Sadilayi Yehowa ne disanka dia mu mutshima

“Milawu eyi yonso neikukuate bushuwa . . . bualu kuvua musadile Yehowa Nzambi webe ne ditshionkomoka ne disanka dia mu mutshima.”​—DUTELONOME 28:45-47, NW.

1. Ntshijadiki kayi tshitudi natshi tshia se: aba badi basadila Yehowa badi ne disanka muaba kayi wonso udibo bamusadila?

BASADIDI ba Yehowa badi bena disanka, nansha bakumbaja disua diende mu diulu anyi pa buloba. Banjelo [anyi] “mitoto ya mu dinda” bakela mbila ya disanka pakafukibua buloba, ne kakuyi mpata miliyare ne miliyare ya banjelo ba mu diulu ‘badi batuala dîyi dia Nzambi.’ (Yobo 38:4-7, NW; Musambu wa 103:20) Muana wa Nzambi umuepele uvua “muenji munene wa mudimu” wa disanka mu diulu ne kuenza disua dia Nzambi pavuaye muntu Yezu Kristo pa buloba kuvua kumusankisha. Kupita apu, “bua disanka divuabo bamutekele kumpala, wakatantamena mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi.”​—Nsumuinu 8:30, 31, NW; Ebelu 10:5-10; 12:2, NW.

2. Ntshinyi tshivua tshikebela bena Izalele mabenesha peshi milawu?

² Bena Izalele bavua balabula disanka pavuabo basankisha Nzambi. Kadi ntshinyi tshivua tshienzeka pavuabo kabayi bamutumikila? Bakabadimuija ne: “[Milawu] ivua ne bua kushala kûdi ne kudi ndelanganyi yebe bu tshimanyinu ne bu bualu budianjila kumanyisha bua bikondo bikena bijadika, bualu kuvua musadile Yehowa Nzambi webe ne ditshionkomoka ne disanka dia mu mutshima bua dibodioka dia bintu bionso. Ne neusadile baluishi bebe bakutumina Yehowa ne tshiji tshikole ne nzala ne nyota ne butaka ne dipangika dia bintu bionso; ne neakukudike bushuwa tshikokedi tshia tshiamu ku nshingu kuebe too ne pakubutulaye.” (Dutelonome 28:45-48, NW) Mabenesha ne milawu bivua bisunguluja bavua anyi bavua kabayi basadidi ba Yehowa. Milawu ya mushindu’eu ivua kabidi ileja ne: ki mbimpe bua kusendeka mêyi-maludiki ne malongolola a Nzambi, peshi kuapetula. Bu muakabenga bena Izalele bua kuangata ne mushinga madimuija a Yehowa a dibutudibua ne diya nabo ku bupika, Yeruzaleme wakalua tshintu tshia kuela “mulawu kudi matunga wonso a pa buloba.” (Yelemiya 26:6, NW) Mbimpe tutumikila Nzambi bua kubabidila dianyishibua dia kudiye. Disanka didi dimue dia ku mabenesha adi banemeki ba Nzambi bapeta.

Mushindu wa kusadila Nzambi ne “disanka dia mu mutshima”

3. Mutshima wa mu tshimfuanyi ntshinyi?

³ Bena Izalele bavua ne bua kusadila Yehowa “ne ditshionkomoka ne disanka dia mu mutshima.” Ke mudi basadidi ba Nzambi ba lelu’eu ne bua kuenza. Kusanka “nkusangala; nkuujibua ne disanka.” Nansha mudibu batela mutshima muena dîna mu Mifundu, kawutu mu ngumvuilu wa ku dîna mua kuela lungenyi anyi kueleela meji to. (Ekesode 28:30) Mudimu wawu munene ng’wa kusaka mashi adi adiisha selile ya mubidi. Kadi, misangu mivule Bible utu utuma lungenyi ku mutshima wa mu tshimfuanyi, udi mutambe tshisombedi tshia dinanga, disakibua ne lungenyi. Batu bamba ne: udi mu “mu kabujima uleja tshitupa tshinene, munda, ne udi kabidi uleja muntu wa mundamunda anu bu mudiye udileja yeye muine mu midimu yende kabukabu, mu majinga ende, mananga, mpampakenu, dinanga diondoke, bipatshila, ngenyi yende, ngumvuilu, mfuanyikijilu biende, meji, dimanya, nzanzu, mitabuja biende ne ngelelu yende ya meji ne kuondo kende ka muoyo.” (Journal of the Society of Biblical Literature and Exegesis, 1882, dibeji dia 67) Mu mutshima wetu wa mu tshimfuanyi mudi nyanji, mpampakenu, pamue ne disanka bietu.​—Yone 16:22.

4. Ntshinyi tshidi mua kutuambuluisha bua kusadila Yehowa Nzambi ne disanka dia mutshima?

⁴ Ntshinyi tshidi mua kutuambuluisha bua kusadila Yehowa ne disanka dia mu mutshima? Mmuenenu muimpe ne wa dianyisha bua mabenesha etu ne masanka a mudimu, mapetesha kudi Nzambi udi ne diambuluisha divule. Tshilejilu, tudi mua kuela meji ne disanka dionso bua dia muabi ditudi nadi dia kuenzela Nzambi mulelela “mudimu wa tshijila.” (Luka 1:74, NW) Mmusuikakaja ku disanka dia mudimu ditudi nadi dia kutuala dîna dia Yehowa bu Bantemu bende. (Yeshaya 43:10-12) Ku ebi, tudi mua kusakidila disanka dia kumanya se: patudi tutumikila Dîyi dia Nzambi tudi tumusankisha. Ne ndisanka kayipu ditudi nadi mu dikenkesha butoke bua mu nyuma ne nunku kuambuluisha bavule bua kumbuka mu mîdima!​—Matayo 5:14-16; fuanyikija ne 1 Petelo 2:9.

5. Ntshinyi tshidi mpokolo wa disanka dinemeki dia Nzambi?

⁵ Kadi, kusadila Yehowa ne disanka dia mu mutshima kakuena patupu anu ngelelu muimpe wa lungenyi to. Bidi biambuluisha bua kuikala ne mmuenenu muimpe. Kadi disanka dinemeki dia Nzambi ki ntshintu tshitudi tupatula ku dikolesha ngikadilu nansha. Apo, ndimuma dia spiritu wa Yehowa. (Galatia 5:22, 23) Biwikala kuyi ne disanka dia mushindu’eu, pamu’apa bidi bikukengela bua kuakajilula malu bua kumona mua kuepuka ngelelu wa lungenyi peshi ngenzelu wa malu bidi bibengangana ne Mifundu bidi mua kubungamija spiritu wa Nzambi. (Efeso 4:30) Kadi, bu mutudi badifile kudi Yehowa, katutshinyi bua se: dibula disanka dia mu mutshima mu bimue bikondo ntshijadiki tshia dibenga kuanyishibua kudi Nzambi. Tudi bapange bupuangane ne banyika ku bisama, dibungama, ne nansha tunyinganyinga tukole mu bimue bikondo, kadi Yehowa utu utumvua. (Musambu wa 103:10-14) Diambedi, tuanji kulomba spiritu wende mu masambila, katuyi tupua muoyo se: dimuma diende dia disanka ntshipedi tshia kudi Nzambi. Tatuetu wa mu diulu wa dinanga neandamune masambila a mushindu’eu ne neatupeteshe mushindu wa kumusadila ne disanka dia mu mutshima.​—Luka 11:13.

Padi disanka dipangika

6. Biajimina disanka mu disadila Nzambi dietu, ntshinyi tshitudi ne bua kuenza?

⁶ Biapangika disanka mu mudimu wetu, tudi pamu’apa mua kukepesha tshisumi tshietu mu disadila Yehowa anyi nansha kubula lulamatu kudiye. Nenku, nebikale bia meji bua kudipuekesha ne kukonkonona mu masambila bipatshila bietu ne kuenza makajulula kampanda adi akengedibua. Bua kupeta disanka dia kudi Nzambi, tudi ne bua kusadila Yehowa basakibua kudi dinanga ne mutshima wetu mujima ne anyima wetu mujima ne lungenyi luetu luonso. (Matayo 22:37, NW) Katuena ne bua kusadila ne lungenyi lua difuilakana to, bualu Paulo wakafunda ne: “Bituikala ne muoyo ku spiritu, tutungunuka kabidi ne kuenda mu bulongame ku spiritu. Katulu bena budisui, pa kujudija difuilakana umue kudi mukuabo, nubabangana umue ne mukuabo.” (Galatia 5:25, 26, NW) Katuakupeta disanka dilelela bituikala tusadila anu bualu tudi basue bua kutamba bakuabo anyi tukeba butumbi.

7. Mmunyi mutudi mua kufululula disanka dietu dia mu mutshima?

⁷ Disanka didiku mu dikumbaja didifila dietu kudi Yehowa. Patutshivua bapiabapia mu didilambula kudi Nzambi, tuakadibueja ne tshisumi tshionso mu njila wa buena-nkristo wa muoyo. Tuvua tulonga Mifundu ne tufila pa tshibidilu mumvuija mu bisangilu. (Ebelu 10:24, 25) Bivua bitupetesha disanka bua kudifila mu mudimu. Kadi, netuenze tshinyi bikala disanka dietu dikepele? Dilonga dia Bible, dibuela mu bisangilu, dipatuka mu buambi​—eyowa, kudîna mu tshitupa kayi tshionso tshia mudimu wa Buena-nkristo—​nedishindamije makanda etu a mu nyuma ne kutemeshilula dinanga dituvua nadi diambedi ne disanka dituvua nadi kale mu mutshima. (Buakabuluibua 2:4) Nenku katuakuikala bu bantu kampanda bakena disanka ne badibo ne bua kuambuluisha misangu mivule mu nyuma. Bakulu badi ne disanka bua kuambuluisha, kadi tudi muntu pa nkayende ne bua kukumbaja didilambula dietu kudi Nzambi. Muntu mukuabo nansha umue kêna mua kutuenzelabi to. Nenku, tudifundilayi bu tshipatshila kulonda nsombelu wa bena nkristo balelela bua tukumbaje didifila dietu kudi Yehowa ne tuikale ne disanka dilelela.

8. Bua tshinyi kuondo ka muoyo kakezuke kadi kakengedibua bituikala basue kuikala ne disanka?

⁸ Bituasua kupeta disanka didi dimuma dia spiritu wa Nzambi, tudi ne bua kuikala ne kuondo ka muoyo kakezuke. Mutantshi wonso uvua Davidi Mukalenge wa Izalele uteta bua kusokoka mpekatu wende, uvua muena diakabi. Bushuwa, muoyo wende mutalaja uvua umueneke bu uvua ubomboloka, ne wakavua mubedi ku mubidi. Ndisulakana kayipu diakapetaye pakanyingalalaye ne kutonda bilema! (Musambu wa 32:1-5) Katuena mua kuikala ne disanka bituikala tusokoka imue mpekatu minene. Kuenza nunku kudi mua kufikisha ku dikala ne nsombelu mulubakane. Bushuwa, awu ki mmushindu wa kupeta disanka to. Kadi kutonda bilema ne kunyingalala kudi kutuala disulakana ne dipetulula mmuenenu wa disanka.​—Nsumuinu 28:13.

Kuindila ne disanka

9, 10. (a) Ndilaya kayi diakapeta Abrahama, kadi mmunyi muvua pamu’apa ditabuja ne disanka biende bitetshibue? (b) Ntshinyi tshitudi mua kulongela ku bilejilu bia Abrahama, Izake, ne Yakoba?

⁹ Kuikala ne disanka patudi diambedi tulonga malu adi atangila dilongolola dia Nzambi mbualu bumue, kadi bukuabo menemene mbua kushala ne disanka mu kupita kua bidimu. Bualu ebu budi mua kulejibua mu muanda wa muena lulamatu Abrahama. Kunyima kua yeye mumane kuteta bua kulambula muanende Izake bilondeshile dîyi-dituma dia Nzambi, muanjelu wakafila mukenji eu: “‘Kundi nkayanyi ndi nditshipa,’ edi ndîyi dia Yehowa, ‘dia se: bualu wenji muanda eu ne bu mûdi kuyi mungimina muanebe wa balume, muanebe umuepele, nenkubeneshe bushuwa ne nemvudije bushuwa ndelanganyi yebe bu mitoto ya mu diulu ne bu tutete tua lusenge tudi ku muelelu wa mbuu; ne dimiinu diebe nediangate tshiibi tshia baluishi bebe. Ne ku dimiinu diebe bisamba bionso bia pa buloba nebibeneshibue bushuwa bualu wateleji dîyi dianyi.’” (Genese 22:15-18, NW) Kabiyi mpata, Abrahama wakatshionkomoka bua dilaya edi.

¹⁰ Abrahama uvua pamu’apa utekemena se: Izake ke uvua mua kuikala “dimiinu” kuvua mabenesha malaya ne bua kufumina. Kadi mu kupita kua bidimu, bu muvua muanda nansha umue wa dikema kawuyi wenzeka ku butuangaji bua Izake, ditabuja ne disanka bia Abrahama ne dîku diende biakatetshibua. Dishindika dia Nzambi dia dilaya kudi Izake ne pashishe kudi muanende wa balume Yakoba diakabajadikila se: dilua dia Dimiinu divua ne bua kuenzeka matuku avua ne bua kulua, ne ebi biakabambuluisha bua kulama lulamatu ne disanka biabo. Kadi, Abrahama, Izake, ne Yakoba bakafua kabayi bamona dikumbana dia malaya a Nzambi kudibo, kadi kabavua basadidi ba Yehowa bavua babule disanka nansha. (Ebelu 11:13) Tuetu petu tudi mua kutungunuka ne kusadila Yehowa ne ditabuja ne disanka eku bindile dikumbana dia malaya ende.

Disanka nansha kuoku kuikale dikengeshibua

11. Bua tshinyi tudi mua kuikala ne disanka nansha bikalaku dikengeshibua?

¹¹ Bu mutudi basadidi ba Yehowa, tudi mua kumusadila ne disanka dia mutshima, nansha tutata bua dikengeshibua. Yezu wakabala bu bena disanka aba badi bakengeshibua bualu buende, ne mupostolo Petelo wakamba ne: “Kadi panudi nuabanyangana bisama ne Kristo, nusanke, bua padileja lumu luende patoke, nuikale ne disanka ne musangelu. Nudi [bena disanka, NW] padibo banupenda bua dina dia Kristo, bualu tshitupa tshia lumu ne tshia [spiritu wa Nzambi, NW] tshinutulukile.” (1 Petro 4:13, 14, Mukenji Mulenga; Matayo 5:11, 12) Biwikala unanukila dikengeshibua ne ukenga bua buakane, udi ne spiritu ne dianyishibua bia Yehowa ne biobi bidi bushuwa bilubuluja disanka.

12. (a) Bua tshinyi tudi mua kuakamangana ne mateta a ditabuja ne disanka? (b) Ndilongesha kayi dia nshindamenu ditudi mua kulongela ku muanda wa muena Lewi kampanda uvuabo baye nende ku bupika?

¹² Tudi mua kuakamangana ne mateta a ditabuja ne disanka dionso bualu Nzambi udi Tshinyemenu tshietu. Ke mudibi bilejibua patoke mu Misambu ya 42 ne 43. Bua kabingila kampanda, muena Lewi kansanga bakaya nende ku bupika. Wakatamba kupangila kutendelela mu ntempelo wa Nzambi, e kumufikishabi ku didiumvua bu dishina dia ngulungu anyi ngulungu mukaji mufue ne nyota, udi wenda ukeba ne muoyo umue mâyi a kunua mu buloba bûme ne buatuke. “Wakafua ne nyota,” peshi wakabakana, bua Yehowa ne bua diakalenga dia kutendelela Nzambi mu ntempelo Wende. (Musambu wa 42:1, 2) Bualu buakamona muena Lewi eu uvuabo baye nende ku bupika budi ne bua kutusaka ku dileja dianyisha bua mutudi badisangishe ne bena tshisamba tshia Yehowa. Bikala nsombelu wa nunku, tshilejilu bu diedibua mu buloko dikebesha kudi dikengeshibua ditupumbisha bua tshitupa tshîpi bua kuikala pamue nabu, mbimpe bua tutume meji ku disanka dituvua nadi bangabanga mu mudimu wa tshijila ne tusambila bua kunanukila eku “bindile Nzambi” bua atupingajilule mu mudimu wa buatshia-buila ne bamutendeledi bende.​—Misambu ya 42:4, 5, 11, NW; 43:3-5.

“Tusadilayi Yehowa ne disanka”

13. Mmunyi mudi Musambu wa 100:1, 2 uleja se: disanka didi ne bua kuikala ngikadilu wa mudimu wetu utudi tuenzela Nzambi?

¹³ Disanka didi ne bua kuikala ngikadilu munene wa mudimu wetu utudi tuenzela Nzambi. Muanda eu wakalejibua mu musambu wa diela nawu tuasakidila wakimba mufundi wa Misambu ne: “Nuelele Yehowa mbila ya disanka, nuenu bonso ba ha buloba! Nukuatshile Yehowa mudimu ne disanka. Nuiye ku mpala kuandi ne kuimba kua misambu.” (Musambu wa 100:1, 2, NW) Yehowa udi “Nzambi wa disanka” ne mmusue bua bamusadidi bende bikale ne disanka mu dikumbaja malu malomba adibo ne bua kukumbaja mu diumvuangana ne didifila diabo kudiye. (1 Timote 1:11) Bantu bena matunga wonso badi ne bua kutshionkomokila mu Yehowa, ne mêyi etu a dimusamuna nawu adi ne bua kuikala a mukitshikitshi, anu bu ‘mbila ya kashimu’ ya tshiluilu tshitshimunyi. Bu mutu mudimu muenzela Nzambi ukankamija, ditshionkomoka didi ne bua kuwutua mu nyima. Nenku, mufundi wa misambu wakalomba bantu bua kulua kumpala kua Nzambi “ne kuimba kua misambu.”

14, 15. Mmunyi mudi Musambu wa 100:3-5 mukumbanyine tshisamba tshia Yehowa tshia disanka lelu’eu?

¹⁴ Mufundi wa misambu wakasakidila ne: “Numanye [nujingulule, nuanyishe] bienu ne, Yehowa udi Nzambi! Nyeye mene wakatufuka, tudi bantu bandi; tudi bantu bandi ne mikoko ya mu mpata wandi.” (Musambu wa 100:3) Bu mudi Yehowa Mutufuki, udi utuenzela anu mutu mulami wa mikoko wenzela mikoko yende. Nenku bu mudi Nzambi utamba kututabalela bimpe, tudi ne bua kumutumbisha ne dianyisha dionso. (Musambu wa 23) Pa bidi bitangila Yehowa, mufundi wa Misambu udi wimba kabidi ne: “Buelai bienu mu bibuelelu biandi ne disakidila, buelai mu biendedi biandi ne misambu ya kumutumbisha n’ai. Numusakidile, nuvudishile dina diandi disanka. Bualu bua Yehowa udi muimpe; luse luandi lujalame ludiku tshiendelele, lulamatu luandi lua bushuwa ludiku tô ne ku bikondo bionso.”​—Musambu wa 100:4, 5.

¹⁵ Lelu’eu, bantu bena disanka ba mu matunga wonso badi babuela mu mbanza ya ntempelo wa Yehowa bua kumuela tuasakidila ne kumusamuna. Tudi tubenesha dîna dia Nzambi ne disanka dionso pa kuakula malu mimpe bua Yehowa, ne ngikadilu yende minene idi itusaka ku dimusamuna. Udi muimpe mu bionso, ne bulenga-bunangi buende anyi mmuenenu wende wa luse kudi bamusadidi bende ng’wa kueyemenyibua dîba dionso, bualu budi butungunuka too ne ku bikondo bikena bijadikibua. Ku “tshipungu ne ku tshipungu,” Yehowa udi muena lulamatu mu dileja dinanga kudi bantu badi benza disua diende. (Lomo 8:38, 39) Nenku, bushuwa, tudi ne kabingila kempe bua “kusadila Yehowa ne disanka.”

Usanke mu ditekemena diebe

16. Mmu matekemena ne malongolola kayi mudi bena nkristo mua kusankila?

¹⁶ Paulo wakafunda ne: “Nusanke mu ditekemena.” (Lomo 12:12, NW) Balondi ba Yezu Kristo bela manyi badi basanka mu ditekemena dia butumbi dia muoyo ukena kufua mu diulu udi Nzambi mubunzuluila njila ku butuangaji bua Muanende. (Lomo 8:16, 17; Filipoi 3:20, 21) Bena nkristo badi ne ditekemena dia kuikala ne muoyo wa kashidi mu Mparadizu pa buloba badi pabo ne kabingila ka nshindamenu bua kusanka. (Luka 23:43) Basadidi buonso ba Yehowa bena lulamatu badi ne kabingila bua kusankila mu ditekemena dia Bukalenge, bualu bamue nebenze mbulamatadi wa mu diulu anyi kusomba pa buloba muinshi mua bukokeshi bua Bukalenge. Ndibenesha kayipu dia disanka!​—Matayo 6:9, 10; Lomo 8:18-21.

17, 18. (a) Ntshinyi tshivua tshidianjila kumanyishibua mu Yeshaya 25:6-8? (b) Mmunyi mudi mulayi eu wa Yeshayi ukumbana lelu’eu, ne ntshinyi tshitudi mua kuamba pa bidi bitangila dikumbana diawu mu matuku atshilualua?

¹⁷ Yeshayi wakadianjila kuakula bua disanka dialua bua bukua-bantu batumikidi. Wakafunda ne: “Mu mukuna eu Yehowa wa misumba nealongoluele bantu bonso bidia bia disanka bia manyi, bidia bia disanka bia nvinyo muladike ndala, bia kudia bia manyi bisangisha ne buongo bua mu mifuba, bia nvinyo muladike ndala mulengeshibue bimpe. Ha mukuna eu yeye neumushe tshilulu tshikudika tshidi tshibuikila ha mitu ya bantu bonso, ne tshibuikilu tshidi tshiadisha ha mutu ha bisamba bionso. Yeye wakumina lufu tshiendelele; ne Mukelenge Yehowa neakuhule binsonshi ku mesu kua bantu bonso, neumushe tshihendu tshidibo bahenda n’atshi bantu bandi, utshiumusha ha buloba buonso; bualu bua Yehowa wakuamba dî edi.”​—Yeshaya 25:6-8.

¹⁸ Mu difesto dia mu nyuma mutudi lelu’eu bualu tudi batendeledi ba Yehowa didi bushuwa tshiakudia tshia disanka tshia dinono. Bushuwa, disanka dietu didi divulangana bualu tudi tusadila Nzambi ne tshisumi tshionso eku bindile bintu bimpe biena dîna bidiye mulaya bua bulongolodi bupiabupia. (2 Petelo 3:13) Ku diambuluisha dia mulambu wa Yezu, Yehowa neumbushe “tshilulu tshikudika” tshidi tshibuikila bukua-bantu bua mpekatu wa Adama. Ndisanka kayipu dikalaku bua kumona mpekatu ne lufu biumbushibua! Mmusangelu kayipu bua kusekelela dipingana dia banangibue babiishibua ku lufu, ne kumona se: binsonji biajiminyi, ne kusomba mu mparadizu pa buloba, muaba wikala tshisamba tshia Yehowa katshiyi mua kudiwudibua, kadi netshikale tshimana kufidila Nzambi diandamuna kudi muyobodianganyi munene, Satana Diabolo!​—Nsumuinu 27:11.

19. Mmunyi mutudi ne bua kuandamuna ku malongolola adi Yehowa mututekele kumpala bualu tudi Bantemu bende?

¹⁹ Bualu ebu kabuenaku bukuuja tente ne disanka ne dianyisha bua kumanya malu alua Yehowa kuenzela bamusadidi bende anyi? Bushuwa, malongolola a mushindu’eu adi alubuluja disanka dietu! Kupita apu, ditekemena dietu dibeneshibue didi ditufikisha ku ditangila Nzambi wetu wa disanka, wa dinanga ne nyanji bu idi mu mêyi aa: “Tangila! Eu udi Nzambi wetu. Tuvua batekemene kudiye, ne neatupandishe. Eu udi Yehowa. Tudi batekemene kudiye. Tuikalayi ne disanka ne musangelu mu lupandu ku butuangaji buende.” (Yeshayi 25:9, NW) Ne ditekemena dietu dia mpatshi dishindika mu tshieledi tshia lungenyi, tuenzayi madikolela wonso bua kusadila Yehowa ne disanka dia mu mutshima.

Newandamune munyi?

◻ Mmunyi mutudi mua kusadila Yehowa ne “disanka dia mu mutshima”?

◻ Ntshinyi tshitudi mua kuenza biajimina disanka mu mudimu wetu utudi tuenzela Nzambi?

◻ Bua tshinyi tshisamba tshia Yehowa tshidi mua kuikala ne disanka nansha bikalaku dikengeshibua?

◻ Ntubingila kayi tutudi natu bua kusankila mu ditekemena dietu?

[Bimfuanyi mu dibeji 17]

Didifila mu bitupa bionso bia nsombelu wa bena nkristo nedivudije disanka dietu