Nshapita wa 31

Midimu ya Yehowa​—Minene ne ya dikema

Tshikena-kumona tshia 10​—Buakabuluibua 15:1-16:21

Tshiena-bualu: Yehowa mu sanktuere wende; tubakudi muanda-mutekete tua tshiji tshiende tshikole tuitshikija pa buloba

Tshikondo tshia dikumbana: Kubangila ku 1919 too ne ku Armagedon

1, 2. (a) Tshimanyinu tshisatu tshileja Yone ntshimanyinu kayi? (b) Anu bu mudi basadidi ba Yehowa babimanye katshia kuonso eku, mmu muanda kayi mudi banjelu bakumbaja mudimu munene?

MUKAJI kampanda waledi muana wa balume! Dragon munene udi ukeba mua kudia muana eu wa katoto! Bimanyinu ebi bibidi bia mu diulu bileja mu mushindu wa dikema mu Buakabuluibua nshapita wa 12, mbitufikishe ku dijingulula ne: difuilakana dia bidimu ne bitshia didi pankatshi pa Dimiinu dia mukaji wa Nzambi ne pa Satana ne dimiinu diende dia ba-demon, diafiki mu tshitupa tshiadi tshipite bukole. Yone uvua mukoke ntema yetu pa bimanyinu ebi pa kuamba ne: “Ne tshimanyinu tshinene tshiakamueneka mu diulu. . . . Ne tshimanyinu tshikuabo tshiakamueneka.” (Buakabuluibua 12:1, 3, 7-12) Mpindieu, Yone udi umanyisha tshimanyinu tshisatu: “Ne meme kumona tshimanyinu tshikuabo mu diulu, tshinene ne tshia dikema, banjelu muanda-mutekete bikale ne bipupu muanda-mutekete. Bidi bia ndekelu, bualu ku diambuluisha diabi, tshiji tshia Nzambi tshidi tshifikishibua ku ndekelu.” (Buakabuluibua 15:1) Tshimanyinu etshi tshisatu tshidi patshi ne diumvuija dia mushinga mukole menemene bua basadidi ba Yehowa.

² Tutabalele ne: banjelu badi bakumbaja kabidi mudimu munene mu dikumbana dia disua dia Nzambi. Ke tshidi basadidi ba Nzambi bamanye katshia kuonso eku. Nenku, mufundi wa ku kale wa misambu muenzeja kudi spiritu wa Nzambi wakasengelela banjelu bine ne: “Beneshayi Yehowa, O nuenu banjelu bende, bena bukole bua tshikandi tshienu, badi bakumbaja dîyi diende, pa kuteleja muaku wa dîyi diende”! (Musambu wa 103:20) Mpindieu, mu tshienzedi etshi tshipiatshipia, banjelu badi bapeta bukenji bua kuitshikija bipupu muanda-mutekete bia ndekelu.

3. Bipupu muanda-mutekete mbinganyi, ne kuitshikijibua kuabi kudi kumanyisha tshinyi?

³ Bipupu ebi ntshinyi? Amu bu kuela kua mpungi muanda-mutekete, mmalumbuluisha makole adi asokolola patoke tshidi lungenyi lua Yehowa bua bitupa bishilangane bia bulongolodi ebu ne adi amanyisha bipeta bia ndekelu bia mapangadika ende a bunzuji. (Buakabuluibua 8:1 too ne 9:21) Kuitshikijibua kua bipupu ebi kudi kumanyisha dikumbajibua dia malumbuluisha aa, tshikondo tshikala Yehowa ne bua kubutula aba badiye mutemeshile tshiji tshiende tshikole mu dituku dia tshiji tshiende tshiteme. (Yeshayi 13:9-13; Buakabuluibua 6:16, 17) Nenku, “tshiji tshia Nzambi tshidi tshikumbana” ku diambuluisha dia bipupu ebi. Kadi, kumpala kua kumvuija ditshikija dia bipupu ebi, Yone udi utuambila bua bamue bantu badi bakubibuaku. Bena lulamatu aba, bakabenga kuangata tshimanyinu tshia nyama wa luonji, badi bimba misambu ya kusamuna nayi Yehowa, eku, benda bamanyisha dituku diende dia kudisombuela.​—Buakabuluibua 13:15-17.

Musambu wa Mozese ne wa Muan’a mukoko

4. Mmuanda kayi udi umueneka mpindieu ku mêsu kua Yone?

⁴ Mpindieu, muanda wa dikema udi umueneka kudi Yone: “Ne meme kumona tshivua tshimueneka bu mbuu wa lumuenu musambakane ne kapia, ne aba bakapatuka batshimunyi ba nyama wa luonji ne ba tshimfuanyi tshiende ne ba bishiferi bia dîna diende, biimane pabuipi ne mbuu wa lumuenu, bikale ne nzenze ya Nzambi.”​—Buakabuluibua 15:2.

5. “Mbuu wa lumuenu musambakaja ne kapia” ntshimfuanyi tshia tshinyi?

⁵ “Mbuu wa lumuenu” udibo batele apa mmuine mbuu ukavua Yone mumone kumpala kua nkuasa wa bumfumu wa Nzambi. (Buakabuluibua 4:6) Mmufuane “mbuu wa tshiamu tshiengulula” (dilongo dia mâyi) divua mu ntempelo wa Solomo, muvua bakuidi batunta mâyi bua kudikezula. (1 Bakalenge 7:23) Nenku, udi tshimfuanyi tshilenga tshia “dioweshibua mâyi,” mbuena kuamba ne: Dîyi dia Nzambi, didi Yezu ukezula nadi tshisumbu tshia bakuidi bena nkristo bela manyi. (Efoso 5:25, 26; Ebelu 10:22) Mbuu eu wa lumuenu udi “musambakane ne kapia,” ebi bidi bileja ne: bena nkristo aba bela manyi mbapitshile ku mateta ne bakezudibue, pa kutumikila mikenji mitumbuke mibelela. Kabidi, abi bidi bituvuluija ne: Dîyi dia Nzambi didi padi ne malumbuluisha makole mamanyisha kudi Yehowa bua bena lukuna bende. (Dutelonome 9:3; Sefanya 3:8) Amue a ku malumbuluisha aa makole mmamueneshibue patoke mu bipupu muanda-mutekete bia ndekelu bikadi pa kuitshikijibua.

6. (a) Bimbi ba musambu badi biimane kumpala kua mbuu wa lumuenu wa mu diulu mbanganyi, ne mmunyi mutudi bamanye nunku? (b) Mmu ngumvuilu kayi ‘mudibo batshimunyi’?

⁶ Bu muvuabo batumika ne mbuu wa tshiamu tshiengulula uvua mu ntempelo wa Solomo bua bakuidi, ebi bidi bileja ne: bimbi ba misambu badi biimane kumpala kua mbuu wa lumuenu wa mu diulu mbena mu kasumbu ka bakuidi. Badi ne “nzenze ya Nzambi,” nenku, badi baleja bakulu 24 ne kabidi bantu 144 000, bualu bena mu bisumbu ebi bibidi badi bimba pabo pa kusakidila nzenze. (Buakabuluibua 5:8; 14:2) Bimbi ba misambu badi Yone umona “bakapatuka batshimunyi ba nyama wa luonji ne ba tshimfuanyi tshiende ne ba bishiferi bia dîna diende.” Nenku, badi ne bua kuikala aba ba ku bantu 144 000 badi ne muoyo pa buloba mu matuku a ku nshikidilu. Bu mudibo kasumbu, badi batshimunyi menemene. Katshia ku 1919, peshi kukadi bidimu bisua kutua ku 90, badi babenga bua kupeta tshimanyinu tshia nyama wa luonji anyi bua kuangata tshimfuanyi tshiende bu ditekemena dimuepele dia ditalala bua bukua-bantu. Bavule ba kudibo bakadi bamane kunanukila ne lulamatu too ne ku lufu, ne bu mukadibo mu diulu mpindieu, kabiyi mpata, badi bateleja ne disanka dinene musambu wa bana babo batshidi pa buloba.​—Buakabuluibua 14:11-13.

7. Lunzenze luvua ne mudimu kayi mu Izalele wa kale, ne dimueneka dia nzenze ya Nzambi mu tshikena-kumona tshia Yone didi ne bua kutusaka ku tshinyi?

⁷ Batshimunyi aba balamatshi ba mikenji badi ne nzenze ya Nzambi. Pa nanku, mbafuane bena Lewi ba kale bavua, mu ntempelo, batendelela Yehowa ne misambu mimba ne nzenze. Bamue pabo bakafila milayi mimba ne nzenze. (1 Kulondolola 15:16; 25:1-3) Tshiona tshisheme tshia nzenze tshivua tshilengeja misambu ya disanka, masambila a disamuna ne mêyi a diela tuasakidila bivua Izalele ubandisha muulu kudi Yehowa. (1 Kulondolola 13:8; Misambu 33:2; 43:4; 57:7, 8) Mu bikondo bia dikenga peshi bupika, muadi wa lunzenze kauvua umvuika to. (Musambu wa 137:2) Dimueneka dia nzenze ya Nzambi mu tshikena-kumona etshi didi ne bua kutamba kutusaka, mu didianjila kusangisha etu mêyi ku musambu eu wa disamuna ne wa diela tuasakidila tua disanka ne wa ditshimuna utudi tuimbila Nzambi wetu.a

8. Mmusambu kayi udibo benda bimba, ne udi ne miaku kayi?

⁸ Ke bualu budi Yone ulonda mpindieu: “Ne badi bimba musambu wa Mozese mupika wa Nzambi ne musambu wa Muan’a mukoko, bamba ne: ‘Midimu yebe idi minene ne ya dikema, Yehowa Nzambi, Wa-Bukole-Buonso. Njila yebe idi miakane ne milelela, Mukalenge wa tshiendelele. Nenku, nnganyi wabenga kukutshina bushuwa, Yehowa, ne wapanga kutumbisha dîna diebe, bualu, wewe nkayebe udi mulamatshi wa mikenji? Bualu, matunga wonso nealue ne neatendelele kumpala kuebe, bualu mapangadika ebe makane akamueneshibua patoke.’”​—Buakabuluibua 15:3, 4.

9. Bua tshinyi, ku lumue luseke, musambu eu udi ubikidibua ne: “musambu wa Mozese”?

⁹ Batshimunyi aba badi bimba “musambu wa Mozese,” mbuena-kuamba ne: musambu mufuane eu uvua Mozese muimbe mu nsombelu ya muomumue. Kunyima kua bena Izalele bamane kudimuena bipupu dikumi mu Ejipitu ne dibutuka dia biluilu bia bena Ejipitu mu mbuu Mukunze, Mozese wakabasaka ku dimbila Yehowa musambu wa ditshimuna wa butumbi, uvua umanyisha ne: “Yehowa neakokeshe bua bikondo kabiyi bijadika, eyowa, bua kashidi.” (Ekesode 15:1-19) Mmushindu kayipu udibi bikumbanyine mu tshikena-kumona tshia Yone bua tungimba tutshimunyi tua nyama wa luonji ne tùdì ne mudimu mu dimanyisha bipupu muanda-mutekete bia ndekelu kuimbilatu patu “Mukalenge wa kashidi”!​—1 Timote 1:17.

10. Mmusambu kayi mukuabu wakasaka Mozese, ne nku tshinyi kudi mvese wa ndekelu wa musambu eu utangila musumba munene lelu’eu?

¹⁰ Mu musambu mukuabu wakasakaye pavua Izalele udilongolola bua kunyenga ditunga dia Kanana, Mozese ukavua mununu, wakambila ditunga ne: “Nemmanyishe dîna dia Yehowa. Ambikayi Nzambi wetu bunene!” Mvese wa ndekelu wa musambu eu udi pende ukankamija aba badi kabayi bena Izalele ku tshileledi, ne mêyi aa matela kudi Mozese ku buenzeji bua spiritu wa Nzambi, adi alenga buludi mitshima ya bena mu musumba munene lelu’eu: “Sankayi bienu, matunga nue, pamue ne tshisamba tshiende.” Bua tshinyi adi ne bua kuikala ne disanka? Bualu, mpindieu Yehowa “neasombuele mashi a basadidi bende, ne neavuije disombola pa baluishi bende.” Dikumbaja dia dilumbuluisha edi diakane nedituadile aba buonso badi batekemena kudi Yehowa ditshionkomoka.​—Dutelonome 32:3, 43; Lomo 15:10-13; Buakabuluibua 7:9.

11. Mmushindu kayi udi musambu mumvua kudi Yone utungunuka ne kupeta dikumbana?

¹¹ Ndisanka kayipu divua Mozese mua kuikala nadi bu yeye ne muoyo mu dituku dia Mukalenge, mu tshikondo tshietu etshi, bua kuimba diatshimue ne tungimba tua mu diulu: “Matunga wonso nealue ne neatendelele kumpala kuebe”! Musambu eu mupite bukole utshidi utungunuka ne kupeta dikumbana dia dikema mu matuku etu aa; ne tudi tumona bushuwa, ki ng’anu mu tshikena-kumona, kadi, ne etu abidi, mushindu udi miliyo ne miliyo ya bantu bafume mu “matunga” benda bapuila mpindieu ne disanka dionso mu bulongolodi bua pa buloba bua Yehowa.

12. Bua tshinyi musambu wa batshimunyi udi ubikidibua kabidi ne: “musambu wa Muan’a mukoko”?

¹² Kadi, musambu eu kawena amu wa Mozese nansha, kadi, udi kabidi “wa Muan’a mukoko.” Mmu ngumvuilu kayi? Mozese uvua muprofete wa Yehowa bua Izalele, kadi, yeye nkayende wakamanyisha ne: Yehowa neapatule muprofete mukuabu amu bu yeye. Muprofete eu wakadisokola muikale Muan’a mukoko, Yezu Kristo. Mozese uvua “mupika wa Nzambi,” kadi Yezu uvua Muana wa Nzambi, Mozese Munene bushuwa. (Dutelonome 18:15-19; Bienzedi 3:22, 23; Ebelu 3:5, 6) Nenku, bimbi badi bimba kabidi “musambu wa Muan’a mukoko.”

13. (a) Nansha mudiye munene kupita Mozese, mmu ngumvuilu kayi mudi Yezu muprofete amu bu yeye? (b) Mmunyi mutudi mua kuikala mu buobumue ne tungimba etu?

¹³ Amu bu Mozese, Yezu wakimba patoke misambu ya kusamuna nayi Nzambi ne wakamanyisha ditshimuna Diende pa bena lukuna bende buonso. (Matayi 24:21, 22; 26:30; Luka 19:41-44) Yezu uvua pende muindile ne muoyo kulukulu tshikondo tshivua matunga ne bua kupuila bua kutumbisha Yehowa, ne, bu mudiye “Muan’a mukoko wa Nzambi” udifidile yeye nkayende, wakafila muoyo wende wa muntu bua dikumbana dia muanda eu. (Yone 1:29; Buakabuluibua 7:9; fuanyikija ne Yeshayi 2:2-4; Zekayi 8:23.) Amu bu muakafika Mozese ku diangata dîna dia Nzambi ne mushinga mukole ne kudizangika, Yezu pende wakamanyisha patoke dîna edi. (Ekesode 6:2, 3; Musambu wa 90:1, 17; Yone 17:6) Bu mudi Yehowa mulamatshi wa mikenji, kabiyi mpata, malaya ende matumbe neakumbane. Nanku, mu buobumue ne tungimba etu tuena lulamatu ku mikenji, Muan’a mukoko ne Mozese, tudi tuanyisha kabiyi mpata mêyi aa a musambu: “Nenku, nnganyi wabenga kukutshina bushuwa, Yehowa, ne wapanga kutumbisha dîna diebe?”

Banjelu ne tubakudi

14. Mbanganyi badi Yone umona bapatukila mu sanktuere, ne ntshinyi tshidibo babapesha?

¹⁴ Mbiakanyine bua tuetu kumvua musambu wa batshimunyi aba bela manyi a spiritu. Mbua kabingila kayi? Bualu, mbamanyishe pa buloba malumbuluisha avua mu tubakudi tuvua tuwule tente ne tshiji tshia Nzambi. Kadi, diitshikija tubakudi etu kadiena ditangila amu bantu nansha, bualu Yone udi utungunuka pa kumvuija ne: “Ne kunyima kua malu aa meme kumona, ne sanktuere wa ntenta wa bumanyishi wakunzuludibua mu diulu, ne banjelu muanda-mutekete bikale ne bipupu muanda-mutekete bakapatukila mu sanktuere, bavuale bilamba bia lin mukezuke ne ubalakana, ne bavuale mikaba ya ngolo pa biadi. Ne umue wa ku bifukibua binayi bidi ne muoyo wakapesha banjelu muanda-mutekete tubakudi tua ngolo muanda-mutekete tuvua tuwule tente ne tshiji tshia Nzambi udi ne muoyo kashidi ne kashidi.”​—Buakabuluibua 15:5-7.

15. Bua tshinyi kabiena bikemesha pa kumona banjelu muanda-mutekete bapatukila mu sanktuere?

¹⁵ Mu tshikondo tshia ntempelo wa bena Izalele, uvua ne bimfuanyi bia bintu bia mu diulu, amu muakuidi munene ke uvua mua kubuela mu Muaba-Mutambe-Bunsantu, udi ubikidibua apa ne: “sanktuere.” (Ebelu 9:3, 7) Udi uleja muaba udi Yehowa yeye muine usanganyibua mu diulu, muaba wa dikalaku diende. Kadi, mu muaba eu wa mu diulu, ki ng’amu Muakuidi Munene Yezu Kristo udi ne disanka dia kubuelamu ne kuimana kumpala kua Yehowa, kadi, ne banjelu pabo. (Matayi 18:10; Ebelu 9:24-26) Nenku, kabiena bikemesha pa kumona banjelu muanda-mutekete bapatukila mu sanktuere mu diulu nansha. Yehowa nkayende mmubapeshe bukenji ebu: kuitshikija tubakudi tuwule tente ne tshiji tshia Nzambi.​—Buakabuluibua 16:1.

16. (a) Ntshinyi tshidi tshileja se: banjelu muanda-mutekete badi bakumbaja menemene malu malomba bua kuenzabo mudimu wabo? (b) Ntshinyi tshidi tshileja se: bantu bakuabo badi pabo baditue mu mudimu munene wa kuitshikija tubakudi tua mu tshimfuanyi?

¹⁶ Banjelu aba mbakumbaje menemene malu malomba bua kuenza mudimu eu. Mbavuale bilamba bia lin mukezuke ne ubalakana, ebi bidi bileja ne: badi bakezuke ne badi bansantu mu nyuma, bakane ku mêsu kua Yehowa. Mbavuale kabidi mikaba ya ngolo. Pa tshibidilu, bavua bavuala mukaba bua kukumbaja mudimu kampanda. (Lewitiki 8:7, 13; 1 Samuele 2:18; Luka 12:37; Yone 13:4, 5) Nenku, banjelu mbavuale mikaba bua kukumbaja mudimu mubafundila. Kabidi, mikaba yabo n’ya ngolo. Mu tabernakle wa kale, ngolo uvua wambuluisha bua kuleja bintu bia mu diulu ne bia Nzambi. (Ebelu 9:4, 11, 12) Tudi mua kufila nkomenu eu: banjelu aba badi ne mudimu wa mushinga mukole wa kukumbaja, mudimu udi Nzambi mufile. Bakuabo badi baditua pabo mu mudimu eu munene. Bushuwa, tshimue tshia ku bifukibua binayi bidi ne muoyo tshidi tshibapesha tubakudi. Kabiyi mpata, ntshifukibua tshia kumpala tshidi ne muoyo, tshifuane nyama wa ntambue, tshidi tshimfuanyi tshia bukitu ne dikima bikena kutshimuna bua kumanyisha malumbuluisha a Yehowa.​—Buakabuluibua 4:7.

Yehowa mu sanktuere wende

17. Ntshinyi tshidi Yone utuambila pa bidi bitangila sanktuere, ne abi bidi bituvuluija tshinyi bua sanktuere wa mu Izalele wa kale?

¹⁷ Ndekelu wa bionso, bua kujikija tshitupa etshi tshia tshikena-kumona, Yone udi utuambila ne: “Ne sanktuere wakuwula tente ne muîshi bua butumbi bua Nzambi ne bua bukole buende, ne muntu nansha umue kavua mua kubuela mu sanktuere, too ne muakumbajibua bipupu muanda-mutekete bia banjelu muanda-mutekete.” (Buakabuluibua 15:8) Mu nsombelu kampanda mu miyuki ya kale ya Izalele, ditutu diakabuikila sanktuere muena-dîna ne dimueneka patoke edi dia butumbi bua Yehowa diakapumbisha bakuidi bua kubuelamu. (1 Bakalenge 8:10, 11; 2 Kulondolola 5:13, 14; fuanyikija ne Yeshayi 6:4, 5.) Bivua mu bikondo bivua Yehowa utabalela menemene mianda ivua yenzeka pa buloba.

18. Ndîba kayi dialukila banjelu muanda-mutekete kumpala kua Yehowa bua kumupesha luapolo?

¹⁸ Lelu’eu kabidi, Yehowa udi utabalela ne ntema yonso mianda idi yenzeka pa buloba. Mmusue bua banjelu muanda-mutekete bakumbaje mudimu wabo. Tudi mu tshikondo tshikole tshia dilumbuluisha, tshidi tshiumvuija mushindu’eu mu Musambu wa 11:4-6 ne: “Yehowa udi mu ntempelo wende munsantu. Yehowa​—nkuasa wende wa bumfumu udi mu diulu. Mesu ende adi àbandila, mesu ende mene adi ela nsese adi akenketa bana ba bantu. Yehowa yeye nkayende udi ukenketa muakane ne mubi, ne muntu yonso udi munange tshimvundu, anyima Wende udi umukina bushuwa. Nealokeshile bantu babi mateyi, kapia, sufre ne lupepele ludi luôsha, bu tshitupa tshia lupanza luabo.” Banjelu muanda-mutekete kabakupingana kumpala kua butumbi kua Yehowa diambedi kabayi banji kuitshikijila bantu babi bipupu muanda-mutekete to.

19. (a) Ndîyi kayi didi ditumibua, ne nnganyi udi udituma? (b) Ndîba kayi diakatuadija ditshikijibua dia tubakudi tua mu tshimfuanyi?

¹⁹ Mukenji mukuate buowa wakumvuika: “Ne meme kumvua dîyi dikole difuma ku sanktuere, divua diambila banjelu muanda-mutekete ne: ‘Ndayi ne nuitshikije tubakudi muanda-mutekete tua tshiji tshia Nzambi pa buloba.’” (Buakabuluibua 16:1) Nnganyi udi utuma dîyi edi? Udi ne bua kuikala Yehowa yeye nkayende, bualu, bukenke bua butumbi buende ne bua bukole buende bidi bipumbisha muntu mukuabu yonso bua kubuela mu sanktuere. Yehowa wakalua mu ntempelo wende wa mu nyuma mu 1918 bua kutuadija dilumbuluisha. (Malaki 3:1-5) Nenku, bidi ne bua kuikala lupolo luîpi kunyima kua tshidimu etshi, kuvuaye mutume dîyi dia kuitshikija tubakudi tua tshiji tshia Nzambi. Bushuwa, malumbuluisha adi mu tubakudi etu tua mu tshimfuanyi akatuadija kumanyishibua ne bukole buonso mu 1922. Ne kumanyishibua kuawu kutshidi kutungunuke ne kuenzeka bikole menemene lelu’eu.

Tubakudi ne diela mpungi

20. Ntshinyi tshidi tubakudi tua tshiji tshia Yehowa tusokolola ne tumanyisha, ne mmushindu kayi uditu tuitshikijibua?

²⁰ Tubakudi tua tshiji tshia Yehowa tudi tusokolola mianda ya pa buloba bujima amu bu mudi Yehowa uyimona ne tudi tumanyisha malumbuluisha ikalaye ne bua kukumbaja. Banjelu badi bitshikija tubakudi ku butuangaji bua tshisumbu tshia bena nkristo bela manyi badi pa buloba, aba badi bimba musambu wa Mozese ne wa Muan’a mukoko. Mu kumanyisha kuabo kua Bukalenge bu lumu luimpe, kasumbu ka Yone nkasokolole ne bukitu buonso malu adi mu tubakudi etu tua tshiji. (Matayi 24:14; Buakabuluibua 14:6, 7) Nenku, mukenji wabo muashila pa malu manene abidi udi wa ditalala, bualu udi umanyisha budikadidi kudi bukua-bantu kadi ne wa mvita, bualu udi umanyisha “dituku dia disombuela dia kudi Nzambi wetu.”​—Yeshayi 61:1, 2.

21. Nku tshinyi kudi bintu bifundila ditshikijila tubakudi tunayi tua kumpala tua tshiji tshia Nzambi biakanangane ne ebi bivua bipupu bitulukile pakedibua mpungi inayi ya kumpala, ne mbishilangane ku tshinyi?

²¹ Bintu bifundila ditshikijila tubakudi tunayi tua kumpala tua tshiji tshia Nzambi mbiakanangane ne ebi bivua bipupu bitulukile pakedibua mpungi inayi ya kumpala, ke buloba, mbuu, misulu ne mpokolo ya mâyi, pamue ne bikenkeshi bia mu diulu. (Buakabuluibua 8:1-12) Kadi, miadi ya mpungi ivua imanyisha bipupu bivua ne bua kudituta pa “tshia-bisatu tshimue,” kadi ditshikija dia tubakudi tua tshiji tshia Nzambi didi dikeba bipupu bidi bikuata bionso. Nenku, pavua bukua-buena-nkristo, “tshia-bisatu tshimue,” bukengeshibue diambedi mu dituku dia Mukalenge, tshitupa nansha tshimue tshia bulongolodi bua Satana ki ntshipanduke ku malumbuluisha a Yehowa mena kusumpakaja ne matuadi a bisama to.

22. Miadi ya mpungi isatu ya ndekelu ivua yoyi mishilangane ku tshinyi, ne idi misuikakaja ku tubakudi tusatu tua ndekelu tua tshiji tshia Yehowa ku tshinyi?

²² Miadi ya mpungi isatu ya ndekelu ivua mishilangane, bualu, yakabikidibua ne: diakabi. (Buakabuluibua 8:13; 9:12) Abidi a kumpala a ku malu a diakabi aa avua nangananga makeba kudi mpasu ne biluilu bia bena tubalu, kadi disatu divua dikeba kudi diledibua dia Bukalenge bua Yehowa. (Buakabuluibua 9:1-21; 11:15-19) Anu mutuabimona, tubakudi tusatu tua ndekelu tua tshiji tshikole tshia Nzambi tudi patu tutuala amue a ku malu aa, kadi ntushilangane kakese ne malu aa a diakabi asatu. Tuteyayi ntema mikole mpindieu ku masokolola a mushinga mukole adi afuma ku ditshikijibua dia tubakudi tua tshiji tshia Yehowa.

[Mêyi adi kuinshi]