Longololayi bantu bapiabapia bua kutantamena buluishi
1 Patu bantu batuadija kulonga Bible ne bapeta dijinga dia “kuikala ne nsombelu mulenga,” Satana utu utuadija kuenza muende muonso bua kubaluisha. (2 Tim. 3:12, MMM) Buluishi budi mua kufumina kudi bena mudimu netu, balongi netu, ne kudi bena mutumba betu. Nsombelu utu ulua kukola nangananga padi mulela utu umueka muntu muimpe utuadija kubaluisha.—Mat. 10:21; Mâko 3:21.
2 Buluishi bukavua bumanyisha: Mbimpe bua bantu bapiapia bamanye ne: nebabakengeshe, ne dikengeshibua ntshimanyinu tshia kuikala bayidi balelela ba Kristo. (Yone 15:20) Imue misangu, bantu batu batuluisha bualu kabatu pamuapa bamanye Bantemu ba Yehowa bimpe to. Kadi, umanye ne: ndisanka dia dikema dia kufuishibua bundu bualu tudi bayidi ba Yezu ne tudi tutumikila Nzambi. (Bien. 5:27-29, 40, 41) Nujadikile bapiabapia aba mudi Yehowa ubakuatshishe ne dinanga. (Mus. 27:10; Mâko 10:29, 30) Padibu bashala anu ne lulamatu badi baya ku luseke lua Yehowa mu tshilumbu bumfumu bunene.—Nsu. 27:11.
3 Mushinga wa dimanya dilelela: Leja balongi bebe ba Bible mushinga wa kutungunuka ne kulonga dimanya dilelela nansha bobu mua kupeta ntatu. Satana udi ubatumina buluishi bua se: malu adibu balonga kaabuedi mu muoyo ne ashalamu to. (Nsu. 4:23; Luka 8:13) Badi ne bua kutungunuka ne kulonga malu malelela adi mu Dîyi dia Nzambi bua bikale ne ditabuja dikole ne badilamate.—Mus. 1:2, 3; Kolos. 2:6, 7.
4 Badi ne bua kutantamena: Ditantamena didi ne mushinga wa bungi padi lutatu lukole lumueneka, ne didi mua kutututshisha diakalengele. (Luka 21:16-19) Padi bantu bapiabapia batantamena buluishi, badi bapeta masanka ne bantu bakuabu badi pabu basanka. Badi bamona mudi Yehowa ne bukole bua kufuta bantu bonso badi ne lulamatu.—Yak. 1:12.
5 Mupostolo Paulo uvua ne disanka dia bungi muvua bana babu ba ku Tesalonike balue bena Kristo bakole mu ditabuja. Bu muvua Paulo muambuluishe ba bungi ba kudibu bua kumanya bulelela bimpe, wakela Nzambi tuasakidila bua bualu buabu buonso. (2 Tes. 1:3-5) Tudi petu mua kupeta disanka dia buena dia Paulo tuetu balongolole balongi betu ba Bible bua kutantamena buluishi ne kubutshimuna.