Utu wenza nabi mudimu bimpe anyi?

¹ Muanetu wa bakaji mukuabu mumane kubala Tshibumba tshia Nsentedi tshia dia 1 Tshiongo 2008, wakafunda ne: “Tshiena mua kuindila bua kuenza natshi mudimu mu buambi to!” Ukadiku mubale bimue bia ku biena-bualu bitu bipatuka mu tshibejibeji tshia bantu bonso ne mupeteku mushindu muimpe uudi mua kuenza nabi mudimu mu buambi anyi?

² “Malu atudi tumanyina kudi Yezu”: Udi pamuapa mumone ne: tshiena-bualu etshi tshidi mua kukuambuluisha bua kutuadija kulongesha bantu Bible. Wewe kuyi muanji kuenza nanku, udi mua kubadila bantu baudi upeta tshiena-bualu, pashishe kukoka ntema yabu ku tshivua Yezu muambe pa bualu abu tshidi tshileja mu tshikoso tshia kumpala. Padi muntu uleja dianyisha diakamue, udienzeje bua kutungunuka nende ne muyiki pa tu biena-bualu tudi tufunda mu nkonko itu ijula bantu dijinga dia kumanya malu a bungi atu. Lomba muntu au andamune lukonko. Udi mua kumvuija mu tshikoso foto idibu benza nayi mudimu ne kupita ku tshikoso tshikuabu. Udi mua kuyikila tshitupa tshia kumpala tshia tshiena-bualu etshi anu mu dikumbula dia kumpala; pashishe nudi mua kulua kuyikidila pa tshidi tshishala musangu kumpala. Ikala mudilongolole bua kutungunuka ne kumulongesha ne mukanda wa Bible ulongesha.

³ “Malu ambuluisha dîku dienu”: Tshitupa etshi ntshienza bua kuambuluisha natshi balume ne bakaji, ne bua baledi bamone mushindu udibu mua kutumikila mikenji ya mu Bible padi ntatu ikeba kunyanga ditalala dia mu dîku. Udi kabidi mua kuenza mudimu ne biena-bualu ebi bua kuambuluisha bantu badi kabayi Bantemu bua bamone meji adi mu Bible.​—2 Tim. 3:16, 17.

⁴ Biena-bualu bua bansonga: Tshitupa tshia “Buenu nuenu bansonga” ntshilongolola bua kushila mubadi dîba dia kushala kuelaye meji pa muyiki kampanda wa mu Bible. Udi mua kuenza mudimu ne biena-bualu ebi bua kuambuluisha bansonga bawapetangana nabu mu buambi bua bamone mushinga wa kulonga Dîyi dia Nzambi. (Mus. 119:9, 105) Paudi uyikila ne baledi, udi mua kubaleja ngenyi milenga idi mu biena-bualu bidi biakula bua: “Longesha bana bebe.” Biena-bualu ebi bidi mua kuambuluisha bansonga bua kumanya malongesha a mimpe adibu mua kupetela kudi bantu badibu batele mu Bible. Ukadiku muteke dîba dia kubala biena-bualu ebi ne bana bebe anyi?

⁵ Biena-bualu bikuabu: Tshitupa tshia “Mandamuna ku nkonko yenu” tshidi tshiandamuna nkonko idibu mua kuela kudi bantu badi kabayi Bantemu to. Udi mua kuakuila pa tshiena-bualu etshi paudi ufila bibejibeji ku nzubu ne ku nzubu. Tshitupa tshia: “Mukanda mufumine kudi . . .” tshidi tshilonda malu malenga adi misionere kampanda anyi muntu mukuabu mupete mu buambi. Biena-bualu ebi bidi mua kuambuluisha bantu badi bitabuja bulelela bua kumona mudi lumu luimpe luyishibue pa buloba bujima, bileja dikumbana dia tshimanyinu tshia dikalaku dia Kristo.​—Mat. 24:3, 14.

⁶ Tshitupa tshia “Semena pabuipi ne Nzambi,” ntshimanyine pa dibala bia Bible ditu dienzeka mu Kalasa ka Mudimu wa Nzambi. Tshidi mua kuambuluisha bantu ba muoyo mutoke bua kulonga malu a bungi pa bidi bitangila Yehowa. Tshitupa tshia “Widikije ditabuja diabu” ntshienza bua kuambuluisha bantu bua kumona mu lungenyi miyiki ya bantu badibu batele mu Bible, kubavuija bu badi ne muoyo mu mitu ya bantu lelu ku malu avuabu benza, ntatu ivuabu nayi ne ditabuja diabu.

⁷ Tudi ne disanka dia kuikala kupeta ku ngondo isatu yonso Tshibumba tshia Nsentedi tshienza bua kutshifila mu buambi. Nanku tuenzayi muetu muonso bua kumanya malu adi mu tshibejibeji etshi bua kuenza nawu mudimu bimpe mu mudimu wetu wa buambi.