Tudi ne bua kueyemena Yehowa

‘Bualu bua Yehowa neikale [“dieyemena,” NW] diebe.’​—NSUMUINU 3:26.

1. Nansha mudi bantu ba bungi bamba mudibu beyemene Nzambi, ntshinyi tshidi tshileja ne: misangu yonso kabatu anu benza nanku?

TSHIAMBILU “Tudi beyemene Nzambi” ntshifunda pa mfranga ya ditunga dia États-Unis. Kadi aba bonso badi benza mudimu ne mfranga eyi mu ditunga edi peshi miaba mikuabu badi bushuwa beyemena Nzambi anyi? Peshi badi batamba kueyemena mfranga nkayayi? Dieyemena dia nunku mu mfranga ya ditunga edi anyi ditunga kayi dikuabu kadiena mua kumvuangana ne dieyemena Nzambi wa bukole buonso muena dinanga, utu kayi utumika bibi ne bukole buende ne utu kayi nansha kakese ne lukuka. Bushuwa, mu mushindu mutoke udi ukandika lukuka.​—Efeso 5:5.

2. Mmuenenu kayi udi nende bena nkristo balelela bua bukokeshi bua bubanji?

² Bena nkristo balelela badi beyemena Nzambi, ki mbubanji nansha, ne “bukokeshi [bua bubanji] budi bushima.” (Matayo 13:22, NW) Mbajingulule ne: bukokeshi bua mfranga bua kufila disanka ne kukuba muoyo mbutambe kuikala ne mikalu. Kabiena nanku bua bukokeshi bua Nzambi Wa-Bukole-Buonso nansha. (Sefanya 1:18) Pa nanku, mubelu eu ng’wa meji: ‘Mioyo yenu kayikadi ne lukuka lua biuma, nuikale ne disanka ne bintu binudi nabi, bualu bua Nzambi muine wakamba ne: Tshiena nkulekela, nansha kakese, tshiena nkushiya tshianana.’​—Ebelu 13:5.

3. Mmunyi mudi mvese idi kumpala kua Dutelonome 31:6 itokesha mvese udi Paulo utela?

³ Pavuaye ufundila bena nkristo bena Ebelu mêyi adi kuulu aa, mupostolo Paulo wakatela ngenyi-miludiki ivua Mozese mupeshe bena Izalele katupa kîpi kumpala kua kufuaye ne: ‘Nuikale ne bukole ne mitshima ya dikima, kanubatshinyi, bualu bua Yehowa, Nzambi wenu, yeye mene uyaya nenu; yeye kêna unupanga, kêna unulekela.’ (Dutelonome 31:6) Mvese idi kumpala kua Mufundu eu idi ileja ne: Mozese uvua ubakankamija bua bikale ne dieyemena kudi Yehowa divua kadiyi dishikile anu pa dimueyemena bua kubapeshaye bintu bia ku mubidi bivuabu bakengela. Mmunyi nanku?

4. Mmunyi muvua Nzambi mujadikile bena Izalele ne: uvua wa kueyemena?

⁴ Munkatshi mua bidimu 40 bivua Izalele ne bua kulalakana mu tshipela, Nzambi uvua ne lulamatu mu dibapesha bintu bivua bikengedibua bua kuikalabu ne muoyo. (Dutelonome 2:7; 29:5) Uvua kabidi ubalombola. Tshijadiki tshimue tshia muanda eu tshivua divuba divua dimueneka mundamunya ne mudilu butuku, bivua bilombola bena Izalele batangile “mu buloba budi ne mabele ne buitshi bia bungi.” (Ekesode 3:8; 40:36-38) Pakakumbana tshikondo tshia kubuela bushuwa mu Buloba Bulaya, Yehowa wakasungula Yoshua bua kuikalaye mupingayi wa Mozese. Bavua batekemene se: bena mu buloba abu bavua mua kubatuila nkanana. Kadi Yehowa wakenda ne bantu bende munkatshi mua makumi a bidimu, nenku kabavua ne bua kutshina nansha. Bena Izalele bavua ne kabingila kakole bua kumanya Yehowa bu Nzambi wa kueyemena!

5. Mmunyi mudi nsombelu wa bena nkristo lelu mufuanangane ne wa bena Izalele kumpala kua kubuelabu mu Buloba Bulaya?

⁵ Lelu’eu bena nkristo badi bapitshila mu tshipela tshia bulongolodi ebu bubi mu luendu luabu batangile mu bulongolodi bupiabupia bua Nzambi. Bamue ba kudibu badi mu njila eu kukadi bidimu bipite pa 40. Mpindieu mbimane ku muelelu wa bulongolodi bupiabupia bua Nzambi. Kadi baluishi batshidi bimane mu njila, bikale ne tshipatshila tshia kujika muntu yonso bua kabuedi mu tshikala mua kulua bu Buloba Bulaya, butambe bulenga kupita bua kale buvua ne mabele ne buitshi bia bungi. Nenku bua bena nkristo lelu’eu, mmunyipu mudi mêyi a Mozese makanyine padi Paulo uambulula ne: ‘Tshiena nkulekela, nansha kakese, tshiena nkushiya tshianana’! Bonso badi bashala bakole ne bikale ne dikima, ne ditabuja dikole beyemene Yehowa, mbashindike se: nebapete difutu.

Dieyemena dishindamene pa dimanya ne bulunda

6, 7. (a) Mbualu kayi buakateta dieyemena divua nadi Abrahama kudi Yehowa? (b) Mmunyi muvua Abrahama mua kuikala mumvue pavuaye mu luendu mutangile ku muaba uvuaye ne bua kulambuila Izake?

⁶ Musangu mukuabu Abrahama nkambua wa bena Izalele uvua mutumina dîyi bua kulambula muanende Izake bu mulambu wa kuosha. (Genese 22:2) Ntshinyi tshiakambuluisha tatu eu wa dinanga bua kuikala ne dieyemena dikole menemene kudi Yehowa mu mushindu wa se: uvua mudiakaje diakamue bua kutumikila Nzambi? Ebelu 11:17-19 udi wandamuna ne: ‘Bua ditabuja Abrahama, pakamutetabu, [“wakenza anu bu,” NW] wakafila Izaka bu mulambu; yeye wakamana kuitabuja milayi ne disanka, wakadi [“mutete,” NW] kufila muanende umuepele mulela; nyeye wakambibua bualu buende ne: Nebabikile tunkanunuina tuebe mu Izaka; wakamanya ne: Nzambi udi ne bukole bua kumubisha munkatshi mua bafue mene, kuakamuangataye kabidi mu tshifuanyikiji.’

⁷ Vuluka ne: biakalomba Abrahama ne Izake matuku asatu bua kufika muaba uvua dilambula ne bua kuenzekela. (Genese 22:4) Abrahama uvua ne dîba dia bungi dia kukonkonona tshivuabu bamulombe bua kuenza. Tudiku mua kuela meji bua bivuaye mumvue ne dipampakana diende anyi? Diledibua dia Izake divua bualu bua disanka buvua kabuyi butekemena. Bualu ebu bujadika ne: mbuenza kudi Nzambi buakakolesha bulamate kudi Nzambi buvua nabu Abrahama ne Sara mukajende uvua nkumba kumpala. Bushuwa panyima apu bavua bashale batekemene tshivua matuku atshivua alua malamine Izake ne ndelanganyi yende. Bipatshila biabu bindila bikole bivua bishikila mu mushindu kauyi mutekemena, bu mudibi bisua kumueneka bua tshidi Nzambi mulombe mpindieu anyi?

8. Mmunyi muvua dieyemena dia Abrahama kudi Nzambi kadiyi dishikile anu pa kuitaba ne: Uvua mua kubisha Izake?

⁸ Nansha nanku, Abrahama uvua ne dieyemena dishindamene pa dimanya dia nsungasunga ditu nadi balunda ba pa muoyo. Bu muvuaye “mulunda wa Nzambi,” Abrahama ‘wakitabuja Nzambi ne bakamubadila ditabuja diende bu buakane buende.’ (Yakobo 2:23) Dieyemena dia Abrahama kudi Yehowa kadivua dishikile anu pa kuitabuja patupu ne: Nzambi uvua mua kubisha Izake. Abrahama uvua kabidi mutuishibue ne: bualu buvua Yehowa umulomba bua kuenza buvua buakanyine, nansha muvua Abrahama kayi mumanye malu onso to. Kavua ne kabingila bua kuelakana bua buakane bua Yehowa mu dimulomba bualu ebu. Nenku, dieyemena dia Abrahama divua dikolesha pakafika muanjelu wa Yehowa bua kukandika bua Izake kafu bushuwa bu mulambu.​—Genese 22:9-14.

9, 10. (a) Ndîba kayi dikavua Abrahama mudianjile kuleja dieyemena diende kudi Yehowa? (b) Ndilongesha kayi dia mushinga ditudi mua kupetela kudi Abrahama?

⁹ Abrahama uvua muleje dieyemena edi dia muomumue mu buakane bua Yehowa bidimu bitue ku 25 kumpala. Pakamudimuijabu ne: bavua ne bua kubutula Sodome ne Gomore, mu bulelela uvua muditatshishe bua diakalenga dia bantu bonso bakane bavua basombelemu, pamue ne Lota, muana wa muanabu. Abrahama wakasengelela Nzambi ne mêyi aa: ‘Bualu ebu kabuikadi kuudi bua wewe kuenza nunku bua kushipa bantu bakane ne bantu babi popamue; biwenza nunku bantu bakane nebikale muomumue ne bantu babi; bualu ebu kabuikadi kuudi; Mulumbuluishi wa buloba buonso katu wenza bimpe anyi?’​—Genese 18:25.

¹⁰ Nkambua Abrahama uvua mutuishibue ne: Yehowa katu wenza bualu budi kabuyi buakane nansha. Mufundi wa misambu wakimba pashishe ne: ‘Yehowa udi muakane mu njila [“yende,” NW] yonso, udi uleja dinanga mu bienzedi biende bionso.’ (Musambu 145:17) Tudi ne bua kudiebeja ne: ‘Ntu ngitaba malu adi Yehowa ulekela amfikila tshiyi ngela buakane buende mpata anyi? Ndi mutuishibue ne: tshionso tshidiye ulekela tshienzeka netshikale bua diakalenga dianyi ne dia bakuabu kabidi anyi?’ Bituandamuna ne: eyowa, tudi bapetele dilongesha dia mushinga kudi Abrahama.

Tueyemenayi bantu badi Yehowa musungule

11, 12. (a) Ndieyemena dia mushindu kayi didi dikale dikengedibua bua basadidi ba Nzambi? (b) Ndutatu kayi lutudi mua kuikala nalu imue misangu?

¹¹ Aba badi bamona Yehowa bu dieyemena diabu badi kabidi beyemena bantu badi Yehowa musungule bua kutumika nabu mu dikumbaja dia malongolola ende. Bua bena Izalele, ebi bivua biumvuija kueyemena Mozese ne pashishe Yoshua uvua mumupingane. Bua bena nkristo ba kumpala, biakumvuija kueyemena bapostolo ne bakulu ba mu tshisumbu tshia mu Yeruzaleme. Buetu tuetu lelu’eu, bidi biumvuija kueyemena “mupika wa lulamatu ne wa budimu” muteka bua kutupesha “biakudia [bia mu nyuma] mu tshikondo tshiakanyine,” pamue ne bantu ba munkatshi muabu badi benza Kasumbu Kaludiki.​—Matayo 24:45, NW.

¹² Bushuwa, kuleja dieyemena dietu kudi bantu aba badi balombola tshisumbu tshia bena nkristo kudi bua diakalenga dietu. Badi batuambila ne: ‘Nutumikile badi banukokesha, nubakokele; bua buobu badi bikale ne tshitabela bua mioyo yenu, bu bantu balua kubadila Nzambi bintu; bua buobu benze bualu ebu ne disanka, kabayi ne manunganyi, bua bualu ebu kabuena bunukuatshisha.’​—Ebelu 13:17.

Epukayi ditobolola bantu badi Yehowa musungule

13. Nkabingila kayi katudi naku bua kueyemena aba badi batekibue bua kutulombola?

¹³ Bible udi utuambuluisha bua kuikala ne nkatshinkatshi mu dieyemena aba badi balombola munkatshi mua bantu ba Yehowa. Tudi mua kudiebeja ne: ‘Mozese kavuaku muenze bilema anyi? Bapostolo bavua misangu yonso baleja mmuenenu uvua nende Kristo, mmuenenu uvuaye musue bua buobu pabu bikale nende anyi?’ Mandamuna mmamanyike. Yehowa mmusungule bua kuenza mudimu ne balume bena didifila ne ba bulamatshi bua kulombola bantu bende, nansha mudibu bantu bapange bupuangane. Nenku lelu nansha mudiku bakulu bapange bupuangane, tudi anu ne bua kubangata bu bantu “[bateka kudi] spiritu munsantu [bua kuikala] batangidi, bua kulama tshisumbu tshia Nzambi.” Mbakanyine dikuatshisha ne kanemu ketu.​—Bienzedi 20:28, NW.

14. Mbualu kayi budi buakanyine ntema bua muvua Yehowa musungule Mozese bu mulombodi pamutu pa Arona anyi Miriyame?

¹⁴ Arona uvua mukulumpe kudi Mozese ku bidimu bisatu, kadi bubidi buabu bavua bashadile kudi yayabu Miriyame. (Ekesode 2:3, 4; 7:7) Ne bu muvua Arona mutambe kupepela ludimi kupita Mozese, bavua bamuteke bua kuambuluisha muanabu bu tshikuma-mbila. (Ekesode 6:29–7:2) Kadi bua kulombola bena Izalele, Yehowa kavua musungule Miriyame uvua mukulumpe ku bonso, anyi Arona uvua mutambe kupepela ludimi to. Muikale ne dimanya dia malu onso ne dia bivua bikengedibua tshikondo atshi, wakasungula Mozese. Pakapangilabu busunguluji ebu butoke bua tshikondo kampanda, Arona ne Miriyame bakadiabakena ne: “[“Yehowa,” NW] mmuyukile anu ne Mozese nkayende anyi? Kena muyukile netu kabidi anyi?” Miriyame, pamu’apa musonguedi wa kumpala, wakanyokibua bua diangata muntu musungula kudi Yehowa ne mmuenenu mubule kanemu, muntu uvuabu ne bua kuangata yeye ne Arona bu “muntu wa bupuekele, mupite ne bantu bonso ba pa buloba ku bupuekele.”​—Dibadika 12:1-3, 9-15, Mukanda wa Mvidi Mukulu.

15, 16. Mmunyi muvua Kaleba muleje ne: uvua mueyemene Yehowa?

¹⁵ Pavuabu batume batentekedi 12 bua kutentekela Buloba Bulaya, bantu 10 bakalua ne luapolo lubi. Bakakuatshisha bena Izalele buôwa mu diamba ne: bena Kanana bavua “bantu ba mibidi minene.” Bualu ebu buakafikisha bena Izalele ku ‘[“dinungena,” NW] Mose ne Arona.’ Kadi ki mbatentekedi bonso bavua bapange dieyemena kudi Mozese ne kudi Yehowa nansha. Tudi tubala ne: ‘Kaleba wakapolesha bantu ku mêsu kua Mose ne: Tuyayi katataka, tunyenge buloba abu, tudi bamanye mua kupita bena buloba abu bukole.’ (Nomba 13:2, 25–33; 14:2) Mmuenenu mushindame wa Kaleba uvua kabidi kudi mutentekedi nende Yoshua. Bubidi buabu bakaleja muvuabu beyemene Yehowa pakambabu ne: ‘Bikala Yehowa ne disanka bualu buetu, yeye nealue netu mu buloba ebu, neatupebu; buloba budi bûle tente ne mabele ne buitshi. Kanutshinyi bena buloba. Yehowa udi netu; kanubatshinyi.’ (Nomba 14:6-9) Dieyemena edi kudi Yehowa divua difutshibue. Ku bantu bakulumpe bavua ne muoyo mu tshipungu atshi, anu Kaleba, Yoshua ne bamue bena Lewi ke bavua bapete diakalenga dia kubuela mu Buloba Bulaya.

¹⁶ Kunyima kua ndambu wa bidimu Kaleba wakamba ne: ‘Kadi meme ngakalonda Yehowa, Nzambi wanyi. Katataka mona, Yehowa wakundama ne ntshidi ne muoyo, bu muakambaye too [ne] bidimu ebi makumi anayi ne bitanu, ku dituku diakambila Yehowa Mose dîyi adi, pakadi bena Izalele bendakana mu tshipela: lelu ndi ne bidimu makumi muanda-mukulu ne bitanu. Ntshidi ne bukole lelu, bu mungakadi nabu dituku diakantuma Mose; bu muakadi bukole buanyi dituku adi, mbu mutshidibu katataka.’ (Yoshua 14:6-11) Bambisha mmuenenu muimpe wa Kaleba, lulamatu luende, ne bukole buende bua ku mubidi. Pabi, Yehowa kavua musungule Kaleba bua ikale mupinganyi wa Mozese nansha. Diakalenga edi divua dipesha Yoshua. Tudi mua kuikala bashindike se: Yehowa uvua ne tubingila tuvuaye musunguile muntu eu, ne divua disungula ditambe buimpe.

17. Mmalu kayi adi asua kumueneka bu mavuije Petelo muntu kayi muakanyine diambula bujitu kampanda?

¹⁷ Mupostolo Petelo wakavila Mfumuende misangu isatu. Ne mabaja onso uvua kabidi mudienzele malu mu wende mushindu, kukosa ditshi dia mupika wa muakuidi munene. (Matayo 26:47-55, 69-75; Yone 18:10, 11) Bamue badi mua kuamba ne: Petelo uvua muena buôwa, kavua ne nkatshinkatshi, kavua muakanyine kupeta masanka a mudimu a pa buawu nansha. Kadi nnganyi uvuabu bapeshe nsapi ya Bukalenge, ne diakalenga dia kunzuluila bisumbu bisatu njila wa dibikila dia mu diulu? Uvua Petelo.​—Bienzedi 2:1-41; 8:14-17; 10:1-48.

18. Ntshilema kayi tshileja kudi Yuda tshitudi ne bua kuepuka?

¹⁸ Bilejilu ebi bidi bileja ne: tudi ne bua kuikala badimuke bua kuangata malu bilondeshile bitudi tumona ne mêsu. Bituikala beyemene Yehowa, katuakuela mpata bua bantu badiye musungule to. Nansha mudi tshisumbu tshiende tshia pa buloba tshienza ne bantu bapange bupuangane batu bepuka diamba mudibu kabayi kalema, udi utumika nabu mu mushindu wa bukole. Yuda muanabu ne Yezu wakadimuija bena nkristo ba mu siekele wa kumpala bua bantu bavua “bapetula bukokeshi ne bakula bibi bua bantu ba butumbi.” (Yuda 8-10, NW) Katubafuanyi nansha kakese.

19. Bua tshinyi katuena ne kabingila bua kutobolola bantu badi Yehowa musungule?

¹⁹ Bua imue midimu, bidi bimueneka ne: Yehowa udi usungula bantu badi ne ngikadilu ya pa buayi idi ikengedibua bua kulombola bantu bende mu mushindu udiye musue bua bende mu tshikondo atshi tshisunguluke. Tudi ne bua kudienzeja bua kuitaba bualu ebu, ki nkutobolola bantu badi Nzambi musungule nansha, kadi kuikala ne disanka ne kusadila ne budipuekeshi muaba udi Yehowa mututeke muntu ne muntu. Nenku tudi tuleja ne: tudi beyemene Yehowa.​—Efeso 4:11-16; Filipoi 2:3.

Tueyemenayi buakane bua Yehowa

20, 21. Ntshinyi tshitudi mua kulongela ku mushindu uvua Nzambi utumika ne Mozese?

²⁰ Bituikala imue misangu batangile ku ditamba kudieyemena ne tueyemena Yehowa kakese menemene, tupetelayi dilongesha kudi Mozese. Pavuaye ne bidimu 40, wakadiangatshila dipangadika dia kupikula bena Izalele ku bupika mu Ejipitu. Bushuwa madikolela ende avua ne tshipatshila tshimpe, kadi kaakafikisha diakamue ku dipikula Izalele, anyi ku dilengeja nsombelu wende yeye muine nansha. Bushuwa, uvua muenzejibue bua kunyema. Anu panyima pa mumane kupeta dishidimuka dikole munkatshi mua bidimu 40 mu buloba bua ku ba bende, ke pakashishaye kukumbaja malu-malomba bua kumusungulabu bua kuenza tshikavuaye musue kuenza kumpala. Musangu eu uvua ne dishindika dia se: Yehowa uvua umukuatshisha, bualu mpindieu malu avua enzeka mushindu uvua Yehowa musue mu tshikondo tshivua tshikumbanangane ne dîba diende dilongolola.​—Ekesode 2:11–3:10.

²¹ Yonso wa kutudi udi mua kudiebeja ne: ‘Ntu imue misangu ndianjidila Yehowa ne bakulu bateka mu tshisumbu kumpala, nkeba bua kuyisha malu lukasa lukasa anyi ngenza malu muanyi mundi mumone anyi? Pamutu pa kudiumvua bu muntu mulengulula bua amue masanka a mudimu, ntu bushuwa ngitaba ne lukasa dishidimuka dindi ngenda mpeta anyi?’ Tudi bapetele dilongesha dia mushinga kudi Mozese anyi?

22. Nansha muvuaye mujimije diakalenga dinene, mmunyi muvua Mozese wangata Yehowa?

²² Kabidi, tudi mua kupetela dilongesha dikuabu kudi Mozese. Nomba 20:7-13 udi utuambila bua tshilema tshiakenzaye tshiakamupangisha bualu bunene. Wakajimija diakalenga dia kulombola bena Izalele too ne mu Buloba Bulaya. Nenku wakandamuna ne: dipangadika dia Yehowa mu tshilumbu atshi kadivua diakane anyi? Wakaditola pa nkayende, mu ngakuilu wa mu tshimfuanyi, musunuke bualu Nzambi uvua mumuenzele malu mu mushindu mubi anyi? Mozese uvua mujimije dieyemena mu buakane bua Yehowa anyi? Tudi mua kupeta mandamuna mu mêyi avua Mozese nkayende muambile bena Izalele katupa kîpi kumpala kua lufu luende. Mozese wakamba bua Yehowa ne: “Mudimu wende udi mupuangane, bualu njila yende yonso idi buakane. Nzambi wa lulamatu, kudiye kakuena kansungasunga; yeye udi mujalame ne mululame.” (Dutelonome 32:4, NW) Bushuwa Mozese wakalama dieyemena diende kudi Yehowa too ne ku ndekelu. Bidi munyi buetu tuetu? Muntu pa nkayende tudiku tuela bidia bua kukolesha dieyemena dietu kudi Yehowa ne mu buakane buende anyi? Mmunyi mutudi mua kuenza nenku? Tuanjibi kumona.

Newandamune munyi?

◻ Ntubingila kayi tuvua natu bena Izalele bua kueyemena Yehowa?

◻ Pa bidi bitangila dieyemena, ntshinyi tshitudi mua kulongela kudi Abrahama?

◻ Bua tshinyi tudi ne bua kuepuka ditobolola bantu badi Yehowa musungule?

[Tshimfuanyi mu dibeji 13]

Kueyemena Yehowa kudi kukonga kunemeka aba badi balombola tshisumbu