‘Nebambile bantu lumu luimpe elu’
1. Bua tshinyi tudi mua kuamba ne: kakuena tshintu tshidi mua kuimanyika mudimu wa kuyisha?
1 Kakuena tshintu nansha tshimue tshidi mua kupangisha Yehowa mua kukumbaja disua diende. (Yesh. 14:24) Nansha muvuabi bimueneka bu bikole bua Gideona ne bantu bende 300 kutshimuna basalayi 135 000 ba bena Midiyana, Yehowa wakamuambila ne: ‘Neusungile bena Isalele mu bianza bia bena Midiyana; tshiakakutuma anyi?’ (Bal. 6:14) Mmudimu kayi udi Yehowa ukuatshisha lelu? Yezu wakamba ne: ‘Nebambile bantu bonso ba pa buloba lumu luimpe elu lua bukalenge.’ (Mat. 24:14) Kakuena muntu udi mua kupangisha mudimu eu bua kuenzekawu to.
2. Bua tshinyi tudi mua kutekemena bua Yehowa ambuluishe muntu yonso mu mudimu wa kuyisha?
2 Yehowa udi wambuluisha muntu yonso: Bu mutudi bashindike ne: Yehowa neambuluishe Bantemu bende mu tshibungi bua kuyisha bimpe, tudiku mua kuamba ne: neambuluishe muntu yonso pa nkayende anyi? Pavua mupostolo Paulo muikale dijinga ne diambuluisha, wakadimuena muvua Yehowa mumuambuluishe ku butuangaji bua Muanende Yezu. (2 Tim. 4:17) Tuikale bashindike ne: Yehowa neabeneshe tshidi yonso wa kutudi wenza bua kukumbaja disua diende.—1 Yone 5:14.
3. Ndîba kayi didi Yehowa utuambuluisha?
3 Ntatu ya buatshia buila idiku ikupangisha bua kuyisha bimpe anyi? ‘Yeye udi ukolesha badi bapanga.’ (Yesh. 40:29-31) Badiku bakukengesha peshi bakuluisha anyi? ‘Teka bujitu buebe pambidi pa Yehowa, ne yeye neakukoleshe.’ (Mus. 55:22) Utuku udiambila imue misangu ne: kuena mukumbane bua kuyisha anyi? ‘Ndaku biebe, meme nengikale ne mukana muebe.’ (Ekes. 4:11, 12) Udiku ne disama didi dikupangisha bua kuyisha bimpe anyi? Yehowa udi wanyisha mudimu uudi wenza ne muoyo mujima, nansha wowu mukese.—1 Kol. 3:6, 9.
4. Kueyemena Yehowa nekutuambuluishe mushindu kayi?
4 Yehowa ‘udi wolola tshianza tshiende, muntu kayi neatshipingaje kunyima?’ (Yesh. 14:27) Tutungunuke ne kuyisha ne dikima ‘mu Mukalenge’ katuyi tulekela, bashindike ne: Yehowa udi ubenesha mudimu wetu.—Bien. 14:3.