Bana benu bakadi badiakaje anyi?
1. Bana badi balonga badi ne bua kudiakaja bua tshinyi?
1 Tulasa tukadi kabidi pa kubuela. Bana benu bakadi pa kupetangana ne ntatu mipiamipia. Nebapete kabidi mpunga wa “kuamba malu malelela.” (Yone 18:37) Bakadi badilongolole anyi?
2. Bana benu badi ne bua kuenza tshinyi bua kudilongolola?
2 Bana benu mbamanye bimpe malu a buena ditunga ne a bampangano onso anyi? Mbamanye bua tshinyi mmabi anyi? Mbamanye tshia kuenza pikalabu babasaka bua kulonga tulasa tua bungi, bua kulejangana mananga, ne bua kunua maluvu anyi bintu bu mudi makanya ne diamba anyi? Nebambe amu ne: tuetu Bantemu katutu tuenza bualu ebu anyi peshi nebumvuije bimpe tshidi Bible wamba?—1 Pet. 3:15.
3. Leja mudi baledi mua kuambuluisha bana babu mu Ntendelelu wa mu Dîku.
3 Mu Ntendelelu wa mu Dîku: Nenuikale imue misangu amu nuyikila ne bana dîba dionso didibu bapeta ntatu mu tulasa. Kadi kuyikila malu atu enzeka mu tulasa kumpala kua tuotu kubuela nekupeshe bana muoyo mukole. Kanuenaku mua kuakula malu aa musangu umue anyi ya bungi mu Ntendelelu wenu wa mu Dîku anyi? Bua kumanya malu a kuyikila, nuebeje bana malu atu atamba kubenza buôwa bua kuya mu kalasa ku mbangilu kua tshidimu. Bu mukadi bana benu bantu bakole mpindieu, nudi mua kuakula kabidi bua malu anuvua bayikile nabu mu bidimu bishale mu mushindu mukuabu mpindieu. (Mus. 119:95) Nudi mua kuenza manaya: Nuenu nudienza balongeshi anyi bafidi ba mibelu anyi balongi babu. Nulongeshe bana benu mua kuandamuna ne Bible ne kupetela mandanuma mu mukanda bu mudi wa Comment raisonner ne wa Les jeunes s’interrogent. Muanetu wa bakaji kampanda uvua wenza manaya ne bana bende bua mudibu mua kuleja balongeshi babu bapiabapia ne: m’Bantemu ba Yehowa.—Tangila Tshibumba tshia Nsentedi tshia dia 15/12/2010, dibeji 3-5.
4. Tshidi baledi badimuke mua kuenza ntshinyi?
4 Ntatu idi bansonga bena Kristo ne bua kupetangana nayi mu matuku a ku nshikidilu aa idi yenda anu ‘ikola.’ (2 Tim. 3:1) Baledi badimuke batu bakeba mushindu wa kudianjila kudimuija bana. (Nsu. 22:3) Baledi wetu, kumpala kua tulasa kubuela, enzeyaku muenu muonso bua kuleja bana benu tshia kuenza padibu bapeta ntatu.