Bukole bua dîyi dilenga
“Mutshima muzengeja kudi tunyinganyinga, mmushindu kayipu udi dîyi dilenga mua kuwukankamija!”—Nsumuinu 12:25, nkudimuinu wa Knox.
BENA nkristo ki mbepeleja ku makenga nansha. Imue misangu badi bapetangana ne tunyinganyinga bualu badi ne muoyo mu “bikondo [ebi] bia kusuika mukaba ne bikole bua kupita nabi.”—2 Timote 3:1, NW.
Padibu bakenga bua bipupu bia mushindu’eu, ndibenesha kayipu dia kuteleja mêyi malenga a kudi mulunda wa pa muoyo! “Mulunda [mulelela, NW] utu wananga mu bikondo bionso, muan’etu utu walesha bulela mu tshikondo tshia dikenga,” ke mudi Bible wamba. (Nsumuinu 17:17) Muena lulamatu Yobo uvua mumanyike bua muvuaye mulunda wa mushindu’eu. Nansha Elifaze wakamba buende ne: “Pavua [muntu] kampanda mulenduke, mutekete ne muzengele, mêyi ebe avua amukankamija bua kuimanununa.”—Yobo 4:4, nkudimuinu wa Today’s English Version.
Kadi, pavua Yobo yeye nkayende ukengela dikankamijibua, Elifaze ne balunda bende kabakapatula mêyi malenga to. Bakadiula Yobo bua dikenga diende, bakakomesha ne: uvua ne bua kuikala muenze mibi misokoka. (Yobo 4:8) Mukanda wa The Interpreter’s Bible udi umvuija ne: “Tshivua Yobo ukengela nduse lua mutshima wa muntu kampanda. Tshivuaye mupete kudi bakuabo bantu mmulongolongo wa miaku miamba miambulula, ikena mipiamipia, ‘milelela’ ne milengele menemene ya malu a Nzambi ne ya nsombelu wa tshitembu.” Yobo wakapampakana bikole pa kuteleja mêyi a Elifaze ne balunda bende e kumusakabi too ne ku diasa muadi ne: “Musangu bule munyi nenunyingalashe mutshima wanyi, nenuntshibule bituha bituha ne mei enu?”—Yobo 19:2.
Nansha musangu umue katuashishi musadidi wa Nzambi netu muadi bualu bua mêyi etu akena a meji, akena malenga. (Fuanyikija ne Dutelonome 24:15.) Lusumuinu kampanda lua mu Bible ludi ludimuija ne: “Biudi wamba bidi mua kulama muoyo anyi kuwubutula; nunku udi ne bua kuitaba bipeta bidi bifumina ku mêyi ebe.”—Nsumuinu 18:21, nkudimuinu wa TEV.
Bu mutuajinguludi bukole bua mêyi, tulondayi tshilejilu tshia mupostolo Paulo. Pavuaye ku Macédoine, uvua ‘ukolesha mitshima ya bavua kuinaku ne mei a bungi.’—Bienzedi 20:2.