Udiku mua kuakaja programe webe anyi?
1. Tudi ne bua kuakaja programe wetu wa buambi bua tshinyi?
1 Tuetu bena Kristo balelela tudi bitabe bua kulua ‘bilembi bia bantu’ anyi balobi ba bantu. (Mat. 4:19) Anu bu mutu balobi ba mishipa benza, bua tuetu kupeta bantu ba bungi mu mudimu wetu wa diyisha, mbimpe tuakaje programe wetu bua kuyisha mêba atudi mua kubapeta ku nzubu yabu. Mu ngondo idi kumpala eku, netuikale ne mushindu wa kuyisha mêba a bungi bualu mu matunga mavule, butuku kabuakuikala buila lukasa to. Mu mapingaja ne ku dilolo, bantu ba bungi batu ku mbanza yabu. Misangu ya bungi batu bakidila bantu bimpe bualu mêba aa lungenyi lutu lutukije, kabayi ne bia bungi bia kuenza. Udiku mua kuakaja programe webe bua kuyisha mu mêba aa anyi?—1 Kol. 9:23.
2. Leja amue malu atudi mua kuenza bua kumona mua kuyisha bantu ba bungi.
2 Buambi bua ku dilolo: Didilongolola bua kuyisha ku mêba a dilolo nedituambuluishe bua kuyisha bantu ba bungi lumu luimpe. (Nsu. 21:5) Bansonga badi mua kuyisha padibu bapatuka mu kalasa. Bena mudimu badi mua kuyisha kunyima kua mudimu. Tumue tusumbu tua dilonga dia mukanda tudi mua kulongolola bua kuikala kuyisha nansha dîba dimue dituku dia dilonga kumpala kua kutuadijadi.
3. Mmishindu kayi iudi mua kuyisha mu teritware wenu mu mapingaja ne ku dilolo?
3 Kuyisha ku nzubu ne ku nzubu mu mêba a mapingaja ne ku dilolo, nekutuambuluishe bua kuyisha bantu batutu katuyi tupeta ku mbanza yabu. Mu teritware ya bungi badi mua kuyisha kabidi ku dilolo mu misesu ne mu miaba itu bantu ba bungi. Bamanyishi ba bungi mbafike ku dimona ne: ku dilolo ke dîba dimpe dia kupinganyina bantu ne kutuadija kulonga nabu Bible.
4. Bua tshinyi mbimpe kuikala ne busunguluji ne kanemu patudi tuyisha ku dilolo?
4 Mbimpe kuikala ne busunguluji: Patudi tuyisha mu mêba a dilolo, mbimpe tuikale ne busunguluji. Pa tshibidilu bitu bimpe kuyisha anu ku ntuadijilu kua mêba a dilolo pamutu pa kuyisha mêba akadi bantu badilongolola bua kulala. (Filip. 4:5) Paudi ukokola ku tshiibi, ikala muimane pa muaba udibu mua kukumona kakuyi lutatu ne udimanyishe bimpe. Manyisha diakamue tshiudi muendele. Wewe musangane bantu badia, bambila ne: neulue musangu mukuabu. Ikala ne kanemu misangu yonso.—Mat. 7:12.
5. Tshitudi mua kuenza ntshinyi bua kuepuka njiwu patudi tuyisha ku mêba a dilolo?
5 Tuikale kabidi ne budimu. Wewe uyisha pakadi panshi penda pafika anyi pakadi butuku bumane kuila, mbimpe nuikale babidi anyi bapite pa babidi. Endelayi mu njila idi ne bantu ba bungi. Yishayi anu miaba inudi numone ne: kabena mua kunuenzela bibi. Kanuyi miaba inudi numone ne: badi mua kunuenzela bibi mu mîdima to.—Nsu. 22:3.
6. Mmasanka kayi makuabu atudi tupeta patudi tuyisha mu mêba a mapingaja anyi ku dilolo?
6 Kuyisha mu mapingaja anyi dilolo kudi kutuambuluisha bua kuyisha ne bampanda-njila bambuluishi ne ba pa tshibidilu. (Lomo 1:12) Kuenaku mua kuakaja programe webe bua kuyisha mu mêba a dilolo anyi?