Dilongesha bua kuikala ne muoyo muimpe

UDI mumanye tshidi kuelela muntu meji mabi kumvuija anyi?​— Kuelela muntu meji mabi mmuomumue ne: kubenga kunanga muntu anu bualu udi umueneka mushilangane anyi bualu udi wakula muakulu mukuabu. Nunku kuelela muntu meji mabi nkumumvuila muoyo mubi anyi kuikala ne lungenyi lubi bua muntu au petu katuyi nansha banji kumumanya bimpe to.

Udi wela meji ne: mbualu buakane bua kubenga kunanga muntu katuyi banji mene kumanya ne: mmuntu wa mushindu kayi anyi anu bualu mmushilangane netu anyi?​— Tòo, kuelelangana meji mabi ki nkuimpe to, ki ndileja dia muoyo muimpe nansha. Katuena ne bua kuleja muntu muoyo mubi anu bualu udi mushilangane netu to.

Elabi meji bimpe pa bualu ebu. Udiku mumanye muntu udi ne dikoba dishilangane ne diebe ta utu wakula muakulu mushilangane ne uwutu wewe wakula anyi?​— Pamuapa udi mumanye bantu badi mibidi yabu imueneka mishilangane ne ya bakuabu bualu bavua bapete njiwu anyi bualu badi basama. Utuku uleja muoyo muimpe ne dinanga kudi bantu badi bashilangane nebe anyi?​—

Tuetu tuteleja Yezu Kristo Mulongeshi Munene, netuleje bantu bonso muoyo muimpe. Buetu tuetu kakuena dishilangane nansha muntu mufumine mu ditunga kayi anyi muikale ne dikoba dia mushindu kayi. Tudi ne bua kumunanga anyi kumuleja muoyo muimpe. Nansha bantu bonso kabayi bitaba bualu ebu to, mbimpe tumanye ne: tshintu etshi ndilongesha divua Yezu mulongeshe. Tuakuilayi mpindieu pa bualu ebu.

Muena Yuda mukuabu uvua welela bakuabu meji mabi wakaya kudi Yezu e kumukonka ne: ‘Tshindi mua kuenza ntshinyi bua meme kupeta muoyo wa tshiendelele?’ Yezu uvua mumanye ne: muntu au uvua pamuapa uteta bua kumuambishisha ne: tudi ne bua kuleja muoyo muimpe anu kudi bantu ba dikoba dietu anyi ba mu ditunga dietu. Nanku pamutu pa kuandamuna anu ku lukonko patupu, Yezu wakamuebeja ne: ‘Mikenji ya Nzambi idi yamba tshinyi tshitudi ne bua kuenza?’

Muntu au wakandamuna ne: ‘Udi ne bua kunanga Yehowa Nzambi webe ne muoyo webe mujima, ne udi ne bua kunanga muntu nebe anu bu wewe muine.’ Yezu wakamba ne: ‘Udi muandamune bimpe. Tungunuka ne kuenza nunku neupete muoyo wa tshiendelele.’

Kadi muntu au kavua musue kunanga bantu bavua bashilangane nende anyi kubaleja muoyo muimpe to. Nanku wakakeba bua kudibingisha. Wakakonka Yezu ne: “Muntu nanyi nnganyi?” Pamuapa uvua mua kuikala ukeba bua Yezu ambe ne: “Bantu nebe mbalunda bebe” anyi “Mbantu badi bu wewe.” Bua kuandamuna lukonko alu, Yezu wakalonda muyiki wa muena Yuda ne muena Samalea. Wakaulonda nunku:

Muntu mukuabu uvua mu njila ufumina mu musoko wa Yelushalema upueka mutangile ku Yeleko. Muntu eu uvua muena Yuda. Pavuaye uya apu, bivi kumukuatabu mu njila amu. Bakamuela mututu mukole e kumulekelabu panshi, bakanyenga makuta ende ne bilamba biende kuyabu nabi. Bivi abu bakamututa bikole kumutapabu too ne mputa ne kumushiyabu kumpenge kua njila wamba kukula muoyo.

Katantshi aka, muakuidi mukuabu kuluilaye mu njila au. Wakamona muntu au uvuabu batape mputa bibi. Bu biobi bikale wewe, uvua mua kuenza tshinyi?​— Muakuidi eu wakalamatshila anu luseke lukuabu lua njila e kutungunukaye mutangile kuvuaye uya. Kakimana nansha kuimana kuine to. Kakenza bualu nansha bumue bua kuambuluisha muntu au to.

Pashishe muntu mukuabu uvua muena malu a Nzambi menemene wakapitshila pende mu njila amu. Uvua muena Lewi uvua wenzela mudimu mu ntempelo wa ku Yelushalema. Wakimanaku bua kuambuluisha muntu au anyi?​— Tòo. Wakenza anu mushindu uvua muakuidi muenze pende.

Ndekelu wa bionso, munga muena Samalea wakapitshila pende mu njila amu. Udi mumumone mudiye wenda ulua lua mu tshibenda tshia njila eu etshi anyi?​— Wakamona muena Yuda au mulale panshi ne mputa inyenya mashi. Umanye ne: bena Samalea ne bena Yuda ba bungi kabavuaku banangangane to. (Yone 4:9) Nanku muena Samalea eu wakashiya muntu au kayiku mumuambuluishe anyi? Wakadiambilaku munda munda ne: ‘Bua tshinyi ndi mua kuambuluisha muena Yuda eu? Yeye uvuaku mua kungambuluisha bu meme muikale mutapike anyi’?

Kadi muena Samalea eu wakatangila muntu uvua mulale kumpenge kua njila au, luse kumuenzalu. Kavua mua kumushiya muaba au ne kumulekela ufua to. Nanku wakatuluka pa nyama wende uvuaye mubande, kusemenaye kudi muntu au ne kutuadijaye kumuondapa mputa. Wakamuelapu manyi ne mvinyo. Bintu ebi bivua mua kumisha mputa. Wakasuika tshilamba pa mputa ayi.

Muena Samalea wakambula muntu uvuabu batape mputa eu pa nyama wende. Bakapueka bitekete bitekete mu njila too ne pakafikabu muaba uvua nzubu mukese wa tshilala benyi. Bafika kuine aku, muena Samalea wakafutshila muntu au nzubu bua kusombaye, wakamuondapesha kabidi bimpe.

Mpindieu Yezu wakakonka muntu uvuaye ulondela muyiki eu ne: ‘Udi wela meji ne: nnganyi wa ku bantu basatu aba uvua muntu nende menemene wa eu uvuabu batape mputa au?’ Wewe uvua mua kuamba tshinyi? Mmuakuidi anyi, mmuena Lewi anyi peshi mmuena Samalea?​—

Muntu au wakandamuna Yezu ne: ‘Muntu uvua muimane ne muondape muntu uvuabu batape mputa au ke uvua muntu nende menemene.’ Yezu wakamba ne: ‘Udi muandamune bimpe. Ndaku, wewe pebe wenze muomumue.’​—Luka 10:25-37, MMM.

Kauvuaku muyiki muimpe anyi? Udi uleja bimpe menemene badi bikale bantu netu. Kabena anu balunda betu ba pa muoyo to. Kabidi kabena anu bantu ba dikoba dia buena dietu anyi badi bakula muakulu wetu to. Yezu wakatulongesha bua kuleja bantu muoyo muimpe peshi kubananga nansha bikale ba muaba kayi, ba mushindu kayi anyi bakula muakulu kayi wonso.

Ke mushindu udi Yehowa Nzambi nanku. Katu welelangana meji mabi to. Yezu wakamba ne: ‘Tatu wenu udi mu diulu udi ubandishila bantu bimpe ne babi dîba diende, ulokeshila bakane ne badi kabayi bakane mvula.’ Nanku tudi ne bua kuleja bantu bonso muoyo muimpe, anu bu mudi Nzambi wenza.​—Matayo 5:44-48.

Nanku paudi umona muntu mutapike mputa, newenze tshinyi?​— Kadi bikala muntu au muikale wa mu ditunga dikuabu peshi muikale ne dikoba dishilangane ne diebe? Udi anu muntu nebe, udi ne bua kumuambuluisha. Wewe mudimone kuyi ne mushindu wa kumuambuluisha bualu udi muana mutekete, nanku udi mua kuambila muntu mukulumpe bua amuambuluishe. Anyi kabidi udi mua kubikila mpulushi ta mulongeshi wa mu kalasa. Ke mushindu wa kuleja muoyo muimpe au, anu bu muena Samalea.

Mulongeshi Munene mmusue bua tuikale tulejangana muoyo muimpe. Mmusue bua tuikale tuambuluisha bakuabu, nansha buobu bikale banganyi. Ke bua tshinyi wakalonda muyiki wa muena Samalea wa muoyo muimpe eu.