Wikale mudilongolole bua kulongesha bimpe
1. Patudi tulongesha muntu Bible, bua tshinyi tudi ne bua kumufikisha ku dianyisha bidiye ulonga?
1 Patudi tulongesha muntu Bible, tudi ne bua kudilongolola bimpe bua kufika ku dilenga muoyo wende ne kumusaka bua kuenzela Yehowa mudimu. Tudi ne bua kudienzeja bua kukolesha dianyisha diende bua bulelela bua mu Bible budiye ulonga. Nebimusake bua kuenzela Yehowa mudimu. (Dut. 6:5; Nsu. 4:23; 1 Kol. 9:26) Mmunyi mutudi mua kukumbaja bualu ebu?
2. Disambila didi ne mushinga kayi patudi tudilongolola bua kulongesha?
2 Tuikale tusambila patudi tudilongolola bua kulongesha mulongi: Bu mudibi ne: Yehowa ke udi udiundisha ntete ya bulelela mu muoyo wa mulongi, mbimpe kusambila bua mulongi ne bua majinga ende patudi tutuadija kudilongolola bua dilonga. (1 Kol. 3:6; Yak. 1:5) Disambila dia nunku didi mua kutuambuluisha bua kujingulula tshitudi mua kuenza bua kuuja muoyo wa mulongi ne “dimanya” dilelela dia disua dia Yehowa.—Kolos. 1:9, 10, MMM.
3. Mmunyi mutudi mua kuela meji ku tshidi mulongi patudi tudilongolola?
3 Ela meji ku tshidi mulongi: Yezu uvua mumanye ne: bua kulongesha bimpe bivua bikengela kuela meji ku tshidi bateleji. Misangu mitue ku ibidi, bakela Yezu lukonko lumue lumue elu: ‘Nengenze tshinyi bua kupiana muoyo wa tshiendelele?’ Misangu yonso pavuaye wandamuna, uvua mumvuije malu mashilashilangane. (Luka 10:25-28; 18:18-20) Tudi ne bua kuikala ne mulongi mu meji bua kumona malu adiye ne bua kulonga patudi tudilongolola. Ngimue ya ku mvese kayi idibu bafile mu tshikoso ituabala nende? Netulonge nende bikoso bungi kayi? Mmalu kayi a mu dilonga adi mua kukolela mulongi bua kumvua anyi adiye mua kubenga kuitaba? Tuetu badianjile kuelela meji pa nkonko idi mulongi mua kujula, netuikale badilongolola bimpe bua kuyandamuna.
4. Didilongolola dimpe didi dilomba kuenza tshinyi?
4 Udilongolole: Nansha tuetu bamane kulonga mukanda au misangu ya bungi, bidi bikengela kudilongolola bualu mmusangu wa kumpala utudi tuulongesha mulongi au. Tuetu basue kulenga muoyo wende, bidi bikengela tuetu kudilongolola bimpe bua dilonga dionso. Mbuena kuamba ne: kuenza malu atudi tuambila mulongi wetu bua kuenza. Tudi mua kuambulula malu atuamulongesha, mvese idibu bafile mu bikoso, kuelela meji pa nsombelu wa mulongi ne kuela tushonyi muinshi mua malu manene.—Lomo 2:21, 22.
5. Mmushindu kayi utudi mua kuidikija Yehowa?
5 Yehowa udi uditatshisha bikole bua dilubuluka dia mulongi yonso wa Bible. (2 Pet. 3:9) Patudi tudienzeja bua kudilongolola bua mulongi yonso wa Bible, tudi tuleja mutudi tuditatshisha petu bua balongi ne dinanga anu bu Yehowa.