Tudi ne bia kupesha Yehowa
1 Udiku mumanye ne: bantu badi ne tshintu tshidibu mua kupesha Nzambi anyi? Abele wakalambula Yehowa nyama yende ya manyi; Noa pende ne Yobo bakafila milambu ya muomumue. (Gen. 4:4; 8:20; Yobo 1:5) Nansha nanku, milambu eyi kayivua mivuije Mufuki wetu mubanji to, bualu yeye ke muena bintu bionso ebi. Kadi milambu ayi ivua ileja muvua bantu abu banange Nzambi ne muoyo mujima. Lelu eu, tudi petu mua kupesha Yehowa dîba dietu, bukole buetu, makuta ne bintu bikuabu bitudi nabi bu “mulambu wa kumutumbisha” nawu.—Eb. 13:15.
2 Dîba: Mbitambe buimpe bua ‘tudisumbilaku’ dîba: tukepeshe malu adi ne mushinga mukese bua kupeta dîba dia bunyi bua kuvudijaku mudimu wetu wa diyisha. (Ef. 5:15, 16) Tshilejilu, tudi mua kuakaja programe wa midimu yetu bua kupeta mushindu wa kuikala mpanda-njila muambuluishi ngondo umue anyi ya bungi mu tshidimu. Anyi tudi mua kuvudija mêba atutu badikosele bua kupitshisha mu mudimu wa buambi. Kutuadijaku ne minite 30 ya pamutu ku lumingu luonso kudi mua kutuambuluisha bua kuenza mêba mapite pa 2 a pamutu ku ndekelu kua ngondo.
3 Bukole: Bua kupeta bukole bukumbane bua kuyisha lumu luimpe bidi bikengela tuepuke mishindu ya dijikija lutetuku ne midimu idi itutshiokesha itupangisha bua kupesha Yehowa bietu bionso bitudi nabi. Tudi kabidi ne bua kulekela tunyinganyinga bua bintu, bualu tudi mua kulua ‘kunemesha mutshima wetu bujitu,’ kutupangisha bukole bua kuenzela nabu Nzambi mudimu. (Nsu. 12:25) Nansha tuetu bapangile tshintu kampanda tshinene ne tutshijinga ne muoyo mujima, mbimpe tuetu ‘kuteka bujitu buetu pambidi pa Yehowa.’—Mus. 55:22; Filip. 4:6, 7.
4 Makuta ne bintu: Tudi kabidi mua kufila makuta ne bintu bietu bikuabu bua kutungunuja mudimu wa buambi kumpala. Paulo uvua mulombe bena Kristo nende bua bikale ne tshibidilu tshia ‘kudibutshila bintu’ bua kupetaku kantu ka kuambuluisha naku badi mu lutatu. (1 Kol. 16:1, 2) Tuikaleku petu ne tshibidilu tshia kulamaku makuta ndambu ku luseke bua kufila mu tshisumbu bua kujikija majinga adimu ne kuafila bua mudimu wetu wa pa buloba bujima. Yehowa udi usanka patudi tufila bintu ne muoyo mujima nansha biobi bikala bikese.—Luka 21:1-4.
5 Bidi Yehowa mutupe kabiena kubala bua bungi buabi. (Yak. 1:17) Tudi tuleja mutudi bena dianyisha kudi Yehowa patudi tufila dîba dietu, bukole buetu, makuta ne bintu bikuabu bitudi nabi bua kumuenzela nabi mudimu. Patudi tuenza nanku, tudi tusankisha Yehowa, ‘bualu yeye utu musue muena kupa udi ufila ne disanka.’—2 Kol. 9:7.