Bisangilu bia mudimu wa buambi bikuambuluishe
1. Bisangilu bia mudimu wa buambi bidi mua kutuambuluisha ku tshinyi?
1 Bisangilu bia mudimu wa buambi bienza bimpe bidi bitupesha bukole ne mibelu mimpe kumpala kua tuetu kuya kayisha. Bidi bituambuluisha bua kuyisha ne bana betu bakuabu bua kumona mua kukoleshangana ne kulejangana mua kuenza mudimu. (Nsu. 27:17; Muam. 4:9, 10) Kadi ntshinyi tshitudi mua kuenza bua bisangilu ebi kutuambuluishabi?
2. Ngamue malu kayi adi mulombodi wa tshisangilu tshia mudimu wa buambi mua kuakuila?
2 Mulombodi: Malu adibu ne bua kutuambila mu bisangilu ebi kabatu anu badianjila kualeja muaba kampanda to. Nunku paudi ne bua kulombola tshisangilu etshi, bikengela udilongolole bimpe. Kuikadi ne tshilele tshia kukeba bua kukonkonona mvese wa ku dituku mu tshisangilu tshia mudimu wa buambi to; tshidibi udi pamuapa mua kumubueja mu malu anudi nuyikila bikalaye wakula anu bua mudimu wa buambi. Keba malu adi mua kuambuluisha bana betu bikala ne bua kuyisha dituku adi. Tshilejilu, udi mua kusungula bua kuyukidilangana pa tshiena-bualu kampanda anyi bua kuenzeja dinaya dia tshilejilu. Udi mua kusungula nansha bua kukonkonona bualu kampanda bua mu mukanda wa Comment raisonner, wa Kalasa ka mudimu, anyi bunuvua bakonkonone mu Tshisangilu tshia Mudimu matuku adi panshi aa. Kadi misangu mikuabu udi mua kusungula nansha bua nuenu kuyikidilangana pa mushindu wa kupita ne ntatu mikuabu inutu nupeta mu buambi mu teritware wenu anyi mene kuleja mushindu wa kujula bantu nyota ne kutuadija kulonga Bible ne bantu, nangananga padi bana betu ba bungi bapinganyina bantu bavuabu bayukile nabu musangu mukuabu. Nansha wewe mulongolole tshiena-bualu tshia mushindu kayi, wikale ne musangelu paudi wakula, mêyi ebe abape muoyo mukole.
3. Tshisangilu tshia mudimu wa buambi tshidi ne bua kuenza minite bungi kayi? Mmalu kayi adi ne bua kuenzeka mu minite ayi?
3 Tuadija tshisangilu pa dîba nansha wewe mumanye ne: kutshidi bantu bakuabu balua panyima. Wikale ne meji paudi wabanya bantu, badi dijinga ne teritware ubapeshayi. Tshisangilu etshi tshidi ne bua kuenza minite 10 anyi 15. Kadi paditshi tshienzeka panyima pa bisangilu bia tshisumbu, nutshipidije bikole menemene. Muntu yonso udi ne bua kumanya wayabu nende ne muaba wayabu kuyisha kumpala kua tshisangilu kujikatshi. Tshisangilu etshi tshidi ne bua kujika ne disambila.
4. Ntshinyi tshitudi mua kuenza bua bisangilu ebi kutuambuluishabi tuetu bonso?
4 Tudi mua kufila diambuluisha: Anu mututu tufika kumpala kua dîba mu bisangilu bietu bikuabu bia tshisumbu bua kunemeka Yehowa ne bana betu, ke mutudi mua kuenza kabidi bua tshisangilu etshi. Tudienzeje bua kuandamunaku padibu bela nkonko. Udi mua kulekela muanetu udi ulombola tshisangilu etshi bua yeye akupeshe muntu wa wewe kuyisha nende anyi nansha kudianjila kumvuangana ne muntu wa nuenu kupatuka nende mu buambi. Wewe musue kudisunguila muntu wa kuyisha nende, wikale udienzeja bua ‘kudiundisha’ anyi kualabaja dinanga diebe, upatukaku ne bantu bashilangane pamutu pa kuikala uyisha anu ne balunda bebe misangu yonso. (2 Kol. 6:11-13) Padi tshisangilu tshijika, kushintuludi muntu udibu bakupeshe to, ndayi diakamue mu buambi.
5. Bisangilu bia mudimu wa buambi bidi ne tshipatshila kayi?
5 Tshisangilu tshia mudimu wa buambi tshidi ne tshipatshila tshia muomumue ne bisangilu bia tshisumbu. Mbabilongolole bua tuetu kufika ku ‘dielelangana meji muntu ne muntu bua kuenzejangana ku dinanga ne ku dienza dia bienzedi bimpe.’ (Eb. 10:24, 25) Tuetu badienzeje bua bisangilu ebi kutuambuluishabi, netufike ku dienza mudimu wetu eu udi ‘mudimu muimpe.’