Bansonga wetu, nudiku nuipatshila majitu anyi?
1. Muanetu wa balume udi nsonga udi mua kutuadija kutumikila mubelu udi mu 1 Timote 3:1 dîba kayi?
1 “Muntu mulume yeye wipatshila . . . , udi ujinga mudimu muimpe.” (1 Tim. 3:1) Mêyi mafundisha ku nyuma wa Nzambi aa adi akankamija bana betu ba balume bua bakumbaje malu malomba bua kupetabu majitu mu tshisumbu. Bua kukumbaja malu malomba, anu pawakola anyi? Mu bulelela, mbimpe kutuadija kuipatshila majitu pautshidi nsonga menemene. Nanku nebakulongeshe mudimu ne neuleje muudi mukumbane bua kukutekabu musadidi wa mudimu pawakola. (1 Tim. 3:10) Biwikala udi nsonga ukadi mutambule, mmunyi muudi mua kuipatshila majitu?
2. Leja mudi nsonga mua kupeta lungenyi lua didifila ne kululeja.
2 Lungenyi lua didifila: Uvuluke ne: kuena wipatshila muanzu kampanda to, kadi udi wipatshila mudimu muimpe. Nanku, wikale ne dijinga dia kuambuluisha bena Kristo nebe. Umue mushindu uudi mua kuenza nanku, nkuelangana meji bua tshilejilu tshimpe tshia Yezu. (Mat. 20:28; Yone 4:6, 7; 13:4, 5) Ulombe Yehowa diambuluisha bua wikale utabalela bantu bakuabu. (1 Kol. 10:24) Udiku mua kuambuluisha bana betu badi balema anyi bakulakaje badi mu tshisumbu anyi? Udiku mudiakaje bua kukosa mashinde anyi kuenza midimu mikuabu ya kulama Nzubu wenu wa Bukalenge ne mankenda anyi? Udiku mua kuenza mudimu wa tshimpitshimpi mu Kalasa ka Mudimu wa Nzambi ku budisuile anyi? Neumone ne: paudi udifila bua kuambuluisha bakuabu, newikale ne disanka dia bungi.—Bien. 20:35.
3. Kuikala mu malanda makole ne Nzambi kudi ne mushinga kayi? Leja muudi mua kuakolesha.
3 Malanda ebe ne Nzambi: Mbitambe buimpe bua musadidi wa mudimu kuikalaye mu malanda mimpe ne Nzambi pamutu pa kuikalaye anu ne dimanya dia pa buadi ne bipedi bia ku tshilelelu nkayabi. Muntu udi ne malanda makole ne Nzambi udi udienzeja bua kumona malu anu mudi Yehowa ne Yezu baamona. (1 Kol. 2:15, 16) Udi uleja “dimuma dia nyuma.” (Gal. 5:22, 23) Mmuambi wa lumu luimpe wa tshisumi udi uteka malu a Bukalenge pa muaba wa kumpala. (Mat. 6:33) Udi mua kupeta ngikadilu ya dimuma dia nyuma wewe ne tshibidilu tshimpe tshia kudilongela. Kudilongela kudi kulomba kabidi kudibadila Bible dituku dionso, kudibadila Tshibumba tshia Nsentedi tshionso ne Réveillez-vous! yonso, ne kulongolola bisangilu ne kubuelamu. (Mus. 1:1, 2; Eb. 10:24, 25) Pavua Paulo ukankamija Timote utshivua nsonga bua kuya kumpala, wakafunda ne: ‘Wikale mudimuke mu dilongesha diebe.’ (1 Tim. 4:15, 16) Udienzeje bikole bua kulongolola midimu idibu bakupesha mu Kalasa ka Mudimu wa Nzambi. Wikale udilongolola bua mudimu wa buambi ne wikale ne tshibidilu tshia kuyisha. Udifundile bipatshila bimpe bu mudi: kulua mpanda-njila, kuenza mudimu ku Betele anyi kuya mu Kalasa ka malu a mu Bible bua bana betu ba balume bajike. Malanda ebe makole ne Nzambe neakuambuluishe bua ‘kunyema majinga a bunsonga.’—2 Tim. 2:22.
4. Kuikala muntu wa kueyemena ne udi ne lulamatu kudi ne mushinga kayi?
4 Muntu wa kueyemena ne udi ne lulamatu: Mu bidimu lukama bia kumpala bapostolo bavua bapeshe bamue bena Kristo bavua ne “lumu luimpe” mudimu wa kuabanyina bantu bavua mu dijinga biakudia. Bidi bimueneka ne: bavua bamanyike bu bantu ba kueyemena ne ba lulamatu. Nanku bapostolo kabavua basamisha mutu bua kumanya ni bavua mua kuenza mudimu au to. Biakabambuluisha bua kudifilabu mu malu makuabu avua ne mushinga wa bungi. (Bien. 6:1-4) Nanku, padibu bakupesha mudimu mu tshisumbu, uwenze ne muoyo mujima. Widikije Noa, bua muvuaye mulonde bimpe menemene bionso bivuabu bamuambile bua kuenza buatu. (Gen. 6:22) Yehowa udi wangata lulamatu luebe ne mushinga wa bungi ne muudi uleja muudi muntu mukole mu nyuma.—1 Kol. 4:2; bala kazubu ka ne: “Dilongesha bakuabu didi dibambuluisha.”
5. Bansonga bena Kristo badi ne bua kuipatshila majitu bua tshinyi?
5 Anu mukavua mulayi wa buprofete muambe, Yehowa udi wendesha mudimu wa kusangisha bantu ne lukasa. (Yesh. 60:22) Patudi tuangata bantu muliyo umue, tshia binayi tshimue tshia bantu aba tshidi tshitambula tshidimu tshionso. Bu mudi bantu bungi nunku bitaba bulelela, bidi bikengela bana betu ba balume badi bakumbane bua kuambula majitu bua kuambuluisha tshisumbu. Nangananga lelu, kudi bia bungi bia kuenza mu mudimu wa Yehowa kupita kuonso eku. (1 Kol. 15:58) Bansonga wetu, nudiku nuipatshila majitu anyi? Biobi nanku, nudi nujinga mudimu muimpe be!
[Lungenyi lunene lua mu dibeji 2]
Bu mudi bantu bungi nunku bitaba bulelela, bidi bikengela bana betu ba balume badi bakumbane bua kuambula majitu bua kuambuluisha tshisumbu
[Kazubu mu dibeji 3]
Dilongesha bakuabu didi dibambuluisha
Bakulu badi bambuluisha bansonga badi bakumbane padibu babapesha midimu ne babaleja tshia kuenza. Mutangidi wa tshijengu kampanda uvua musombe ku tshiakuidi ukankamija mumanyishi kansanga pavua bisangilu bimane kujika. Wakamona ne: kuvua nsonga kampanda muimane ku luseke muaba uvuabu au, ke yeye kumuebeja bua kumanya ni uvua ukeba kumuambila bualu. Nsonga au kumuandamunaye ne: bavua bamupeshe mudimu wa kuteka mankenda ku tshiakuidi panyima pa bisangilu bionso. Baledi bende bakavua bakeba kuya, kadi yeye uvua muindile anu bua kuenza mudimu wende kumpala kua kuyaye. Mutangidi wa tshijengu wakamushila muaba ne disanka. Wakafundila biro wamba ne: “Bakulu ba mu tshisumbu atshi bavua ne tshibidilu tshia kulongesha bansonga badi bakumbane bualu bavua babapesha midimu ya kuenza. Ke bualu kayi, misangu yonso ivuaye uya mu tshisumbu atshi, kabivua bikolela bakulu bua kulombelabu nsonga kampanda bua kuluaye musadidi wa mudimu to.”