Muntu udi mua kulua muyidi ne diambuluisha dietu bonso
1 Kuvuija muntu muyidi wa Yezu ki ntshilumbu tshia muntu umue to. Yehowa udi mua kukuata mudimu ne ‘benzejanganyi nende ba mudimu’ bonso bua kuambuluisha balongi ba Bible bua kuyabu kumpala. (1 Kol. 3:6-9) Katuena tuambuluisha bantu bapiabapia anu ku mandamuna mimpe atudi tufila mu bisangilu nkayawu to, kadi kabidi ku bienzedi bietu bidi bileja ne: nyuma wa Nzambi udi utuambuluisha mu nsombelu wetu. (Yone 13:35; Gal. 5:22, 23; Ef. 4:22, 23) Mmalu kayi makuabu atudi mua kuenza bua kuambuluisha bantu bapiabapia?
2 Bena mu tshisumbu bonso: Tuetu bonso tudi mua kuleja mutudi banange bantu badi batuadijilaku kubuela mu bisangilu patudi tubakidila ne disanka ne tuyukilaku nabu kumpala ne panyima pa bisangilu. Muntu mukuabu udi wamba bua tshivuaye mumone musangu wa kumpala wakabuelaye mu bisangilu ne: “Mu dituku dimue patupu, mvua mupetangane ne bantu bavua bannange bikole nansha mumvua katshia tshiyi mubamanye, kupita kule ne kule ba mu nzambi muetu mumvua katshia ku buana. Meme kumona ne: ndi mupete bulelela.” Kunyima kua ngondo 7 katshia ku dituku adi, muntu eu wakatambula.
3 Ikala ubela kalumbandi paudi ubamona benda baya kumpala. Tshilejilu, badi bakengesha mulongi wa Bible anyi? Utu ubuela mu bisangilu bionso anyi? Ukadi wandamuna mu bisangilu anyi? Ukadi mudifundishe mu Kalasa ka Mudimu wa Nzambi, anyi mutuadije kuyisha anyi? Umuele kalumbandi bua malu aa. Nebimukoleshe mu mikolo.—Nsu. 25:11.
4 Wewe mulongeshi: Bamue bana betu mbafikishe balongi babu ba Bible ku dimanyangana ne bena mu tshisumbu bakuabu pavuabu baya ne banga bana betu ba bikadilu bimpe bua kulonga nabu. Ambila diakamue mulongi bua atuadije kubuela mu bisangilu anu nutshituadijilaku dilonga. Padiye ulua mu bisangilu, umumanyishe kudi bakuabu. Utshidi uluangana bua kulekela tshilele tshibi bu mudi dinua dia makanya anyi? Kudiku mulela wende kampanda udi kayi musue padiye ulonga Bible anyi? Mulongeshi ebeje muanetu utu mupitshile pende mu ntatu ya buena ayi ne mupite nayi bimpe.—1 Pet. 5:9.
5 Bantu bapiabapia badi dijinga ne: babatue mpanda kudi bena mu tshisumbu. Bantu bonso badi mua kubambuluisha bua kuyabu kumpala padibu badia nabu bulunda.