Uvuaku mpanda-njila wa pa tshibidilu kumpala anyi?
1. Ba bungi bavua ne diakalenga kayi? Kadi bamue bavua benzejibue bua kuenza tshinyi?
1 Bantu ba bungi bavua ne diakalenga dia ‘kuyisha bantu ne kubambila lumu luimpe’ pavuabu bampanda-njila. (Bien. 5:42) Kadi bua amue malu, bamue ba kudibu bakalekela mudimu eu. Biwikala wa munkatshi muabu, kuenaku bua kuanji kutangila nsombelu webe mpindieu bua kumona ni kudi mushindu wa kulua kabidi mpanda-njila anyi?
2. Bantu bavua balekele bumpanda-njila badi ne bua kutangilula kabidi nsombelu yabu bua tshinyi?
2 Nsombelu itu ishintuluka: Imue misangu, malu avua menze bua wewe kulekela bumpanda-njila, kaatshienaku to. Tshilejilu, biwikala uvua mupangile mushindu wa kukumbaja mêba 90, kuenaku mua kulua kabidi mpanda-njila, bualu mpindieu bakadi balomba mêba 70 anyi? Mêba a mudimu webe wa bianza peshi majitu a dîku mmakepele mpindieu anyi? Tshilejilu, muanetu wa bakaji uvua mulekele bumpanda-njila bua masama, wakalua kubangishilula pakavuaye ne bidimu 89. Wakangatulula mudimu eu pakamonaye tshidimu tshijika kayi musame kabidi to.
3. Leja mudi bena dîku mua kumvuangana bua umue wa kudibu kuluaye mpanda-njila.
3 Pamuapa kuvua mpanda-njila to; kadi muntu wa mu dîku dienu uvua muimanyike bumpanda-njila bua kuambuluisha muena mu dîku mukuabu (tshilejilu muledi ukavua mukulakaje). (1 Tim. 5:4, 8) Pikalabi nanku, wewe anyi bena mu dîku bakuabu, kanuenaku mua kumuambuluisha anyi? Nuenu bena mu dîku, kanuenaku mua kuyikila bualu ebu anyi? (Nsu. 15:22) Padi bena dîku bumvuangana bua umue wabu alue mpanda-njila, mbienze anu bu ne: buonso buabu badi benza mudimu eu.
4. Udi mua kuenza tshinyi wewe kuyi ne mushindu wa kubangishilula bumpanda-njila?
4 Kuteketshi mu mikolo pikala malu akupangisha mpindieu bua kutuadijilula bumpanda-njila to. Dijinga diebe nkayadi dia kuwenza kabidi didi disankisha Yehowa. (2 Kol. 8:12) Paudi uyisha, wikale ukuata mudimu bimpe ne malu auvua mumanye pauvua mpanda-njila. Ikala uleja Yehowa dijinga diebe edi, eku wenda ukeba mushindu wa kulongolola malu. (1 Yone 5:14) Bumue, Nzambi ‘neakunzuluile tshiibi tshinene ne tshia kuenza mudimu mukole’ matuku adi kumpala bua wewe kulua kabidi mpanda-njila.—1 Kol. 16:9.