Mushindu wa kudilongolola bua Tshisangilu tshia Mudimu
1. Tshisangilu tshia Mudimu ntshilongolole bua tshinyi? Mmushindu kayi uditshi mua kutuambuluisha?
1 Tshisangilu tshia Mudimu ntshilongolola bua kutuambuluisha bua tuetu kuyisha ne kupatula bipeta bilenga. Tshidi tshimanyina pa mudimu wa kuyisha lumu luimpe lua Bukalenge, kuvuija bantu bayidi, ne kumanyisha mushindu wikala Nzambi mua kunyoka bantu babi. (Mat. 28:20; Mâko 13:10; 2 Pet. 3:7) Patudi tulongolola tshisangilu etshi netuandamune bimpe ne netshituambuluishe bikole.
2. Mmunyi mutudi mua kudilongolola bua kuteleja muyuki?
2 Muyuki: Pa tshibidilu batu baleja ngamba-malu malu a kuambaye. Wewe pebe udi mua kubala malu au, kubala mvese ne kuela meji pa mushindu uudi mua kutumikila malu au mu buambi.
3. Ntshinyi tshitudi mua kuenza bua kudilongola bua mudimu wenzabu mu nkonko ne mandamuna?
3 Diyukidilangana mu nkonko ne mandamuna: Mudimu eu ngua kuenza anu mutubu balombola dilonga dia Tshibumba tshia Nsentedi, kutuadijaku ne mêyi makese, kujikija kabidi ne mêyi makese. Wela kashonyi ku ngenyi minene, udilongolole bimpe bua kuandamuna bilondeshila malu adi mu tshikoso.
4. Mmushindu kayi utudi mua kudilongolola bua mudimu wa diyukidilangana ne bateleji?
4 Diyukidilangana ne bateleji: Nebenza mudimu eu bu muyuki, kadi ngamba-malu nealombe bateleji bua kuakulabu pabu. Paudi udilongolola bua mudimu eu, wewe muela kashonyi pa malu a mushinga ne mubale mvese idibu bafile, neupete mushindu wa kuandamuna pikala ngamba-malu mua kuela nkonko. Muanetu wenza mudimu eu neenze muende muonso bua kubueja bateleji mu muyuki bua kuakuila pa ngenyi minene.
5. Tshia kuenza ntshinyi bua manaya a bilejilu kutuambuluishawu bikole?
5 Manaya a bilejilu: Bimue bitupa bia mu Tshisangilu tshia Mudimu nebilombe bua kuenzeja manaya a bilejilu bua kuleja mushindu wa kuenza mudimu ne malu anudi nulonga au mu teritware wenu. Bakulu anyi bamanyishi badi ne dimanya dia bungi nansha bampanda-njila badi mua kuenza manaya aa. Didilongolola diebe ku tshitupa etshi didi mua kuikala diela diebe dia meji bua mushindu wenzeka dinaya edi. Padibu benza dinaya dia tshilejilu bu mudi dia mua kufila tshibejibeji, uteya ntema bua kumona mua kukuata mudimu ne ngenyi ayi paudi uyisha, kadi mu ebe mêyi ne bilondeshila muntu uudi uyikila nende. Kupu muoyo bua kuambula mukanda anyi tshibejibeji tshienzabu natshi dinaya edi mu bisangilu. Nenuenze bimpe bu nuenu mua kuambulula ngenyiminene ya manaya aa dîba dinudi nutendelela mu dîku.
6. Tudi tulongolola Tshisangilu tshia Mudimu bua malu kayi malenge?
6 Tshisangilu tshia Mudimu netshitusankishe bikole bituikale balongolola midimu yonso yenzabu ne bele meji bua malongesha aa. Tuetu tuenza nunku netukoleshangana mu ditabuja ne bana betu. (Lomo 1:11, 12) Tuetu tudisumbila tshikondo tshia kulongolola Tshisangilu tshia Mudimu, netuikale badilongolole tshishiki bua kukumbaja mudimu wetu.—2 Tim. 3:17.