Bamanyishi ba Bukalenge badi balonda

“Butoke buenu bukenke kumpala kua bantu”

MU MUYUKI wende wa pa Mukuna, Yezu wakambila bayidi bende ne: “Nudi butoke bua bukua-bantu.” Wakatungunuka ne kubalomba ne: “Butoke buenu bukenke kumpala kua bantu, bua bamone midimu mimpe yenu ne batumbishe Tatu wenu udi mu diulu.”​—Matayo 5:14-16, NW.

Mu Italie midimu mimpe ya Bantemu ba Yehowa mmimanyike. Tshilejilu, bienzedi biabu bimpe padibu babuela mu mpuilu yabu ya ku tshidimu bidi bitumbisha Nzambi, bu mudi luapolo idi ilonda eyi ijadika:

▪ Munkatshi mua bidimu bivule mukaji kampanda wa mu Terni, mu Italie, wakambuluisha muanende wa bakaji bua kuenzaye nzubu wa tshidiilu uvua pabuipi ne tshipalu mu tshimenga atshi. Udi ulonda ne: “Ngakabambishilamu dishilangana dinene pankatshi pa aba bavua baluila manaya a ndundu ne aba bavua batumibue mu mpuilu ya Bantemu ba Yehowa. Bantemu bavua batambe kuikala badipope mu mvuadilu wabu, ne bavua bena bululame ne bena kanemu. Mvua ndikonka misangu yonso mushindu uvua bantu ba makoba kabukabu mua kusomba bimpe pamue mushindu’eu.

“Dimue dituku Ntemu kampanda wakangimanyika mu musesu e kunkonka né mvua mumanye dîna dia Nzambi. Tshivua mudimanye to, ne bu mumvua mumanye se: Bantemu ba Yehowa mbantu bimpe, ngakitaba bua yeye kunkumbula. Mvua ne nkonko idi itangila ngikadilu wa bafue, yakandamuinaye mu Bible. Kakuyi dielakana, ngakitaba dilonga dia Bible, ne mbingu ibidi pashishe ngakatuadija kubuela mu bisangilu.

“Kumpalampala muananyi wa bakaji wakambengela, kadi bienzedi bianyi ne dipangadika biakashintulula mmuenenu wende. Ndi mutuadije kulonga kukadi ngondo tshitema. Lelu’eu muananyi wa bakaji ne bayende badi bafila mêyi a dianyisha kudi Bantemu bàdì basumba bintu mu nzubu wabu wa tshidiilu. Ku luanyi luseke, mvua mutambuishibue mu mpuilu kampanda mu tshine tshipalu etshi.”

▪ Panyima pa mpuilu kampanda mu tshimenga tshia Roseto degli Abruzzi, muena tshipalu kampanda wakumvuija se: “Ndi mubambishe ne: Bantemu ba Yehowa mbena bululame menemene mu bionso bidibu benza. Lumingu lushale, mvua ne bantu 40 ba kudibu mu tshipalu tshianyi, ne kabakakebesha tshilumbu nansha tshimue. Bishilangane, anu buobu nkayabu ke badi balua kukumanyisha né badi ne muntu muenyi udi musombele mu mashinyi a mukokakoka anyi mu ntenta yabu. Buanyi meme, mbasumbi batambe buimpe banudi mua kuikala nabu.”

▪ Panyima pa mpuilu umue-umue eu, muena nzubu wa tshilala-benyi kampanda wakamba ne: “Bantemu ba Yehowa bonso mbena ditalala. Ki mbena mutoyi, ne badi balala kumpala kua dîba. Bushuwa mbantu bimpe, bena bululame, ne bena ngikadilu mimpe. Bivua kuikala bimpe bu bantu bonso bikale mushindu udibu. Bakuabu badi biba bintu bionso​—ngesu, bieledi bia butu bua makanya, nansha mabeji a mu nkumba ne nsukadi! Tshintu tshia nunku ki ntshianji kunufikila. Padi bana benu bangata kreme mu tshiamu tshia mashika ku dilolo, tshiena nditatshisha bua kuya katangila bidibu bangate. Badi babala bidi bu bianyi ne balua kufuta diakamue. Ndi ne dieyemena ditambe bunene kudibu. Mmunyipu mùvuàbi mua kuikala bimpe bu bakuabu bikale nanku! Ndi njinga ne: benyi banyi bonso bikale Bantemu ba Yehowa.”

Bantemu ba Yehowa mbamanyike bimpe mu Italie, nansha mu bitupa bikuabu bivule bia buloba. ‘Badi ne bienzedi biabu bimpe munkatshi mua bisamba bia bende’ ne nunku batumbisha Nzambi mulelela, muena dîna didibu nadi.​—1 Petelo 2:12.