Udi mudiakaje bua dituku dia Yehowa anyi?

‘Dituku dinene dia Yehowa didi pabuipi; didi pabuipi ne didi didiendesha lukasa!’​—SEFANYA 1:14.

1. Mmunyi mudi Mifundu yumvuija dituku dia Yehowa?

‘DITUKU dinene dia Yehowa, didi dikuatshisha bantu buôwa,’ nedilue mu katupa kîpi emu pa ndongoluelu eu mubi wa malu. Mifundu idi yumvuija dituku dia Yehowa bu dituku dia mvita, mîdima, luonji, dikenga, disumpakana, miyenge, ne kabutu. Kadi, nekuikale bapanduki, bualu “muntu yonso watela dina dia Yehowa neasungidibue.” (Yoele 2:30-32; Amosa 5:18-20) Eyowa, Nzambi neabutule tshikondo atshi bena lukuna bende ne neapandishe bantu bende.

2. Bua tshinyi tudi ne bua kuikala ne ngumvuilu wa mitalu bua dituku dia Yehowa?

² Baprofete ba Nzambi bavua bangata dituku dia Yehowa ne ngumvuilu wa mitalu. Tshilejilu, Sefanya wakafunda ne: ‘Dituku dinene dia Yehowa didi pabuipi; didi pabuipi ne didi didiendesha lukasa!’ (Sefanya 1:14) Nsombelu mmutambe kuikala wa mitalu lelu’eu bualu Mfumu Mukumbaji wa malumbuluisha a Nzambi, Mukalenge Yezu Kristo, ukadi pa ‘kuasa muele wende pa mikaba ne kuluila bulelela, bupole ne buakane.’ (Misambo 45:3, 4, MMM) Udi mudiakaje bua dituku adi anyi?

Bavua ne matekemena manene

3. Mmatekemena kayi avua nawu bamue bena nkristo bena Tesalonike, ne mbua tubingila kayi tubidi buvuabu mu ntupakanyi?

³ Bavule bavua ne matekemena akapanga kukumbana pa bidi bitangila dituku dia Yehowa. Bamue bena nkristo ba kumpala ba mu Tesalonike bakamba ne: ‘Dituku dia Mukalenge dikadi apa!’ (2 Tesalonike 2:2) Kadi kuvua tubingila tubidi tunene tua muvua dituku adi kadiyi pabuipi. Pa kutela kamue ka ku tuotu etu, mupostolo Paulo wakamba ne: ‘Patshidibu bamba ne: tudi ne ditalala, katuyi ne bualu; apu dibutuka dia tshintuluntulu dilualua kudibu.’ (1 Tesalonike 5:1-6) Mu ‘tshikondo etshi tshia ku nshikidilu,’ tuetu bine tudi tuindila dikumbana dia mêyi au. (Danyele 12:4) Bena Tesalonike kabidi kabavua ne tshijadiki tshikuabu tshia se: dituku dinene dia Yehowa dikavua difike, bualu Paulo wakabambila ne: “Kadiena dilua anu bialua [“butontolodi,” NW] diambedi.” (2 Tesalonike 2:3) Pakafunda Paulo mêyi au (bu mu 51 B.B.), “butontolodi” bua mu Buena-nkristo bulelela kabuvua buanji kudiunda menemene. Lelu’eu, tudi tubumona mudibu bushindame mu Bukua-buena-nkristo. Kadi, nansha muakapanga kukumbana matekemena abu, bela manyi abu ba lulamatu ba mu Tesalonike, bakatungunuka ne kusadila Nzambi ne lulamatu luonso too ne ku lufu, bakapeta ndekelu wa bionso difutu diabu mu diulu. (Buakabuluibua 2:10) Tuetu petu netufutshibue bituashala ne lulamatu mu dindila dietu dia dituku dia Yehowa.

4. (a) Dituku dia Yehowa ndisuikakaja ku tshinyi mu 2 Tesalonike 2:1, 2? (b) Mmuenenu kayi ivua nayi badibu babikila ne: Batatu ba Ekleziya pa dipingana dia Kristo ne malu makuabu adi masuikakajaku?

⁴ Bible udi usuikakaja “dituku dinene dia Yehowa” ku “dikalaku dia Mfumu wetu Yezu Kristo.” (2 Tesalonike 2:1, 2, NW) Badibu babikila ne: Batatu ba Ekleziya bavua ne ngenyi kabukabu pa dipingana dia Kristo, dikalaku diende, ne Bukokeshi buende bua Bidimu Tshinunu. (Buakabuluibua 20:4) Mu siekele muibidi B.B., Papias wa ku Hierapolis uvua mulame mu lungenyi matekemena a bufuke bua dikema bua buloba mu Bukokeshi bua Bidimu Tshinunu bua Kristo. Justin Martyr wakakula misangu ne misangu bua dikalaku dia Yezu ne uvua mutekemene bua Yeruzaleme muasulula kuikalaye tshishikaminu tshia Bukalenge Buende. Irénée wa ku Lyon wakalongesha ne: kunyima kua dibutudibua dia Ampire wa bena Roma, Yezu uvua ne bua kumueneka ne mubidi, kusuika Satana, ne kukokesha mu Yeruzaleme wa pa buloba.

5. Ntshinyi tshidi bamue bashikuluji bambe pa “Dipingana dia tshia kabidi” dia Kristo ne pa Bukokeshi buende bua Bidimu Tshinunu?

⁵ Muena malu a kale Philip Schaff wakabambisha ne: “bualu budi butamba kukoka ntema” mu lupolo lua tshikondo kumpala kua Tshisangilu tshia bepiskopo tshia ku Nicée mu 325 B.B. buvua “ditabuja dia bukokeshi budi bumueneka bua Kristo mu butumbi pa buloba pamue ne bansantu babiishibue ku lufu munkatshi mua bidimu tshinunu, kumpala kua dibiishibua ne dilumbuluisha dia bantu bonso.” Nkonga-miaku kampanda udi wamba ne: “Tertullien, Irénée, ne Hippolyte batshidi bakeba Dipingana dia lukasa [dia Yezu Kristo]; kadi ne Batatu ba ku Alexandrie tudi tubuela mu ngelelu wa meji mupiamupia. . . . Ne disunguluja dia Milenyuma bu tshikondo tshia Ekleziya wa badi ne muoyo dienza kudi Augustin, Dipingana dia tshia kabidi didi diladikijibua kule mu matuku atshilualua.”​—A Dictionary of the Bible, mupatula kudi James Hastings.

Dituku dia Yehowa ne dikalaku dia Yezu

6. Bua tshinyi katuena ne bua kukoma ne: dituku dia Yehowa ditshidi mutantshi mule?

⁶ Ngenyi ya ntupakanyi mmifikishe ku diteketa mu mikolo, kadi katuedi meji ne: dituku dia Yehowa ditshidi mutantshi mule. Dikalaku dia Yezu dikena dimueneka, dìdì disuikakajaku bilondeshile Mifundu, dikadi dituadije. Tshibumba tshia Nsentedi ne mikanda mikuabu ya Bantemu ba Yehowa mbifile misangu mivule tshijadiki tshia mu Mifundu tshia se: dikalaku dia Kristo diakatuadija mu tshidimu tshia 1914.a Nenku, ntshinyi tshiakamba Yezu bua dikalaku diende?

7. (a) Mbimue bimuenekelu kayi bidiku bia tshimanyinu tshia dikalaku dia Yezu ne nkomenu wa ndongoluelu eu wa malu? (b) Mmunyi mutudi mua kupandishibua?

⁷ Dikalaku dia Yezu diakalua tshiena-bualu tshia diyukidilangana katupa kîpi kumpala kua lufu luende. Pakamanabu kumumvua udianjila kuamba bua dibutudibua dia ntempelo wa mu Yeruzaleme, bapostolo bende Petelo, Yakobo, Yone, ne Andele bakakonka ne: “Ntshikondo kayi tshikala malu aa, ne ntshinyi tshikala tshimanyinu tshia dikalaku diebe ne tshia nkomenu wa ndongoluelu eu wa malu?” (Matayo 24:1-3, NW; Mâko 13:3, 4) Mu diandamuna, Yezu wakadianjila kuakula bua mvita, biyole bia nzala, bikumina, ne bikuabu bimuenekelu bia “tshimanyinu” tshia dikalaku diende ne tshia nkomenu wa ndongoluelu eu wa malu. Wakamba kabidi ne: ‘Wananukila too ne ku nshikidilu neasungidibue.’ (Matayo 24:13) Netusungidibue bituananukila ne lulamatu luonso too ne ku ndekelu wa muoyo wetu wa mpindieu anyi too ne ku ndekelu wa ndongoluelu eu mubi.

8. Kumpala kua nshikidilu wa ndongoluelu wa bena Yuda, ntshinyi tshivua ne bua kukumbana, ne ntshinyi tshidi tshienjibua lelu mu muanda eu?

⁸ Kumpala kua nshikidilu, tshimue tshimuenekelu tshia mushinga wa pa buawu tshia dikalaku dia Yezu tshivua ne bua kukumbana. Bua bualu buatshi, wakamba ne: “Lumu luimpe elu lua bukalenge neluyishibue pa buloba buonso buasa bu bumanyishi kudi matunga onso; ne pashishe nshikidilu nealue.” (Matayo 24:14, NW) Kumpala kua bena Roma kubutulabu Yeruzaleme ne ndongoluelu wa malu wa bena Yuda kujikaye mu 70 B.B., Paulo uvua mua kuamba ne: lumu luimpe “luakambibua munkatshi mua bifukibua bionso muinshi mua diulu.” (Kolosai 1:23) Kadi, lelu’eu, mudimu wa diyisha mutambe kualabala udi wenda wenjibua kudi Bantemu ba Yehowa “pa buloba buonso buasa.” Mu bidimu bikese bishale ebi, Nzambi mmunzulule njila bua bumanyishi bunene kufidibuabu ku Mputu wa ku Est. Ne biapu bia dipatuila mikanda pamue ne nzubu mikuabu pa buloba bujima, bulongolodi bua Yehowa mbudiakaje bua mudimu mubandile, nansha mene mu “teritware ukena muanji kulenga.” (Lomo 15:22, 23, NW) Mutshima webe udiku ukusaka bua kuenza muebe muonso mua kuenza mu difila bumanyishi kumpala kua nshikidilu kuluaye anyi? Pikalabi nanku, Nzambi udi mua kukukolesha bua wewe kupeta tshiebe tshitupa tshia difutu mu mudimu utshidi kumpala.​—Filipoi 4:13; 2 Timote 4:17.

9. Mmuanda kayi wakamba Yezu, bu mudibi bifunda mu Matayo 24:36?

⁹ Mudimu mudianjila kumanyisha wa diyisha Bukalenge ne bikuabu bimuenekelu bia tshimanyinu tshia dikalaku dia Yezu bidi bienda bikumbana mpindieu mene. Nenku, nshikidilu udi pabuipi bua ndongoluelu eu mubi wa malu. Bulelela, Yezu wakamba ne: ‘Bua dituku adi ne pa dîba adi kakuena muntu udi mumanye, banjelu menemene ba mu diulu kabena bamanye, Muana kêna mumanye, anu Tatu udi mumanye.’ (Matayo 24:4-14, 36) Kadi mulayi wa Yezu udi mua kutuambuluisha bua kudiakaja bua ‘dituku adi ne pa dîba adi.’

Bavua badiakaje

10. Mmunyi mutudi bamanye se: kudi mushindu wa kushala batabale mu nyuma?

¹⁰ Bua kupanduka ku dituku dinene dia Yehowa, tudi ne bua kushala batabale mu nyuma ne bashindame bua ntendelelu mulelela. (1 Kolinto 16:13) Tudi bamanye se: ditantamena bu nunku didi mua kuenzeka, bualu dîku kampanda dia buena Nzambi diakenza nanku ne diakapanduka ku Mvula munene wakabutula bantu babi mu 2370 K.B.B. Pa kufuanyikija tshikondo atshi ne dikalaku diende, Yezu wakamba ne: “Anu bu muvua matuku a Nowa, nenku ke muikala dikalaku dia Muana wa muntu. Bualu bu muvuabu mu matuku au a kumpala kua mvula munene, badia ne banua, balume basela ne bakaji bafidibua ku mabaka, too ne dituku diakabuela Nowa mu buâtu; ne kabakateya ntema too ne pakalua mvula munene ne kubabutula bonso, nenku ke muikala dikalaku dia Muana wa muntu.”​—Matayo 24:37-39, NW.

11. Nnjila kayi wakalonda Nowa nansha muvuaku tshinyangu mu tshikondo tshiende?

¹¹ Anu bu tuetu, Nowa ne dîku diende bavua mu bulongolodi bua tshinyangu. Banjelu ba bupidia, “bana ba Nzambi mulelela” bavua bavuale mibidi ya bumuntu ne bangate bakaji bakalelabu nabu ba-Nefilime bavuambudi​—bantu ba mpolondo bakavuija kakuyi mpata nsombelu mutambe kuikala wa tshinyangu. (Genese 6:1, 2, 4, NW; 1 Petelo 3:19, 20) Kadi, ‘Nowa wakenda ne Nzambi’ mu ditabuja. Uvua ‘muakane tshishiki [“munkatshi mua bantu ba,” NW] mu tshikondo tshiende’​—tshipungu tshibi tshia mu matuku ende. (Genese 6:9-11) Ne dieyemena dia muoyo umue kudi Nzambi, tudi mua kuenza bia muomumue mu bulongolodi ebu bua tshinyangu ne bubi mutudi tuindila dituku dia Yehowa.

12. (a) Kusakidila ku dienza buâtu, mmudimu kayi wakenza Nowa? (b) Mmunyi muakandamuna bantu ku diyisha dia Nowa, ne mbipeta kayi bivuaku bua bualu buabu?

¹² Nowa mmumanyike bimpe bu muibaki wa buâtu bua dikubibua dia muoyo mu Mvula wa kabutu. Uvua kabidi “muyishi wa buakane,” kadi bantu ba mu tshikondo tshiende “kabakateya ntema” ku mukenji wende wa kudi Nzambi. Bavua badia ne banua, baselangana, bakolesha mêku, ne benza midimu yabu ya pa tshibidilu ya mu nsombelu too ne pakalua Mvula munene kubabutula bonso. (2 Petelo 2:5; Genese 6:14) Kabavua basua kumvua bualu bua ngakuilu ne bikadilu bilulame, anu bu mudi tshipungu tshibi tshia lelu’eu tshijika matshi atshi ku bidi Bantemu ba Yehowa bamba bua ‘dikudimuna mutshima kudi Nzambi,’ ditabuja Kristo, buakane, ne ‘dilumbuluisha dilualua.’ (Bienzedi 20:20, 21; 24:24, 25) Kakuena kupeteka muyuki mufunda bua bungi bua bantu bavua pa buloba tshikondo tshivua Nowa umanyisha mukenji wa Nzambi. Kadi bualu bumue mbulelela, bungi bua bantu ba pa buloba buakakepeshibua bikole menemene mu 2370 K.B.B.! Mvula wa kabutu wakakupula bantu babi bonso, kulama anu aba bavua badiakaje bua tshienzedi atshi tshia Nzambi​—Nowa ne bantu bakuabu muanda-mutekete ba mu dîku diende.​—Genese 7:19-23; 2 Petelo 3:5, 6.

13. Ndipangadika kayi dia bunzuji diakeyemena Nowa ne muoyo mujima, ne mmunyi muakatumikaye biumvuangane ne bualu ebu?

¹³ Nzambi kakadianjila kumanyisha Nowa bidimu bivule kumpala bua dituku ne dîba dijalame bua Mvula au munene nansha. Kadi, pavua Nowa ne bidimu 480, Yehowa wakamanyisha ne: “Spiritu wanyi kakuenzela muntu malu tshiendelele, bualu udi kabidi mubidi. Nenku matuku ende neafike ku bidimu lukama ne makumi abidi.” (Genese 6:3, NW) Ne muoyo mujima, Nowa wakeyemena dipangadika edi dia bunzuji dia Nzambi. Mumane kukumbaja bidimu 500, “wakalela Shema, Hama ne Yafete,” ne tshilele tshia mu matuku au tshidi tshifila lungenyi lua se: bidimu 50 peshi 60 biakapita kumpala kua bana bende kuselabu. Pakambilabu Nowa bua kuenza buâtu bua [kupeta] dikubibua ku Mvula munene, mbimueneke se: bana abu ne bakaji babu bakamukuatshisha mu mudimu au mukole. Dienza dia buâtu diakenzeka pamu’apa dîba dimue ne mudimu wa Nowa bu “muyishi wa buakane,” pa kumupesha bia bungi bia kuenza kumpala kua Mvula munene munkatshi mua bidimu 40 anyi 50 bia ku ndekelu. (Genese 5:32; 6:13-22) Munkatshi mua bidimu bionso abi, yeye pamue ne dîku diende bakenza malu mu ditabuja. Tulejayi petu ditabuja patudi tuyisha lumu luimpe ne tuindila dituku dia Yehowa.​—Ebelu 11:7.

14. Ndekelu wa bionso, ntshinyi tshivua Yehowa muambile Nowa, ne mbua tshinyi?

¹⁴ Bu mukavua buâtu buenda bujika, Nowa uvua mua kuikala muele meji ne: Mvula munene ukavua pabuipi menemene, nansha muvuaye kayi mumanye menemene tshikondo tshivuaye ne bua kuenzeka. Ndekelu wa bionso Yehowa wakamuambila ne: “Pakumbana matuku muanda mutekete, nendokeshe mvula wa matuku makumi anayi a munya ne a butuku.” (Tshibangidilu 7:4, MMM) Abi biakapesha Nowa ne dîku diende dîba dikumbane bua kubueja mishindu yonso ya nyama mu buâtu ne buobu bine kubuelamu kumpala kua Mvula munene kutuadijaye. Katuena tukengela kumanya dituku ne dîba dia ntuadijilu wa dibutudibua dia ndongoluelu eu; dipanduka dia nyama ki ndituambika, ne bantu bikala mua kupanduka mbamane kuikala benda babuela mu buâtu bua mu tshimfuanyi, mparadizu wa mu nyuma wa bantu ba Nzambi.

“Nuikale batabale”

15. (a) Mu mêyi ebe wewe muine, mmunyi muudi mua kumvuija mêyi a Yezu adi mu Matayo 24:40-44? (b) Mbuenzeji kayi budi nabu dipanga kumanya tshikondo tshijalame tshia dilua dia Yezu bua kukumbaja disombuela dia Nzambi?

¹⁵ Pa bidi bitangila dikalaku diende, Yezu wakumvuija ne: “Diba adio, pikala balume babidi [batumika] mu budimi, nebangate umue, bashiye mukuabo. Pikala bakaji babidi batua [bapela bukula] ku tshinu, nebangate umue, bashiye mukuabo. Nuikale batabale, bualu kanuena bamanye dituku diafika Mfumu wenu. Numanye bimpe ne: bu mfumu wa nzubu mudianjile kumanya diba didi muivi ufika butuku, uvua kuikala mutabale, kayi mua kulekela batubula bimana bia nzubu wende. Nenku, nuenu kabidi nuikale badilongolole, bualu Muana wa muntu neafike diba dinudi kanuyi belele meji.” (Matewuse 24:40-44, MMM; Luka 17:34, 35) Dipanga kumanya dîba dijalame dia dilua dia Yezu bua kukumbaja disombuela dia Nzambi didi dituambuluisha bua kushala batabale ne ku dituku dionso didi ditupesha tshikondo tshia kujadika ne: tudi tusadila Yehowa katuyi ne tuenzela tua budinangi.

16. Ntshinyi tshienzekela bantu ‘bashiya’ ne bantu ‘bangatshibue’?

¹⁶ Bantu ‘bashiya’ bua dibutudibua pamue ne bantu babi nebakonge aba bavua ku kale bakenkeshibue kadi balue kutukina mu nsombelu wa budinangi. Suayi tuikale munkatshi mua aba ‘bangatshibue,’ aba badi badifile tshishiki kudi Yehowa ne badi bushuwa ne dianyisha bua biakudia biende bia mu nyuma bitupetesha ku butuangaji bua “mupika wa lulamatu ne wa budimu.” (Matayo 24:45-47, NW) Too ne ku ndekelu, tusadilayi Nzambi ne ‘dinanga dia mu mutshima mutoke ne dia mu [“kuondo ka muoyo kimpe,” NW] ne dia mu ditabuja didi kadiyi ne lubombo.’​—1 Timote 1:5.

Bienzedi binsantu bidi ne mushinga

17. (a) Ntshinyi tshivua tshidianjila kumanyisha mu 2 Petelo 3:10? (b) Mbimue bienzedi kayi ne malu bidi 2 Petelo 3:11 ukankamija?

¹⁷ Mupostolo Petelo wakafunda ne: “Dituku dia Yehowa nedilue bu muibi, ndiodi diajimina muulu ne diyoyo dikole, kadi bintu bidi ne kapia kakole menemene nebienguluke, ne buloba ne midimu idimu nebisokolodibue.” (2 Petelo 3:10, NW) Muulu ne buloba bia mu tshimfuanyi kabiakupanduka ku luya lukole lua tshiji tshia Nzambi tshidi tshiosha. Nenku Petelo udi usakidila ne: “Bu mudi bintu ebi bionso ne bua kuenguluka nenku, mbantu ba mushindu kayi banudi ne bua kuikala mu bienzedi binsantu bia nsombelu ne malu a bulamate kudi Nzambi!” (2 Petelo 3:11, NW) Munkatshi mua bienzedi ne malu aa mudi dikalaku pa tshibidilu mu bisangilu bia bena nkristo, dienzela bakuabu malu mimpe, ne didifila bikole mu diyisha lumu luimpe.​—Matayo 24:14; Ebelu 10:24, 25; 13:16.

18. Bituikala tudima bulamatshi ku bulongolodi ebu, ntshinyi tshitudi ne bua kuenza?

¹⁸ “Bienzedi binsantu bia nsombelu ne malu a bulamate kudi Nzambi” bidi bilomba ne: ‘tudilame katuyi ne ditoba dia ku malu a pa buloba.’ (Yakobo 1:27) Kadi netuambe munyi bituikala tudima bulamatshi ku bulongolodi ebu? Pamu’apa tudi tuenda tukokibua kudi nsombelu kampanda wa njiwu kumpala kua Nzambi pa kukeba dijikija lutetuku dikena dikezuke anyi pa kuteleja mijiki ne misambu bidi bilubuluja mmuenenu ukena wa buena Nzambi wa bulongolodi ebu. (2 Kolinto 6:14-18) Pikalabi nanku, tukebayi diambuluisha dia Nzambi mu masambila bua katulu kujimina pamue ne bulongolodi ebu kadi bua tuetu kuimana banyishibue kumpala kua Muana wa muntu. (Luka 21:34-36; 1 Yone 2:15-17) Bituikala baditshipe kudi Nzambi, bushuwa netusue kuenza muetu muonso bua kuasa ne kulama nende malanda a musangelu ne pa nanku kuikala badiakaje bua dituku dinene dia Yehowa, didi dikuatshisha bantu buôwa.

19. Bua tshinyi bantu ba bungi ba ku bamanyishi ba Bukalenge badi mua kutekemena bua kupanduka ku nkomenu wa ndongoluelu eu mubi wa malu?

¹⁹ Muena Nzambi Nowa ne dîku diende bakapanduka ku Mvula munene wakabutula bulongolodi bua kale. Bantu bakane bakapanduka ku nshikidilu wa ndongoluelu wa malu wa bena Yuda mu 70 B.B. Tshilejilu, mupostolo Yone utshivua mu mudimu wa Nzambi bu mu 96 anyi 98 B.B., pakafundaye mukanda wa Buakabuluibua, Evanjeliyo wende, ne mikanda isatu mifundisha ku spiritu. Ku binunu bia bantu bakakùngama ditabuja dilelela mu Pentekoste wa mu 33 B.B., bumue bavule bakapanduka ku nshikidilu wa ndongoluelu wa bena Yuda. (Bienzedi 1:15; 2:41, 47; 4:4) Lelu’eu bantu ba bungi ba ku bamanyishi ba Bukalenge badi mua kutekemena bua kupanduka ku nkomenu wa ndongoluelu eu mubi wa malu.

20. Bua tshinyi tudi ne bua kuikala ‘bayishi ba buakane’ ba lukunukunu?

²⁰ Ne dikubibua bua kubuela mu bulongolodi bupiabupia kumpala kuetu, tuikalayi ‘bayishi ba buakane’ ba lukunukunu. Mmuabi kayipu wa kusadila Nzambi mu matuku aa a ku nshikidilu! Ne ndisanka kayipu dia kuludika bantu ku “buâtu” bua lelu, mparadizu wa mu nyuma udi bantu ba Nzambi bapete! Miliyo ya bantu badimu lelu’eu bashaleku ne lulamatu, batabale mu nyuma, ne badiakaje bua dituku dinene dia Yehowa. Kadi ntshinyi tshiatuambuluisha tuetu bonso bua kushala batabale?

[Mêyi adi kuinshi]

Newandamune munyi?

◻ Mmatekemena kayi avua bamue bikale nawu pa bidi bitangila dituku dia Yehowa ne dikalaku dia Kristo?

◻ Bua tshinyi tudi mua kuamba ne: Nowa ne dîku diende bavua badiakaje bua Mvula munene?

◻ Ntshinyi tshienzekela aba badi “bikale batabale” ne aba bakena batabale?

◻ Bua tshinyi bienzedi binsantu bidi ne mushinga, nangananga bu mutudi tuenda tusemena ku dituku dinene dia Yehowa?