Tulondayi tshilejilu tshia Yezu
1. Ntshilejilu kayi tshidi Yezu mutushile?
1 Katupu muoyo ne: patudi tuenza mudimu wa divuija bantu bayidi, tshilejilu tshietu tshidi ne bukole bua bungi kudi bantu badi batutangila. Yezu uvua ulongesha bantu ku mêyi ne bienzedi biende. Bantu bakamona tshisumi tshiende, muvuaye mubanange ne dijinga diende dikole dia kutumbisha dîna dia Tatuende ne kuenza disua diende.—1 Pet. 2:21.
2. Mmu mishindu kayi mudi tshilejilu tshietu mua kuambuluisha bantu batudi tuyisha nabu?
2 Patudi tuyisha ku nzubu ne ku nzubu: Anu bu muvuabi bua Yezu, tshilejilu tshietu tshidi tshiambuluisha bantu batudi tuyisha nabu bikole. Padi bamanyishi batshidi batuadijilaku kuyisha ne bakuabu badi kabayi ne dimanya dia bungi mu mudimu eu batumone tuyisha ne tshisumi, bidi mua kubeleshisha meji bua mushindu udibu pabu mua kupeta tshisumi. Padibu batumone ne disanka ne tumueneka banange bantu bikole, nebamone ne: mbimpe bikala pabu ne ngikadilu eyi padibu bayisha. Padibu batumone tuyisha bimpe ne Bible, tupinganyina bantu ne tulombola malonga a Bible, nebajinge bua kutuidikija.
3. Mmunyi mudi tshilejilu tshietu mua kulongesha bantu batudi tulonga nabu Bible, ne ntshinyi tshidibu mua kulongela kutudi?
3 Patudi tulonga Bible ne bantu: Bantu batudi tulonga nabu Bible batu batamba kutangila bienzedi bietu. Tshilejilu, patudi tuleja balongi mudibi ne mushinga bua kudilongolola kumpala kua tuetu kulonga nabu ne kukeba mvese idibu bafile ne kuela tushonyi pa malu manene, badi mua kutangila mu wetu mukanda bua kumona bituikala tuetu bine badilongolole. (Lomo 2:21) Tuetu bikale tufika anu pa dîba ditudi bumvuangane ne balongi bua kulonga, kabakuitaba bua midimu mikuabu ilue kutshiamakana kumpala dîba dia kulonga Bible to. Nebamone kabidi mutudi tudipangisha amue malu bua kumona mua kuyisha ne mutudi ne ditabuja dikole. Kabiena bitukemesha bua mutu balongi ba Bilbe batu balonga ne bana betu badi balonda tshilejilu tshia Yezu bikole balua pabu bena tshisumi ne bamanyishi badi bavuija bakuabu bayidi.
4. Patudi mu bisangilu bia tshisumbu, ntshinyi tshidi tshilejilu tshietu ne bua kulongesha bakuabu?
4 Patudi mu bisangilu bia tshisumbu: Bena mu tshisumbu tshia bena Kristo bonso badi ne bua kulongesha bakuabu ku tshilejilu tshiabu mu bisangilu. Bantu bapiabapia badi batuadija kubuela mu bisangilu badi ne bua kulongela ku tshilejilu tshietu tshimpe mu tshisumbu. Badi ne bua kumona mutudi banangangane, mutudi mu buobumue ne mutudi ne mvuadilu muimpe ne tshimuenekelu tshimpe. (Mus. 133:1) Badi kabidi ne bua kumona mutudi tubuela mu bisangilu bionso ne tujikulamu ditabuja dietu. Muntu mukuabu uvua mubuele mu tshimue tshia ku bisangilu bietu wakamona muvua kana kakuabu ka bakaji katekete kamanye mua kupeta mvese pa lukasa mu Bible waku ne kulondesha bimpe pavuabu bamubala. Tshilejilu tshia kamuana aku tshiakamufikisha ku dilomba bua bamulongeshe Bible.
5. Bua tshinyi katuena ne bua kupepeja mushinga udi nawu tshilejilu tshietu?
5 Bible udi utukankamija bua kuidikija bilejilu bimpe bia bakuabu. (Filip. 3:17; Eb. 13:7) Kadi tudi ne bua kuvuluka ne: tuetu balonde tshilejilu tshia Yezu bimpe menemene, bantu bakuabu nebamone bualu ebu ne kutuidikija. Bu mudibi nanku, tulondayi ne muoyo mujima mêyi adi mu 1 Timote 4:16 a ne: “Wikale mudimuke ku malu ebe ne ku diyisha diebe.”