Ulame kondo kebe ka muoyo
1. Mpuilu wetu wa pa buende wa tshidimu tshia mudimu tshia 2013, udi ne tshiena-bualu kayi? Mbamulongolole bua tshinyi?
1 Dituku dionso, kudi malu adi atufikila adi mua kunyanga kondo ketu ka muoyo. Ke bua tshinyi mpuilu wetu wa pa buende wa dituku dimue wa tshidimu tshia mudimu tshia 2013 (tshidi tshituadija mu dia 1/9/2012) udi ne tshiena-bualu tshia ne: “Ulame kondo kebe ka muoyo.” (1 Tim. 1:19) Mbalongolole mpuilu eu bua kuambuluisha yonso wa kutudi bua atabalele bikole mushindu udiye wenza mudimu ne dipa dia pa buadi edi didi Mufuki wetu mutupeshe.
2. Mu mpuilu eu nebandamune nkonko kayi?
2 Utabalele malu aa: Mpuilu eu neandamune nkonko minene 7 idi itangila kondo ka muoyo eyi:
• Tshidi mua kuteka kondo ketu ka muoyo mu njiwu ntshinyi?
• Tudi mua kulongesha kondo ketu ka muoyo mushindu kayi?
• Mmushindu kayi utudi mua kuikala katuyi ne dibanza dia mashi a muntu nansha umue?
• Mmunyi mudi meji ne bienzedi bietu bidi bimanyine pa mêyi manene a mu Bible bileja tshitudi?
• Mmunyi mutudi mua kubenga kunyingalaja tuondo tua muoyo tua bakuabu mu malu adi abatangila?
• Nuenu bansonga, mmushindu kayi unudi mua kushala balamate Nzambi padibu banusaka bua kushipa mikenji yende?
• Mmasanka kayi apeta aba badi balama kondo ka muoyo kimpe?
3. Mpuilu eu neatuambuluishe mushindu kayi?
3 Yehowa udi utuambuluisha bua kutantamena mateyi a Satana a kunyanga kondo ketu ka muoyo. Ku diambuluisha dia Dîyi diende ne bulongolodi buende, Tatuetu wa mu diulu udi utuambila ne: ‘Ke njila eu, endelamu.’ (Yesh. 30:21) Mpuilu eu ng’umue wa ku mishindu idi Yehowa utulombola. Nanku, udilongolole bua kubuela mu mpuilu eu mujima. Uteleje ne ntema yonso, wele meji bua muudi mua kutumikila malu aa. Nuyukidilangane mu dîku bua malu anualonga mu mpuilu. Kutumikila malu atualonga nekutuambuluishe bua kutungunuka ne ‘kuikala ne kondo ka muoyo kimpe,’ bua kubenga kulonda bisankasanka bia mu bulongolodi bua Satana.—1 Pet. 3:16.