Teritware webe nkayebe neakuambuluishe
1. Mbimpe kuikala ne teritware webe nkayebe bua tshinyi?
1 Mbimpe kuikala ne teritware webe nkayebe bua tshinyi? Wewe mu tshisumbu tshidi ne teritware munene, udi mua kulomba webe teritware, nangananga eu udi pabuipi nenu. Mukanda wa Bulongolodi udi wamba mu dibeji dia 103 ne: ‘Wewe ne teritware udi pabuipi nebe, neupete mushindu wa kuyisha dîba dionso diudi musue. Udi kabidi mua kuambila mumanyishi mukuabu bua kukufila mu teritware webe.’
2. Pa kumbusha buambi bua mu kasumbu, udi mua kuyisha mu teritware webe mushindu kayi?
2 Bua kuyisha bikondo bikuabu: Wewe ne teritware pabuipi ne muaba uudi wenzela mudimu, udi mua kuyishamu, pamuapa ne mumanyishi mukuabu udi wenzela mudimu pabuipi nebe mu mêba a dikisha anyi kumpala kua kupingana ku nzubu. Wewe ne teritware pabuipi ne muaba uudi musombele, udi mua kuyishamu bimpe dilolo ne bena mu dîku dienu. Wewe kuyi ne mushindu wa kuya mu tshisangilu tshia mudimu wa buambi, mbimpe usambile Yehowa kumpala kua kutuadija kuyisha. (Filip. 4:6) Mbimpe wikale ne dîba dia kuyisha mu teritware webe ne dia kuyisha mu kasumbu kenu ka buambi. Mbimpe kuya mu kasumbu kenu, nangananga mu Disambombo ne Dia lumingu patu bantu ba bungi balua mu tshisangilu tshia buambi.
3. Kuikala ne teritware webe nkayebe kudi ne masanka kayi?
3 Masanka: Wewe ne teritware webe, newikale ne muaba wa kuyisha dîba diudi musue. Udi mua kuyisha mêba a bungi bualu kua kuanji kukeba bua kuya mu tshisangilu tshia buambi. Ebi bidi mua kukuambuluisha bua kulua mpanda-njila muambuluishi anyi wa pa tshibidilu. Bu mudi bantu badi bitaba bua kulonga Bible bikale muaba umue, mbipepele bua kubapinganyina ne kulonga nabu Bible. Bamanyishi ba bungi mbamone ne: kuyisha mu teritware wabu kudi kubambuluisha bua kuibidilangana ne bantu ne kukolesha ditabuja diabu, nangananga bobu benze mudimu bikole mu teritware au kumpala kua kumupingajabu bua bamupeshe bamanyishi bakuabu. Kuyisha mu teritware webe kudiku mua kukuambuluisha wewe ne bena mu dîku diebe bua kuenza mudimu bimpe menemene anyi?—2 Tim. 4:5.