Yehowa udi utulongesha bua mudimu eu
1. Padi Yehowa upesha bantu mudimu, utu wenza kabidi tshinyi?
1 Padi Yehowa upesha bantu mudimu, utu kabidi ubambuluisha bua kuwenza. Tshilejilu, pavua Yehowa muambile Noa bua kuenza buatu, wakamuleja mushindu wa kubuenza; bualu Noa kavua mumanye mua kubuenza to. (Gen. 6:14-16) Pavua Yehowa mutume Mose (mulami wa mikoko) bua kuyikila ne bakulu ba bena Isalele ne Palô kabidi, wakamuambila ne: ‘Meme nengikale ne mukana muebe, meme nenkuyishe mêyi andi musue wewe kuamba.’ (Ekes. 4:12) Bia muomumue, Yehowa kena mutulekele nkayetu bua kuyisha lumu luimpe to. Ku diambuluisha dia Kalasa ka Mudimu wa Nzambi ne Tshisangilu tshia Mudimu, udi utulongesha mua kuyisha. Kadi tudi mua kuenza tshinyi bua bisangilu ebi kutuambuluishabi?
2. Leja mushindu udi Kalasa ka Mudimu wa Nzambi mua kutuambuluisha.
2 Kalasa ka Mudimu wa Nzambi: Ikala ubala ne ulonga malu adi mu programe lumingu luonso kumpala kua dîba. Paudi ulua kumona balongi benza malu au mu miyuki, newikale ulonga mua kulongesha. (Nsu. 27:17) Wikale ulua ne mukanda webe wa Kalasa ka mudimu. Uwangate bu mukanda wa kulonga nawu. Padi mutangidi wa kalasa wenza mudimu ne mukanda eu bua kupesha mulongi yonso mibelu, wele tushonyi ku malu manene audi musue kutumikila, ufunde amue malu ku mielelu ya mabeji. Kadi tshidi mua kukuambuluisha bikole, nkuenza mudimu mu kalasa aka. Ukadi mudifundishe anyi? Padibu bakupesha mudimu, uwulongolole bimpe, utumikile mibelu idibu bakupesha. Paudi mpindieu mu buambi, utumikile mibelu ayi.
3. Leja mushindu udi Tshisangilu tshia Mudimu mua kutuambuluisha.
3 Tshisangilu tshia Mudimu: Bua tuetu kuvuluka bimpe malu a mu tshisangilu etshi, tudi ne bua kubala malu kumpala kua dîba ne kudiakaja bua kuandamuna. Tuetu tufila mandamuna mîpi, bantu ba bungi nebapete mushindu wa kuandamuna pabu. Tutangile bimpe padibu benza manaya a tshilejilu, tuenze mudimu ne ngenyi itudi tumona ne: idi mua kutuambuluisha mu buambi bikole. Tuikale tulama biena-bualu binene bia mu Mudimu wetu wa Bukalenge bidi mua kutuambuluisha bua kuyisha.
4. Bua tshinyi bidi bikengela kukuata mudimu bimpe ne malu adibu batulongesha mu bisangilu?
4 Mudimu wetu wa kuyisha lumu luimpe pa buloba bujima ki mmutekete to, mmufuane mudimu uvuabu bapeshe Noa anyi Mose. (Mat. 24:14) Tuetu tueyemena Yehowa Mulongeshi wetu Munene, tulonda kabidi malu adibu batulongesha, netuyishe bimpe.—Yesh. 30:20.