Dîku diebe ndidilongolole bua kupanduka anyi?

¹ Milayi idi mikumbane ya mu Bible idi itushindikila ne: nshikidilu wa bulongolodi ebu bubi udi ulua ne lubilu luonso. Tudi mu tshikondo tshikole tshia buena tshivuaku kumpala kua Mvula wa kabutu. (Mat. 24:37-39) Noa ne bena mu dîku diende bavua bapanduke bualu ‘wakendakana ne Nzambi.’ (Gen. 6:9) Noa uvua ne bua kuikala mulongeshe bena mu dîku diende malu a Yehowa bualu bavua bapanduke pabu ku kabutu aku. Ntshinyi tshitudi mua kuenza bua kuidikija Noa ne kulongolola bena mu dîku dietu bua kupanduka palua kabutu ka bulongolodi ebu bubi?

² Mulongeshi wa buakane: Noa wakatungunka ‘ulongesha buakane’ mu bidimu bitue ku 40 anyi 50. (2 Pet. 2:5) Nansha muvua bantu ba mu tshikondo tshiende balonde bienzedi bibi bia banjelu bavua balue pa buloba, yeye kavua muenza nanku, ne bavua bamuseka bua diyisha bantu. Mu mudimu wetu wa diyisha tutu tupetangana ne buluishi ne tuseku kabidi, malu adi aleja ne: tukadi ku ndekelu kua tshikondo etshi. (2 Pet. 3:3, 4) Nansha nanku, bantu ba bungi ba mu tshikondo tshietu badi bitaba patudi tubayisha ne ‘babuela’ mu ntendelelu wa Yehowa, bualu buvua bena tshikondo tshia Noa babenga. (Yesh. 2:2) Netufike ku didisungila tuetu bine ‘ne bobo kabidi badi bumvue mêyi etu’ anu bituatungunuka. (1 Tim. 4:16) Nanku si mbimpe bua baledi kulongeshabu bana babu ne mukana ne ku tshilejilu mudibi bikengela mitalu bua kuyisha!​—2 Tim. 4:2.

³ Wakenza ‘bionso bivuabu bamuambile’: Dipanduka dia Noa ne bena mu dîku diende divua disuikila ku dilonda diabu dia malu onso avua Yehowa mubambile bua kuenza. (Gen. 6:22) Bidi kabidi ne mushinga wa bungi buetu lelu bua ‘kuikala pabuipi bua kutumikila’ dîyi dionso dia mu Bible ne dia mupika wa lulamatu. (Yak. 3:17, NW) Bana bakuabu bakadi bakulumpe mpindieu badi bavuluka muvua tatuabu utumikila mibelu yonso ivuaye upeta mu bulongolodi bua Yehowa. Tshilejilu, bua ditumikila edi bakatuadija kulonga mu dîku lumingu lonso ne uvua uya ne bana bende mu buambi ku ndekelu kua lumingu luonso. Uvua ulongolola bua ne: bikala baya mu buambi ne muana ne muana yonso lumingu luonso. Ditungunuka diende ne muoyo mukole dia kuenza malu onso ‘anu muvuawu amu’ diakapesha bana bende njila wa kulonda, ne bonso basambombo bakakola ne badi basadila Yehowa ne lulamatu.

⁴ Nshikidilu wa bulongolodi ebu nealue mu tshintuluntulu. (Luka 12:40) Tuetu tuidikija Noa ne tuenza malu a ditabuja bua lupandu, tuetu ne bena mu dîku dietu netuikale badilongolole bua kupanduka.​—Eb. 11:7.