Ndongamu mupiamupia wa mpuilu wa tshijengu

Bantu mbasue kutuleja ne: ndongoluelu wa malu eu kakubutuka to. Pabi, Dîyi dia Nzambi didi dituambila malu mushindu mukuabu. (1 Yone 2:15-17) Didi dituambuluisha bua kumanya ne: ‘kudibutshila bintu pa buloba’ nkuipata kua lupepele. Bua kukolesha bantu ba Nzambi, mpuilu wa tshijengu wa tshidimu tshia mudimu tshia 2007 neikale ne tshiena-bualu ne: ‘Nudibutshile bintu mu diulu.’​—Mat. 6:19, 20.

Kuteka meji onso anu ku bintu bia pa buloba kudi munkatshi mua bintu bidi Efeso 2:2 ubikila ne: ‘bukokeshi bua mu lupepele, nyuma udi wenzeja mpindieu munkatshi mua bana ba bupidia.’ Anu bu mudi lupepele luetu elu luikale miaba yonso, ne bantu balukoka bua kupuyakana kakuyi lutatu, ke mudi ‘nyuma wa pa buloba’ muikale pa buloba bujima. (1 Kol. 2:12) Bu mudi nyuma eu ufikisha bantu ku dienza malu, badi bamba ne: udi ne ‘bukokeshi.’ Mpuilu wa tshijengu mupiamupia neatuambuluishe bua kulekela ngelelu wa meji mutekela anu pa bintu bia pa buloba ne kulama bimpe mu mutu malu adi ne mushinga wa bungi. (Mat. 6:33) Mpuilu eu neatuambuluishe kabidi bua kueyemena Yehowa patudi tuyisha nansha mudiku mateta ne ntatu.

Wikalaku matuku onso abidi ne ulonde malu adibu bamba bimpe menemene. (Eb. 2:1) Ufunde malu awatumikila ne kabidi akuambuluisha mu buambi kadi kufundi mapite bungi to. Wewe muikalaku ku ntuadijilu too ne ku ndekelu wa mpuilu mulenga eu, neupetulule makanda ne neutungunuke ne ‘kudibutshila bintu mu diulu.’