NSHAPITA WA 14

Tuikalayi tuamba bulelela mu malu onso

“Tudi basue kuenda bimpe mu malu onso.”—EBELU 13:18.

1, 2. Bua tshinyi Yehowa udi usanka padiye utumona tudienzeja bua kuamba bulelela? Fila tshilejilu.

MAMU mukuabu ne muanende badi bapatuka mu tshisalu. Diakamue muana udi wimana, umueneka mulubakane. Mmukuate kantu ka kunaya naku kavuaye muambule pa tshitanda kampanda ku bianza. Uvua mukambule bua kuleja mamuende bua amusumbile, kadi kupuaye muoyo bua kukapingaja. Udi umvua buôwa ne utuadija kudila. Mamuende udi umupuwisha ne upingana nende muaba uvuaye mukambule bua akapingaje ne alombe luse. Mamu udi umvua disanka padiye umona muanende upingaja kantu aku ne ulomba luse. Bua tshinyi?

² Kakutu bualu butu busankisha baledi bu padibu bamona bana babu badienzeja bua kuamba anu bulelela. Ke mutu Tatu wetu wa mu diulu umvua pende disanka, bualu udi “Nzambi udi ulamata ku bushuwa.” (Musambu 31:5) Udi usanka bikole padiye utumona tuenda tukolesha malanda etu nende ne tudienzeja bua kuamba anu bulelela. Bu mutudi basue kumusankisha ne kushala mu dinanga diende, tudi tuamba anu bu mupostolo Paulo ne: “Tudi basue kuenda bimpe mu malu onso.” (Ebelu 13:18) Kadi kabitu anu bitekete bua kuamba bulelela mu nsombelu yonso to. Nunku tuakulayi bua nsombelu minene inayi, pashishe netuakule bua amue masanka atudi tupeta patudi tuamba bulelela.

KATUIKADI TUDISHIMA TO!

3-5. (a) Bible udi utuambila ne: tuetu badishime tudi mua kupeta ntatu kayi? (b) Ntshinyi tshidi mua kutuambuluisha bua katudishimi?

³ Lutatu lunene lututu nalu ndua kumanya mua kubenga kudishima. Bu mutudi bena mapanga, bitu bitekete bua tuetu kudishima. Tshilejilu, Yezu wakambila bena Kristo ba ku Laodikiya muvuabu badishima pavuabu bela meji ne: mbabanji pabu bikale mu nsombelu mubi bualu bavua ‘bapele ne bafofo ne butaka’ ku mêsu kua Nzambi. (Buakabuluibua 3:17) Didishima diabu adi divua mua kubakebela ntatu ya bungi.

⁴ Tuvuluke kabidi mudi muyidi Yakobo utudimuija wamba ne: ‘Biela muntu meji ne: Ndi ndonda malu a Nzambi, padiye kayi ukanda ludimi luende, udi udinga mutshima wende, bualu bua Nzambi bua muntu eu budi tshianana.’ (Yakobo 1:26) Tuetu tuela meji ne: Nzambi neatungunuke ne kuitaba ntendelelu wetu nansha tuetu tupatula mêyi mabi mukana muetu, tudi tudishima. Ntendelelu wetu nealue patupu ku mêsu kua Yehowa, tudi tujimija dîba dietu tshianana. Kadi tshia kuenza ntshinyi bua bualu ebu kabutufikidi?

⁵ Mu mvese idi kumpala kua utudi batele eu, Yakobo udi ufuanyikija Dîyi dia Nzambi ne lumuenu. Udi utubela bua kukonkonona mikenji ya Nzambi ne kushintulula malu adi akengela kushintulula. (Yakobo 1:23-25) Bible udi utuambuluisha bua kubenga kudishima ne kujingulula tshitudi mua kuenza bua kulengeja nsombelu wetu. (Muadi 3:40; Hagai 1:5) Tudi kabidi mua kulomba Yehowa bua atukonkonone, atuambuluishe bua kumanya bilema bietu ne bua kubijikija. (Musambu 139:23, 24) Kushima mbutekete butu bukuata muntu ku kakese ku kakese, kayi mumanye to. Tudi ne bua kukumona anu bu mudi Tatu wetu wa mu diulu ukumona. Nsumuinu 3:32 udi wamba ne: ‘Yehowa udi ukina muntu udi ne tshishiku [anyi muena mashimi], kadi bunyana buende budi kudi badi ne mitshima miakane.’ Yehowa udi mua kutuambuluisha bua tuetu kumona malu mudiye uamona ne kudimona bu mudiye utumona. Tuvuluke ne: Paulo uvua muambe ne: “Tudi basue kuenda bimpe mu malu onso.” Eyowa, katuena mua kulua bapuangane mpindieu to, kadi tudi basue kudienzeja ne muoyo mujima bua kuamba anu bulelela.

KUAMBA BULELELA MU DÎKU

6. Bua tshinyi mulume ne mukajende badi ne bua kuambilangana anu bulelela? Padibu benza nunku badi bepuka tshinyi?

⁶ Bena Kristo badi ne bua kuambilangana anu bulelela mu dîku diabu. Mulume ne mukajende badi ne bua kuambilangana malu patoke, kabayi bashimangana to. Mu dîku dia bena Kristo kamuena ne bua kuikala bibidilu bibi bu mudi, kunangangana ne muntu udi kayi bayebe anyi mukajebe mu musokoko anyi kutangila malu a bantu butaka to. Bamue bena Kristo bakadi mu dibaka batu benza malu aa mu musokoko. Kuenza nunku ki nkuimpe to. Mukalenge Davidi wakamba ne: ‘Tshiena mushikame ne bantu badi balonda malu a mashimi, tshiena mbuelakana ne badi basokoka malu mabi abu mu lubombo.’ (Musambu 26:4) Biwikala ukadi mu dibaka, kuitabi bua kuenza bualu budi mua kukufikisha ku disokoka muena dibaka nebe tshiudi to.

7, 8. Fila bilejilu bia mu Bible bidi mua kuambuluisha bana bua kumona buimpe bua kuamba anu bulelela.

⁷ Mbimpe baledi bapeshe bana babu bilejilu bia mu Bible padibu babalongesha bua kuamba bulelela. Badi mua kubatelela bilejilu bibi bu mudi tshia Akana wakiba bintu kadi kusokoka bubi buende; tshia Gehazi wakashima bua kupeta makuta ne tshia Yudasa wakiba ne kushiminyina Yezu malu bua bamuenzele bibi.—Yoshua 6:17-19; 7:11-25; 2 Bakelenge 5:14-16, 20-27; Matayo 26:14, 15; Yone 12:6.

⁸ Badi mua kubatelela kabidi bilejilu bimpe bu mudi tshia Yakoba wakambila bana bende bua kuyabu kupingaja makuta avuabu basangane mu bibombi biabu bualu uvua wela meji ne: bavua mua kuikala batupakane ne baelamu; tshia Yafeta ne muanende wa bakaji wakakumbaja mutshipu wa tatuende nansha muvua bualu ebu bubakengeshe bonso babidi; ne tshia Yezu wakadileja patoke ne dikima kudi baluishi bende bua kukumbaja tshikavuabu balaye ne kulama balunda bende. (Genese 43:12; Balumbuluishi 11:30-40; Yone 18:3-11) Bilejilu bikese ebi bidi mua kuambuluisha baledi bua kumanya malu mimpe adi mu Dîyi dia Nzambi adi mua kubambuluisha bua kulongesha bana babu bua kunanga kuamba bulelela.

9. Ntshinyi tshidi baledi kabayi ne bua kuenza bikalabu basue bua bana babu kabikadi bena mashimi? Bua tshinyi tshilejilu tshiabu tshidi ne mushinga?

⁹ Dilongesha bana malu aa didi diela baledi dibanza dinene. Mupostolo Paulo wakakonka ne: ‘Wewe udi uyisha mukuabu, kuena udiyisha anyi? Wewe udi wamba ne: Kanuibi, udi wiba anyi?’ (Lomo 2:21) Baledi bakuabu batu bapangisha bana babu tshia kuenza padibu babalongesha mua kuamba bulelela kadi bobu kabayi babuamba to. Badi mua kudibingisha bua tubintu tukese tudibu biba ku mudimu bamba ne: “Bamfumu ba mudimu mbamanye ne: tutu tutuangata,” anyi badi mua kushima kadi bamba ne: “Kushima kakese ki nkubi to.” Pabi, kuiba kudi anu kuiba, nansha tshintu tshitudi bibe tshinene anyi tshikese. Kushima paku kudi anu kushima nansha bualu butudi bashime bobu bunene anyi bukese.a (Luka 16:10) Bitu bitekete bua bana kumonabu lubombo lua baledi babu, ne ludi mua kubanyanga. (Efeso 6:4) Kadi padi bana balongela kuamba bulelela ku tshilejilu tshia baledi babu, badi balua bantu badi bamba anu bulelela ne nebatumbishe Yehowa lelu eu, udi bantu kabayi basue kuamba bulelela.—Nsumuinu 22:6.

KUAMBA BULELELA MU TSHISUMBU

10. Bua tuetu kuikala bantu badi bamba bulelela, ntshinyi tshitudi ne bua kudimukila patudi tusombeshangana ne bena Kristo netu?

¹⁰ Kusomba ne bena Kristo netu kudi kutupetesha mpunga ya bungi ya kuamba bulelela. Anu bu mutuvua balonge mu nshapita wa 12, tudi ne bua kukanda ludimi luetu nangananga patudi munkatshi mua bena Kristo netu. Bitu bitekete bua kujana bantu anyi kubashiminyina malu patudi tuyukila miyuki yetu ya tshianana eyi. Tuetu bambile bantu bualu butudi bumvue kadi katuyi babujadike, tudi mua kuikala tuenda tumuangalaja mashimi, nunku mbimpe ‘tukande mishiku’ yetu. (Nsumuinu 10:19) Pashishe, nansha tuetu bajadike ne: bualu budibu batuambile mbulelela, kabiena biumvuija ne: tudi ne bua kubuambila bantu bakuabu to. Tshilejilu, bualu abu ki mbututangile to, anyi ki mbuimpe bua kubuambila bakuabu to. (1 Tesalonike 4:11) Bantu bakuabu batu bamba mêyi mabi patoke bamba mudibu bambe bulelela, kadi mêyi etu adi ne bua kuikala mimpe misangu yonso.—Kolosai 4:6.

11, 12. (a) Mmushindu kayi udi bantu bakuabu badi benza bubi bunene banyangakaja tshilumbu? (b) Leja imue mishindu itu Satana udinga bantu badi benza bubi bunene? Mmushindu kayi utudi mua kukandamena malu aa? (c) Mmunyi mutudi mua kubenga kushima bulongolodi bua Yehowa?

¹¹ Tudi nangananga ne bua kuambila bana betu badi balombola tshisumbu bulelela. Bana betu bakuabu batu banyangakaja tshilumbu padibu benza bubi, babusokoka bakulu padibu babebejabu. Bantu ba mushindu eu badi mua kulua bena mpala ibidi, badingidija mudibu benzela Yehowa mudimu eku benza malu mabi. Ndekelu wa bionso, malu onso adibu benza adi alua a dishima. (Musambu 12:2) Bakuabu bena Kristo batu bambila bakulu ndambu wa malu mabi adibu benze, basokoka adi ne mushinga. (Bienzedi 5:1-11) Bantu batu batamba kuenza nunku bualu badi bitaba mashimi a Satana.—Bala malu adi mu kazubu kadi kamba ne: “Mudi Satana ushima bantu badi benza bubi bunene.”

¹² Katuena ne bua kushima bulongolodi bua Yehowa patudi tufunda malu kampanda to. Tshilejilu, patudi tufila luapolo luetu lua mudimu wa buambi, tudi ne bua kufunda anu malu malelela. Bia muomumue, patudi tuuja formilere bua kuenza mudimu kampanda, katuena ne bua kuamba ne: tudi ne makanda a mubidi mimpe petu bikale ne disama kampanda anyi kushima mu bualu bukuabu budi bututangila to.—Nsumuinu 6:16-19.

13. Mmunyi mutudi mua kuambilangana bulelela ne bena Kristo netu patudi tuenza nabu mudimu?

¹³ Tudi kabidi ne bua kuamba bulelela patudi tuenza mudimu wa bianza ne bena Kristo netu. Imue misangu bena Kristo batu bumvuangana bua kuenza imue midimu pamue. Kabena ne bua kubuejakaja midimu yabu eyi ne malu a ntendelelu wabu padibu ku Nzubu wa Bukalenge anyi padibu mu buambi to. Muntu udi mua kuikala muangate muena Kristo nende ku mudimu. Tuetu bangate bena Kristo netu ku mudimu, katuena ne bua kubadingakaja to, kadi tudi ne bua kubafuta difutu diabu dionso pa dîba ne kubapesha bintu bionso bidibu ne bua kupeta bilondeshile mikenji ya mudimu. (1 Timote 5:18; Yakobo 5:1-4) Bia muomumue, padibu batuangate ku mudimu kudi muena Kristo netu, tudi ne bua kuenza mudimu anu mudibi bikengela. (2 Tesalonike 3:10) Katuena mua kutekemena bua atuengeleke bualu tuetu tudi bena Kristo nende, anyi atuenzele malu bu mudi kutupesha matuku a dikisha, bintu kampanda kupita bena mudimu bakuabu to.—Efeso 6:5-8.

14. Ntshinyi tshidi bena Kristo badi basue kuenda mushinga pamue ne bua kuenza? Bua tshinyi?

¹⁴ Kadi netuambe tshinyi binuikala nukeba kuenza bualu budi mua kunujimijila makuta anyi kunupetesha makasa a bungi peshi kusombeshangana makuta? Bible udi utuambila ne: mbimpe kufunda malu onso. Tshilejilu, pavua Yelemiya musumbe budimi, bakenza mikanda ibidi, wende ne wa uvua mumusumbishabu, kutuabu biala kudi bantemu ba bualu bua kuepuka bilumbu bivua mua kujuka. (Yelemiya 32:9-12; tangila kabidi Genese 23:16-20.) Padi muena Kristo wambila muanabu udibu benda nende mushinga bua kufundabu malu onso pa mikanda ne kutua biala kumpala kua bantemu ba bualu kabiena biumvuija ne: kena umueyemena to. Kadi bualu ebu budi buambuluisha bua kuepuka bilumbu, dinyingalajangana anyi malu adi mua kubafikisha ku ditapuluka. Muena Kristo udi wenda mushinga ne muanabu udi ne bua kumanya ne: nansha bobu bapete bualu bua mushindu kayi mu mishinga yabu, bualu abu kabuena ne bua kunyanga buobumue ne ditalala mu tshisumbu to.b—1 Kolinto 6:1-8.

KUAMBA BULELELA MU MALU ONSO

15. Mmunyi mudi Yehowa umona kushimangana mu malu a mishinga? Ntshinyi tshidi bena Kristo benza nansha mudi bantu bashimangana bikole mu mishinga?

¹⁵ Muena Kristo kena ne bua kuamba bulelela anu mu tshisumbu to. Paulo wakamba ne: “Tudi basue kuenda bimpe mu malu onso.” (Ebelu 13:18) Yehowa mmusue bua tuikale tuamba bulelela mu midimu yetu ya bianza. Tshilejilu, anu mu mukanda wa Nsumuinu nkayawu badi bakulamu bua tshipiminu tshibi misangu inayi mijima. (Nsumuinu 11:1; 16:11; 20:10, 23) Ku kale, bantu bavua ne tshibidilu tshia kupima bintu, kupima kabidi makuta pavuabu basumbishangana bintu. Bangenda bena mashimi bavua bangata bipiminu bibidi bua kushima bantu anyi bua kubiba.c Yehowa mmukine malu a mushindu eu. Bua kushala mu dinanga diende, katuena ne bua kushima nansha kakese mu malu etu a mishinga to.

16, 17. Leja mutu bantu bashima lelu eu. Bena Kristo batu benza tshinyi padibu batuilangana ne malu adi abasaka bua kushima?

¹⁶ Bu mudi Satana ke udi ukokesha buloba, kabiena bitukemesha bua mudi mashimi matangalake pa buloba bujima to. Dituku dionso edi, tutu tutuilangana ne malu adi atusaka anu bua kushima. Patu bantu bafunda mikanda bua kubangatabu ku mudimu, batu bashima mudibu balonge tulasa tua bungi anyi mudibu bamanye kuenza malu mapite bungi. Batu bashima kabidi patubu buuja mikanda ya kubuela nayi mu ditunga dikuabu, bua kufuta bitadi anyi mikanda mikuabu ya mbulamatadi anu bua kupetabu tshidibu bakeba. Balongi batu biba mandamuna patubu benza mateta mu tulasa, anyi batu baya kutentula malu kampanda ku Internet ne balua kushima ne: bobu ke badi baafunde. Patu bantu bapetangana ne bamfumu badi basue nkosa mishiku, batu babakosa mishiku bua kupeta bidibu bakeba. Bidi bienzeka nanku bualu tudi mu tshikondo tshidi bantu ba bungi ‘badisui, banangi ba biuma, kabayi basue malu mimpe.’—2 Timote. 3:1-5.

¹⁷ Bena Kristo balelela kabena mua kuenza malu a mushindu eu to. Bitu bitukolela bua kuamba anu bulelela bualu tutu tumona bantu badi bashima banema ne baya kumpala mu midimu yabu. (Musambu 73:1-8) Pashishe, bena Kristo badi mua kupeta ntatu ya mfranga anu bualu mbasue kuamba bulelela “mu malu onso.” Mbimpe kuamba anu bulelela mu malu onso anyi? Eyowa. Bua tshinyi? Mmalu mimpe kayi atudi tupeta patudi tuamba anu bulelela?

MASANKA ATUDI TUPETA PATUDI TUAMBA BULELELA

18. Bua tshinyi kuikala ne lumu lua bantu batu bamba anu bulelela kudi ne mushinga?

¹⁸ Kakuena tshintu tshidi ne mushinga kupita lumu luimpe to, bualu bantu nebakueyemene paudi wamba anu bulelela. (Bala malu adi mu kazubu kadi kamba ne: “Ntuku ngamba bulelela mu malu onso anyi?”) Tumanye ne: muntu yonso udi mua kupeta lumu lua mushindu eu. Bua kulupeta kabiena bikengela kuikala ne dimanya dia bungi, bubanji, kuikala muimpe kumona, kuikala wa mu dîku kampanda anyi malu makuabu to. Nansha nanku, bantu ba bungi kabena bakokesha bua kuikala ne lumu luimpe to. Ndukepe bikole mu bantu. (Mika 7:2) Bamue bantu badi mua kukuseka bualu utu wamba anu bulelela, kadi bakuabu nebakuanyishe, nebakueyemene ne nebakunemeke. Bantemu ba Yehowa ba bungi bakatu bapete bintu bia bungi anu bualu batu bamba bulelela. Tshilejilu, bavua babalame ku midimu pavuabu bipate bena mudimu nabu bua mashimi anyi babangate ku midimu itubu bakeba anu bantu batu bamba bulelela.

19. Ntshinyi tshidi kuamba bulelela kuenzela kondo ketu ka muoyo ne malanda etu ne Yehowa?

¹⁹ Nansha malu aa wowu makuenzekele anyi kaayi manji kukuenzekela, umanye ne: kuamba bulelela kutu kupetesha masanka a bungi. Newikale ne kondo ka muoyo kimpe. Paulo wakafunda ne: ‘Tudi tuitabujibua ne: tudi ne mioyo-mikese mimpe.’ (Ebelu 13:18) Tatu wetu wa mu diulu utu munange bantu batu bamba bulelela ne udi umona bienzedi biebe. (Musambu 15:1, 2; Nsumuinu 22:1) Bushuwa, kuamba bulelela kudi kutuambuluisha bua kushala mu dinanga dia Nzambi ne kakuena difutu didi dipite edi to. Mpindieu tuakulayi bua tshiena-bualu tshikuabu tshidi tshipetangana ne etshi, tuambe ne: mushindu utu Yehowa umona kuenza mudimu.

[Mêyi adi kuinshi]

[Kazubu mu dibeji 164, 165]

MUDI SATANA USHIMA BANTU BADI BENZA BUBI BUNENE

Satana utu udinga bantu badi benza bubi bunene bikole, ne mmusue bua witabe pebe mashimi ende. Diakalenga, bena Kristo mbamanye “mateyi” a Diabolo. (Efeso 6:11) Tumonayi mishindu isatu ituye udinga bantu.

“Udi mua kusokoka bubi buebe.” Mu bulelela, Yehowa utu umona bionso bitudi tuenza. ‘Bintu bionso bidi butaka ne bibulula ku mêsu kua utudi nende ne bualu.’ (Ebelu 4:13) Bu mudi Yehowa mumanye malu onso ne mutualua kumubadila malu etu, tudi tudienzela bibi patudi tusokoka bakulu mibi minene itudi benze.—Tangila kabidi 2 Samuele 12:12.

“Bakulu ki mbantu ba kueyemena to, nunku kubambidi bualu to.” Mukalenge mubi Ahaba wakabikila Eliya ne: “Wewe, muena lukuna wanyi.” (1 Bakelenge 21:20) Bu muvua Eliya muikale muprofete wa Yehowa mu Isalele, uvua mua kuambuluisha Ahaba bua Yehowa kumufuilaye luse. Yezu mmuteke bakulu bua kuikalabu bu ‘mapa’ mikale bantu mu tshisumbu tshia bena Kristo. (Efeso 4:8) Nansha mudi bakulu bena mapanga, badi balala ‘tshitabela bua mioyo yetu,’ tuambe ne: badi baditatshisha bikole bua tuetu kuikala mu malanda mimpe ne Yehowa. (Ebelu 13:17) Ki mbaluishi betu to, kadi Yehowa mmubateke bua batuambuluishe.

“Udi wenza bimpe paudi wambuluisha mulunda webe bua kusokoka bubi buende.” Pabi, paudi wambuluisha mulunda webe bua kusokoka bubi buende, udi umuenzela bibi bitambe. Mibi minene idi inyanga malanda a muntu ne Yehowa, nunku kuyisokoka kudi anu bu kubenga kuambila munganga tshitudi tusama. (Yakobo 5:14, 15) Muntu udi muenze bubi udi mua kuikala utshina bua kabamunyoki to, pabi dinyoka didi dileja mudi Yehowa mutunange ne didi mene mua kusungila muoyo wa muntu udi muenze bubi. (Nsumuinu 3:12; 4:13) Pashishe, muntu udi utungunuka ne kuenza mibi udi mua kukebela bena mu tshisumbu diakabi. Kuitabi bua ngenyi yende mibi ivua mimufikishe ku dienza bubi yambulukile bantu bakuabu mu tshisumbu to. (Lewitiki 5:1; 1 Timote 5:22) Nunku, enza muebe muonso bua muntu udi muenze bubi aye kubuambila bakulu.

[Kazubu mu dibeji 167]

NTUKU NGAMBA BULELELA MU MALU ONSO ANYI?

Dîyi dia kulonda: ‘Yehowa, mmuntu kayi washikama mu nzubu webe wa ntenta? Nyeye udi wenda mu buakane, udi wenza malu makane, udi wamba mêyi malelela mu mutshima wende.’—Musambu 15:1, 2.

Imue nkonko iudi ne bua kudiela

▪ Bua tshinyi ndi ne bua kuamba bulelela misangu yonso?—Nsumuinu 6:16, 17.

▪ Mmushindu kayi undi mua ‘kulekela mashimi’ pandi ngenza mateta mu kalasa, pandi nguuja mikanda ya malu a bitadi anyi mikanda mikuabu ya mbulamatadi?—Efeso 4:25; Yeshaya 28:15; Matayo 22:17-21; Lomo 13:1-7.

▪ Mmushindu kayi udi ngakuilu wanyi ne bienzedi bianyi mua kuleja ne: ndi muena mudimu utu wamba anu bulelela?—Nsumuinu 11:1; Efeso 4:28; Kolosai 3:9, 10.

▪ Mmushindu kayi udi dinanga dia makuta mua kumpangisha mua kuamba anu bulelela?—Musambu 37:21; 1 Timote 6:9, 10.

[Tshimfuanyi mu dibeji 162]

Kuamba bulelela kudi kutuambuluisha bua kubenga kuenza bualu bubi butudi mua kusokoka