Tutabalelayi bakuabu: Pa kubela nkonko ne kubateleja
1 Bantu ba bungi kabatu basue bua bikale anu babalongesha anyi babela nkonko to, kadi batu basue kulejaku biabu bidibu bamanye. Nunku, tuetu bena Kristo tudi ne bua kumanya mua kuela nkonko bua kufika ku dipatuisha idi munda mua bantu.—Nsu. 20:5.
2 Kadi nkonko yetu eyi idi ne bua kuelesha bantu meji pamutu pa kuikalayi ibatshinyisha. Muanetu kampanda utu webeja bantu patuye uyisha ku nzubu ne ku nzubu ne: “Udi wela meji ne: tshikondo netshilue tshikala bantu bonso batua bakuabu mushinga ne babanemeka anyi?” Bilondeshile tshidi muntu wandamuna, utu utungunuka ne: “Kadi buebe wewe, bidi bikengela tshinyi bua kukumbaja bualu ebu?” anyi ne: “Udi wamba nanku bua tshinyi?” Muanetu mukuabu pende utu webeja baledi dîba dituye uyisha padi mpunga umueneka ne miaba idi bantu ba bungi ne: “Ndisanka kayi diudi nadi bua paudi muledi?” Pashishe webeja kabidi ne: “Nntatu minene kayi iudi nayi?” Nkonko eyi idi isaka bantu bua kuleja wabu mmuenenu wa malu, kadi kayena ibatshinyisha to. Bu mutu nsombelu ishilangana, tudi ne bua kushintulula mbuelelu wetu wa muyuki ne ngelelu wetu wa nkonko bua kulenga mitshima ya bantu ba mu teritware wetu.
3 Patuisha bantu idi munda: Padi muntu ujinga kuleja mmuenenu wende, kumukoshi ku dîyi to, umuteleje ne lutulu luonso. (Yak. 1:19) Muela tuasakidila bua mmuenenu wende. (Kolos. 4:6) Udi mua kuamba ne: “Bimpe be! Tuasakidila bua muudi mungambile bualu ebu.” Padiku mushindu, umuele kalumbandi ne muoyo mujima. Umuele kabidi nkonko mikuabu bua kumanya meji adiye wela ne tshidiye uelela. Keba malu anudi nuenu bonso nuitaba. Paudi musue kumubadisha mvese, udi mua kuamba ne: “Ukadiku mubale bualu ebu anyi?” Kubengi bionso bidiye wamba diakamue to, ne kumutandishi to.—2 Tim. 2:24, 25.
4 Bantu batu batuandamuna nangananga bilondeshile mushindu utudi tubateleja. Tuetu tuteleja bantu ne muoyo mujima, nebamone ne: bushuwa tudi tubateleja. Mutangidi muena-ngendu mukuabu udi wamba ne: “Patudi tuteleja bantu ne lutulu luonso, bidi bibalenga ku muoyo ne kuenza nunku ke mushindu mutambe buimpe utudi tuleja mutudi tubatabalela.” Bantu batu badiumvua bimpe padibu bamona tubateleja, bibafikisha too ne ku diteleja lumu luimpe lutudi tubayisha.—Lomo 12:10.