Kanujimiji dinanga dinuvua nadi kumpala to
1 Yezu wakabela bena Kristo ba mu tshisumbu tshia Efeso ne: ‘Ndi nenu bualu ebu ne: nuakalekela dinanga dienu dia kumudilu.’ (Buak. 2:4) Bidi bimueneka ne: bantu ba bungi kabavua kabidi banange Yehowa bu muvuabu bamunange kumpala to. Patuvua tulonga bulelela, tuvua ne dinanga dikole bua Nzambi ne bua muntu netu, ne dinanga edi divua ditusaka bua kumanyisha bakuabu malu mapiamapia atuvua balonge ne tshisumi tshia bungi. Ntshinyi tshidi mua kutuambuluisha bua katujimiji dinanga dituvua nadi kumpala ne tshisumi bua mudimu wetu wa buambi?
2 Didilongela ne dibuela mu bisangilu: Ntshinyi tshivua tshitusake bua kunanga Nzambi ne muntu netu patutshivua tulonga bulelela? Ki mmalu onso adi atangila Yehowa atuvua balonge mu Bible anyi? (1 Yone 4:16, 19) Nunku, bua dinanga dietu ‘kudiundadi,’ tudi ne bua kutungunuka ne kumbula mu “malu male a Nzambi” bua kupeta dimanya dijalame.—Filip. 1:9-11; 1 Kol. 2:10.
3 Bidi mua kuikala bikole bua kuikala ne tshibidilu tshia kudilongela Bible mu matuku a ku nshikidilu aa adi muule ne ntatu ne malu adi afila ditanaji. (2 Tim. 3:1) Tudi ne bua kuikala ne dîba dia kubala malu a Nzambi. Kuikala ne tshibidilu tshia kubuela mu bisangilu kudi paku ne mushinga, nangananga patudi ‘tumona dituku dia Mukalenge disemena pabuipi.’—Eb. 10:24, 25.
4 Mudimu wa buambi: Kuyisha bikole lukunukunu kudi kutuambuluisha bua kulama dinanga dituvua nadi kumpala bua Nzambi. Patudi tuyisha lumu luimpe, tudi tuenda tuvuluka malu malenga adi Yehowa mutulaye, ne bualu ebu budi bukolesha ditekemena dietu ne bulama dinanga dietu. Bua tuetu kulongesha malu a Nzambi tudi ne bua kuenza makebulula bua kuumvua tuetu bine bimpe; nenku bualu ebu nebukoleshe ditabuja dietu.—1 Tim. 4:15, 16.
5 Yehowa mmukumbanyine malu onso, nansha dinanga dietu. (Buak. 4:11) Kanulekedi dinanga dienu difubidila nansha. Nuikale nudilongela Bible, nubuela mu bisangilu bionso, numanyisha bakuabu malu anudi banange ne muoyo mujima bua dinanga dienu dia ku ntuadijilu kushaladi dikole.—Lomo 10:10.