17. Ntshinyi tshidi Yone utuambila pa bidi bitangila sanktuere, ne abi bidi bituvuluija tshinyi bua sanktuere wa mu Izalele wa kale?

¹⁷ Ndekelu wa bionso, bua kujikija tshitupa etshi tshia tshikena-kumona, Yone udi utuambila ne: “Ne sanktuere wakuwula tente ne muîshi bua butumbi bua Nzambi ne bua bukole buende, ne muntu nansha umue kavua mua kubuela mu sanktuere, too ne muakumbajibua bipupu muanda-mutekete bia banjelu muanda-mutekete.” (Buakabuluibua 15:8) Mu nsombelu kampanda mu miyuki ya kale ya Izalele, ditutu diakabuikila sanktuere muena-dîna ne dimueneka patoke edi dia butumbi bua Yehowa diakapumbisha bakuidi bua kubuelamu. (1 Bakalenge 8:10, 11; 2 Kulondolola 5:13, 14; fuanyikija ne Yeshayi 6:4, 5.) Bivua mu bikondo bivua Yehowa utabalela menemene mianda ivua yenzeka pa buloba.

18. Ndîba kayi dialukila banjelu muanda-mutekete kumpala kua Yehowa bua kumupesha luapolo?

¹⁸ Lelu’eu kabidi, Yehowa udi utabalela ne ntema yonso mianda idi yenzeka pa buloba. Mmusue bua banjelu muanda-mutekete bakumbaje mudimu wabo. Tudi mu tshikondo tshikole tshia dilumbuluisha, tshidi tshiumvuija mushindu’eu mu Musambu wa 11:4-6 ne: “Yehowa udi mu ntempelo wende munsantu. Yehowa​—nkuasa wende wa bumfumu udi mu diulu. Mesu ende adi àbandila, mesu ende mene adi ela nsese adi akenketa bana ba bantu. Yehowa yeye nkayende udi ukenketa muakane ne mubi, ne muntu yonso udi munange tshimvundu, anyima Wende udi umukina bushuwa. Nealokeshile bantu babi mateyi, kapia, sufre ne lupepele ludi luôsha, bu tshitupa tshia lupanza luabo.” Banjelu muanda-mutekete kabakupingana kumpala kua butumbi kua Yehowa diambedi kabayi banji kuitshikijila bantu babi bipupu muanda-mutekete to.

19. (a) Ndîyi kayi didi ditumibua, ne nnganyi udi udituma? (b) Ndîba kayi diakatuadija ditshikijibua dia tubakudi tua mu tshimfuanyi?

¹⁹ Mukenji mukuate buowa wakumvuika: “Ne meme kumvua dîyi dikole difuma ku sanktuere, divua diambila banjelu muanda-mutekete ne: ‘Ndayi ne nuitshikije tubakudi muanda-mutekete tua tshiji tshia Nzambi pa buloba.’” (Buakabuluibua 16:1) Nnganyi udi utuma dîyi edi? Udi ne bua kuikala Yehowa yeye nkayende, bualu, bukenke bua butumbi buende ne bua bukole buende bidi bipumbisha muntu mukuabu yonso bua kubuela mu sanktuere. Yehowa wakalua mu ntempelo wende wa mu nyuma mu 1918 bua kutuadija dilumbuluisha. (Malaki 3:1-5) Nenku, bidi ne bua kuikala lupolo luîpi kunyima kua tshidimu etshi, kuvuaye mutume dîyi dia kuitshikija tubakudi tua tshiji tshia Nzambi. Bushuwa, malumbuluisha adi mu tubakudi etu tua mu tshimfuanyi akatuadija kumanyishibua ne bukole buonso mu 1922. Ne kumanyishibua kuawu kutshidi kutungunuke ne kuenzeka bikole menemene lelu’eu.

Tubakudi ne diela mpungi

20. Ntshinyi tshidi tubakudi tua tshiji tshia Yehowa tusokolola ne tumanyisha, ne mmushindu kayi uditu tuitshikijibua?

²⁰ Tubakudi tua tshiji tshia Yehowa tudi tusokolola mianda ya pa buloba bujima amu bu mudi Yehowa uyimona ne tudi tumanyisha malumbuluisha ikalaye ne bua kukumbaja. Banjelu badi bitshikija tubakudi ku butuangaji bua tshisumbu tshia bena nkristo bela manyi badi pa buloba, aba badi bimba musambu wa Mozese ne wa Muan’a mukoko. Mu kumanyisha kuabo kua Bukalenge bu lumu luimpe, kasumbu ka Yone nkasokolole ne bukitu buonso malu adi mu tubakudi etu tua tshiji. (Matayi 24:14; Buakabuluibua 14:6, 7) Nenku, mukenji wabo muashila pa malu manene abidi udi wa ditalala, bualu udi umanyisha budikadidi kudi bukua-bantu kadi ne wa mvita, bualu udi umanyisha “dituku dia disombuela dia kudi Nzambi wetu.”​—Yeshayi 61:1, 2.

21. Nku tshinyi kudi bintu bifundila ditshikijila tubakudi tunayi tua kumpala tua tshiji tshia Nzambi biakanangane ne ebi bivua bipupu bitulukile pakedibua mpungi inayi ya kumpala, ne mbishilangane ku tshinyi?

²¹ Bintu bifundila ditshikijila tubakudi tunayi tua kumpala tua tshiji tshia Nzambi mbiakanangane ne ebi bivua bipupu bitulukile pakedibua mpungi inayi ya kumpala, ke buloba, mbuu, misulu ne mpokolo ya mâyi, pamue ne bikenkeshi bia mu diulu. (Buakabuluibua 8:1-12) Kadi, miadi ya mpungi ivua imanyisha bipupu bivua ne bua kudituta pa “tshia-bisatu tshimue,” kadi ditshikija dia tubakudi tua tshiji tshia Nzambi didi dikeba bipupu bidi bikuata bionso. Nenku, pavua bukua-buena-nkristo, “tshia-bisatu tshimue,” bukengeshibue diambedi mu dituku dia Mukalenge, tshitupa nansha tshimue tshia bulongolodi bua Satana ki ntshipanduke ku malumbuluisha a Yehowa mena kusumpakaja ne matuadi a bisama to.

22. Miadi ya mpungi isatu ya ndekelu ivua yoyi mishilangane ku tshinyi, ne idi misuikakaja ku tubakudi tusatu tua ndekelu tua tshiji tshia Yehowa ku tshinyi?

²² Miadi ya mpungi isatu ya ndekelu ivua mishilangane, bualu, yakabikidibua ne: diakabi. (Buakabuluibua 8:13; 9:12) Abidi a kumpala a ku malu a diakabi aa avua nangananga makeba kudi mpasu ne biluilu bia bena tubalu, kadi disatu divua dikeba kudi diledibua dia Bukalenge bua Yehowa. (Buakabuluibua 9:1-21; 11:15-19) Anu mutuabimona, tubakudi tusatu tua ndekelu tua tshiji tshikole tshia Nzambi tudi patu tutuala amue a ku malu aa, kadi ntushilangane kakese ne malu aa a diakabi asatu. Tuteyayi ntema mikole mpindieu ku masokolola a mushinga mukole adi afuma ku ditshikijibua dia tubakudi tua tshiji tshia Yehowa.

1. Ntshinyi tshikala tshienzeke pikala tubakudi tuonso muanda-mutekete tuitshikijibue, ne nnkonko kayi idi yedibua mpindieu pa bidi bitangila tubakudi?

YONE ukadi mumane kuleja banjelu badi bapeshibue bujitu bua kuitshikija tubakudi muanda-mutekete. Udi utuambila ne: bipupu bidi bifumina ku ditshikijibua dia tubakudi etu, “mbia ndekelu, bualu, ku diambuluisha diabi, tshiji tshia Nzambi tshidi tshifikishibua ku ndekelu.” (Buakabuluibua 15:1; 16:1) Bipupu ebi bidi bisokolola manyoka mafunda kudi Yehowa bua bubi budi butue mushimi pa buloba bujima, bidi ne bua kuitshikijibua too ne pajikabi. Apu, malumbuluisha a Nzambi neyikale makumbajibue. Bulongolodi bua Satana kabuakuikalaku kabidi! Nenku, ntshinyi tshidibi bimanyisha bua bukua-bantu ne bua bamfumu ba bulongolodi ebu bubi? Mmunyi mudi bena nkristo mua kuepuka dikengeshibua kudi bipupu ebi pamue ne bena mu bulongolodi ebu bufundila tshibawu? Mine eyi nnkonko ya mushinga mukole ne ikadi pa kuandamunyibua mpindieu. Bushuwa, aba buonso badi bindile ne muoyo kulukulu ditshimuna dia buakane nebatabalele ne ntema yonso bidi Yone umona mpindieu.

Tshiji tshikole tshia Yehowa kudi “buloba”

2. Ntshinyi tshidi tshienzeka padi muanjelu wa kumpala witshikija kabakudi kende pa buloba, ne “buloba” budi buleja tshinyi?

² Muanjelu wa kumpala watuadiji kutumika! “Ne wa kumpala wakaya ne wakitshikija kabakudi kende pa buloba. Ne mputa wa lubangu mubiamubi ne wa kusama kukole kumuenekaye kudi bantu bavua ne tshimanyinu tshia nyama wa luonji ne bavua batendelela tshimfuanyi tshiende.” (Buakabuluibua 16:2) Amu bu mu muyuki wa diela mpungi wa kumpala, “buloba” apa budi buleja bulongolodi bua tshididi budi bumueneka ku mêsu bu bushindame, buakatuadija Satana kufuimba pa buloba katshia ku tshikondo tshia Nimerode, kukadi bidimu bipite pa 4 000.​—Buakabuluibua 8:7.

3. (a) Mmushindu kayi udi mbulamatadi mivule ilomba ku bukole dikokela difuane ntendelelelu kudi bakokeshibue bayi? (b) Ntshinyi tshidi matunga madienzele ne mateke pa muaba udi mukumbanyine Bukalenge bua Nzambi, ne ntshinyi tshienzekela aba badi batshitendelela?

³ Mu matuku aa a ndekelu, mbulamatadi mivule idi ilomba bena mu matunga abo dikokela didi bu ntendelelu, badi bakolesha dîyi ne: Mbulamatadi udi ne bua kutekibua ku mutu kua Nzambi peshi kua bionso bidi bikengela lulamatu ku mikenji. (2 Timote 3:1; fuanyikija ne Luka 20:25; Yone 19:15.) Katshia ku 1914, mbivue tshilele bua matunga kuikala abikila bansonga bawu bua kudifilabo, peshi kuikala badiakaje bua kudifila mu diluangena ditunga mvita mijima ya mumue ne itu mieleshe mashi mavule panshi mu mianda ya tshikondo etshi. Mu dituku dia Mukalenge, pa muaba udi mukumbanyine Bukalenge bua Nzambi, matunga mmapingajepu kabidi tshimfuanyi tshia nyama​—Nsangilu wa Matunga, pashishe, bulongolodi buakamupingana, bua Matunga masanga. Ntshipendu kayipu kudi Nzambi pa kuamba amu bu bamue ba ku ba-pape ba ndekelu, mudi bulongolodi ebu buénzá kudi bantu buikale ditekemena dimuepele dia ditalala bua matunga! Budi butombokela menemene Bukalenge bua Nzambi. Aba badi babutendelela badi badivuija bapange bukezuke mu nyuma, babuikila kudi mputa ya lubangu, anu bu bena Ejipitu bakatombokela Yehowa mu matuku a Mozese, ne kubatuminabo tshipupu tshia mputa ya lubangu miena-dîna.​—Ekesode 9:10, 11.

4. (a) Ne bukole buonso, ebi bidi mu kabakudi ka kumpala ka tshiji tshia Nzambi bidi bizangika tshinyi? (b) Mmunyi mudi Yehowa wangata aba badi banyisha tshimanyinu tshia nyama wa luonji?

⁴ Bidi mu kabakudi ka kumpala bidi bizangika ne bukole buonso, nsombelu ibidi mishilangane idi kumpala kua bantu. Badi ne bua kukenga pa kubengibua kudi bulongolodi ebu, anyi kupeta dibengibua dia Yehowa. Badi benzejibua ku bukole bua kuanyisha tshimanyinu tshia nyama wa luonji, bua “muntu nansha umue kasumbi anyi kasumbishi tshintu, amu eu udi ne tshimanyinu tshia dîna dia nyama wa luonji anyi bishiferi bia dîna diende.” (Buakabuluibua 13:16, 17) Kadi, kudi difutu kampanda dia kufuta! Ku mêsu kua Yehowa, aba badi banyisha tshimanyinu etshi badi bu batuta kudi “mputa wa lubangu mubiamubi ne wa kusama kukole.” Katshia ku 1922, bakafundibua tshimanyinu patoke, ke tshidi tshileja ne: mbimanshe Nzambi udi ne muoyo. Mapangadika abu a mu mianda ya tshididi kaena alubuluka ne badi mu tunyinganyinga tukole. Mbapange bukezuke mu nyuma. Anu bianyingalalabo, tshianana disama edi ‘dibiadibi’ nedibatuadile lufu, bualu edi ndituku dia dilumbuluisha dia Yehowa. Kakuena ngikadilu wa ndubidilu mu muanda eu pankatshi pa kuikala ku luseke lua bulongolodi ebu bua malu, ne kusadila Yehowa ku luseke lua Kristo wende.​—Luka 11:23; fuanyikija ne Yakobo 4:4.

Mbuu wandamuki mashi

5. (a) Ntshinyi tshidi tshienzeka padi kabakudi kibidi kitshikijibua? (b) Mmunyi mudi Yehowa wangata bantu badi mu mbuu wa mu tshimfuanyi?

⁵ Mpindieu ke dîba dia kuitshikija kabakudi kibidi ka tshiji tshia Nzambi. Nekupatuke bipeta kayi bua bukua-bantu? Yone udi utuambila ne: “Ne muibidi wakitshikija kabakudi kende mu mbuu. Ne wakandamuka mashi amu bu a muntu mufue, ne anyima wonso udi ne muoyo wakafua, eyowa, bintu bivua mu mbuu.” (Buakabuluibua 16:3) Amu bu kuedibua kua mpungi muibidi, kabakudi aka kadi kitshikijibua mu “mbuu”​—musumba musaluke wa bantu bantomboji ne badi kule ne Yehowa. (Yeshayi 57:20, 21; Buakabuluibua 8:8, 9) Ku mêsu kua Yehowa, “mbuu” eu mmufuane mashi, tshifukibua nansha tshimue katshiena mua kushalamu ne muoyo. Ke bua tshinyi bena nkristo kabena ne bua kuikala bena mu bulongolodi ebu. (Yone 17:14) Ditshikijibua dia kabakudi kibidi ka tshiji tshia Nzambi didi disokolola ne: bantu buonso badi mu mbuu eu mbafue ku mêsu kua Yehowa. Bua dipiila dia tshi-bungi tshiabu, mbabafundile tshibawu bua dibanza dia mashi mavule a aba bavua kabayi ne bualu adibo bamuangalaje panshi. Nanku, nebashipibue kudi biluilu bikumbaji bia malumbuluisha a Yehowa pafika dituku dia tshiji tshiende.​—Buakabuluibua 19:17, 18; fuanyikija ne Efeso 2:1; Kolosai 2:13.