Utu mudimuke anyi?

PAVUA Mose uteka balumbuluishi mu Isalele, wakadienzeja bua kupeta “balume ba meji, badimuke ne ba dimanya.” (Dutelonome 1:13, NW) Dimanya ditu muntu upeta padiye ukola, kadivua bualu bumuepele buvuabu babalombe nansha. Meji ne budimu bivua pabi ne mushinga.

Muntu mudimuke utu wakula ne wenza malu adi aleja ngelelu muimpe wa meji. Nkonga-miaku kampanda udi uleja ne: muntu mudimuke udi kabidi ne “bukole bua kushala mupuwe ne ditalama.” (Webster’s Ninth New Collegiate Dictionary) Bushuwa, kudi “tshikondo tshia kuakula,” ne kudi “tshikondo tshia kupuwa,” ne muntu mudimuke mmumanye dishilangana edi bimpe. (Muambi 3:7, MMM) Misangu ya bungi, kushala bapuwe kutu ne buimpe buaku, bualu Bible udi wamba ne: ‘Pavulangana mêyi, kushipa kua mikenji kudiku, kadi udi ukanda mishiku yende udi ne meji [anyi budimu].’​—Nsumuinu 10:19.

Bena Kristo badi ne bua kuikala badimuke mu disomba diabu ne bakuabu. Muntu utu utamba kulola malu anyi utu utamba kuakula ushindika ki ngutu anu ne mushinga wa bungi to. Vuluka ne: Mose ‘wakadi mukole mu mêyi ende,’ kadi kavua mua kulombola tshisamba tshia Isalele bimpe to, wakindila too ne pakaluaye kupeta lutulu, budipuekeshi ne didikanda. (Bienzedi 7:22) Ke bua tshinyi aba badibu bapeshe mudimu wa kulombola bakuabu badi nangananga ne bua kudienzeja bua kuikala ne bupuekele ne badi ne bua kuitaba tshidi bakuabu bamba.​—Nsumuinu 11:2.

Dîyi dia Nzambi didi dibikila aba badi Yezu Kristo mupeshe “bintu biende bionso” ne: ‘mba lulamatu ne ba budimu.’ (Matayo 24:45-47, NW) Kabena bapange bupuekele ne bateta bua kudianjidila Yehowa anyi kuangata dipangadika kampanda dia mu tshiputuku to; peshi kabatu bashadila panyima padi dîyi dia Nzambi dikale ditoke pa bualu kampanda nansha. Mbamanye dîba dia kuakula ne dîba dia kuindila mumvuija makuabu mu tshimuma. Bena Kristo bonso kabena anu ne bua kuidikija ditabuja diabu patupu to, kadi badi kabidi ne bua kuikala pabu badimuke anu mudi kasumbu ka mupika.​—Ebelu 13:7.