Londayi tshilejilu tshia baprofete: Yona
1. Yona uvua ne ngikadilu mimpe kayi?
1 Pautu uvuluka Yona, tshitu tshikuluila mu mutu ntshinyi? Bamue batu bamumona bu muena buôwa anyi muena lukinu. Kadi mu bulelela, wakaleja didipuekesha, dikima ne lungenyi lua didifila. Tudi mua kuidikija ngikadilu mimpe ya Yona mushindu kayi?—Yak. 5:10.
2. Mmunyi mutudi mua kudipuekesha bu Yona?
2 Didipuekesha: Ku ntuadijilu, Yona wakanji kunyema mudimu uvuabu bamupeshe, kuya muaba mukuabu. Katuena mua kukema to, bualu bena Ashû bavua bamanyike bikole bua tshikisu tshiabu, ke bua tshinyi bakalua kubikila Ninewe ne: ‘musoko udi umatshisha mashi a bantu panshi.’ (Nah. 3:1-3) Nansha nanku, Yehowa wakanyoka Yona; ke yeye kudipuekesha, kuitabaye bua kuenza mudimu pavua Yehowa mumupeshe mpunga bua musangu muibidi. (Nsu. 24:32; Yona 3:1-3) Nansha muvuaye muanji kunyema, wakenza disua dia Yehowa. (Mat. 21:28-31) Nansha tuetu bapete manyoka mu tshisumbu peshi nansha tuetu tuenza mudimu mu teritware mubi, tudiku badisuike bua kuyisha lumu luimpe anyi?
3. Mmishindu kayi ya mudimu webe wa buambi idi ikulomba bua wikale ne dikima ne lungenyi lua didifila?
3 Dikima ne lungenyi lua didifila: Pakamona Yona ne: dipangadika diende dibi divua diteke muoyo wa bendeshi ba mazuwa mu njiwu, wakitaba bua kufua bua bobu bashale ne muoyo. (Yona 1:3, 4, 12) Pakapita matuku, pakavua Yona wenza mudimu mu Ninewe, wakendakana bikole munkatshi mua tshimenga, pamuapa wenda ukeba muaba muimpe uvuaye mua kumanyishila dilumbuluisha dia Yehowa. Bu muprofete eu ne buôwa kavua mua kuenza nanku. Uvua muprofete wa Nzambi uvua ne dikima. (Yona 3:3, 4) Netuambe tshinyi buetu tuetu lelu? Bidi bikengela dikima dia kudi Nzambi bua tuetu kuyisha katuyi ne buôwa padiku buluishi. (Bien. 4:29, 31) Bidi bikengela kuikala kabidi ne lungenyi lua didifila bua kupeta dîba ne kufila bintu bietu mu mudimu wa kuyisha.—Bien. 20:24.
4. Mbimpe tudienzeje bua kuidikija tshilejilu tshimpe tshia baprofete bua tshinyi?
4 Dîba dionso diudi ubala bualu buvua bufikile muprofete kampanda wa Yehowa, bua biobi kukuambuluisha, umone bu ne: bualu ebu mbukufikile wewe. Udiebeje ne: ‘Mvua mua kuikala muenze tshinyi? Mmunyi mundi mua kuidikija ngikadilu yende mimpe?’ (Eb. 6:11, 12) Netukonkonone malongesha makuabu mimpe atudi tupetela kudi baprofete bakuabu bavua balamate Yehowa mu tshiena-bualu tshia buena etshi tshikala tshipatuka mu Mudimu wetu wa Bukalenge.