Mudimu wetu wa diyisha mmudimu wa luse
1 Yezu wakamona ne: bantu bavua bamuteleja bavua ‘batata, bamuangalake bu mikoko idi kayiyi ne mulami.’ (Mat. 9:36) Yezu wakabalongesha mikenji ya Yehowa ne luse ne dinanga dionso, kubakolesha ku muoyo, ne kuenzaye muende muonso bua kubayisha Dîyi dia Nzambi. Tuetu bele meji a malu avuaye muenze, netufike petu ku dikala ne meji bu ende ne kumvua bu muvuaye umvua ne netuikale ne luse patudi tuyisha.
2 Tuanji kuelabi meji kakese bua kumona tshivua Yezu muenze pavua bantu bavua mu ntatu bamulomba diambuluisha. (Luka 5:12, 13; 8:43-48) Yezu uvua umvuila bantu aba bavua mu nsombelu mikole luse lua bungi. (Mâko 7:31-35) Uvua uditeka pa muaba wa bakuabu ne ubambuluisha. Uvua umona tshivua mu mitshima ya bantu. (Luka 7:36-40) Nunku, Yezu wakaleja mu bule ne mu butshiama luse ludi nalu Nzambi wetu.
3 ‘Uvua nabu luse’: Yezu kavua uyisha bantu anu bualu Tatuende uvua mumuambile bua kuyisha to. Uvua uyisha bualu ‘uvua nabu luse.’ (Mâko 6:34) Bia muomumue lelu’eu, katuena tuyisha anu bu bantu badi baya kushilangana mukenji to, kadi mbua kusungila mioyo ya bantu. Tukebe bua kumanya tshidi bantu batuandamuina mudibu batuandamuna amu. Bua tshinyi badi ne tshiji anyi bua tshinyi mbatume meji abu kua tshianana? Badiku mua kuikala babalengulule anyi babashime kudi bampasata ba bitendelelu biabu anyi? Tuetu babatabalele ne muoyo mujima, badi mua kuteleja lumu luimpe.—2 Kol. 6:4, 6.
4 Padi bantu bamona ne: tudi tubumvuila luse, nebilenge mioyo yabu bikole. Tshilejilu, mamu mukuabu uvua ne dibungama dikole bua muanende wa ngondo isatu uvuaye ufuma ku difuisha. Pakalua bana betu ba bakaji babidi kumutangila, wakababueja mu nzubu ne meji a kubaleja ne: malu atubu bamba ne: ke adi Nzambi mulekele makenga nga dishima. Kadi mamu eu wakalua kuamba pashishe ne: “Bantemu babidi abu bakangumvuila luse e kuntelejabu ne ntema yonso, ne pakayabu, ngakadiumvua bimpe, meme kuitaba bua kuluabu kabidi.” Utuku pebe udienzeja bua kumvuila muntu yonso uudi upetangana nende mu buambi luse anyi?
5 Patudi tumvuila bakuabu luse, tudi tubakolesha mu maboko. Tuetu benze nanku, netutumbishe Yehowa “Tatu wa luse.”—2 Kol. 1:3.