Mushindu udi Dilonga dia Mukanda dia Tshisumbu dituambuluisha
1. Nku tshinyi kudi bisangilu bietu bitanu bitutu tuenza lumingu luonso bituambuluisha?
1 Bisangilu bietu bitanu bitutu tuenza ku lumingu luonso bitu bishilangane ku mushindu utubi bienzeka ne bitu ne bipatshila bishilangane. Kadi buonso buabi bidi ne mushinga bualu bidi butuambuluisha bua ‘kuelelangana meji muntu ne muntu bua kuenzejangana ku dinanga ne ku bienzedi bimpe.’ (Eb. 10:24, 25) Ngamue malu kayi a pa buawu atudi tupetela mu Dilonga dia Mukanda dia Tshisumbu adi atuambuluishe?
2. Mmalu mimpe kayi adi kuikala mu kasumbu kakese ka dilonga kutupetesha?
2 Diambuluisha bua kukola mu ditabuja: Bungi bua bantu batu babuele mu dilonga dia mukanda butu bushadile bikole kudi bua batu babuela mu bisangilu bikuabu. Nunku mbitekete bua bantu kudiabu bulunda bikole ne bena Kristo nabu badi mua kubakolesha mu nyuma. (Nsu. 18:24) Ukatuku mutete bua kumanya muntu yonso wa mu kasumbu kenu ka dilonga, pamuapa mumulombe bua nuenu kupatuka nende mu buambi anyi? Bu mudi kasumbu ka dilonga dia mukanda kikale kakese, bidi biambuluisha mukulu udi ukatangila bua kumanya nsombelu wa muntu ne muntu udimu ne kumuambuluisha pa nkayende.—Nsu. 27:23.
3. Mmunyi mudi dilonga dia mukanda diambuluisha too ne balongi ba Bible mua kuandamuna?
3 Utu ubikila bantu bautu ulonga nabu Bible bua kubuelabu nebe mu dilonga dia mukanda anyi? Bantu bakuabu batu banange Bantemu kadi belakana bua kubuela mu bisangilu bia bantu ba bungi badi mua kuitaba bua kubuela mu tshisangilu tshidi ne bantu bakese nangananga paditshi tshienzekela kumbelu kua muntu. Musangelu udi nawu bantu mu dilonga edi udi mua kuambuluisha bana ne bantu bakuabu batshidi batuadijilaku kubuela mu bisangilu bua kuandamuna pabu. Kabidi bu mudi kasumbu kikale kakese, tudi ne mushindu wa kuandamuna misangu ya bungi bua kutumbisha Yehowa.—Mus. 111:1.
4. Mmalu kayi adi akengela bua muaba wa kutekela tusumbu tua dilonga dia mukanda?
4 Pa tshibidilu batu bateka tusumbu tua dilonga dia mukanda miaba idi miakanyine bamanyishi mu teritware wa tshisumbu tshiabu. Kabitu anu bipepele bua muntu yonso kuikala pabuipi ne kasumbu kabu ka dilonga dia mukanda to. Kadi dibuela mu dilonga dia mukanda ditu pa tshibidilu ditulomba bua kuenda ntanta mukese pa kufuanyikija ne ututu tuenda bua kuya mu bisangilu bikuabu. Muaba utubu benzela dilonga udi kabidi mukumbane bua kuenzelapu bisangilu bia mudimu wa buambi.
5. Mmunyi mudi mutangidi wa kasumbu ketu ka dilonga dia mukanda mua kutuambuluisha mu buambi?
5 Diambuluisha bua buambi: Mutangidi wa kasumbu ka dilonga dia mukanda udi ne bua kuambuluisha muntu yonso wa mu kasumbu kende bua kuikala uyisha pa tshibidilu ne disanka dionso. Ke bualu kayi udi ne bua kudienzeja bua kuyisha ne yonso wa kudibu ne kumuambuluisha pa nkayende mu mishindu mishilashilangane ya mudimu wetu wa buambi. Wewe mumone mushindu kampanda wa kuyisha mukukolele, bu mudi kupinganyina bantu bauvua muyukile nabu, ambila mutangidi wa kasumbu kenu ka dilonga. Pamuapa udi mua kukeba mushindu wa wewe kuyisha ne muanetu ukadi ne dimanya dia bungi wa mu kasumbu kenu. Wewe utangila ne ulondesha bimpe mishindu itu mutangidi wa kasumbu kenu ka dilonga udilombola, neumanye pebe mua kulombola malonga a Bible bimpe.—1 Kol. 4:17.
6. Bua tshinyi tudi ne bua kuenza muetu muonso bua ndongoluelu wa dilonga dia mukanda atuambuluishe bikole?
6 Bushuwa, Dilonga dia Mukanda dia Tshisumbu mmushindu muimpe be udibu batulongoluele! Yehowa mmulongolole mushindu eu bua kutuambuluisha bua tuikale anu bakole mu ditabuja mu matuku aa makole atudi.—Mus. 26:12.