Ehuda​—Muntu wa ditabuja ne dikima

BIDIMU bivule bikavua bipite katshia bena Izalele badiata dikasa mu Buloba Bulaya. Mozese ne mumupinganyi wende, Yoshua, bakavua bafue mutantshi mule. Mu dibenga kuikalaku dia bantu ba ditabuja bu nunku, dianyisha dia ntendelelu mukezuke diakapona. Bena Izalele bakatuadija too ne kusadila Baala pamue ne makunji a tshijila.a Bu tshipeta, Yehowa wakafila bantu bende mu bianza bia bena Syrie bua bidimu muanda-mukulu. Pashishe bena Izalele bakela mbila kudi Nzambi bua diambuluisha. Ne luse luonso, wakateleja. Yehowa wakajula mulumbuluishi, Oteniele, bua kusungila bantu Bende.​—Balumbuluishi 3:7-11.

Malu aa avua ne bua kuikala malongeshe bena Izalele bulelela bua nshindamenu​—ditumikila Yehowa didi dituala mabenesha, padi eku dibenga kumutumikila difikisha ku milawu. (Dutelonome 11:26-28) Pabi, tshisamba tshia Izalele tshiakapangila kulonga dilongesha edi. Panyima pa tshikondo tshia bidimu 40 bia ditalala, bakalekela kabidi ntendelelu mukezuke.​—Balumbuluishi 3:12.

Bakuatshibue kudi Moaba

Tshikondo etshi Yehowa wakaponesha bantu bende mu bianza bia Egelona Mukalenge wa Moaba. Bible udi umumvuija bu ‘muntu uvua ne mafuta a bungi.’ Ne diambuluisha dia bena Amona ne bena Amaleka, Egelona wakabunda Izalele ne kujadika nzubu wende wa bukalenge mu Yeriko, ‘musoko wa mabue a ngaji.’ Ndipanga kulondanganapu kayi dia malu mudi tshimenga tshia kumpala tshia bena Kanana tshivua tshikuatshibue kudi Izalele tshilue kuasa mpindieu bilombuelu bia muntu uvua utendelela nzambi wa dishima Kemoshe!b​—Balumbuluishi 3:12, 13, 17.

Egelona wakafinakaja bena Izalele mu bidimu 18 biakalonda, bimueneke se: uvua ubalomba bitadi bia bujitu buvule. Pa kulomba milambu ku tshikondo ne ku tshikuabu, Moaba wakakolesha nsombelu wende wa bubanji eku wenda ukepesha mabanji a Izalele. Mu mushindu mumvuike, bantu ba Nzambi bakela mbila bua dikuatshisha, ne tshiakabidi Yehowa wakateleja. Wakabajudila musungidi mukuabu​—musangu eu muena Benyamina mubikidibue ne: Ehuda. Bua kujikija tshinyangu tshia Egelona pa Izalele, Ehuda wakalongolola bua kuoya ngombo mu dituku dia difila mulambu divua dilonda.​—Balumbuluishi 3:14, 15.

Bua kudilongolola bua bualu buende bua dikima, Ehuda wakenza muele wa ntapa-kubidi wa bule bua coudée umue. Bikala coudée eu uvua muipi, tshia-lufu etshi tshivua ne bule bua santimetre bu 38. Bamue bavua mua kutshiangata bu kele. Mbimueneke patoke se: kakuvua tshitupa tshitshiamakane pankatshi mulumbu ne tshilabi. Nunku, Ehuda uvua mua kusokoka muele wende mukese mu mubunyi wa tshilamba tshiende. Kupita apu, bu muvua Ehuda muena luboko, wakajingila muele wende ku luseke luende lua balume​—muaba ukena wa pa tshibidilu bua tshia-lufu.​—Balumbuluishi 3:15, 16.

Mayele a Ehuda kaavua mapange njiwu nansha. Tshilejilu, bivua kuikala munyi bu basadidi ba mukalenge bakenkete Ehuda bua bia-lufu? Nansha bikalabu kabayi benze nanku, bushuwa kabavua mua kushiya mukalenge wabu nkayende ne muena Izalele nansha! Kadi nansha buobu bamushiye nkayende, ne Egelona kushipibuaye, mmunyi muvua Ehuda mua kunyema? Ntanta bule kayi uvuaye mua kunyema kumpala kua basadidi ba mukalenge kutandulabu tshivua tshienzeke?

Kakuyi mpata Ehuda uvua muele meji pa tunungu bu etu, imue misangu muele meji ku bungi bua bipeta bibiabibi bivua mua kumueneka. Nansha nanku, wakatungunuka ne dilongolola diende, uleja dikima ne ditabuja mu Yehowa.

Ehuda udi upetangana ne Egelona

Dituku dia kufila mulambu mukuabu diakafika. Ehuda ne bantu bende bakabuela mu nzubu wa mukalenge. Mutantshi kaulepi, bakavua bimane kumpala kua Mukalenge Egelona mene. Kadi dîba kadivua dianji kukumbana bua Ehuda kubundula mvita. Panyima pa difila dia mulambu, Ehuda wakaluja bambudi ba mulambu kuabu.​—Balumbuluishi 3:17, 18.

Bua tshinyi Ehuda wakanengakana bua kutonkola Egelona? Wakakanka anyi? Nansha kakese! Bua kukumbaja dilongolola diende, Ehuda uvua ukengela muyuki wa mu musokoko ne mukalenge​—tshintu tshivua katshiyi tshimuitabila mu dimonangana edi dia kumpala. Kupita apu, Ehuda uvua mua kukengela bua kupeta mushindu muimpe wa kunyema lukasa. Kunyema kuvua mua kuikala kupepele bua muntu umue kupita bua musumba mujima wa bambudi ba mulambu. Nunku, Ehuda wakindila tshikondo tshiakanyine. Dikumbula dia tshitupa tshîpi ne Egelona diakamuambuluisha bua kuibidilanganaye ne ndongoluelu wa nzubu wa bukalenge ne kujadika bualabale bua bukubi bua mukalenge.

Panyima pa mumane kufika ‘muaba uvuabu basongela mpingu ya mabue uvua mu Gilegala,’ Ehuda wakashiya bantu bende e kupingana ku nzubu wa bukalenge wa Egelona. Luendu lua kilometre mitue ku ibidi luakapetesha Ehuda mpunga wa kueleela lungenyi pa mudimu wende ne bua kusambila Yehowa bua kupeta dibenesha.​—Balumbuluishi 3:19.

Ehuda udi upingana

Mbimueneke se: Ehuda uvua muakidila bimpe tshiakabidi mu nzubu wa bukalenge. Pamu’apa mulambu wa kalolo uvuaye mufile kumpala uvua mutokeshe Egelona munda. Bidi mua kuikala ne: nansha muvua dikumbula dia kumpala dia tshitupa tshîpi, diakapetesha Ehuda mpunga muakanyine bua kushindika malanda ne mukalenge. Mu mishindu yonso, Ehuda uvua tshiakabidi kumpala kua Egelona.

‘Mukalenge, ndi ne dîyi dia kukuambila mu musokoko,’ ke muakamba Ehuda. Bu muvuaye mupingane mutantshi bule nunku etshi tshivua tshijadiki tshia se: Yehowa uvua umulombola. Pabi, kuvua bualu. ‘Dîyi dia mu musokoko’ divua nadi Ehuda kadivua mua kuambibua kumpala kua basadidi ba mukalenge nansha. Biabuela Yehowa mu tshilumbu etshi, Ehuda uvua ukengela diambuluisha adi diakamue. ‘Anji kupuwa!’ ke muakatuma mukalenge dîyi. Bu muvua Egelona kayi musue bua ‘dîyi dia mu musokoko’ edi kumvuikadi, wakatangalaja basadidi bende. Elabi meji disulakana dia Ehuda!​—Balumbuluishi 3:19.

Egelona uvua musombe mu nzubu wa kuulu pakaya Ehuda kudiye ne kuamba ne: “Ndi ne dî[yi] dia Nzambi dia kukuambila.” Pa kutela “Nzambi,” Ehuda uvua mutume lungenyi kudi Kemoshe anyi? Egelona uvua mua kuikala muele meji nanku. Mukokibue ntema, wakajuka ne bujitu buende buonso mu nkuasa wende wa bumfumu e kuimana mu mushindu wa kuteleja. Ehuda wakasemena pabuipi, pamu’apa usemena ne budimu bua kubenga kujula dielakana dia mukalenge dia dimubundula mvita. Pashishe, ne lukasa luonso, ‘Ehuda wakolola tshianza tshiende tshia luboko, wakatula muele uvua pa lukundu luende lua ku tshianza tshia bukole; wakamutua mu difu diende [dia Egelona]; tshilabi tshia muele tshiakajibikidibua, ne mafuta ende akajimija muele, bualu bua yeye kakatula muele ku difu diende, ne [“bunyawu buakatuadija kupatuka,” NW].’​—Balumbuluishi 3:20-22.

Bajangulukila pabuipi apu, basadidi ba mukalenge kabavua banyunge. Kadi Ehuda utshivua anu mu njiwu. Mu tshikondo kayi tshionso basadidi ba Egelona bavua mua kubuela mu nzubu ne kusangana tshitalu tshia mukalenge wabu mupone panshi. Ehuda uvua ne bua kunyema pa lukasa! Ukanga biibi, wakanyemena pa disoso dia kapepe dia tshibambalu tshia kuulu.​—Balumbuluishi 3:23, 24a.

Disokolola ne ditshimuna

Mutantshi kaulepi basadidi ba Egelona bakajinga kumanya. Kadi, kabakakimina kutuilangana ne tshiji tshia mukalenge pa kukosesha muyuki wende wa mu musokoko. Pashishe bakabambisha ne: biibi bia tshibambalu tshia kuulu bivua bikanga. “Mfumu utshidi muikishe mu tshibambalu tshiende tshia kulu tshidi ne tshitalela,” ke muakelabu meji. Kadi, bu muakapita mutantshi, dijinga kumanya diakalua disumpakana dinene. Basadidi ba Egelona kabavua mua kuindila kabidi mutantshi mule. “Kuangatabo nsapi, kunzulula biibi [bia tshibambalu tshia kuulu], kumonabo mfumuabo mutandabale panshi, mufue.”​—Baludiki 3:24b, 25, MMM.

Pine apu, Ehuda wakanyema. Wakapitshila muaba uvuabu basongela mpingu ya mabue mu Gilegala ne ndekelu wa bionso kufikaye ku Seila, muaba udi mu rejon wa mikuna ya Efelayima. Ehuda wakasangisha pamue balume ba Izalele e kubalombola mu diela bena Moaba mvita mu tshisumbu tshimue. Muyuki udi ulonda ne: ‘bakashipa balume ba bena Moaba bu binunu dikumi; buonso buabu bavua bakole ne ba dikima; nansha muntu umue kakapanduka.’ Ne ditekeshibua dia bena Moaba, buloba bua Izalele kabuakatatshishibua kabidi munkatshi mua bidimu 80.​—Balumbuluishi 3:26-30.

Dilongela ku tshilejilu tshia Ehuda

Ditabuja kudi Nzambi diakasaka Ehuda. Ebelu nshapita wa 11 kêna umutela mu mushindu musunguluke bu umue wa ku aba bavua ‘bua ditabuja diabu batekeshe makalenge, . . . balue bakole mu mvita, bipate bisumbu bia bena mvita ba bende.’ (Ebelu 11:33, 34) Nansha nanku, Yehowa wakakuatshisha Ehuda bu muakenzaye malu mu ditabuja ne kusungila Izalele ku bukokeshi bua tshinyangu bua Mukalenge Egelona.

Dikima divua umue wa ku ngikadilu ya Ehuda. Uvua ne bua kuikala muena dikima bua kutumika biakane ne muele mulelela. Bu basadidi ba Nzambi ba matuku aa, katuena tuangata muele wa nunku. (Yeshaya 2:4; Matayo 26:52) Kadi, tudi tutumika ne “muele wa [“spiritu,” NW],” Dîyi dia Nzambi. (Efeso 6:17) Ehuda uvua muzanzamuke mu ditumika ne tshia-lufu tshiende. Tuetu petu tudi tukengela kuikala bazanzamuke mu ditumika ne Dîyi dia Nzambi patudi tuyisha lumu luimpe lua Bukalenge. (Matayo 24:14) Dilonga dia Bible dia muntu pa nkayende, dikala pa tshibidilu mu bisangilu bia bena nkristo, didifila ne mitalu mu mudimu, ne dieyemena ne muoyo mujima Tatu wetu wa mu diulu nebituambuluishe bua kuidikija ngikadilu mileja kudi Ehuda, bushuwa muntu wa ditabuja ne dikima.

[Mêyi adi kuinshi]

[Tshimfuanyi mu dibeji 31]

Ehuda ne bantu bende bakafila mulambu kudi Mukalenge Egelona

[Mêyi a dianyisha]

Biangata mu Illustrirte Pracht - Bibel/​Heilige Schrift des Alten und Neuen Testaments, nach der deutschen Uebersetzung D. Martin Luther’s