Ba diakalenga ng’aba badi bashala batabale!

“Monayi! Ndi ndua bu muivi. Wa diakalenga ng’eu udi ushala mutabale ne ulama bilamba biende bia pa mutu.”​—BUAKABULUIBUA 16:15, NW.

1. Bu mudi dituku dia Yehowa pabuipi, ntshinyi tshitudi mua kutekemena?

DITUKU dinene dia Yehowa didi pabuipi, ne abi bidi biumvuija mvita! Mu tshikena-kumona, mupostolo Yone wakamona “mêyi mamba ku buenzeji bua ba-demon” mafuane ndimba apatuka matangile kudi “bakalenge” bonso, peshi bakokeshi, ba pa buloba. Bua kuenza tshinyi? Ee, “bua kubasangisha bua mvita ya dituku dinene dia Nzambi Wa-Bukole-Buonso”! Yone wakasakidila ne: “Akabasangisha mu muaba udibu babikila mu tshiena-Ebelu ne: Har–Magedone.”​—Buakabuluibua 16:13-16, NW.

2. Gog wa ku Magog nnganyi, ne ntshinyi tshienzeka pabundaye bantu ba Yehowa?

² Mu katupa kîpi emu, Yehowa neasake tshitupa tshia malu a tshididi tshia ndongoluelu eu bua kubutulatshi Babilone Munene, nsangilu wa buloba bujima wa bitendelelu bia dishima. (Buakabuluibua 17:1-5, 15-17) Pashishe Gog wa ku Magog, Satana Diabolo mupuekesha mu mutumba wa buloba, nealombole bisumbu biende bua kubunda ne madikolela onso bantu ba Yehowa badi mu ditalala, bamueneka bu badi kabayi wa kubasungila. (Yehezekele 38:1-12) Kadi Nzambi neatumike bua kuambuluisha bantu bende. Abi nebifikishe ku dibudika dia “dituku adi dinene dia Yehowa, didi dikuatshisha bantu buôwa.”​—Yoele 2:31; Yehezekele 38:18-20.

3. Mmunyi muudi mua kumvuija malu madianjila kuamba mu Yehezekele 38:21-23?

³ Eyowa, Yehowa neambuluishe bantu bende ne neabutule bishadile bia ndekelu bionso bia ndongoluelu wa Satana patudi tufika ku nsombelu wa buloba bujima mubikila ne: Har–Magedone, peshi Armagedone. Bala mêyi a buprofete a Yehezekele 38:21-23, ne fuanyikija malu aa mu lungenyi. Yehowa udi utumika bimpe ne bukole buende bua kutuala mvula mikole ya bipupu, mabue a mvula mabutudi, kapia ka mbutula, bipupu bia masama bia lufu. Tshipapu tshia buôwa tshidi pa buloba bujima padi midìtà ya Gog yedibua mu dikondakana, iluishangana munkatshi muayi. Baluishi kayi bonso ba Nzambi Wa-Bukole-Buonso bàdì bapanduka badi bashipibua bu mudi Yehowa utumika ne mishindu ikena ya pa tshibidilu bua kupandisha basadidi bende. Padi “dikenga dinene” didianjila kumanyisha dijika, kakuakushala tshintu nansha tshimue ku ndongoluelu wa Satana ukena unemeka Nzambi. (Matayo 24:21) Kadi, nansha mu mpalu yabu ya lufu, bantu babi nebamanye mukebeshi wa dikenga diabu. Nzambi wetu mutshimunyi udi wamba yeye muine se: “Nebamanye ne, Meme ndi Yehowa.” Malu aa a dikema neenzeke mu matuku etu aa, mu tshikondo tshia dikalaku dia Yezu.

Dilua bu muivi

4. Mmu mushindu kayi walua Yezu kubutula ndongoluelu eu mubi wa malu?

⁴ Mukalenge mutumbishibue Yezu Kristo wakamba ne: “Monayi! Ndi ndua bu muivi.” Dilua difuane dia muivi didi ne bua kuikala dia tshintuluntulu, pa dîba dikena ditekemena, padi bantu ba bungi mu tulu. Padi Yezu ulua bu muivi bua kubutula ndongoluelu eu mubi, neakube aba badi bushuwa batabale. Wakambila Yone se: “Wa diakalenga ng’eu udi ushala mutabale ne ulama bilamba biende bia pa mutu, bua kendi butaka ne bantu kabamonyi bundu buende.” (Buakabuluibua 16:15, NW) Mêyi au adi umvuija tshinyi? Ne mmunyi mutudi mua kushala batabale mu nyuma?

5. Ndilongolola kayi dia mudimu wa mu ntempelo divuaku tshikondo tshivua Yezu pa buloba?

⁵ Pa tshibidilu, kabatu bashiya nsentedi butaka padiye ulala dîba dia mudimu. Kadi abi bivua bienzeka mu ntempelo mu Yeruzaleme tshikondo tshivua Yezu pa buloba, ne bisumbu bia bakuidi ne bena Lewi bivua bisadila mu ntempelo mu Yeruzaleme. Bivua mu siekele wa 11 K.B.B. muakalongolola Mukalenge Davidi nkama ya bakuidi ba mu Izalele ne binunu bia bambuluishi babu bena Lewi mu bulongolodi kampanda buenza ne bisumbu 24. (1 Kulondolola 24:1-18) Tshisumbu tshionso tshia bena mudimu bashidimuna bapite pa tshinunu tshivua tshipita watshi musangu mu dikumbaja bitupa bishilangane bia mudimu wa mu ntempelo misangu mipite pa ibidi ku tshidimu munkatshi mua lumingu lumue lujima ku musangu. Kadi, mu Difesto dia Mitàndà, bisumbu bionso 24 bivuapu bua kuenza mudimu. Diambuluisha dia pa mutu divua kabidi dikengedibua mu mafesto a Pasaka.

6. Nku bualu kayi kuvua Yezu mua kuikala mutume meji pakambaye ne: “Wa diakalenga ng’eu udi ushala mutabale ne ulama bilamba biende bia pa mutu”?

⁶ Pakamba Yezu ne: “Wa diakalenga ng’eu udi ushala mutabale ne ulama bilamba biende bia pa mutu,” uvua mua kuikala mutume meji ku ngenzelu kampanda mulonda tshikondo atshi uvua utangila bunsentedi ku ntempelo. Mishnah wa bena Yuda udi wamba ne: “Bakuidi bavua bashala batabale mu miaba isatu mu Ntempelo: mu Tshibambalu tshia Abtinas, mu Tshibambalu tshia Ludimi lua kapia, ne mu Tshibambalu tshia Ditshuwa; ne bena Lewi [bavua] mu miaba makumi abidi ne umue: batanu ku biibi binene bitanu bia ku Mukuna wa Ntempelo, banayi mu matumba ende anayi a munda, batanu ku bitanu bia ku biibi binene bia Lubanza lua Ntempelo, banayi ku matumba ende anayi a pambelu, ne umue ku Tshibambalu tshia Milambu, ne umue ku Tshibambalu tshia Tshilamba tshikudika, ne umue panyima pa muaba wa Tshishikaminu tshia Luse [pambelu pa tshimanu tshia kumfundu kua Mutambe-Bunsantu]. Mfumu wa Mukuna wa Ntempelo uvua ne tshibidilu tshia kupita kudi nsentedi yonso ne bimunyi bitemesha kumpala kuende, ne pavua nsentedi kayi yonso kayi wimana kuulu ne umuambila ne: ‘O mfumu wa Mukuna wa Ntempelo, ditalala dikale kuudi!’ ne pavuabi bimueneka patoke se: uvua mulale, uvua umukuma ne lukodi luende, ne uvua ne bukenji bua kuosha bivualu biende.”​—Mishnah, Middoth (“Bipiminu”), 1, bikoso 1-2, mukudimuna kudi Herbert Danby.

7. Bua tshinyi bakuidi ne bena Lewi bàvuà mu bunsentedi ku ntempelo bavua bakengela kushala batabale?

⁷ Bena Lewi ne bakuidi ba bungi ba mu tshisumbu tshivua mu mudimu bavua bashala batabale butuku bujima bua kulama ne kukandika muntu yonso uvua kayi mukezuke bua kubuela mu mbanza ya ntempelo. Bu muvua “mfumu wa Mukuna wa Ntempelo,” peshi “ka[p]ita ka ntempelo,” wenza mpungi ya dipita mu miaba yonso 24 munkatshi mua ditshisha butuku, nsentedi yonso uvua ne bua kushala mutabale ku muaba wende bu bikalaye kavua musue kusanganyibua mulekele bunsentedi.​—Bienzedi 4:1.

8. Bilamba bia pa mutu bia mu tshimfuanyi bia bena nkristo mbinganyi?

⁸ Bena nkristo bela manyi pamue ne basadidi nabu badi bakengela kushala batabale mu nyuma ne kulama bilamba biabu bia pa mutu bia mu tshimfuanyi. Ebi mbijadiki bia pambelu bia ditekibua dietu ku mudimu wa mu ntempelo wa Yehowa wa mu nyuma. Mu dijingulula dia bualu ebu, tudi ne spiritu munsantu wa Nzambi, peshi bukole buenzeji, bua kutuambuluisha bua kuenza midimu yetu ne kukumbaja masanka etu a mudimu bu bamanyishi ba Bukalenge. Dipona mu tulu mu miaba yetu ya midimu bu ba-ministre ba Nzambi didi mua kututeka mu njiwu ya dikuatshibua kudi Yezu Kristo, Kapita ka ntempelo munene wa mu nyuma. Tuetu balale tulu tua mu nyuma tshikondo atshi, netuvuudibue bilamba mu ngakuilu wa mu tshimfuanyi ne kuoshisha bilamba bietu bia mu tshimfuanyi. Nenku, mmunyi mutudi mua kushala batabale mu nyuma?

Mushindu utudi mua kushala batabale

9. Bua tshinyi dilonga dia Bible ku diambuluisha dia mikanda ya Buena-nkristo ndia mushinga munene?

⁹ Dilonga dia Mifundu dia tshisumi ku diambuluisha dia mikanda ya Buena-nkristo ntshisonsodi bua kutabala kua mu nyuma. Dilonga bu nunku neditukumbaje bua mudimu, nedituambuluishe bua kutantamena ntatu, ne nedituleje njila wa diakalenga dia tshiendelele. (Nsumuinu 8:34, 35; Yakobo 1:5-8) Dilonga dietu didi ne bua kuikala diondoke ne didi dilubuluka. (Ebelu 5:14–6:3) Biakudia bimpe bidia pa tshibidilu bidi mua kuambuluisha bua kutulama batabale ne badimuke. Bidi mua kukuba ku bufuba budi mua kuikala tshimanyinu tshia didiishibua dibi. Katuena ne pa kubingila bua kuikala badiishibue bibi ne tubungila mu nyuma, bualu Nzambi udi upetesha dibodiama dia biakudia bia mu nyuma ku butuangaji bua “mupika wa lulamatu ne wa budimu” muela manyi. (Matayo 24:45-47, NW) Didia dia pa tshibidilu dia biakudia bia mu nyuma mu dilonga dia muntu pa nkayende ne dia mu dîku ng’umue mushindu wa kushala batabale ne kuikala “balenge mu ditabu[j]a.”​—Tito 1:13.

10. Mmunyi mudi mpuilu minene ne mikese, ne bisangilu bia bena nkristo bituambuluisha bua kushala batabale mu nyuma?

¹⁰ Mpuilu minene ne mikese, ne bisangilu bia bena nkristo bidi biambuluisha bua kutulama batabale mu nyuma. Bidi bipetesha dikankamija ne mishindu ya “kusakangana ku dinanga ne midimu milenga.” Tudi nangananga ne bua kudisangisha pa tshibidilu bu mutudi ‘tumona dituku dienda disemena pabuipi.’ Dituku adi didi bushuwa pabuipi. ‘Ndituku dia Yehowa,’ diabingishaye bumfumu bukulu buende. Bikala bushuwa dituku adi ne mushinga kutudi​—ne didi ne bua kuikala nawu—​‘katuakulekela didisangisha dietu popamue.’​—Ebelu 10:24, 25; 2 Petelo 3:10, NW.

11. Bua tshinyi tudi mua kuamba ne: mudimu wa bena nkristo ng’wa mushinga mukole bua kutabala kua mu nyuma?

¹¹ Didifila ne muoyo mujima mu mudimu wa Buena-nkristo didi ne mushinga bua kutabala kua mu nyuma. Didifila dia pa tshibidilu ne dia lukunukunu mu diyisha lumu luimpe didi ditulama badimuke. Mudimu wetu udi utupetesha mishindu mivule ya kuyukila ne bantu pa Dîyi dia Nzambi, Bukalenge buende, ne malongolola ende. Bidi bisankisha bua kufila bumanyishi ku nzubu ne ku nzubu, kuenza makumbulula, ne kulombola malonga a Bible a kumbelu mu mikanda bu eu wa Dimanya didi difikisha ku muoyo wa kashidi. Bakulu ba mu Efeso wa kale bakajadika se: Paulo uvua mubalongeshe ‘padi bantu bunguile, ne ku nzubu ne ku nzubu.’ (Bienzedi 20:20, 21) Bushuwa, bamue Bantemu ba Yehowa ba lulamatu badi ne masama makole adi akepesha mu mushindu kampanda mudimu wabu, kadi badi bapeta mishindu ya kuambila bakuabu malu adi atangila Yehowa ne bumfumu buende ne bapetelaku disanka dinene mu dienza nunku.​—Musambu 145:10-14.

12, 13. Mbua tubingila kayi butudi ne bua kuepuka dinekesha mu didia ne mu dinua?

¹² Diepuka dinekesha [mu malu onso] nedituambuluishe bua kushala batabale mu nyuma. Pakakulaye bua dikalaku diende, Yezu wakabela bapostolo bende ne: ‘Nudilame bimpe, bua mitshima yenu kayinemi mu mudiu ne dibuluka dia maluvu ne malu a pa buloba, ne bua dituku adi kadilu kunudi lukasa bu buteyi. Bualu bua dituku adi nedilue kudi bonso badi bashikame pa buloba buonso.’ (Luka 21:7, 34, 35) Mudiò ne dikuatshika dia maluvu mbibengangane ne mêyi-maludiki a mu Bible. (Dutelonome 21:18-21) Nsumuinu 23:20, 21 udi wamba ne: “Kuikadi munkatshi mua banu ba baluvu, anyi munkatshi mua bena lumpukusu. Bualu bua mukuatshiki wa maluvu ne muena lumpukusu nebabuele mu bu[p]ele; tulu netuluatshishe muntu bilulu bisunsuke.”​—Nsumuinu 28:7.

¹³ Kadi, nansha bikala didia dipitshisha ne dinua dikole kabiyi bifike kuine aku, bidi mua kuvuija muntu mubungidi wa tulu, nansha mene mufuba ne mulenguludi mu dienza disua dia Nzambi. Pa tshibidilu, kutu masumpakana adi atangila nsombelu wa dîku, makanda a mubidi, ne bikuabu. Kadi, netuikale bena diakalenga bituateka bipatshila bia Bukalenge pa muaba wa kumpala mu nsombelu ne bituikala ne dieyemena dia se: Tatuetu wa mu diulu neatupeteshe bitudi tukengela. (Matayo 6:25-34) Tshianana, “dituku adi” nedituluile bu “buteyi,” pamu’apa bu musubula musokoka bimpe udi mua kutukuata katuyi bamanye anyi bu tshidimbu, bu mudi ebi bitu bikoka ne pashishe bikuata nyama ikena midimuke. Bualu ebu kabuakuenzeka bituashala batabale, bamanye menemene se: tudi mu ‘tshikondo tshia ku nshikidilu.’​—Danyele 12:4.

14. Bua tshinyi tudi ne bua kudifila mu masambila a muoyo umue?

¹⁴ Masambila a muoyo umue ndiambuluisha dikuabu bua kutabala kua mu nyuma. Mu mulayi wende munene, Yezu wakabela kabidi ne: ‘Tabalayi misangu yonso, nutendelele Nzambi mua kuikala ne bukole bua kupanduka mu malu aa onso alua, ne bua kuimana ku mêsu kua Muana wa muntu.’ (Luka 21:36) Ee, tusambilayi bua tumone mua kuikala misangu yonso ku luseke lua Yehowa ne kupeta dianyishibua padi Yezu, Muana wa muntu, ulua bua kubutula ndongoluelu eu mubi wa malu. Bua diakalenga dietu tuetu bine ne dia bena kuitabuja netu batudi tusambila bualu buabu, tudi tukengela bua ‘kuikala batabale mu disambila.’​—Bena Kolose 4:2, MMM; Efeso 6:18-20.

Tshikondo tshidi tshishiikila

15. Ntshinyi tshidi tshikumbajibua ku mudimu wetu bu bayishi ba buakane?

¹⁵ Mu dindila dietu dia dituku dinene dia Yehowa, kakuyi mpata tudi tujinga kuenza bionso bitudi mua kuenza mu mudimu wende. Bituamulomba ne muoyo umue bua bualu ebu, badi mua kutunzuluila ‘tshiibi tshinene tshia kuenza mudimu.’ (1 Kolinto 16:8, 9) Mu tshikondo tshijadika kudi Nzambi, Yezu nealumbuluishe ne neatapulule “mikoko” ya buakane miakanyine muoyo wa kashidi ne “mbuji” ikena ya Nzambi miakanyine kabutu ka tshiendelele. (Yone 5:22) Ki ntuetu badi batapulula mikoko ne mbuji nansha. Kadi mudimu wetu bu bayishi ba buakane mpindieu udi upetesha bantu mushindu wa kusungula nsombelu wa dienzela Nzambi mudimu ne kupeta nenku ditekemena dia kuikala batapulula bua muoyo padi Yezu ‘ulua mu butumbi buende.’ Buîpi bua tshikondo tshishala bua ndongoluelu eu wa malu budi bukolesha dikengela dia mudimu muenza ne muoyo mujima patudi tuenda tukeba aba badi “badiakaje bimpe bua muoyo wa kashidi.”​—Matayo 25:31-46; Bienzedi 13:48, NW.

16. Bua tshinyi tudi ne bua kuikala bamanyishi ba Bukalenge ba lukunukunu?

¹⁶ Tshikondo tshiakashiikila bua bantu ba mu matuku a Nowa, ne netshishiikile mu katupa kîpi emu bua ndongoluelu eu wa malu. Pa nanku tuikalayi bamanyishi ba Bukalenge ba lukunukunu. Mudimu wetu wa diyisha udi wenda usonga nkela, bualu ku tshidimu tshionso bantu nkama ya binunu badi batambula bu tshimanyinu tshia diditshipa diabu kudi Nzambi. Badi balua bena mu bulongolodi bubenesha bua Yehowa​—‘bantu bende ne mikoko ya mu mpata wende.’ (Musambu 100:3) Ndisankapu kayi pa kudifila mu mudimu wa diyisha Bukalenge udi utuadila bantu bavule batambe ditekemena kumpala kua ‘dituku dinene dia Yehowa, didi dikuatshisha bantu buôwa’!

17, 18. (a) Patudi tuyisha, ndiandamuna kayi ditudi ne bua kutekemena kudi bamue? (b) Ntshinyi tshidi tshijadikibue tshiatulukila baseki?

¹⁷ Bu Nowa, tudi ne dikuatshisha ne bukubi bia kudi Nzambi. Eyowa, bantu, banjelu bavuale mibidi ya bantu, ne ba-Nefilime bavua ne bua kuikala baseke mukenji wa Nowa, kadi abi kabiakamuimanyika nansha. Lelu’eu, bamue badi baseka patudi tuleja tshijadiki tshinene tshia se: tudi mu ‘matuku a ku nshikidilu.’ (2 Timote 3:1-5) Tuseku bu nunku tudi mu dikumbana dia mulayi wa mu Bible udi utangila dikalaku dia Kristo, bualu Petelo wakafunda ne: “Mu matuku a ku nshikidilu, nekulue baseki ne tuseku tuabu, benza malu bilondeshile majinga abu buobu bine ne bamba ne: ‘Dikalaku diende edi dilaya didi kuepi? Bualu, katshia ku dituku diakalala bankambua betu mu lufu, malu onso adi atungunuka anu bu ku tshibangidilu tshia bufuki.’”​—2 Petelo 1:16; 3:3, 4, NW.

¹⁸ Baseki ba lelu badi mua kuela meji ne: ‘Tshintu nansha tshimue ki ntshishintuluke katshia ku bufuki. Muoyo udi utungunuka, ne bantu bikala badia, banua, baselangana, ne bakolesha mêku. Nansha Yezu muikaleku, kakukumbaja dilumbuluisha mu tshikondo tshianyi.’ Mmunyipu mudibu badishima! Pikalabu kabayi bafue ku bimue bikebeshi bia lufu mu tshikondo etshi, dituku didi dikuatshisha buôwa dia Yehowa nedilue kubabutula butubutu, anu bu muvua kabutu ku Mvula munene kajikije tshipungu tshibi tshia mu matuku a Nowa.​—Matayo 24:34.

Mu mishindu yonso, tushalayi batabale!

19. Mmunyi mutudi ne bua kuangata midimu yetu ya dienza bayidi?

¹⁹ Bituikala baditshipe kudi Yehowa, katuladishibu nansha kakese kudi ngelelu wa meji ukena muakane. Etshi ntshikondo tshia kushala batabale, kuleja ditabuja mu milayi ya Nzambi, ne kukumbaja mudimu wetu mutuomekela wa ‘kuvuija ba bisamba bionso bayidi.’ (Matayo 28:19, 20) Bu mudi ndongoluelu eu mutangile ku nshikidilu wende wa ndekelu, katuena ne bua kuikala ne disanka dikuabu dinene kupita edi dia kusadila Yehowa Nzambi ku bulombodi bua Yezu Kristo ne kudifila mu mudimu wa pa buloba bujima wa diyisha “lumu luimpe elu lua buk[a]lenge” kumpala kua nshikidilu kuluaye.​—Matayo 24:14; Mâko 13:10.

20. Ntshilejilu kayi tshiakashiya Kaleba ne Yoshua, ne nsombelu wabu udi uleja tshinyi buetu tuetu?

²⁰ Bamue ba ku bantu ba Yehowa mbamusadile munkatshi mua makumi a bidimu, pamu’apa matuku abu onso a muoyo. Ne nansha bituikala tutshifumina ku ditaba ntendelelu mulelela, tuikalayi bu Kaleba, muena Izalele “wakalonda Yehowa bulelela.” (Dutelonome 1:34-36) Yeye ne Yoshua bavua badiakaje bimpe bua kubuela mu Buloba Bulaya katupa kîpi kunyima kua dipikudibua dia Izalele ku bupika bua bena Ejipitu. Kadi, bena Izalele bakulumpe mu tshi-bungi bakabula ditabuja ne bavua ne bua kupitshisha bidimu 40 mu tshipela, muakafuilabu. Kaleba ne Yoshua bakatantamena ntatu mikole pamue nabu mu tshikondo atshi tshionso, kadi ndekelu wa bionso bantu babidi abu bakabuela mu buloba bua dilaya. (Nomba 14:30-34; Yoshua 14:6-15) ‘Bitualonda Yehowa bulelela’ ne kushala batabale mu nyuma, netupete disanka dia kubuela mu bulongolodi bupiabupia bulaya kudi Nzambi.

21. Mmalu kayi atuamona bituashala batabale mu nyuma?

²¹ Tshijadiki tshidi tshileja patoke se: tudi mu tshikondo tshia ku nshikidilu ne se: dituku dinene dia Yehowa didi pabuipi. Etshi ki ntshikondo tshia kubungila tulu ne kulengulula dienza disua dia Nzambi. Netubeneshibue anu bituashala batabale mu nyuma ne bitualama bilamba bietu bidi bitusunguluja bu ba-ministre bena nkristo ne basadidi ba Yehowa. Dipangadija dietu dikale dia ‘kushala batabale, bashindame mu ditabuja, kutungunuka bu bantu mene, kudiunda bikole.’ (1 Kolinto 16:13, NW) Bu basadidi ba Yehowa, yonso wa kutudi ikale mushindame ne mukole muoyo. Ke patuashisha kuikala munkatshi mua aba badi badiakaje padi dituku dinene dia Yehowa dituta, mu disadila ne lulamatu luonso mu milongo ya bantu ba diakalenga badi bashala batabale.

Newandamune munyi?

◻ Mmunyi muudi mua kumvuija bilamba bietu bia pa mutu bia mu tshimfuanyi, ne mmunyi mutudi mua kubilama?

◻ Ng’imue mishindu kayi itudi mua kushala batabale mu nyuma?

◻ Bua tshinyi tudi ne bua kutekemena dipetangana ne baseki, ne mmunyi mutudi ne bua kubangata?

◻ Mmunyi mutudi ne bua kuangata mudimu wetu wa dienza bayidi mu matuku aa a ku nshikidilu?

[Lungenyi lunene lua mu dibeji 16]

Bena nkristo badi ne spiritu munsantu wa Nzambi udi ubambuluisha bua kushala batabale ne kukumbaja majitu abu

[Tshimfuanyi mu dibeji 15]

Udi mupangadije bua kushala mutabale mu nyuma ne kulama bilamba biebe bia pa mutu bia mu tshimfuanyi anyi?