Padi utudi tupeta wakula muakulu muenyi
1. Bua tshinyi bidi bikengela bua bisumbu bikala bienza mudimu mu diumvuangane padibi biyisha mu teritware?
1 Misangu ya bungi, bamanyishi ba Bukalenge batu bapete bantu batu basue bulelela kadi bikale bakula muakulu udi mushilangane ne udibu benzela bisangilu. Bua kumona mua kuambuluisha bantu aba ne dimanya dia malu a Nzambi, ku Betele ya bungi mbalongolole bua kuenza tusumbu tudi tuenza bisangilu mu miakulu eyi anyi mene bisumbu bijima. Bu mudi bantu ba miakulu mishilashilangane mua kusombela mu tshitupa tshimue, bisumbu bia bungi bia miakulu mishilashilangane kabidi bidi mua kuyisha mu teritware umue. Ntshinyi tshidi bisumbu mua kuenza bua kuikala bashindika ne: mbayishe mu teritware amu bimpe mu bulongame?—1 Kol. 14:33.
2. Padi bamanyishi bayisha ku nzubu ne ku nzubu, mmushindu kayi udibu mua kueleshangana diboko ne bena mu bisumbu bia miakulu mikuabu bidi mu teritware wabu?
2 Dieleshangana diboko: Padi bamanyishi bayisha mu njila anyi padi mpunga umueneka, badi mua kuyikila ne muntu yonso udibu bapetangana nende, nansha aba badi bakula muakulu mukuabu, ne kubapesha mikanda ne bibejibeji mu muakulu udi muntu au musue kubala. Kadi, padibu bayisha ku nzubu ne ku nzubu mu teritware udi bena tshisumbu tshia muakulu mukuabu benzela pabu mudimu, badi ne bua kuya anu ku nzubu ya bantu badi bakula muakulu wa tshisumbu tshiabu. Padi bisumbu bia bungi biyisha muaba umue, dipatula dia bipeta bimpe ke bualu bua mushinga. Batangidi ba mudimu badi ne bua kuenza muabu muonso bua kuyikila ne kupetangana bimpe bua kumona mua kuenza malu mu mushindu muimpe. (Nsu. 11:14) Kadi, wewe mutuilangane ne muntu udi wakula muakulu mukuabu paudi uyisha ku nzubu ne ku nzubu ne pikalaku kakuyi bisumbu bidi bienza bisangilu mu muakulu wa muntu au pabuipi apu, udi ne bua kutungunuka ne kuambuluisha muntu au bua kunangaye bulelela.
3. Tshia kuenza ntshinyi padi bamanyishi ba mu bisumbu bia miakulu ibidi bapetangana mu buambi dituku kampanda mu teritware umue?
3 Mudimu wa muomumue: Tshia kuenza ntshinyi bikala bantu ba mu bisumbu bia miakulu mishilangane bapetangana mu teritware umue dituku dimue bua kuyisha? Dinanga dia buena Kristo nedikale ku mutu kua dishilangana dia miakulu ne bantu bonso nebadienzeje bua kutangila majinga a bantu badi mu teritware. (Yone 13:34, 35) Nanku, bana betu badi balombola diyisha dituku adi nebenze malu ne meji mimpe ne dinanga padibu bangata dipangadika dia kuanji kulomba tshisumbu tshimue bua kuya mu teritware mukuabu.—Yak. 3:17, 18.
4. Ntshinyi tshikavua tshidianjila kuleja tshidi tshikumbana lelu eu?
4 Bible ukavua mumane kuleja muvua bantu ba miakulu yonso mua kuteleja lumu luimpe. (Buak. 14:6, 7) Padiku dieleshangana diboko dia bantu bonso, netuepuke bua kuyisha kumbelu kumue kumue ne netupete bantu bapiabapia ba bungi, too ne badi bakula miakulu mikuabu.—Ef. 4:16.