Uvuije dilongesha dia lupandu mushindu webe wa nsombelu
“Ditshina dia Nzambi didi diambuluisha mu malu wonso.”—1 TIMOTE 4:8, NW.
1, 2. Mmushindu kayi udi bantu baditatshisha bua makanda abu a mubidi, ne kudi kupatuka tshipeta kayi?
BANTU bavule nebitabe se: makanda a mubidi mimpe ke tshimue tshia ku bintu bia mushinga mukole bia kuikala nabi mu nsombelu. Badi bapitshisha mêba mavule ne batula mfranga mivule bua kushalabu buobo bine ne makanda a mubidi mimpe ne kuikala ne dishindika dia se: badi batabalela menemene bua kupeta luondapu lua mpatshi padibu balukengela. Tshilejilu, ku Etats-Unis, mfranga yakatulabu bua makanda a mubidi mu tshimue tshia ku bidimu bidi panshi ebi ivua mipite pa dolare 900 000 000 000. Ebi bidi bileja mfranga bungi bupite pa dolare 3 000 mitula ku tshidimu bua muntu yonso, mulume, mukaji, ne muana mu ditunga edi, ne bakatula bungi pabuipi ne bua muomumue ne ebu pa muntu yonso mu matunga makuabo mabanji.
2 Netuambe tshinyi bua bipeta bidi bifume ku dîba dia mushinga mukole, makanda, ne mfranga biakatudishawu? Bushuwa, muntu nansha umue kakuvila bua kujadika se: mu bionso, malubuluka manene bu mudi mpitadi minenanenayi ne ngondapilu mupiluke bidiku lelu’eu mbipite ne kule ebi bia mu bikondo bishale mu mianda ya bantu. Kadi, ebi kabiena nkayabi biumvuija se: tudi ne nsombelu wa makanda a mubidi mimpe nansha. Bushuwa, pavuaye wakula bua programme udi utangila makanda a mubidi mimpe mu ditunga dia Etats-Unis, mfumu wa ditunga wakamba patoke se: kusakidila ku “tshikisu tshikole mu ditunga edi,” bantu badi basombe mu Etats-Unis “ke badi batamba kupia disama dia SIDA, banua makanya ne banekesha bunuavi bua maluvu, diimita mêmi kudi bansongakaji, dilela dia bana ba bujitu bushadile kupita mu ditunga kayi dionso dibanji. Mmunyi mudi nkomenu wende? “Bituajinga kuikala bantu badi ne makanda a mubidi mimpe, tudi ne bua kushintulula nsombelu wetu.”—Galatia 6:7, 8.
Nsombelu wa makanda mimpe a mubidi
3. Bilondeshile nshidimukilu wa bena Greke ba kale, mmubelu kayi wakafila Paulo?
3 Mu siekele wa kumpala, bena Greke bavua bamanyike bua didifila diabo ne kasuki mu dikolesha mubidi, diibaka mubidi ne manaya a ditembangana. Kayi wanyisha malu aa, mupostolo Paulo wakenzejibua ku spiritu bua kufundila nsongalume Timote ne: “Didibidija dia mubidi didi ne mushinga mukese; kadi ditshina dia Nzambi didi diambuluisha mu malu wonso, bualu didi ne dilaya dia muoyo mpindieu ne wa mu matuku atshilualua.” (1 Timote 4:8, NW) Nenku, Paulo udi uleja patoke tshivua bantu badiku lelu’eu ne bua kulua kujingulula, mbuena kuamba ne: manga peshi bintu bia luondapu kabiena bipetesha anu mudibi bikengela makanda a mubidi mu nsombelu to. Paulo udi utushindikila se: tshidi tshimpe ndidima makanda mimpe a mu nyuma ne ditshina dia Nzambi.
4. Ditshina dia Nzambi didi ne mabenesha kayi?
4 Nsombelu wa mushindu’eu udi diambuluisha bua “muoyo mpindieu” bualu udi utukuba ku malu wonso mabi adi bapidi ba Nzambi, anyi aba badi’anu “ne mushindu kampanda [anyi tshimuenekelu] tshia ditshina dia Nzambi,” badikengesha nawu. (2 Timote 3:5, NW; Nsumuinu 23:29, 30; Luka 15:11-16; 1 Kolinto 6:18; 1 Timote 6:9, 10) Aba badi bashila ditshina dia Nzambi muaba bua kufumbadi nsombelu yabu badi ne kanemu kimpe ka mikenji ya Nzambi ne bidiye utulomba, ne biobi ke bidi bibasaka ku divuija dilongesha dia Nzambi dia lupandu nsombelu wabu. Nsombelu wa mushindu’eu udi utuala makanda a mubidi ne a mu nyuma, disankishibua, ne disanka. Ne badi “badiunguijile bu tshiuma tshijalame, tshishimikidi tshimpe bua matuku atshivuavua, bua bikale ne dishindika dijima dia [kupeta] muoyo wa bushuwa.”—1 Timote 6:19, NW.
5. Mmibelu kayi yakafila Paulo mu nshapita muibidi wa mukanda wende mutumina Tito?
5 Bu mudi nsombelu udi muludika kudi dilongesha dia Nzambi dia lupandu upetesha mabenesha a mushindu’eu mpindieu ne mu matuku atshilualua, tudi tukengela kumanya, bua kupetelaku diambuluisha kampanda, mushindu utudi mua kuvuija dilongesha dia lupandu nsombelu wetu. Mupostolo Paulo wakafila diandamuna mu mukanda wende wakatuminaye Tito. Netutambe kutabalela mu mushindu wa pa buawu nshapita muibidi wa mukanda eu, mudibo bashidimune Tito bua “kutungunukaye ne kuamba malu adi makanangane ne dilongesha dia lupandu.” Bushuwa, yonso wa kutudi, muana ne mukulumpe, mukaji ne mulume, udi mua kubabidila “dilongesha dia lupandu” dia mushindu’eu lelu’eu.—Tito 1:4, 5; 2:1.
Mubelu kudi bantu bakulumpe
6. Mmubelu kayi wakafila Paulo kudi “balume bakulumpe,” ne bua tshinyi uvua muleje buimpe pa bualu ebu?
6 Diambedi, Paulo udi ne imue mibelu idiye ufila kudi bantu bakulumpe mu tshisumbu. Suayi nubale Tito 2:2. “Bantu bakulumpe,” anu bu kasumbu, mbanemekibue ne bangatshibue bu bilejilu bia ditabuja ne dilamata dia ku mikenji. (Lewitiki 19:32; Nsumuinu 16:31) Bua kabingila aka, bakuabo badi mua kuelakana bua kufila mibelu kudi bantu bakulumpe pa malu a mushinga mukese. (Yobo 32:6, 7; 1 Timote 5:1) Nenku, ku luseke lua Paulo ndileja buimpe bua kudianjila diambedi kufila mibelu kudi bantu bakulumpe, ne bidi ne bua kuikala bimpe kudibu bua kuangata ne mushinga mêyi a Paulo ne kuikala ne dishindika dia se: amu bu Paulo, mbantu bakanyine kuidikija.—1 Kolinto 11:1; Filipoi 3:17.
7, 8. (a) Kuikala “ne mmuenenu wa pankatshikatshi mu bibidilu” kuvua kabidi kumvuija tshinyi? (b) Bua tshinyi ngikadilu wa “bena lubatshi” udi ne bua kutuibua mpanda ne wa “kuikala ne mmuenenu muimpe mu tshieledi tshia lungenyi”?
7 Bena nkristo bakulumpe badi ne bua kuikala buonso buabo “ne mmuenenu wa pankatshikatshi mu bibidilu.” Nansha mudi muaku uvuabo batumike nawu ku ntuadijilu wakula bua tshibidilu tshia kunua (“pankatshikatshi,” Kingdom Interlinear), udi kabidi ne diumvuija dia kuikala mutabale, muena lumonu lutue peshi muena kupima miaku ne bienzedi biende. (2 Timote 4:5; 1 Petelo 1:13) Nenku, mu bibidilu bia dinua anyi mu malu makuabo, bantu bakulumpe badi ne bua kuikala ne mmuenenu wa pankatshikatshi, kabayi banekesha.
8 Pashishe, badi ne bua kuikala “bena lubatshi” ne “bena mmuenenu muimpe mu tshieledi tshia lungenyi.” Kuikala bena lubatshi, anyi bantu bena buneme, batumbishibue, ne bakumbanyine kanemu, kutu kulua mu kupita kua bidimu. Kadi, bamue, badi mua kunekesha mu kuleja kua lubatshi, kabayi banyisha nansha kakese bidibo benza kudi bansonga bena bukole. (Nsumuinu 20:29) Ke bua tshinyi kuikala “bena lubatshi” mbakutekeshe ne “mmuenenu muimpe mu tshieledi tshia lungenyi.” Bantu bakulumpe badi ne bua kushala bena lubatshi bilondeshile bungi bua bidimu, kadi mu tshikondo tshimue tshimue kuikala ne mmuenenu wa pankatshikatshi, bikale ne kukanda menemene kua mushindu udibu badiumvua ne basakibua ku bienzedi kampanda.
9. Bua tshinyi balume bakulumpe badi ne bua kuikala bakole mu ditabuja ne dinanga ne nangananga mu dinanukila?
9 Ku ndekelu, bantu bakulumpe badi ne bua kuikala “[bakole mu ditabuja, mu dinanga, mu dinanukila, NW]” Misangu mivule mu mifundu yende, Paulo wakafila mu liste umue ditabuja ne dinanga pamue ne ditekemena. (1 Kolinto 13:13; 1 Tesalonike 1:3; 5:8) Apa wakateka “dinanukila” pa muaba wa “ditekemena.” Imue misangu, mbua padi diteketa ku muoyo mua kukuata bantu bakulakaje kakuyi lutatu. (Muambi 12:1) Kadi, anu bu muvua Yezu muleje, “wananukila too ne ku nshikidilu neasungidibue.” (Matayo 24:13) Kusakidila apu, bakulumpe badi bilejilu biakanyine kulonda kudi bakuabu ki nganu bua bungi bua bidimu biabu ne kumonamona kuabu kua malu kadi bua bikadilu biabu bishindame bia—ditabuja, dinanga, ne dinanukila.
Bua bakaji bakulumpe
10. Mmubelu kayi udi Paulo upesha “bakaji bakulumpe” mu tshisumbu?
10 Paulo udi mpindieu utangija ntema yende kudi bakaji bakulumpe mu tshisumbu. Suayi nubale Tito 2:3. “[Bakaji, NW] bakulumpe” badi bakulumpe ba mu tshisumbu munkatshi mua bakaji, pamue ne bakaji ba “balume bakulumpe” ne ba-mamu ne ba-kaku ba bakuabu bena mu tshisumbu. Pa nanku, badi ne buenzeji buvule, buimpe anyi bubi. Ke bualu kayi Paulo wakatuadija miaku yende ne muaku “muomumue,” mbuena kuamba se: “[bakaji, NW] bakulumpe” badi pabu ne amue majitu mu tshisumbu adibu ne bua kukuba bua kukumbaja mudimu wabu mu tshisumbu.
11. Ngikadilu wa kanemu udi umvuija tshinyi?
11 Tshia kumpala, “[bakaji, NW] bakulumpe bikale ne [ngikadilu wa kanemu, NW]” ke muakamba Paulo. “Ngikadilu” udi tshimuenekelu tshia patoke tshia mmuenenu ne bumuntu bidi munda mua muntu, bu mudibi bimueneka mu ngikadilu wende ne mu tshimuenekelu tshiende. (Matayo 12:34, 35) Nenku, mmuenenu wa mukaji mukulumpe anyi bumuntu buende bidi ne bua kuikala munyi? Mu muaku umuepele, wa “kanemu.” Mmuaku mukudimuna ku muaku wa tshiena-Greke udi ne diumvuija dia “etshi tshidi tshikumbanyine bantu, bienzedi biabu anyi bintu bilongoluela Nzambi.” Ewu udi bushuwa mubelu muakanyine menemene pa kumona buenzeji budibu nabu pa bakuabu nangananga bakaji batekete mu tshisumbu.—1 Timote 2:9, 10.
12. Nntumikilu kayi mubi ne ludimi utudi ne bua kuepuka?
12 Tshibidi, malu abidi mabi adi alonda: “kabikadi [badingididianganyi ba malu, NW] anyi bahika ba maluvu.” Bidi bisankisha pa kumona se: bikadilu ebi mbitekibue kaba kamue. “Mu bikondo bia kale, pavua maluvu mikale tshinuibua tshimuepele,” bilondeshile Mulongeshi E. F. Scott, “mu bisangilu biabu bia kunua kua maluvu ke muvua bakaji bakulumpe badingidila bena mutumba nabu malu.” Bakaji batu pa tshibidilu batabalela bantu kupita balume, mbualu bua kuela ka-lumbandi. Kadi, kutabalela eku kudi mua kukudimuka bijanu nansha kudingilangana mene, nangananga padi ludimi lupepeja kudi maluvu. (Nsumuinu 23:33) Bushuwa, buonso badi bipatshila mushindu wa nsombelu wa lupandu, balume ne bakaji, badi benza bimpe pa kulama mêsu mabulula bua kuepuka buteyi ebu.
13. Mmu mishindu kayi mudi bakaji bakulumpe mua kuikala balongeshi?
13 Bua kuikala ne ngenzelu muimpe wa dîba diabu, bakaji bakulumpe mbakankamijibue bua kuikala “bayishi ba malu adi mimpe.” Muaba mukuabu, Paulo wakafila mibelu mijikuke bua se: bakaji kabena ne bua kuikala balongeshi mu tshisumbu nansha. (1 Kolinto 14:34; 1 Timote 2:12) Kadi, ebi kabiena bibapumbisha bua kufila dimanya dia mushinga mukole dia Nzambi kudi bena mu dîku diabu ne kudi bantu buonso. (2 Timote 1:5; 3:14, 15) Badi kabidi mua kuenza bilenga bivule [pa kuikala bilejilu bia buena nkristo kudi bakaji batekete mu tshisumbu, bu mudi mvese idi ilonda eyi ileja.
Bua bakaji batekete
14. Mmunyi mudi bakaji batekete bena nkristo mua kuleja buakajanganyi mu dikumbaja midimu idi mibuomekela?
14 Mu dikankamija bakaji bakulumpe bua kuikala “bayishi ba malu adi mimpe,” Paulo udi utela bakaji batekete pa muaba wabu nkayabu. Suayi nubale Tito 2:4, 5. Nansha mudi dilongesha edi ditamba kushindamena pa midimu ya mu nzubu, bakaji batekete mbakankamijibue bua kuepuka dinekesha ku luseke lumue anyi ku lukuabu, pa kulekela diditatshisha bua bintu bia ku mubidi dikokesha nsombelu wabu. Kadi, badi ne bua kuikala “ne [meji mimpe, NW], bua kuikala kabai ne [meji, NW] a tshiendenda, . . . bimpe,” ne kupita bionso, ne lukasa bua kutua ndongoluelu wa bukokeshi bua buena nkristo nyama ku mikolo, “bua dî dia Nzambi kadihendibu.”
15. Bua tshinyi bakaji batekete bavule mu bisumbu mbakumbanyine kuedibua ka-lumbandi?
15 Lelu’eu, nsombelu wa mu dîku mmushintuluke bikole ne mushilangane ne wa mu tshikondo tshia Paulo. Mêku mavule mmatapuluke mu ditabuja, ne makuabu adi anu ne muledi umue. Nansha mu mêku mudi tatu, mamu ne bana ne tatu muikale mfumu wa dîku, mbikole bua kumona mamu muikale wenza anu midimu ya mu nzubu. Bionso ebi bidi biteka bujitu buvule pa bakaji batekete bena nkristo, kadi ebi kabiena bibapumbisha bua kukumbaja midimu yabu bilondeshile Mifundu. Nenku, ndisanka dia bungi bua kumona bakaji bena lulamatu bavule benza mudimu mukole bua kukumbaja midimu mivule yonso idibu nayi ne bikale bateke bipatshila bia Bukalenge pa muaba wa kumpala, bamue bikale nansha mu mudimu wa ku dîba ne ku dîba bu bampanda-njila bambuluishi anyi ba pa tshibidilu. (Matayo 6:33) Bushuwa mbakanyine ka-lumbandi!
Bua bansongalume
16. Mmubelu kayi wakafila Paulo kudi bansongalume, ne bua tshinyi mmuakanyine tshikondo tshietu etshi?
16 Paulo udi ufika mpindieu kudi bansongalume, ne Tito muine munkatshi muabu. Suayi nubale Tito 2:6-8. Pa kumona bienzedi bia kupanga mudimu wa kuenza ne bia kabutu bia bansongalume bavule ba tshikondo etshi—kunua kua makanya, kua diamba ne bukuatshiki bua maluvu, ne tshiendenda tshia masandi, ne bikuabu bipatshila bia bena mu bulongolodi ebu, bu mudi manaya a lonji ne mijiki ne mishindu mibi ya dijikija lutetuku—ewu mmubelu muakanyine bua bansonga bena nkristo badi basue kulonda njila wa lupandu ne wa disanka.
17. Mmunyi mudi nsongalume mua kulua “mukezuke mu tshieledi tshiende tshia meji” ne “tshilejilu tshia midimu mimpe”?
17 Bishilangane ne bansonga ba mu bulongolodi ebu, nsongalume muena nkristo udi ne bua kuikala “ne [meji mimpe, NW]” ne “tshilejilu tshia midimu mimpe.” Paulo wakumvuija ne: tshieledi tshia meji tshimpe ne tshishindame tshidi tshipetshibua, ki nganu kudi aba badi balonga, kadi ne kudi aba badi “ku ditumikatumika, bakupeta ngikadilu ya bujinguludi mikumbanyine mua kusunguluja malu mempe ne mabi.” (Ebelu 5:14, NW) Mbualu bua dikema kayipu pa kumona bansonga bafila ku budisuile dîba diabu ne bukole buabu bua kuenza midimu mivule ya mu tshisumbu tshia bena nkristo, pamutu pa kujimija bukole buabu bua bunsonga mu bipatshila bia buiminyi! Pa kuenza nenku, anu bu Tito, badi mua kulua bilejilu bia “midimu mimpe” mu tshisumbu tshia bena nkristo.—1 Timote 4:12.
18. Kubenga kuikala buoneke mu dilongesha diabu, bena lubatshi mu bienzedi, ne kuikala ne mêyi mimpe, bidi biumvuija tshinyi?
18 Bansonga mbavuluijibue bua se: “mu [dilongesha diabu kabikadi buoneke, NW], bikale badiholeshe, bikale ne mei malenge adi kâi mua kuhishibua].” Dilongesha didi ‘kadiyi dioneke’ didi ne bua kuikala diashila bikole pa Dîyi dia Nzambi; nenku, bansongalume badi ne bua kuikala balongi ba disuminyina ba Bible. Anu bu bantu bakulumpe, bansongalume badi ne bua kuikala bashindame. Badi ne bua kumanya ne: kuikala ministre wa Dîyi dia Nzambi mbujitu bukole, ne pa nanku badi ne bua kuikala ne ‘bikadilu bikumbanyine ne lumu luimpe.’ (Filipoi 1:27) Bia muomumue ngakuilu wabu udi ne bua kuikala “muimpe” ne wa “mei malenge adi kâi mua kuhishibua” bua baluishi kabamonyi pa kusambena.—2 Kolinto 6:3; 1 Petelo 2:12, 15.
Bua bapika ne basadidi
19, 20. Mmunyi mudi aba badi ku mudimu wa bakuabu bantu mua “kulengejija dilongesha dia Musungidi wetu, Nzambi”?
19 Ndekelu wa bionso, Paulo udi ukudimuka kudi aba badi ku mudimu wa bakuabu. Suayi nubale Tito 2:9, 10. Ba kutudi badi bapika ne basadidi mbakese, kadi bavule badi bena mudimu ba bakuabu. Nenku, mêyi-maludiki matela kudi Paulo adi anu ne mushinga nansha lelu’eu.
20 “Bikale bakokela banfumu babo, ne babasankisha mu malu onso” mbuena kuamba ne: bena mudimu bena nkristo badi ne bua kuleja bamfumu babu ba mudimu kanemu kalelela. (Kolosai 3:22) Badi kabidi ne bua kuikala ne lumu lua bena mudimu kabayi buivi, bafila dituku dijima dia mudimu kudi mfumu wabu bu tshintu tshiende. Ne badi ne bua kulama mêyi-maludiki matumbuke a nsombelu wa buena nkristo ku miaba yabu ya mudimu nansha bena mudimu nabu bikale ne mmuenenu kayi. Bionso ebi bidi nanku “bua bobo [balengejije dilongesha, NW] dia Nzambi, Musungidi wetu, mu malu onso.” Mmisangu bungi munyi itudi tumvua bakula bua bipeta bia disanka padi babandidi ba muoyo muimpe bandamuna ku bulelela bua ngikadilu muimpe wa bena mudimu nabu Bantemu. Edi ndifutu didi Yehowa witshikijila aba badi balonda dilongesha diende dia lupandu nansha pa miaba yabu ya mudimu.—Efeso 6:7, 8.
Tshisamba tshikezula
21. Bua tshinyi Yehowa mmufile dilongesha dia lupandu, ne mmunyi mutudi ne bua kuandamuna?
21 Malongesha a lupandu avua Paulo muadije kaena tshibungu tshia mêyi-maludiki anyi ngenyi ya nsombelu bitudi mua kubala bu mutudi basue. Paulo wakatungunuka ne kumvuija tshipatshila tshiawu. Suayi nubale Tito 2:11, 12. Bua dinanga diende ne bua buimpe buende budi kabuyi butukumbanyine, Yehowa Nzambi mmufile malongesha a lupandu bua tuetu kulonga mua kuikala ne nsombelu udi ne tshipatshila mu bikondo ebi bikole mua kupita nabi ne bia njiwu. Udi musue kuitaba dilongesha dia lupandu ne kudivuija mushindu webe wa nsombelu anyi? Kuenza nenku nekumvuije lupandu luebe.
22, 23. Mmabenesha kayi atudi tunowa pa kuvuija dilongesha dia lupandu mushindu wetu wa nsombelu?
22 Kupita pine apu, kuvuija malongesha a lupandu mushindu wetu wa nsombelu kudi kutupetesha disanka dia pa buadi mpindieu ne ditekemena dia diakalenga bua matuku atshilualua. Suayi nubale Tito 2:13, 14. Bushuwa, kuvuija malongesha a lupandu mushindu wetu wa nsombelu kudi kutupatula bu tshisamba tshikezula mu bulongolodi bunyanguke ne budi bubunga ne lufu. Miaku ya Paulo idi yumvuangana ne madimuija a Mozese kudi bana ba Izalele ku Sinai: “Ne Yehowa, . . . [neanubandishe, NW] ku mutu kua bisamba bionso biakafukeye mu butumbi ne mu dina ne mu buneme; bua nuenu nuikale [bansantu, NW] kudi Yehowa, Nzambi wenu, bu muakuambaye.”—Dutelonome 26:18, 19.
23 Tutungunukayi ne kuangata ne mushinga disanka dietu dia kuikala tshisamba tshikezula tshia Yehowa pa kuvuija malongesha a lupandu mushindu wetu wa nsombelu! Ikalayi anu badimuke bua kuepuka mushindu wonso wa dipidia dia Nzambi ne majinga a bena bulongolodi ebu, nenku kumona mua kushala bakezula ne bakumbanyine mua Yehowa kuenzaye netu mudimu mu mudimu munene udiye wenzeja lelu’eu.—Kolosai 1:10.
Utshidi muvuluke anyi?
◻ Bua tshinyi ditshina dia Nzambi didi dituambuluisha mu malu wonso?
◻ Mmunyi mudi balume ne bakaji bena nkristo bakulumpe mua kuipatshila dilongesha dia lupandu bu mushindu wa nsombelu?
◻ Ndilongesha kayi dia lupandu divua Paulo muadijile bansongalume ne bakaji batekete ba mu bisumbu?
◻ Ndisanka kayi ne ndibenesha kayi bitudi mua kupeta bu tuetu mua kuvuija dilongesha dia lupandu mushindu wetu wa nsombelu?
[Bimfuanyi mu dibeji 18]
Bavule lelu badi batumikila mubelu wa Tito 2:2-4