Tukoleshayi dieyemena dietu mu buakane bua Nzambi

“Bua dieyemena diebe dikale mu Yehowa [“ndi mukupeshe dimanya,” NW].”​—NSUMUINU 22:19.

1, 2. (a) Bua tshinyi Bantemu ba Yehowa badi beyemena Yehowa? (Nsumuinu 22:19) (b) Ntshinyi tshidi tshileja ne: bamue bantu badi bakengela kukolesha dieyemena diabu kudi Yehowa?

BENA NKRISTO balelela mbabenesha ne dimanya dijalame dia Yehowa ne dia malongolola ende. Ne dinanga dionso “mupika wa lulamatu ne wa budimu” udi ubapesha “biakudia [bia mu nyuma] mu tshikondo tshiakanyine.” (Matayo 24:45, NW) Dimanya didibu bapeta didi dibapesha tshishimikidi tshikole tshia kuashila dieyemena diabu kudi Nzambi. Nenku mu tshi-bungi, Bantemu ba Yehowa badi baleja dieyemena dia dikema kudi Yehowa ne mu buakane buende.

² Kadi bidi bimueneka ne: bangata muntu pa nkayende, bamue Bantemu badi mua kukengela bua kukolesha dieyemena edi. Imue misangu Société utu upeta mikanda idi ileja dielakana pa mumvuija mafila mu mikanda yende. Dielakana edi didi mua kuikala diandamuna ku makajilula mu ngumvuilu, anyi didi mua kuikala ditangila malu adi alenga mutumi wa mukanda, nangananga mu mpampakenu.​—Fuanyikija ne Yone 6:60, 61.

3. Ntshinyi tshidi mua kuenzekela nansha basadidi ba lulamatu ba Yehowa, ne mbua tshinyi?

³ Nansha basadidi balelela ba Yehowa badi bamona bulelela bua Muambi 9:11: ‘Ngakatangila kabidi muinshi mua dîba ne: Bena lubilu lukole kabena bapita bakuabu mu kulumbila lubilu misangu yonso, nansha bena bukitu kabena bapitapita bakuabu bukole mu mvita; bena meji kabatu bapeta biakudia bionso; bena lungenyi kabatu bapeta bubanji buonso; badi ne ngenzelu muimpe kabatu bapeta diakalengele dionso; kadi buonso buabu badi ne bikondo bidi [“malu kaayi malongolola,” NW] abatulukila.’ Mmunyi mudi bualu ebu mua kuikala bulelela mu ngumvuilu mualabaja anyi wa mu nyuma? Tudi mua kuikala bamanye bena nkristo bavua ne lubilu mu ditumikila mibelu ya mu Bible, bena bukitu mu dibingisha bulelela, bena meji mu ditumikila mêyi-maludiki a mu Bible, bikale ne lukunukunu mu dipatshila dimanya dijalame. Kadi bua ‘bikondo bia malu kaayi malongolola,’ bamue badi mpindieu mua kudimona belela mikalu kudi njiwu ivua mibafikile anyi bukulakaje. Badi mua kudiebeja bikalabu mua kubuela mu bulongolodi bupiabupia bua Nzambi kakuyi dimona lufu.

4, 5. Bua tshinyi bena nkristo kabena ne kabingila nansha kamue bua kubenga kuikala ne dieyemena mu buakane bua Yehowa?

⁴ Padi muena nkristo ujimija muena dibaka nende, kanyinganyinga ne didiumvua mushale nkaya bitu bikole. Pavuabu pamue bu bena dibaka, bavua mua kuikala basadile Yehowa munkatshi mua bidimu bivule anyi mene makumi a bidimu. Muena dibaka udi mushale ne muoyo mmumanye ne: lufu ludi lukosa tshisuikidi tshia dibaka.a (1 Kolinto 7:39) Mpindieu, bua kajimiji dieyemena diende, udi ne bua kukontolola mpampakenu yende.​—Fuanyikija ne Mâko 16:8.

⁵ Mmunyipu mudibi bia meji bua kumona lufu lua muena dibaka nebe, muledi, muana anyi muena nkristo mulunda wa pa muoyo bu tshikondo tshia kuleja dieyemena mu buakane bua Yehowa! Nansha patudi bafuishe, tudi mua kuikala bashindike ne: Yehowa ki mmupange buakane nansha. Tudi mua kuikala ne dieyemena dia se: muntu yonso udi upeta muoyo wa kashidi​—nansha mu dishala ne muoyo too ne ku nshikidilu anyi mu dibiishibua—​neikale ne disanka. Mufundi wa misambu udi wamba bua Nzambi ne: ‘Udi ubulula tshianza tshiebe, tshintu tshionso tshidi ne muoyo udi utshiukutshisha ne diakalengele. Yehowa udi muakane mu njila [“yende,” NW] yonso, udi uleja dinanga mu bienzedi biende bionso. Yehowa udi pabuipi ne bonso badi bamubikila, kudi bonso badi bamubikila mu bushuwa. Yeye udi umana dijinga dionso dia badi bamutshina, udi umvua muadi wabu kabidi, udi ubasungila.’​—Musambu 145:16-19.

Bituikala tumvua bu badi bakenge bua tshianana

6, 7. (a) Bua tshinyi bamue Bantemu bakakenga kale badi mua kuikala mpindieu ne ngumvuilu mushilangane? (b) Bua tshinyi katuena ne bua kuangata Yehowa bu mupange buakane bua muvuaye mulekele makenga a nunku kale?

⁶ Kale, bamue Bantemu bakakenga bua dibenga kuenza mudimu kampanda udi kuondo kabu ka muoyo mua kubanyishila bua kuenza mpindieu. Tshilejilu, badi mua kuikala basungule bualu ebu kukadi bidimu bivule bua imue mishindu ya midimu milomba kudi mbulamatadi. Muanetu kansanga udi mua kumvua mpindieu ne: udi mua kuenza midimu eyi ne dituishibua dionso kakuyi ditupa ku ndubidilu wende wa buena-nkristo mu ndongoluelu eu wa malu.

⁷ Yehowa uvua mupange buakane bua kumulekela ukenga bua dibenga bualu budiye mua kuenza mpindieu kakuyi bipeta bibi anyi? Bantu bavule bavua bapitshile mu nsombelu eu kabakuela meji mushindu’au to. Pamutu pa nanku badi basanka bua muvuabu bapete mushindu wa kuleja patoke ne: bavua bapangadije bua kushala bashindame pa tshilumbu tshia bumfumu bukulu pa bionso. (Fuanyikija ne Yobo 27:5.) Nkabingila kayi kadi muntu mua kuikala naku bua kunyingalala bua mudiye mulonde kuondo kende ka muoyo mu dishala mushindame ku luseke lua Yehowa? Mu dibingisha ne bulamatshi mêyi-maludiki a bena nkristo mushindu uvuabu baumvue anyi mu diandamuna ku misongolo ya kuondo ka muoyo, bakadileja bakanyine kudia bulunda ne Yehowa. Bushuwa, mbia meji bua kuepuka nsombelu udi mua kutatshisha kuondo ketu ka muoyo anyi udi pamu’apa mua kufika ku dilenduisha bakuabu. Mu muanda eu tudi mua kuela meji bua tshilejilu tshiakashiya mupostolo Paulo.​—1 Kolinto 8:12, 13; 10:31-33.

8. Bua tshinyi bena nkristo bena Yuda, bavua balamate ku Mikenji kumpala, kabavua ne kabingila bua kuela buakane bua Yehowa mpata?

⁸ Bua kumona mua kusankisha Yehowa, bena Yuda bavua balombibue bua kutumikila Mêyi-matuma Dikumi pamue ne mulongolongo wa mikenji misakidila mitue ku 600. Pashishe, mu ndongoluelu wa Buena-nkristo, ditumikila mikenji eyi kadivua kabidi bualu-bulomba bua kushisha kuenzela Yehowa mudimu, nansha mene bua bena Yuda ba ku mubidi. Mu mikenji ivuabu kabayi kabidi benzejibue bua kutumikila muvua kabidi eyi ivua itangila ditengula, dilama Nsabatu, difila milambu ya nyama ne dilonda imue mikandu ya biakudia. (1 Kolinto 7:19; 10:25; Kolosai 2:16, 17; Ebelu 10:1, 11-14) Bena Yuda​—pamue ne bapostolo—​bakalua bena nkristo bavua bumbusha ku dienzejibua dia kulama mikenji ivuabu babalombe bua kutumikila pavuabu mu tshipungidi tshia Mikenji. Bakadiabakena bua se: ndongoluelu wa Nzambi uvua mupange buakane bua muvuaye mubalombe kumpala malu avua kaatshiyi ne mushinga anyi? Tòo, bakasanka bua ngumvuilu mualabaja wa malongolola a Yehowa.​—Bienzedi 16:4, 5.

9. Mmuanda kayi udi muikale mulelela bua bamue Bantemu, kadi bua tshinyi kabena ne kabingila bua kunyingalala?

⁹ Mu bikondo bietu ebi, kuvua bamue Bantemu bavua ne dîsu dikole mu mmuenenu wabu wa tshivuabu mua kuenza anyi kabayi mua kuenza. Bua kabingila aku bakakenga bikole kupita bakuabu. Kunyima, dimanya divule diakabambuluisha bua kukolesha mmuenenu wabu wa malu. Kadi kabena ne kabingila bua kunyingalala bua muvuabu benze malu kumpala mu diumvuangana ne kuondo kabu ka muoyo, nansha pikala pamu’apa malu aa mabakebele makenga mapitshidile. Bushuwa mbakanyine ka-lumbandi bua muvuabu badileje badiakaje bua kukenga bua kuikala ne lulamatu kudi Yehowa, bua ‘kuenza malu onso bualu bua lumu luimpe.’ Yehowa udi ubenesha dimulamata dia mushindu’au. (1 Kolinto 9:23; Ebelu 6:10) Ne busunguluji mupostolo Petelo wakafunda ne: ‘Binuadikankamika panuenza bualu buimpe ne nudi nukenga, bualu ebu budi bua kusakidila ku mêsu kua Nzambi.’​—1 Petelo 2:20.

Tulongelayi kudi Yona

10, 11. Mmunyi muvua Yona muleje dipanga kueyemena Yehowa (a) pavua Nzambi mumupeshe mudimu wa kuya ku Ninive? (b) pavua Nzambi kayi mubutule bena mu Ninive?

¹⁰ Pakamutumabu bua kuya ku Ninive, Yona wakaleja dipanga dianyisha bua dieyemena divua Yehowa muikale nadi kudiye. Panyima pa muanda mukuate buôwa wakamufikila bua dibenga kutumikila diende, meji akavuila Yona, wakajingulula tshilema tshiende, kuitabaye mudimu wende wa ku ba bende, ne kudimuijaye bena Ninive bua kabutu kavua kasemena pabuipi. Pashishe kuakalua bualu kabuyi butekemena: Bua mmuenenu wa dinyingalala wa bena Ninive, Yehowa wakapangadija bua kubenga kubabutula.​—Yona 1:1–3:10.

¹¹ Ntshinyi tshiakenza Yona? Muikale mubungame, wakabakena Nzambi mu disambila. Dinyingalala diende divua se: ‘Mvua muele meji ne: malu avua mua kuenzeka mushindu’eu. Ke bua tshinyi kumpala tshivua musue kulua ku Ninive. Mpindieu, panyima pa bionso bindi mumone ebi, pamue ne tshipapu tshia buôwa ne dimpuekesha milongo pakammina mushipa munene, ne panyima pa mudimu wanyi mukole wa didimuija bena Ninive bua kabutu kakavua pa kuenzeka, ke tshipeta etshi! Mudimu wanyi ne makenga anyi onso bivua bia tshianana! Mvua nansha mua kuikala mufue!’​—Yona 4:1-3.

12. Ntshinyi tshitudi mua kulongela ku bualu buakafikila Yona?

¹² Yona uvua ne kabingila bua kudiabakena anyi? Yehowa uvua mupange buakane mu difuila benji ba bubi bavua banyingalale luse anyi? Bushuwa, Yona uvua ne bua kuikala musanke; bantu makumi a binunu bavua ne bua kuikala bepula ku kabutu aku! (Yona 4:11) Kadi mmuenenu wende mupange kanemu ne wa didiabakena wakaleja ne: kavua uleja dieyemena dikole mu buakane bua Yehowa. Uvua utamba kuela meji a bungi buende yeye, makese menemene bua bakuabu. Tulongelayi kudi Yona pa kuditeka tuetu bine ne nyanji yetu pa muaba muibidi. Tuikalayi batuishibue ne: kutumikila Yehowa, kulonda buludiki bufila ku diambuluisha dia bulongolodi buende ne kuitaba mapangadika ende, ke bualu buakane bua kuenza. Tudi bashindike ne: ‘Badi batshina Nzambi nebapete diakalengele ku mêsu kuende.’​—Muambi 8:12.

Mpindieu ke tshikondo tshia kukolesha dieyemena dietu!

13. Mmunyi mutudi buonso buetu mua kukolesha dieyemena dietu kudi Yehowa?

¹³ Kukolesha dieyemena dietu kudi Yehowa ke njila wa meji. (Nsumuinu 3:5-8) Bushuwa, tudi ne bua kuenza bivule kupita disambila patupu bua Yehowa atuambuluishe bua kutamba kuikala ne dieyemena. Dieyemena didi dikola dishindamene pa dimanya dijalame, nenku tudi ne bua kuvuija didilongela Bible, dibala Bible ne mikanda idi imumvuija, malu etu a buatshiabuatshia. Dibuela pa tshibidilu mu bisangilu bia bena nkristo mbualu bua mushinga wa bungi, bidi kabidi muomumue bua dibilongolola bimpe ne difilamu mandamuna padiku mushindu. Kuikala ne tshibidilu tshia kuyisha bakuabu malelela a mu Bible, kutshimuna milandu ne mbabi yonso, kudi kabidi kukolesha dieyemena dietu kudi Yehowa ne mu Dîyi diende. Nenku tudi tulua batambe kukuatakana nende ku dituku ne ku dituku.

14. Bua tshinyi mu katupa kîpi emu nebalombe bantu ba Nzambi bua baleje dieyemena kudi Yehowa dipite dia kuonso eku?

¹⁴ Mu katupa kîpi emu, tshikondo tshitambe bikuabu tshia dikenga ditu kadiyi dianji kukuata bukua-bantu netshilue mu tshintuluntulu. (Matayo 24:21) Paluatshi, basadidi ba Nzambi badi ne bua kuleja dieyemena dipite dia kuonso eku mu buakane bua Yehowa ne mu bulombodi bufila kudi bulongolodi buende. Mu tshimfuanyi, dîba adi nebatumikile ne dieyemena dionso mubelu wa Nzambi wa se: “Bantu banyi, ndayi, nubuele mu nzubu yenu, nudikangile biibi; nuanji kusokoma katupa kipi too ne padi tshiji . . . tshijika.” (Yeshaya 26:20, MMM) Bakadi bamane kubuela mu nsombelu wa bukubi wa bisumbu bipite pa 85 000 mu matunga 232. Nansha buobu mua kusakidila kabidi bualu kayi ku mubelu wa se: “nubuele mu nzubu yenu,” tudi mua kuikala bashindike ne: Yehowa neatuambuluishe bua kuukumbaja.

15. Mmunyi mudibu bele kashonyi pa tshilumbu tshia dieyemena mu 1998, ne bua tshinyi mbiakanyine nenku?

¹⁵ Mbia mushinga wa bungi bua tukoleshe dieyemena dietu mpindieu. Tuetu katuyi ne dieyemena kudi bana betu bena nkristo, mu bulongolodi bua Yehowa ne, kupita bionso, kudi Yehowa muine, lupandu neluikale bualu bukole. Nenku mmunyipu mudibi biakanyine bua se: mu 1998, misangu ne misangu mbavuluije Bantemu ba Yehowa pa buloba bujima ku diambuluisha dia mêyi a mvese wabu wa ku tshidimu ne: “yonso udi ubila dîna dia Yehowa neapandishibue”! (Lomo 10:13, NW) Tudi ne bua kutungunuka ne kuikala bashindike bualu abu. Bituajingulula nansha dielakana dikese menemene mu dieyemena edi, tudi ne bua kudienzeja bua kudilongolola ku mpindieu, eyowa, lelu’eu.

Dilumbuluisha dia Yehowa nedikale diakane

16. Ntshinyi tshidi mua kuenzekela dieyemena padidi kadiyi dilama bimpe, ne mmunyi mutudi mua kuepuka nsombelu eu?

¹⁶ Mu Ebelu 3:14 (NW), mbavuluije bena nkristo bela manyi ne: “Tudi bushuwa tulua babanyanganyi ne Kristo anu bitualama bikole too ne ku ndekelu dieyemena dietu dituvua nadi ku ntuadijilu.” Mêyi aa adi kabidi atangila bena nkristo badi ne ditekemena dia kuikala ne muoyo pa buloba. Dieyemena dia ku ntuadijilu didi mua kumungutuka bituikala katuyi badilame bimpe. Mmunyipu mudibi bia mushinga wa bungi bua tuetu kutungunuka ne kuipatshila dimanya dijalame, mu mushindu’eu tukolesha tshishimikidi tshitudi bashile dieyemena dietu!

17. Bua tshinyi tudi mua kuikala bashindike ne: bua bidi bitangila lupandu, Yezu nealumbuluishe biakane?

¹⁷ Mu katupa kîpi emu Kristo neakonkonone bisamba bionso bua kumonaye mua ‘kutapulula [bantu] bu mudi mulami utapulula mikoko ne mbuji.’ (Matayo 25:31-33) Tudi mua kuikala bashindike ne: Kristo neikale muakane bua kujadika udi muakanyine lupandu. Yehowa mmumupeshe meji, busunguluji ne ngikadilu mikuabu idi ikengedibua bua ‘kulumbuluisha ba pa buloba mu buakane.’ (Bienzedi 17:30, 31) Dituishibua dietu dikale bu dia Abrahama, wakamba ne: ‘Bualu ebu kabuikadi kuudi bua wewe kuenza nunku bua kushipa bantu bakane ne bantu babi popamue; biwenza nunku bantu bakane nebikale muomumue ne bantu babi; bualu ebu kabuikadi kuudi; Mulumbuluishi wa buloba buonso katu wenza bimpe anyi?’​—Genese 18:25.

18. Bua tshinyi katuena ne bua kutamba kuditatshisha bua malu atudi katuyi mua kuikala bamanye mpindieu?

¹⁸ Bikale ne dieyemena dikole mu buakane bua Yehowa, katuena ne bua kupampakana bua kupeta mandamuna a nkonko bu mudi: ‘Mmunyi mualumbuluishabu bana ba mu maboko ne bana batekete? Bidiku mua kuikala se: bantu ba bungi nebikale kabayi banji kupeta lumu luimpe palua Armagedone anyi? Tuambe bishi bua badi ne masama a mpala? Tuambe munyi bua . . . ?’ Bushuwa, bua mpindieu katuena mua kumanya muikala Yehowa mua kuandamuna nkonko eyi. Kadi neayandamune mu mushindu muakane ne wa luse. Katuena ne bua kuela bualu abu mpata nansha. Bulelela, tudi mua kukema ne kusanka bua kumumona wandamuna nkonko eyi mu mushindu utudi katuyi banji kuelela meji.​—Fuanyikija ne Yobo 42:3; Musambu 78:11-16; 136:4-9; Matayo 15:31; Luka 2:47.

19, 20. (a) Bua tshinyi ki mbibi bua kuela nkonko ya meji? (b) Ndîba kayi diafila Yehowa mandamuna adi akengedibua?

¹⁹ Bulongolodi bua Yehowa kabutu bukandika bua kuela nkonko ne muoyo umue ne mu tshikondo tshiakanyine, bu mudi bamue baluishi basua kuamba kabayi kabingila. (1 Petelo 1:10-12) Kadi Bible udi utubela bua kuepuka nkonko kayiyi ya meji ne ya dinana nayi lungenyi patupu. (Tito 3:9) Kuela nkonko ya meji ne kuenza makebulula mu Dîyi dia Nzambi ne mu mikanda ya bena nkristo bua kupeta mandamuna a mu Mifundu kudi mua kuvudija dimanya dietu dijalame ne nenku kudi mua kukolesha dieyemena dietu kudi Yehowa. Bulongolodi budi bulonda tshilejilu tshia Yezu. Uvua udilaminyina bua kufila mumvuija pa nkonko ivua tshikondo tshiakanyine bua kuyandamuna katshiyi tshianji kukumbana. Wakumvuija ne: “Ntshidi ne malu makuabo a bungi a kunuambila, kadi nuenu kanuena bamanye mua kuatuala katataka.” (Yone 16:12) Wakitaba kabidi ne: yeye muine kavua mumanye amue malu tshikondo atshi to.​—Matayo 24:36.

²⁰ Yehowa utshidi ne malu a bungi a kusokolola. Mmunyipu mudibi bia meji bua kumuindila, bashindike ne: tshikondo tshijadika bua kusokololaye malongolola ende netshikale tshiakane bua kukumbaja majinga ikalaku. Tudi mua kuikala bashindike ne: diakamue padi tshikondo tshijadika kudi Yehowa tshikumbana, netuikale ne disanka dia kupeta busunguluji bua pa mutu bua kumvua njila yende. Eyowa, netupete difutu, anu tuetu baleje dieyemena dikole kudi Yehowa ne bulongolodi budiye utumika nabu. Nsumuinu 14:26 (NW) udi utujadikila ne: “Mu ditshina dia Yehowa mudi dieyemena dikole, ne bua bana bende nekuikale tshisokomenu.”

[Mêyi adi kuinshi]

Udi wela meji kayi?

◻ Bua tshinyi ki mbia meji bua kulekela mpampakenu inyanga dieyemena dietu kudi Yehowa?

◻ Ntshinyi tshitudi mua kulongela ku muanda wakafikila Yona?

◻ Bua tshinyi dilonga dia Bible ne dibuela mu bisangilu bidi ne mushinga wa bungi?

[Tshimfuanyi mu dibeji 16]

Nansha tuetu bafuishe, tudi ne bua kuikala bashindike ne: Yehowa mmuakane

[Bimfuanyi mu dibeji 18]

Udi mujadike ne: udi mueyemene Yehowa anyi?