Mandamuna a nkonko yenu

▪ Baledi bonso babidi badi mua kufila luapolo lua mêba a dilonga dia mu dîku anyi?

Nansha mudi batatu bikale ba kumpala badi ne bujitu bua kulongesha bana ne ‘didimuija bia Mukalenge,’ baledi bonso babidi badi ne bua kudifila bua kulongesha bana babu. (Ef. 6:4) Bible udi ubela bana wamba ne: ‘Muananyi, umvue diyisha dia tatu webe, kupidi diyisha dia mamu webe.’ (Nsu. 1:8) Dilonga dia Bible mu dîku ngumue mushindu mulenga wa kulongesha bana udi baledi nawu.

Ku kale, anu muledi uvua ulombola dilonga dia mu dîku muvua bana kabayi batambule ke uvua mua kubala mêba au, nansha pavua baledi bonso babidi babuela mu dilonga adi. Kadi bualu ebu buashintuluku. Bikala baledi bonso babidi tshikondo tshia dilonga dia mu dîku balongesha bana babu, bonso babidi badi mua kubala anu dîba dimue ku lumingu luonso. Bushuwa, baledi batu benza mêba a bungi ku lumingu bua kulongesha bana babu, ne bua kubalongesha nanku bidi bikengela baledi bonso babidi badifile bikole. (Dut. 6:6-9) Kadi, bungi bua mêba budibu bafila budi ne bua kuikala nangananga bua mêba menza mu buambi. Nanku, kanuena mua kubala mêba bungi bupite pa dimue ku lumingu to, nansha bikala dilonga dienze mêba a bungi, anyi dienzeke misangu ya bungi mu lumingu lumue, anyi dienza ne muana ne muana pa nkayende. Kadi bua kufunda dilonga dia mu dîku mu luapolo, anu muledi umue ke udi ne bua kubala dilonga dimuepele dia Bible mu dîku ne dikumbula dipiadipia dimue ku lumingu luonso ludibu balonga.