Mutudi mua kulongesha bantu Bible ne mukanda wa “Dinanga dia Nzambi”
1. Mukanda wa “Dinanga dia Nzambi” udi ne tshipatshila kayi?
1 Tuvua ne disanka dia bungi patuvua bapete mukanda mupiamupia wa “Nudilame mu dinanga dia Nzambi” mu mpungilu wetu wa Distrike wa “Nyuma wa Nzambi udi utulombola.” Anu muvuabu bamanyishe, mukanda eu udi utuambuluisha bua kumanya mikenji ya Yehowa ne kuyinanga, kadi ki mbua kulongesha nawu bantu malongesha manene a mu Bible to. Katuakuupesha bantu mu mudimu wa ku nzubu ne ku nzubu to.
2. Ndîba kayi ditualongesha balongi ba Bible ne mukanda eu? Mbanganyi batuawulongesha?
2 Mukanda eu ke utualongesha nawu balongi ba Bible patudi tujikija nabu mukanda wa Bible ulongesha. Numanye ne: bantu kabatu baya kumpala mu dilonga dia dîyi dia Nzambi mushindu umue to. Bidi bikengela kulonga ne muntu yonso bilondeshile tshidiye. Ikala mujadike ne: mulongi mmumvue bimpe malu audi umulongesha. Mukanda eu ki ngua kulongesha nawu bantu bakadi balonge mikanda yetu ya bungi, kadi kabayi babuela mu bisangilu bia tshisumbu ne kabayi basue kuenza malu adi umvuangana ne malongesha malelela a mu Bible adibu balonge to.
3. Ntshinyi tshitudi ne bua kuenza bituikala tulonga ne muntu mukanda wa Tutendelelayi Nzambi?
3 Biwikala ulonga ne muntu mukanda wa Tutendelelayi Nzambi ne binuikala nukadi mu nshapita ya ndekelu, nudi mua kuujikija, kadi umuambile bua adibadile mukanda wa “Dinanga dia Nzambi.” Kadi binuikala nutshidi ku ntuadijilu, mbimpe nutuadije kulonga nende mukanda mupiamupia anu ku ntuadijilu kuawu. Anu bu mutudi tuenza bua mukanda wa Bible ulongesha, nudi mua kulonga biena-bualu bidibu basakidile mu mukanda mupiamupia eu anyi kubenga kubilonga.
4. Ntshinyi tshitudi ne bua kuenza bikala mulongi wa Bible mutambule kumpala kua kujikija mukanda wa Bible ulongesha ne wa “Dinanga dia Nzambi”?
4 Muntu yeye mutambule kumpala kua kujikijaye mikanda ibidi eyi, udi ne bua kutungunuka ne kulonga too ne muajikijaye mukanda wa “Dinanga dia Nzambi.” Nansha mukadi mulongi mutambule, mulongeshi udi ne bua kubala mêba, makumbula mapiamapia ne dilonga padibu balonga nende. Mumanyishi udi uya kufila mulongeshi bua kulongabu ne mulongi eu udi pende mua kubala mêba bikalaye muakule.
5. Mmushindu kayi utudi mua kuambuluisha bamanyishi bakadi balekele kuyisha ne mukanda wa “Dinanga dia Nzambi”?
5 Mukulu wa mu kasumbu ka mudimu ka tshisumbu udi mua kukulomba bua kulonga imue nshapita misunguluke ya mu mukanda wa “Dinanga dia Nzambi” ne muntu ukadi mulekele kuyisha. Dilonga dia mushindu eu kadiena ne bua kuenza matuku a bungi to. Mukanda mupiamupia eu udi ne malongesha mimpe matambe adi atuambuluisha bua kushala “mu dinanga dia Nzambi.”—Yuda 21.