukanda wa Bible ulongesha ke mukanda wetu munene wa kulongesha nawu bantu Bible
1 Tuvua basanke bikole pakatumanyishabu dipatuka dia mukanda wa Bible utu ulongesha tshinyi menemene? mu Mpungilu wa Distrike wa “Tutumikilayi Nzambi.” Bantu bakasanka kabidi bikole pakapetabu mukanda eu. Kadi mmushindu kayi utuenza nawu mudimu? Mukanda eu ke utudi ne bua kulongesha nawu bantu Bible. Nansha mutuawufila bua musangu wa kumpala mu buambi mu ngondo muisatu, tudi tulomba bamanyishi bonso bua balombole nawu malonga a Bible kutuadija ku mpindieu.
2 Malonga etu a Bible: Bamanyishi badi balombola malonga a Bible ne mukanda wa Dimanya anyi broshire wa Utulomba badi ne bua kuela meji bimpe bua mushindu ne dîba didibu mua kutuadija kulonga Bible ne muntu ne mukanda mupiamupia eu. Pikala dilonga dituadije anu matuku abidi aa, udi mua kudibangulula mu mukanda mupiamupia eu. Binuikala nukadi balonge nshapita ya bungi mu mukanda wa Dimanya, nudi mua kutungunuka mu nshapita udi upetangana ne unuvua au mu mukanda wa Bible ulongesha. Binuikala nukadi ku ndekelu kua mukanda wa Dimanya, nudi mua kuujikija.
3 Kakuyi mpata, tuetu bonso tudi bamanye bantu badi mukanda wa Bible ulongesha mua kuambuluisha. Bua tshinyi kubenga kuambilaku muntu yonso bua nulonge nende mukanda eu udi uleja bulelela bua mu Bible mu mushindu muimpe? Tshilejilu, bantu bavua balonge broshire wa Utulomba anyi mukanda wa Dimanya kadi kabayi bafike ku ditambula, tudi mua kutuadijilula kulonga nabu mu wa Bible ulongesha. Baledi badi mua kulongesha bana babu ne mukanda eu bua bamanye bimpe tshidi disua dia Nzambi.—Kolos. 1:9, 10.
4 Kulonga mukanda muibidi: Kudi mukanda mukuabu utudi mua kulonga ne muntu kunyima kua tuetu bamane kujikija nende mukanda wa Bible utu ulongesha tshinyi menemene anyi? Eyowa. Padibi bimueneka ne: mulongi udi udiunda mu nyuma kakese ku kakese kadi muikale wanyisha malu adiye ulonga, tudi mua kutungunuka ne kulonga nende mu mukanda wa Tutendelelayi Nzambi umuepele mulelela. Tudi bajadike ne: mukanda wa Bible ulongesha neutuambuluishe bikole bua kuvuija bantu bayidi.—Mat. 28:19, 20.