Bakenza disua dia Yehowa

Dipetela Izaka mukaji

MUNTU wa mvula ya bungi musombe pabuipi ne tshina tshia mâyi uvua mupungile bikole. Yeye ne basadidi nende pamue ne tumelo tuabu dikumi bavua benze luendu lule kumbukila pabuipi ne Beer-sheba too ne ku Nord kua Mezopotamia​—mutantshi wa kilometre mipite pa 800.a Mpindieu bamane kufika kuvuabu baya, muena luendu eu mupungile wakasomba kakese bua kuela meji pa mudimu wende mukole mumupesha. Muntu eu uvua nganyi, ne bua tshinyi wakenza luendu elu lukole?

Muntu eu uvua musadidi wa Abrahama, “mukulu wa bena mudimu ba mu nzubu muende.” (Tshibangidilu 24:2, MMM) Nansha mudi dîna diende kadiyi ditela mu muyuki eu, mbimueneke se: uvua Eliezere, uvua Abrahama mutele munga musangu bu ‘muntu muledibue mu nzubu muende’ ne wakambaye bualu buende bu muikale mu mulongo wa kulua ‘mupianyi wa bintu biende.’ (Genese 15:2, 3) Bushuwa, ebi bivua tshikondo tshivua Abrahama ne Sara kabayi ne muana. Mpindieu muanabu wa balume, Izaka, uvua ne bidimu 40, ne nansha muvua Eliezere kayi kabidi mupianyi wa kumpala wa bintu bia Abrahama, utshivua anu musadidi wende. Nenku wakatumikila mêyi a Abrahama pakenzaye dilomba dikole edi. Divua dilomba kayi?

Mudimu mukole

Mu tshikondo tshia Abrahama diselangana kadivua dilenga amu dîku nkayadi kadi kabidi tshisa tshijima, peshi tshinsanga tshia nkambua wa dîku. Nenku bivua tshibidilu tshia baledi bua kusunguila bana babu muena dibaka kampanda. Kadi, mu dikebela muanende Izaka mukaji, Abrahama uvua kumpala kua nshinga wa kujandula. Bua bikadilu bia dipetula Nzambi bia bena Kanana bavuaye musombe nabu, kabivua mua kuedibua meji bua kuselangana ne umue wa kudibu. (Dutelonome 18:9-12) Ne nansha muvuabi tshibidilu bua muntu kuselaye mu tshisa tshiende, bana babu ne Abrahama bavua basombele mutantshi wa nkama ne nkama ya kilometre ku Nord kua Mezopotamia. Kavua bushuwa mua kutuma Izaka bua kuasaye kuine aku, bualu Yehowa wakalaya Abrahama ne: “Nempe tunkanunuina tuebe buloba ebu,” buloba bua Kanana. (Genese 24:7) Pa nanku, Abrahama wakambila Eliezere ne: “Uye mu ditunga dietu kudi balela banyi, usunguile muananyi Izake mukaji.”​—Tshibangidilu 24:4, MMM.

Mumane kufika ku ndekelu kua luendu elu lule, Eliezere wakiikisha pabuipi ne tshina tshia mâyi welangana meji pa mudimu mumupesha. Wakajingulula se: mu katupa kîpi bakaji nebikale mua kulua ku tshina bua kusuna mâyi abu a kulama butuku. Nenku wakalomba Yehowa ne: “Nsongakaji ungambila ne ‘Puekesha mulondo webe, nnue mayi’, kabidi wangandamuna ne ‘Nuaku, nennuishe kabidi ne nyama yebe ya tumelo’, ke yeye uudi musunguile musadidi webe Izake. Nanku nemmanye ne: udi uleja muudi mutabalele mfumuanyi.”​—Tshibangidilu 24:14, MMM.

Patshivuaye usambila, nsongakaji kampanda mulengele mubikidibue Rebeka kusemenaye. Eliezere kumuambilaye ne: “Anyisha nnue mayi a mu mulondo webe.” Rebeka kuenzaye nanku, ne pashishe kuambaye ne: “Ndi nya kusunyina kabidi nyama yebe ya tumelo too ne pukutayo.” Etshi tshivua dipa dia kalolo menemene, bualu kamelo kàdì ne nyota kadi mua kunua litre ya mâyi mitue ku 95 mu minute dikumi patupu! Nansha bu bikala ne: tumelo tua Eliezere tuvua ne nyota mikole peshi katuyi nayi, Rebeka uvua ne bua kuikala mumanye se: mudimu uvuaye muanyishe bua kukuata eu uvua ne bua kuikala mukole. Bushuwa, ‘wakapongolola mayi avua mu mulondo wende mu tshinuinu tshia nyama lukasa, kupinganaye tshiakabidi lubilu ku tshina, kusuna bua nyama ya tumelo yonso.’​—Tshibangidilu 24:15-20, MMM.

Mutuishibue bua bulombodi bua Yehowa, Eliezere e kupesha Rebeka kakanu ka ngolo ka ku diûlu ne bikanu bibidi bia ngolo bia ku maboko, mushinga wabi lelu’eu udi dolare bu 1 400. Pakamuambila Rebeka ne: uvua muikulu wa Nahore, muanabu ne Abrahama, Eliezere wakenza disambila bua kuela Nzambi tuasakidila. Kuambaye ne: ‘Yehowa mmundombole ku nzubu kua bana babu ne mukalenge wanyi.’ (Genese 24:22-27) Bakaya ne Eliezere mu dîku dia Rebeka. Kunyima kua tshikondo kampanda, Rebeka wakalua mukaji wa Izaka, ne wakapeta disanka dia kulua nkambua wa Masiya, Yezu.

Malongesha buetu

Yehowa wakabenesha madikolela a Eliezere a muoyo umue bua kupetela Izaka muena dibaka udi utshina Nzambi. Kadi nuvuluke ne: dibaka dia Izaka divua disuikakaja buludiludi ku dilongolola dia Nzambi dia kupatula dimiinu ku butuangaji bua Abrahama. Nenku muyuki eu kawena ne bua kutufikisha ku dikoma ne: muntu yonso udi usambila bua kupeta muena dibaka nebamupetesheye mu tshishima. Kadi, bituashala balamate ku mêyi-maludiki a Yehowa, neatupeshe makanda bua kutantamena ntatu idi imueneka mu nsombelu yonso ibidi​—wa dibaka peshi wa bujike.​—1 Kolinto 7:8, 9, 28; fuanyikija ne Filipoi 4:11-13.

Eliezere uvua ne bua kuenza madikolela mavule bua kuenza malu bilondeshile disua dia Yehowa. Tuetu petu tudi mua kumona se: dinemekela mêyi-makulu a Yehowa kadiena misangu yonso dipepele. Tshilejilu, bidi mua kuikala bikole bua kupeta mudimu wa ku mubidi udi kauyi ukanda mudimu wa teokrasi, muena dibaka udi utshina Nzambi, balunda biibakianganyi, dijikija lutetuku didi kadiyi dinyanga. (Matayo 6:33; 1 Kolinto 7:39; 15:33; Efeso 4:17-19) Pabi, Yehowa udi mua kukuatshisha aba badi babenga bua kutupa ku mêyi-maludiki a mu Bible. Bible udi ulaya ne: “Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululami[j]ile n[j]ila yebe.”​—Nsumuinu 3:5, 6.

[Mêyi adi kuinshi]