‘Uyishe bimpe menemene’
1. Paulo mmutushile tshilejilu kayi tshimpe bua mudimu wa buambi?
1 “Ukumbaje mudimu webe ne muebe muonso.” (2 Tim. 4:5) Kutuadijila ku tshidimu tshia 47 too ne tshia 56, Paulo ukavua muenze ngendu yende isatu ya bumisionere. Ke bua tshinyi wakapesha Timote mubelu eu ne muoyo mujima. Mukanda wa Bienzedi udi uleja misangu ya bungi ivua Paulo ‘muyishe bimpe menemene.’ (Bien. 23:11; 28:23) Mmunyi mutudi mua kumuidikija lelu?
2. Mmunyi mutudi mua kuyisha bimpe menemene patudi tuya ku nzubu ne ku nzubu?
2 Ku nzubu ne nzubu: Bu mutudi tudienzeja bua kuyikila ne bantu batu kabayi banji kumvua lumu luimpe, mbimpe kuya kubatangila mu mêba mashilangane. Bantu balume badi mua kuikala ku nzubu mêba a dilolo anyi mu Disambombo ne mu Dia lumingu. Tudi ne bua kudienzeja bua kuyikila ne muntu ku nzubu yonso, tupinganyina misangu ne misangu bantu badi kabayi ku nzubu. Kadi tuetu katuyi anu tubapeta? Pamuapa kubafundila mukanda anyi kubabikila ku telefone kudi mua kupatula bipeta bimpe.
3. Ndîba kayi diudi mua kuyisha muaba udi bantu ne padi mpunga umueneka?
3 Muaba udi bantu ne padi mpunga umueneka: Batendeledi ba Yehowa lelu badi bamanyisha “meji” malelela kudi bonso badi bateleja. Misangu mikuabu, bitu bienzeka nanku “mu musesu” anyi muaba udi bantu. (Nsu. 1:20, 21) Patudi tuya ku tu midimu tuetu tua buatshia buila, tutuku badisuike bua kuyisha anyi? Tudiku mua kuamba ne: tudi ‘badifile bikole mu mudimu wa dîyi’ anyi? (Bien. 18:5) Biobi nanku, tudi tukumbaja mudimu wetu wa ‘kuyisha bimpe’ menemene.—Bien. 10:42; 17:17; 20:20, 21, 24.
4. Kusambila ne kuelangana meji kudi kutuambuluisha bua kuyisha bimpe mushindu kayi?
4 Kadi, misangu mikuabu bua butekete bua mubidi anyi bua bundu, tudi mua kubenga kuyisha. Bulelela, Yehowa mmumanye ntatu yetu. (Mus. 103:14) Nansha nunku, padi malu a nunku atufikila, tudi mua kumulomba bua atupeshe dikima dia kuakula. (Bien. 4:29, 31) Patudi kabidi tudilongela ne tuelangana meji a malu a mu Dîyi dia Nzambi, netukoleshe dianyisha dietu bua mushinga udi nawu lumu luimpe. (Filip. 3:8) Bualu ebu nebutusake bua kuyisha ne tshisumi.
5. Mmunyi mutudi mua kukumbaja mulayi wa Yoele?
5 Muprofete Yoele wakamanyisha ne: kumpala kua dituku dinene dia Yehowa didi dienza buôwa kuluadi, bantu ba Nzambi bavua ne bua kutungunuka ne kuya, kabavua mua kulekela tshintu nansha tshimue tshibapangisha mua kuyisha to. (Yoe. 2:2, 7-9) Tudifilayiku ne muetu muonso mu mudimu eu utuikala katuyi mua kuenza kabidi.