NSHAPITA 3
Nanga bantu badi Nzambi munange
“Udi wenda ne bena meji udi ulua muena meji.”—NSUMUINU 13:20.
1-3. (a) Mbualu kayi budi Bible wamba butudi katuyi mua kuela mpata? (b) Mmunyi mutudi mua kufika ku disungula balunda badi mua kutusaka ku dienza malu mimpe?
BANTU batu anu bu ndanda mu mushindu kampanda bualu batu batentula malu onso a muaba udibu. Bitu bipepele bua kuidikija ngikadilu ne bienzedi bia bantu batudi tusomba nabu, pamuapa katuyi bamanye.
2 Bible udi uleja bualu butudi katuyi mua kuela mpata padiye wamba ne: ‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ (Nsumuinu 13:20) Mvese eu kena wakula bua kuenda ne muntu mu mpukampuka to. ‘Kuenda ne’ muntu kudibu bakuila mu mvese eu kudi kumvuija kusomba nende bikole.a Mukanda mukuabu udi umvuija mvese eu ne: “Kuenda ne muntu kudi kumvuija kumunanga ne kumulamata bikole.” Kuenaku pebe mumone ne: tutu ne tshibidilu tshia kuidikija bantu batudi banange anyi? Nunku bu mutudi tulamata bantu batudi banange bikole, badi mua kulengeja bienzedi bietu anyi kubinyanga.
3 Bua kushala mu dinanga dia Nzambi, tudi ne bua kukeba balunda badi mua kutusaka ku dienza malu mimpe. Mushindu kayi? Mu tshikoso, tudi ne bua kunanga bantu badi Nzambi munange ne kuvuija balunda bende balunda betu. Anji elabi meji, kudiku bantu bakuabu badi mua kuikala balunda bimpe pa kumbusha badi ne ngikadilu idi Yehowa ukeba bua kuikalabu balunda bende anyi? Kadi tuanji kuakula bua bantu badi Nzambi munange. Tuetu bamanye tshidi meji a Yehowa mu bualu ebu, netufike ku disungula balunda badi mua kutusaka ku dienza malu mimpe.
BANTU BADI NZAMBI MUNANGE
4. Bua tshinyi Yehowa katu udia bulunda ne bantu bonso tshianana tshianana? Bua tshinyi wakabikila Abalahama ne: “Mulunda wanyi”?
4 Yehowa katu udia bulunda ne bantu bonso tshianana tshianana to. Bua tshinyi? Bualu yeye ke Mukalenge wa diulu ne buloba, ne kudia nende bulunda ndiakalenga dinene ditambe. Kadi mbanganyi badiye usungula bua kuikalabu balunda bende? Yehowa udi udia bulunda ne bantu badi bamueyemena ne bamuitabuja ne muoyo mujima. Tuangate tshilejilu tshia Abalahama udi muende lumu bua ditabuja dikole divuaye nadi. Kakuena diteta dikole bu dia kuambila tatu bua kufilaye muanende bu mulambu to.b Kadi Abalahama wakitaba bua ‘kufila Isaka bu mulambu,’ bualu uvua mutuishibue ne: “Nzambi udi ne bukole bua kumubisha munkatshi mua bafue.” (Ebelu 11:17-19) Bu muvua Abalahama muitabuje Yehowa ne mumutumikile mushindu eu, Yehowa wakamubikila ne: “Mulunda wanyi.”—Yeshaya 41:8; Yakobo 2:21-23.
5. Mmunyi mudi Yehowa umona bantu badi bamutumikila ne muoyo mujima?
5 Yehowa udi wangata kumutumikila ne mushinga wa bungi. Mmunange bantu badi bamulamata yeye ne muoyo mujima kumpala kua bionso. (2 Samuele 22:26) Anu bu mutuvua balonge mu nshapita wa kumpala wa mukanda eu, bantu badi batumikila Yehowa bualu mbamunange badi bamusankisha bikole. Nsumuinu 3:32 udi wamba ne: ‘Bunyana buende budi kudi badi ne mitshima miakane.’ Bantu badi batumikila mikenji ya Yehowa ke badiye witabila bua kusomba mu ‘nzubu’ muende, mbuena kuamba ne: ke badiye witaba bua bamutendelele ne bamusambile.—Musambu 15:1-5.
6. Mmunyi mutudi mua kuleja ne: tudi banange Yezu? Ntshinyi tshidi Yehowa umvua bua bantu badi banange Muanende?
6 Yehowa mmunange bantu badi banange Yezu Muanende umuepele mulela. Yezu wakamba ne: ‘Biansua muntu, neenze dîyi dianyi; Tatu wanyi neamusue, tuetu netulue kudiye, netuikale nende.’ (Yone 14:23) Mmunyi mutudi mua kuleja ne: tudi banange Yezu? Mpatudi tutumikila mikenji yende bu mudi wa kuyisha lumu luimpe ne kuvuija bantu bayidi. (Matayo 28:19, 20; Yone 14:15, 21) Tudi kabidi tuleja mutudi banange Yezu patudi ‘tulonda mu makasa ende,’ tuenza muetu muonso bua kumuidikija mu mêyi ne mu bienzedi bietu nansha mutudi bena mapanga. (1 Petelo 2:21) Yehowa udi usanka padiye umona bantu badi banange Muanende badienzeja bua kumuidikija.
7. Bua tshinyi mbimpe kuikala mulunda wa balunda ba Yehowa?
7 Yehowa udi ulomba bantu badi basue kulua balunda bende bua kuikala ne ngikadilu bu mudi: ditabuja, lulamatu, ditumikila ne bua kunangabu Yezu ne mikenji yende. Mbimpe tuetu bonso tudiebeje ne: ‘Balunda banyi badiku ne ngikadilu eyi anyi? Balunda ba Yehowa ke bandi muvuije balunda banyi anyi?’ Mbimpe tudiele nkonko eyi. Bantu badi ne ngikadilu idi Nzambi musue ne badi bayisha lumu luimpe lua Bukalenge ne tshisumi badi mua kulengeja bienzedi bietu ne kutusaka bua kutungunuka ne kusankisha Nzambi.—Bala malu adi mu kazubu kadi kamba ne: “Mulunda muimpe nganyi?”
LONGELA KU TSHILEJILU TSHIA MU BIBLE
8. Ntshinyi tshidi tshikusankisha mu bulunda buvua pankatshi pa (a) Naomi ne Luta? (b) bansongalume basatu bena Ebelu? (c) Paulo ne Timote?
8 Mu Bible mudi bilejilu bia bantu bavua basungule balunda bimpe ne bulunda buabu abu bubapeteshe masanka. Mudi tshilejilu tshia bulunda bua Naomi ne Luta mukaji wa muanende, tshia bansongalume basatu bena Ebelu pavuabu mu Babulona ne tshia Paulo ne Timote. (Luta 1:16; Danyele 3:17, 18; 1 Kolinto 4:17; Filipoi 2:20-22) Kadi tuakulayi bua tshilejilu tshikuabu tshitambe buimpe tshia bulunda bua Davidi ne Yonatana.
9, 10. Ntshinyi tshivua tshifikishe Davidi ne Yonatana ku dinangangana bikole?
9 Bible udi wamba ne: kunyima kua Davidi mumane kushipa Goleyata, ‘mutshima wa Yonatana wakakuatakana ne mutshima wa Davidi; Yonatana wakamunanga bu mutshima wende mene.’ (1 Samuele 18:1) Ke muakadiabu bulunda bukole nanku nansha muvuabu bashilangane ku bidimu bia bungi. Bakashala anu balunda too ne pakafua Yonatana mu mvita.c (2 Samuele 1:26) Ntshinyi tshivua tshifikishe balunda babidi aba ku dilamatangana bikole?
10 Davidi ne Yonatana bavua balamatangane bikole bualu bavua banange Nzambi ne basue kushala bamulamate. Dijinga diabu dia kusankisha Nzambi ke divua dibafikishe ku dinangangana bikole. Yonso wa kudibu uvua ne ngikadilu ivua isaka mukuabu bua kumunanga. Yonatana uvua umona nsongalume eu umusankisha bualu uvua uluila dîna dia Yehowa ne dikima ne tshisumi tshionso. Davidi pende uvua unemeka mukuluende eu bualu uvua utumikila malu onso avua Yehowa mulongolole, ne bualu uvua muteke disanka dia Davidi kumpala kua diende. Tuangate tshilejilu tshia tshivua tshienzeke dîba divua Davidi mutekete ku muoyo bikole pavuaye muye kusokoma mu tshisuku bua kuepuka tshiji tshia mukalenge mubi, Shaula tatuende wa Yonatana. Yonatana wakaleja muvuaye mulamate Davidi bikole bualu yeye ke ‘wakaya kudi Davidi, wakakolesha maboko ende mu Nzambi.’ (1 Samuele 23:16) Ela meji muvua Davidi mua kuikala mumvue pakalua mulunda wende wa pa muoyo kumuambuluisha ne kumukankamija.d
11. Bulunda bua Yonatana ne Davidi budi bukulongesha tshinyi?
11 Bulunda bua Yonatana ne Davidi budi butulongesha tshinyi? Dilongesha dinene ditudi tupeta ndia ne: balunda bimpe badi ne bua kuteka malanda abu ne Nzambi pa muaba wa kumpala. Patudi tudia bulunda ne bantu badi bitabuja malu atudi bitabuje petu, badi ne bikadilu bu bietu ne badi basue kushala balamate Nzambi bu tuetu, tudi mua kupeshangana ngenyi ne kulondelangana malu adi mua kutuambuluisha ne kutukolesha. (Lomo 1:11, 12) Balunda ba mushindu eu tudi mua kubapeta anu mu tshisumbu tshia bena Kristo. Abi bidiku bisua kumvuija ne: bantu bonso batu balua mu bisangilu ku Nzubu wa Bukalenge mbalunda bimpe anyi? Kabitu anu nanku to.
MUTUDI MUA KUSUNGULA BALUNDA
12, 13. (a) Bua tshinyi tudi ne bua kuikala ne budimu patudi tusungula balunda nansha munkatshi mua bena Kristo netu? (b) Ntatu kayi ivua nayi bisumbu bia bena Kristo ba kumpala? Yakafikisha Paulo ku dibapesha mibelu kayi?
12 Nansha mu tshisumbu tshia bena Kristo tudi ne bua kusungula balunda badi mua kutuambuluisha bua kukolesha malanda etu ne Nzambi. Bualu ebu budi ne bua kutukemesha anyi? Nansha kakese. Bamue bantu badi mua kuenza matuku a bungi mu tshisumbu bua kuluabu bena Kristo bashindame anu bu mutu bimue bimuma binenga bua kubobabi. Ke bualu kayi mu tshisumbu tshionso mutu anu bena Kristo bakadi bashindame ne badi kabayi banji kushindama. (Ebelu 5:12–6:3) Nunku, tudi ne bua kuikala ne lutulu ne kunanga bantu bapiabapia ne badi batekete mu ditabuja bualu tudi basue kubambuluisha bua balue pabu bena Kristo bashindame.—Lomo 14:1; 15:1.
13 Imue misangu, kudi mua kuenzeka bualu mu tshisumbu budi mua kutulomba bua kukonkonona balunda betu. Bamue badi mua kuikala batuadije kuenza malu mabi. Bakuabu badi mua kuikala balue bena tulumbulumbu anyi badiabakena bikole. Bisumbu bia mu bidimu lukama bia kumpala bivua pabi ne ntatu ya muomumue. Nansha muvua ba bungi ba kudibu ne lulamatu, bakuabu kabavua ne ngikadilu mimpe to. Bu muvua bamue bena Kristo ba mu Kolinto kabayi bitaba amue malongesha, mupostolo Paulo wakafundila tshisumbu atshi ne: “Kanudingibu; malunda mabi adi anyanga malu makane a bantu.” (1 Kolinto 15:12, 33) Paulo wakambila Timote ne: nansha munkatshi mua bena Kristo nende muvua bamue bavua ne bibidilu bibi. Timote uvua ne bua kudimukila bantu abu pa kubenga kusomba nabu bikole.—2 Timote 2:20-22.
14. Mmunyi mutudi mua kutumikila mubelu wa Paulo bua malunda?
14 Mmunyi mutudi mua kutumikila mibelu ya Paulo eyi? Katuena ne bua kudia bulunda ne muntu udi mua kunyanga bienzedi bietu nansha yeye mu tshisumbu anyi pambelu patshi. (2 Tesalonike 3:6, 7, 14) Tudi ne bua kulama malanda etu ne Yehowa. Tuvuluke ne: tudi anu bu ndanda bualu tutu ne tshilele tshia kutentula bibidilu bia balunda betu ne tutuadija kuenza malu anu bu bobu. Katuena mua kutua ndanda mu mâyi a manyanu kadi kutekemena ne: netumupatule muikala ne mâyi matoke to. Bia muomumue, katuena mua kudia bulunda ne bantu badi ne bienzedi bibi tuela meji ne: nebatusake ku dienza malu mimpe to.—1 Kolinto 5:6.
15. Ntshinyi tshiudi mua kuenza bua kupeta balunda badi batshina Nzambi mu tshisumbu?
15 Diakalenga, bena Kristo ba bungi badi mua kuikala balunda bimpe. (Musambu 133:1) Mmunyi muudi mua kupeta balunda badi badienzeja bua kulama malanda abu ne Yehowa mu tshisumbu? Udi ne bua kuikala ne ngikadilu mimpe ne bienzedi bidi bisaka bakuabu bua kudia nebe bulunda. Udi kabidi ne bua kudienzeja bua kupeta balunda bapiabapia. (Bala malu adi mu kazubu kadi kamba ne: “Mutudi bapete balunda bimpe.”) Keba bantu badi ne ngikadilu iudi musue kuikala nayi. Tumikila mubelu wa mu Bible wa ‘kudiundishibua mu mitshima yetu’ pa kudia bulunda ne bena Kristo nebe nansha bobu ba mubidi kayi, ditunga kayi anyi tshisamba kayi. (2 Kolinto 6:13; 1 Petelo 2:17) Ki mbimpe kudia bulunda amu ne bena mulongo nebe to. Vuluka ne: Yonatana uvua mukulu wa Davidi kule ne kule. Kudia bulunda ne bantu bakulumpe ba bungi kudi mua kukuambuluisha bua kupeta dimanya ne meji.
PADI BILUMBU BIJUKA
16, 17. Muena Kristo netu yeye mutuenzele bualu bubi, bua tshinyi katuena ne bua kumbuka mu tshisumbu?
16 Bu mudi mu tshisumbu muikale bantu ba mishindu yonso badi bakole mu mishindu mishilangane, bilumbu kabitu bipangika to. Muena Kristo netu udi mua kuamba anyi kuenza bualu budi mua kutunyingalaja. (Nsumuinu 12:18) Imue misangu bilumbu bitu bijuka bualu tudi bashilangane ne bakuabu, bua dibenga kupetangana ku mêyi anyi bualu tudi ne ngenyi mishilangane. Tudi ne bua kulenduka bua malu aa ne kumbuka mu tshisumbu anyi? Tuetu banange Yehowa ne bantu badiye munange, katuakuenza nanku to.
17 Bu mudi Yehowa Mufuki wetu ne mufidi wa bionso bidi bituambuluisha bua kuikala ne muoyo, tudi ne bua kumunanga ne kumulamata ne muoyo umue. (Buakabuluibua 4:11) Pashishe tudi ne bua kulamata bulongolodi buende budiye wenza nabu mudimu. (Ebelu 13:17) Nunku padi muanetu utuenzela bualu bubi anyi utunyingalaja mu mushindu kampanda, katuena ne bua kumbuka mu tshisumbu bua kuleja tshiji tshietu to. Tuetu benze nanku nebiambuluishe ku tshinyi? Yehowa ki ngudi mutufikishe munda to. Bituikala banange Yehowa katuakuitaba bua kumulekela ne kulekela bulongolodi buende to.—Musambu 119:165.
18. (a) Ntshinyi tshitudi mua kuenza bua kulama ditalala mu tshisumbu? (b) Kufuilangana luse padibi bikengela nekutupeteshe masanka kayi?
18 Dinanga ditudi banange bena Kristo netu didi ne bua kutusaka bua kukeba ditalala mu tshisumbu. Yehowa katu ulomba bantu badiye munange bua bikale bapuangane to. Ke tshitudi petu ne bua kuenza. Dinanga didi dituambuluisha bua kubenga kuimanyina pa tulema tua bana betu, kadi kuvuluka ne: tuetu bonso tudi bena mapanga ne tutu tuenza bilema. (Nsumuinu 17:9; 1 Petelo 4:8) Dinanga didi dituambuluisha bua kutungunuka ne ‘kulekelelangana mibi yetu.’ (Kolosai 3:13) Kabitu anu bitekete bua kutumikila mubelu eu to. Tuetu balekele kanyinganyinga bua bualu bubi budi muanetu mutuenzele katupita bukole, tudi mua kumufikila munda pamuapa tuela meji ne: ke dinyoka ditudi tumupesha. Mu bulelela, tudi tudienzela bibi patudi tukuatshilangana tshiji. Mbimpe kubuikidila bakuabu padibi bikengela, bualu kuenza nunku kudi kutupetesha masanka a bungi. (Luka 17:3, 4) Kudi kutupetesha ditalala dia mu mutshima, kutuambuluisha bua kulama ditalala mu tshisumbu ne nangananga bua kulama malanda etu ne Yehowa.—Matayo 6:14, 15; Lomo 14:19.
DÎBA DITUDI NE BUA KUSHIPA BULUNDA
19. Ngamue malu kayi adi mua kutufikisha ku dikosa malanda ne muena Kristo netu?
19 Imue misangu badi mua kutuambila bua kukosa malanda ne muena Kristo netu kampanda. Bitu bienzeka nanku padibu bipata muena Kristo udi muenze bubi bunene kayi unyingalala anyi padi muena Kristo ubenga malongesha etu, ne utuadija kulongesha malu a dishima anyi padi muntu udipatukila nkayende mu tshisumbu. Bible udi utuambila ne: “Kanubuelakanyi” ne bantu ba mushindu eu to.e (1 Kolinto 5:11-13; 2 Yone 9-11) Kabitu bitekete bua kukosa malanda ne muntu uvua pamuapa mulunda wetu anyi mulela wetu to. Dîba adi tudiku mua kuleja ne: tudi balamate Yehowa ne muoyo mujima, ne balamate kabidi mikenji yende miakane kumpala kua bionso anyi? Tuvuluke ne: Yehowa udi wangata lulamatu ne ditumikila ne mushinga wa bungi.
20, 21. (a) Bua tshinyi kuipata muntu mu tshisumbu kudi kuleja mutudi bamunange? (b) Bua tshinyi tudi ne bua kuikala ne budimu patudi tusungula balunda?
20 Yehowa mmulongolole bua bipate bamue bantu mu tshisumbu bualu mmutunange. Mushindu kayi? Kuipata muntu udi kayi unyingalala bua bubi buende kudi kuleja mutudi banange dîna dia Yehowa, banange mikenji yende ne bamunange yeye muine. (1 Petelo 1:15, 16) Kuipata bantu mu tshisumbu kudi kutshilama. Kudi kulama bantu badi bashalamu bua kababanyangi kudi benji ba malu mabi ne kudi kubambuluisha bua kuikala bajadike ne: tshisumbu ki ntshinyanguke ne malu a pa buloba ebu to. (1 Kolinto 5:7; Ebelu 12:15, 16) Badi bipata muntu udi muenze bubi mu tshisumbu bualu mbamunange. Tshidi mua kuikala dinyoka divuaye ukengela bua kushisha kumonaye ne: udi ne bua kushintulula bienzedi biende ne kupingana kudi Yehowa.—Ebelu 12:11.
21 Tumanye ne: balunda batudi tusomba nabu bikole badi mua kunyanga bienzedi bietu anyi kubilengeja. Ke bualu kayi mbimpe tuikale ne budimu patudi tusungula balunda. Patudi tuvuija balunda ba Yehowa balunda betu, ne tunanga bantu badiye munange, netupete balunda bimpe ba bungi. Malu atudi tupeta kudibu neatuambuluishe bua kutungunuka ne kuenza malu adi asankisha Yehowa.
[Mêyi adi kuinshi]
a Muaku wa mu tshiena Ebelu udibu bakudimune ne: ‘Kubuelakana ne’ muntu, udi umvuija kabidi kuikala “mulunda” anyi kudia nende ‘bulunda.’—Balumbuluishi 14:20; Nsumuinu 22:24.
b Pavua Yehowa mulombe Abalahama bua kumulambulaye muanende, uvua usua kuleja muvuaye mua kulua kufila Muanende umuepele mulela bu mulambu. (Yone 3:16) Kadi mu tshilumbu tshia Abalahama, Yehowa wakamukandika bua kashipi Isaka ne wakamupesha tshimpanga bua kutshilambulaye pa muaba wa Isaka.—Genese 22:1, 2, 9-13.
c Davidi utshivua muana anyi “nsongalume” pakashipaye Goleyata ne uvua ne bidimu bitue ku 30 pakafua Yonatana. (1 Samuele 17:33; 31:2; 2 Samuele 5:4) Bu muvua Yonatana ne bidimu bitue ku 60 pakafuaye, nanku: uvua mukulu wa Davidi ku bidimu 30.
d Bilondeshile 1 Samuele 23:17, Yonatana wakambila Davidi malu atanu aa bua kumukolesha: (1) Wakabela Davidi bua kikadi ne buôwa. (2) Wakamujadikila ne: bionso bidi Shaula musue kuenza nebiye mu mâyi. (3) Wakamuvuluija ne: yeye ke uvua ne bua kulua mukalenge anu muvua Nzambi mulaye. (4) Wakamujadikila kabidi ne: neashale anu mumulamate. (5) Wakamuambila ne: nansha tatuanyi Shaula mmumanye mundi mukulamate.
e Bua kumanya malu makuabu a tshitudi ne bua kuenzela muntu udibu bipate mu tshisumbu, bala Biena-bualu bidibu basakidile “Tshia kuenza ne muntu udibu bipate mu tshisumbu.”
[Kazubu/Tshimfuanyi mu dibeji 29]
MULUNDA MUIMPE NNGANYI?
Dîyi dia kulonda: ‘Mulunda utu wananga mu bikondo bionso, mmuanetu utu waleja bulela mu tshikondo tshia dikenga.’—Nsumuinu 17:17.
Imue nkonko iudi ne bua kudiela
▪ Balunda banyi batu balunda ba Yehowa ne Yezu anyi?—Yone 15:14, 16; Yakobo 2:23.
▪ Balunda banyi batu bangambuluisha bua kuikala ne bikadilu bimpe anyi?—1 Kolinto 15:33.
▪ Balunda banyi batuku bannange bikole, bafuane kumbela padibi bikengela anyi?—Musambu 141:5; Nsumuinu 27:6.
▪ Ngakuilu wanyi ne bienzedi bianyi bidi bileja ne: ndi mulunda wa mushindu kayi kudi bakuabu?—Nsumuinu 12:18; 18:24; 1 Yone 3:16-18.
[Kazubu mu dibeji dia 30]
MUTUDI BAPETE BALUNDA BIMPE
▪ “Kumpala, bivua binkolele bua kupeta balunda mu tshisumbu. Kadi ngakalua kumona ne: kuyisha bikole kudi kungambuluisha bua kupeta ngikadilu bu mudi lutulu, dinanukila ne dinanga. Pamvua ngenda mpeta ngikadilu eyi, ngakamona ne: bantu badi ne ngikadilu bu yanyi bakatuadija kulua kundi ne lelu ndi ne ndambu wa balunda bimpe.”—Shivani.
▪ “Ngakasambila bikole bua kupeta balunda mu tshisumbu. Kadi munkatshi mua matuku a bungi, mvua ngela meji ne: Nzambi kavua umvua masambila anyi to. Kadi ngakalua kumona ne: tshivua ngenza bualu nansha bumue bua kupeta balunda to. Tshivua mbakeba to. Meme kutuadija kuenza tshimvua ndomba mu masambila anyi ne mpindieu ndi mumone ne: Yehowa mmungandamune.”—Ryan.
[Tshimfuanyi mu dibeji 33]
Udi mua kupeta balunda bimpe munkatshi mua bena Kristo nebe