Tulongeshe bantu bua kunanga Yehowa
1. Ntshinyi tshidi tshikoka bamue bantu kudi Yehowa?
1 Utshidi uvuluka musangu wa kumpala uvuabu bakuyishe bualu bua Yehowa anyi? Ntshinyi tshivua tshikukoke kudiye? Bantu bimpe ba bungi badi mua kuamba ne: tshiakabasaka bua kusemena pabuipi ne Mufuki wabu ndimanya dia ngikadilu yende mitambe bunene, nangananga luse ne dinanga.—1 Yone 4:8.
2, 3. Mmushindu kayi utudi mua kuambuluisha balongi ba Bible ne mukanda wa Bible ulongesha bua kunangabu Yehowa bikole?
2 “Eu udi Nzambi wetu”: Mukanda wa Bible ulongesha udi utamba kuleja bunene bua dinanga dia Yehowa ne mushinga wa muntu yonso kuikala nende mu malanda mimpe. Mmushindu kayi utudi mua kulongesha ne mukanda eu bua kufikisha bantu ku dinanga Nzambi? Patudi tujinga kushindikila mulongi lungenyi kampanda lupiabupia, tudi mua kumueleshisha meji ne nkonko bu mudi eyi: “Bualu ebu mbukulongeshaku tshinyi pa bidi bitangila Yehowa?” anyi “Nku tshinyi kudi bualu ebu bujadika mudi Yehowa muikale Tatu muimpe menemene udi bantu bonso mua kukeba?” Tuetu tulongesha mushindu eu netuambuluishe balongi ba Bible bua kudiabu bulunda bua kashidi ne Yehowa.
3 Patudi tuambuluisha balongi ba Bible bua kumvuabu mushinga wa kulonga bua kumanya Nzambi umuepele mulelela udi ne muoyo, nebafike ku dijingulula anu muakajingulula Yeshaya ne: “Eu udi Nzambi wetu.” (Yesh. 25:9) Patudi tumvuija bantu Dîyi dia Nzambi, tudi ne bua kubashindikila muikala Nzambi mua kubenesha bukua bantu bonso pakumbana disua diende ku diambuluisha dia Bukalenge buende budi Kristo Yezu ukokesha.—Yesh. 9:6, 7.
4, 5. Kunanga Yehowa kudi kumvuija tshinyi?
4 Tshijadiki tshia mudi Yehowa mutunange: Tudi bamanye ne: kunanga Yehowa ne muoyo wetu mujima ne anyima wetu mujima ne lungenyi luetu luonso nkushilangane ne kumvua dinanga dikole dia Nzambi munda muetu patupu. Tudi ne bua kulonda meji a Nzambi ne kushala nawu. (Mus. 97:10) Tudi tuleja mutudi banange Nzambi patudi tutumikila mikenji yende yonso ne tutungunuka ne kudifila mu “bienzedi bia tshijila ne bia Nzambi” nansha kumpala kua mateta anyi buluishi.—2 Pet. 3:11; 2 Yone 6.
5 Bitu bienza disanka patudi tuenza disua dia Nzambi bua patudi bamunange. (Mus. 40:8) Mbimpe mulongi wa Bible afike ku diumvua ne: mikenji yonso idi Nzambi muelele bantu bende mmubelelaye bua bikale ne diakalengele tshiendelele. (Dut. 10:12, 13) Padi muntu ulonda buludiki bua Yehowa, udi uleja mudiye muanyishe midimu ya kukema ya Nzambi ne muoyo mujima. Ambuluisha mulongi bua kumvuaye ne: kulonda kua njila miakane ya Yehowa nekumuepule ku ntatu ne tunyinganyinga.
6. Mmasanka kayi adi muntu udi munange Yehowa mua kupeta?
6 Masanka adi badi banange Nzambi bapeta: Yehowa udi utamba kutabalela bantu bena bupuekele badi bamunange ne ubabuluila “malu male” ende. (1 Kol. 2:9, 10) Padibu bamanya disua dia Yehowa dia nunku, badi bumvua tshikala nsombelu wabu mu matuku atshilualua ne bapeta ditekemena dia bushuwa. (Yel. 29:11) Yehowa udi wenzela bantu badi bamunange malu ne luse lupite. (Ekes. 20:6) Kabidi mbatekemene muoyo wa tshiendelele bualu Nzambi mubanange bikole.—Yone 3:16.
7. Mmushindu kayi uutu umona mudimu wa kulongesha bakuabu bua kunanga Yehowa?
7 Patudi tumanya Tatu wetu wa mu diulu bikole, tudi tupeta kabidi malu a bungi a kuyisha bakuabu. (Mat. 13:52) Kulongesha bakuabu bua kunanga Yehowa mbualu buimpe be, nangananga patudi tulongesha bana betu balela. (Dut. 6:5-7) Nanku, tuetu bonso pamue ne balongi betu ba Bible tutungunukayi ne kutumbisha Yehowa bua malu a ‘buimpe buende bunene’ adiye utuenzela.—Mus. 145:7.